Fiskani Vilato Vinu Vyauzimu Kuti Muchindike Mlengi Winu

“USANGE munthu wakumanya yayi icho wakukhumba kuchita pa umoyo, wakuyegheka waka bweka kuko.” Mazgu agha yikayowoya ni nkhwantha yinyake ya ku Roma cha m’ma 100 C E. Iyo yikang’anamuranga kuti munthu wakwenera kuŵa na vilato kuti vinthu vimwendere makora pa umoyo.

Mu Baibolo muli viyelezgero vinandi chomene vya ŵanthu awo ŵakaŵa na vilato vyauzimu. Nowa “wakapanga chingalaŵa chakuponoskeramo ŵamunyumba yake” kwa vyaka pafupifupi 50. Ntchimi Mozesi ‘yikalaŵisiska pa njombe iyo yizamupokera.’ (Ŵahebere 11:7, 26) Joshuwa uyo wakanjira mu malo mwa Mozesi wakaphalirika ivyo wakeneranga kuchita kuti wakathereske na kupoka charu cha Kenani.—Dotoronome 3:21, 22, 28; Joshuwa 12:7-24.

Mu nyengo ya Ŵakhristu ŵakwambilira, chilato cha mpositole Paulosi chikwenera kuti chikajintha pa mazgu gha Yesu ghakuti “makani ghawemi agha gha Ufumu, ghazamupharazgika mu charu chose chapasi kuti uŵe ukaboni ku mitundu yose.” (Mateyu 24:14) Paulosi wakakhozgeka chomene na uthenga uwo Yesu wakamuphaliranga, mboniwoni izo wakamulongoranga, kweniso uteŵeti uwo wakamupa kuti wakachitire ukaboni vya zina la Yesu ku mitundu yose. Ivi vikawovwira chomene kuti papangike mipingo yinandi ku Asia Minor kweniso Europe.—Milimo 9:15; Ŵakolose 1:23.

Kufuma kale, ŵateŵeti ŵa Yehova ŵakujiŵikira vilato vyauzimu kuti ŵachindike Chiuta wawo. Kasi mazuŵa ghano tingachita wuli kuti tiŵe na vilato vyauzimu? Kasi tingajiŵikira vilato wuli ndipo tingachita wuli kuti tivifiske?

Mukwenera Kuŵa na Maghanoghano Ghakwenelera

Pafupifupi munthu waliyose mu charu, wakuŵa na vilato pa umoyo wake, ndipo para wafiska vilato vyake, charu chikumuwonera panyake. Kweni vilato vyauzimu vikupambana chomene na vilato vya charu. Vilato vinandi ivyo ŵanthu ŵakujiŵikira vikujintha pa usambazi, udindo, nkhongono na kumanyikwa. Kweni ntchakwenelera yayi kuti Mkhristu wajiŵikirenge vilato vyanthena ivi. Kweni vilato ivyo vikuchindika Yehova Chiuta, vikukolerana na kusopa kwithu kweniso Ufumu wake. (Mateyu 6:33) Tikuŵa na vilato ivi chifukwa chakuti tikutemwa Chiuta kweniso ŵazengazgani ŵithu.—Mateyu 22:37-39; 1 Timote 4:7.

Tikwenera kuŵa na maghanoghano ghawemi para tikujiŵikira vilato vyauzimu, ivi vitovwirenge kuti tiŵe na mwaŵi wakuchita vinandi. Kweni nyengo zinyake vingaŵa vyakusuzga kuti tifiske vilato vithu nanga vingaŵa viwemi waka. Kweni kasi tingachita wuli kuti tijiŵikire vilato vyauzimu na kuvifiska?

Tikwenera Kuŵikapo Mtima Chomene

Ghanaghanirani waka umo Yehova wakalengera vinthu. Yehova wakayowoya waka mazgu ndipo “kukaŵa mise ndiposo kukaŵa mulenji,” ndipo wakaŵika mphaka pakati pa usiku na mhanya. (Genizesi 1:5, 8, 13, 19, 23, 31) Kufuma waka pakwamba, Yehova wakamanyanga makora chilato icho wakapangiranga chinthu chilichose. Ndipo Chiuta wakafiska chilato chake pakulenga vinthu. (Chivumbuzi 4:11) Yobu wakalemba kuti “para [Yehova] wakukhumba kuchita chinthu, wakuchita.” (Yobu 23:13) Yehova wakwenera wakakhorwa kuwona “vyose ivyo wakapanga” ndipo wakati “vikaŵa viwemi chomene”!—Genizesi 1:31.

Kuti tifiske vilato vinthu, nase tikwenera kuŵikapo mtima chomene. Kasi ntchivichi chingatovwira kuti tifiske vilato vithu? Nanga ni apo charu chikaŵa chawaka, chambura kanthu, Yehova wakaghanaghaniranga umo charu chizamuwonekera para wamara kuchilenga, ivi vikamupanga uchindami na ntchindi. Nase tingafiska makora vilato vithu para tikughanaghanira chomene pa viwemi ivyo tizamusanga. Ivi ndivyo vikachitikira munyamata munyake wa vyaka 19 zina lake Tony. Iyo wakaluwa yayi umo wakakondwera wakati wawona ofesi ya munthavi ya Ŵakaboni ŵa Yehova iyo yili ku Western Europe. Kufuma waka nyengo yira Tony wakajifumbanga kuti, ‘Kasi umoyo ungaŵa uli usange ningakhala na kuteŵetera ku malo agha?’ Tony wakaleka yayi kughanaghanirapo ndipo wakaŵikapo mtima kuti mpaka wakateŵetereko. Pakati pajumpha vyaka 7 wakachemeka kukateŵetera pa ofesi iyi, ndipo wakakondwa chomene!

Usange tikuchezga na ŵanthu awo ŵali kufiska vilato vyawo vingatovwira kuti nase tiŵikepo mtima na kufiska vilato vithu. Jayson uyo wali na vyaka 30 wakati wakatemwanga yayi kunjira mu uteŵeti apo wakaŵa muwukirano. Kweni wakati wamalizga masambiro ghake ku koleji wakamba kuchita upayiniya. Kasi ntchivichi chikawovwira Jayson kuti wambe kuchita upayiniya? Iyo wakati: “Nkhatemwanga kuchezga na awo ŵakachitanga upayiniya kweniso nkhatemwanga chomene kwenda nawo mu uteŵeti.”

Lembani Vilato Vinu

Kanandi chikuŵa chipusu kufiska vilato vyako para walemba kupambana na para ukuyowoya waka. Solomoni wakati mazgu ghawemi ghali nga nkhanjo iyo yikulongozga pa umoyo. (Mupharazgi 12:11) Para munthu wachita kulemba ivyo wakukhumba kuchita, wakughanaghanirapo chomene. Lekani Yehova wakaphaliranga mathemba gha Israyeli kuti ghalembenge Dango. (Dotoronome 17:18) Ntheura tingachita makora chomene kuti tilembe ivyo tikukumba kuchita na kuŵikapo mtima kuti tivifiske, kweniso tingalembaso ivyo tingachita kuti titonde masuzgo agho ghangaŵapo. Tingachitaso makora kulemba vinthu ivyo tikukhumba kuvimanya makora, maluso agho tikukhumba kuŵa nagho kweniso ŵanthu awo ŵangatovwira kuti tifiske ivyo tikukhumba kuchita.

Geoffrey nayo wakajiŵikira vilato vyauzimu ndipo ivi vikamovwira kuti wachite upayiniya kwa vyaka vinandi ku malo ