Ju je metechani jatsikukuarhiani parachi kʼéri ambe arhini juchaari Kueraajpirini

“PARA ima enga no míteka ambesï uéjki úni, no ma ambe úsïndi sési uérakuni”. I uandakuecha enga primeru siglurhu anapu filosofu ma enga Roma anapueka uandaapka, xarhatasïndiksï ambe ma enga meru ísïika, eskachi jatsiska para jatsikukuarhiani meteechani parachi úni míteni ambe engachi uékajka úni.

Bibliarhuksï jarhasti ejempluecha ima kʼuiripuecheri engaksï jatsikukuarhiapka meteechani. Pori ejemplu, Noé ánchikuarhispti ma sinkuenta uéxurhini ísïi para úni arkani ma “jima enga kuájpikuarhipiringa iámindu imeeri kʼumanchikuarhu anapuechani jingoni”. Ka profeta Moisési seguirispti ‘mintsikani eska Tata Diosï maiamuntapiringa’ (Ebreu 11:​7, 26). Tata Diosï arhispti Josuéni, enga Moisésini jimbo pakarapka, eska andaapiringa Kanaáni anapuechani para pakatani imeecheri echerini (Deuteronomio 3:​21, 22, 28; Josué 12:​7-​24).

Primeru siglurhu, Jesúsiiri uandakuecha enga jindeeka “i ambakiti aianhperakua Diosïiri juramukueri, aianhpinhaati iápuru parhakpinirhu” meru jarhuatapti apostoli Pabluni paraka sánderu marhuakupiringa Tata Diosïni (Mateu 24:14). Tata Jesukristu kánikua uinhaperantapti Pabluni uandakuecha ka jánhaskakuecha jimbo enga íntsaapka, ístu enga arhipka eska mítekuarhipiringa tata Jesukristueri nombrini iámindu nasionicharhu, ka inde ambe úspti eska úpiringa uaxastani uánikua kúnguarhikuechani iámu Asia Menor ka Europa (Ukuecha 9:​15; Kolosasi 1:​23).

Desde iónisïa, Tata Diosï Jeobaeri marhuariichaksï jatsikukuarhiasïndi meteechani ka niárastiksïa andanguani para kʼéri ambe arhinhani Tata Diosï. ¿Nénachi uaa iásï jatsikukuarhiani meteechani? ¿Náki meteenchanchi úpirini jatsikukuarhiani, ka ambe ka ambechi uaa úni parachi niárani ísï uaani?

Kánikua jukaparhakuesti míteni andichisï uéjki úni ambe ma

Para uánikua ambe jimbo uaakachi meteechani jatsikukuarhiani juchaari irekuarhu, parhakpinirhu uánikua kʼuiripuechaksï ísï úsïndi. Joperu, para Tata Diosïiri marhuariicha meteechaksï méntku ménderueniisti eska parhakpini anapuecheeri. Kʼuiripuecheri meteechaksï sánderu sáni jatsikuarhekua ambe jimboesïndi o paraksï kʼéri ambe exenhani o paraksï kánikua uinhapikua jatsini. Nóchi sési úni japiringa engachi uékapiringa kʼéri ambeeni ka uinhapikua jatsini. Meteecha engachi jimbo kʼéri ambe arhijka Tata Diosï Jeobani jindeestiksï ima ambe engachi újka para marhuakuni Tata Diosïni ka ístu engachi orhetku peerajka Reinueri ambeni (Mateu 6:​33). I járhati meteechanchi jatsiasïnga jimbokachi xénchasïnga Tata Diosïni ka kʼuiripuechani, ka jimbokachi uékasïnga kʼéri ambe arhini Tata Diosïni (Mateu 22:​37-​39; 1 Timoteo 4:7).

Engachi meteechani jatsikukuarhiaka para Tata Diosïni marhuakuni, komu sánderu ánchikuarhini para jarhuajpeni o jánguarhintani sánderu sési marhuakuni Tata Diosïni, jatsiskachi para seguru jarhani eskachi no interesi jimbosï ísï úni jaka. Nájkirukachi jánguarhintaaka, ménichanchi no uaaka ísï úni eskachi na uékapiringa, nájkirukaksï sési jauaka. ¿Nénachi uaa jatsikukuarhiani meteechani ka sánderu seguru jarhani eskachi uaaka ísï uaani?

Meru uétarhisïndi mintsita jingoni uékani ísï uáni

Ju je exeni na enga Tata Diosï Jeoba kueraaka iámindu ambe. Enga Tata Diosï kueraani japka ambe ma mándani jurhiatikua: “Niáraspti xatinini ka niáraspti erandeni” (Génesis 1:​5, 8, 13, 19, 23, 31). Enga ueenani jarhengia kueraani ambe ma, sési mítespti ambe enga uékeenga úni. Ka úspti kueraani ambe ma ísï eska ima na uékeenga (Jaŋaskuecha 4:​11). Patriarka Jobu uandaspti eska enga Tata Diosï Jeoba uékajka ambe ma úni, ísï úsïnga (Job 23:13). Tata Diosï Jeoba kánikua sési pʼikuarherapti enga na exepkia “iámindu ambe enga kueraapka” ka uandapti eska “kánikua ambakiti ambeesp[ka]” (Génesis 1:​31).

Engachi uéjka andanguani juchaari meteechani, kánikua jukaparhakuesti eskachi iámu juchaari mintsita jingoni uékaaka ísï úni. ¿Ambejtsïni jarhuataa parachi uékani ísï úni? Nájkiruka Echeri nótki ísï úkata japka eska na uétarhienga jarhani ka nijtu ambe ma jarhani, Tata Diosï Jeoba úsïreendi eranhaskani na enga xarharapinga enga na kʼamarakata japiringuia: kánikua sési jásï ma joiespti, enga úpiringa eska kʼéri ambe arhinhapiringa Tata Diosï. Májkueni, juchajtuchi uaaka sánderu ka sánderu uékani ísï úni eskachi na eratsetini jakaia ka ístu eratsentani na enga xáni sésiuaka jiáni engachi na ísï uaakia. Ísïsï úkuarhinchati Tony, 19 jatiri ma. Ima no méni mirhikuarhispti primeru uelta enga nípka Jeobaeri testiguecheri Betelirhu Europa occidental. Desde ima jurhiatikua, méntkisï kurhamarhikuarhisïreendi de néneepirini para jima irekani ka marhuani. No méni mirhikuarhispti eska úpiringa ísï úni ka seguirispti jánguarhintani para jima marhuani. Eranhaska je na enga xáni tsípipka enga máru uéxurhiniichani ísï tátsekua pʼímarhinhapka para Beteli marhuani.

Imani kʼuiripuecha jingoni kúnguarhini engaksï andanguakia meteechani ístujtsïni uaati jarhuatani parakachi juchajtu májkueni uaaka. Jayson, 30 jatiri ma, no tsitisïreendi aianhpini enga tumbi sapichuepka, joperu enga na uéntapkia eskuela, tsípispti prekursori úkuarhini ka marhuani komu tiempu kompletueri para aianhpini Reinueri ambe. ¿Ambe jarhuataaspi paraka tsitipiringa prekursoriini? Ima uandantasïndi: “Uandontskuarheni erachiicha jingoni engaksï prekursoripka ka imeecha jingoni nirani aianhpini kánikuarini marhuachesti”.

Kánikua jarhuajpesïndi enga ma karaajka meteechani

Eratsekua ma enga no xáni sési kurhangukuarhiaka niárasïndi sési kurhangukuarhini engaksï uandakuecha úrakuarheaka. Salomóni uandaspti eskaksï ambarhati uandakuecha ísïiska eskaksï tʼenajpitarakuecha engaksï kánikua uinhapikua jatsika, o engaksï újka eskachi sési ambe uaaka juchaari irekuarhu (Eclesiastés 12:11). Engaksï uandakuecha karakata pakarajka eratsekuarhu ka mintsitarhuksï niáratspesïndi. Ísï jimbosï Tata Diosï Jeoba juramukuapti Israeli anapu reiichani eskaksï imajkumindu karapiringa kopia ma Leiiri (Deuteronomio 17:18). Ísï jimbo, sési japirindi engachi karaapiringa juchaari meteechani ka ambe engachi eratseni jaka úni para andanguani, ístu lista ma ójkutakuecheri ambe engaksï úpiringa jarhani ka néna engachi uaaka orhepani uérakuani. Ístu, sési japirindi eratseni ambe engachi jatsika para estudiarini, ambechi uétarhinchasïni sánderu sési úni ka náki kʼuiripuechajtsïni úpirini jarhuatani ka apoiarini.

Meteechani jatsikukuarhiani kánikua jarhuataspti paraka pínandikua jatsipiringa Geoffrey, enga uánikua uéxurhiniichani jimbo marhuakia komu prekursori espesiali territoriurhu ma enga iauanisï jaka Asia. Joperu, ma repentku imeeri témba uarhispti. Enga na sáni sési pʼikuarherantapkia, Geoffrey eratsespti meteechani jatsikukurhiani engaksï jarhuatapiringa para ima sési marhuani aianhpikuarhu komu prekursori ma. Enga na karaapkia imeeri meteechani ka enga na kurhakupkia Tata Diosï Jeobani eska jarhuatapiringa, uandaspti eska antede kʼamarani ma kutsï ueenapiringia jorhendaani Biblieri ambe tanimu kʼuiripuechani. Pauani pauani exesïreendi ambe enga xáni úpiringuia, ka mándani diesi jurhiatikuechani exesïreendi ambe enga xáni ueengia. ¿Niáraspi andanguni imeeri metani? Tsípiparini uandantasïndi eska jo, jimboka no solu tanimu kʼuiripuechantku ueenaspka Biblieri ambe jorhendaani, sino, ¡tʼámu!

Sapirhati meteechaktsïni arhisïndi náchi xáni ambe uaa úni

Máru meteechaksï úpirindi ísï xarharani enajkichi no méni uaa andanguani. Tony, imeeri engachi antesi uandakia, eratsesïreendi eska para ima solu tsánharhikua máespka Jeobaeri testiguecheri Betelirhu ma marhuani jimboka no sési ambe úsïreenga ka jimboka nótki itsï atakuarhixapka. Joperu erakuspti ísï irekani eska Tata Diosï Jeoba na uékajka ka imeeri meta jindeespti uaani mójtakukuechani para úni itsï atakuarhini. Enga úpkia ísï úni, jánguarhintaspti para prekursori auksiliari úkuarhini ka tátsekua prekursori regulari, ísï jimbo karhanharhikuspti kalendariurhu káni enga ueenapiringa. Enga na ma tiempu jimbo marhuapkia komu prekursori ma, Beteli marhuani para ima nóteru ísïisptia eska tsánharhikua ma.

Ístujtsïni úpirindi jarhuatani engachi imani meteechani engachi sánderu orhepatini eratseatini jatsiaka arhukuantauaka ka imeechani jatsikukuarhiani engachi no ióni jimbo uaaka ísï úni, jimbokajtsïni jarhuataaka exeni eskachi uaaka uaani imeechani engachi sánderu orhepatini eratseatini jaka andanguani. Méntku exeni jarhani eskachi andanguani jarhasïngia máru meteechani jarhuataatijtsïni parachi sánderu jánguarhintani. Someni kómarhini jarhani Juchaari Tata Diosï Jeobani juchaari meteecheri ambe jimbo jarhuataatijtsïni parachi no jámani máteru meteechani jatsiani o erakuani. Apostoli Pablu pʼímarpispti: ‘Méntku jauena je kómarhini’ (1 Tesalonika 5:17).

Uétarhisïndi sési eratsetini jarhani ka no kuatantani

Nájkirukachi sési exeaka néna engachi jámaaka para juchaari metechani andanguani ka nájkirukachi meru uékaaka ísï úni, ménichanchi no iámu ambe uaaka ísï úni. Eranhaska je na enga xáni no sési pʼikuarherapka Juanu Markusï enga apostoli Pablu no uékapka pájtani imani jingoni segundu biaji misionalirhu (Ukuecha 15:37-40). Enga Markusï i ambe úkuarhinchapka jatsispti para ambakiti ambe jorhenguarhini ka mójtakuni imani metani enga jatsipkia para úni sánderu sési marhuakuni Tata Diosïni. Iámindu ambe xarhatasïndi eska ísïmindu úspka. Sánderu tátsekua, Pablu sési uandaspti Markusïri ambe, ka i úspti tsípikua jingoni marhuani apostoli Pedru jingoni Babilonia (2 Timoteo 4:11; 1 Pedru 5:13). Jamberi sánderu kʼéri kóntperata enga jatsipka jindeesti karani Tata Diosïiri espirituni jimbo Jesúsiiri tsípikueri ka aianhpikueri ambe.

Jamberichi juchajtu ménichani no úka andanguani metechani para Tata Diosïni marhuakuni. Joperu ju je no chkétakukuarhini, ju je exeni ambe engachi úkia sési úni, exeni ménderu nákiiski juchaari meta ka mójtakuni ambe ma enga uétarhiaka. Engaksï ójkutakuecha ambe jauaka, kánikua jukaparhakuesti eskachi sési úraaka juchaari eratsekua ka no kuatantani parachi úni orhepani uérakuani. Jánhaskaati rei Salomóni uandaspti: “Jurajkuku Tata Diosïni Jeobani iámindu ambe engari uaaka, ka ambe engari eratsetini jaka úni sési uéraati” (Proverbios 16:3).

Nájkirukachi jánguarhintaaka andanguani juchaari metechani, ménichani jarhasïndi ambe ma engachi jimbo no újka ísï úni. Por ejemplu, jamberichi no úpiringa andanguani máru meteechani jimbokachi pʼamenchaxaka o jimbokaksï juchaari familiarhu anapuecha uétarhinchajka eskachi jarhuatauaka. Joperu, ju je no mirikuarhini eskachi andakua ma intsïnhaaka enga jindeeka tsípikua para méntkisï, ia sea auandarhu o ixú Echerirhu (Lukasʌ 23:43; Filipusʌ 3:13, 14). ¿Ambechi jatsiski para úni parachi úni intsïnhani i ambe? Apostoli Juanu karasti: “Ima enga újka eska [Tata] Diosï na uékajka méntkisï irekaati” (1 Juanu 2:17). Nájkirukachi ambe ma jimbo no uaaka andanguani juchaari metechani, útasïchi uaaka kánikua “janhanharhi Tata Diosïni enga jurhimbitiika ka ú[ni] ambe enga ima juramujka” (Eclesiastés 12:13). Metecha engaksï jindeeka para Tata Diosïni marhuakuni jarhuataatijtsïni parachi imani ambe úni enga meru ima uékajka. Ísï jimbo, ju je jatsikukuarhiani metechani ka jánguarhintani andanguani parachi ísï úni kʼéri ambe arhini juchaari Kuerajpirini.

[Rekuadruecha]

Meteecha engachi úpiringa jatsikukuarhiani para TataDiosïni marhuakuni

○ Pauani pauani arhintani Bibliani

○ Arhiantani rebistechani Aianhpiri ka ¡Tsínharhi!

○ Sánderu sési kómarhini

○ Xarhataani kualidadichani enga espiritu santu úrpijka

○ Sánderu aianhpini

○ Sánderu sési aianhpini ka jorhentpini

○ Sánderu sési aianhpini telefonu jimbo, máteru nani ísï ka negosiuecharhu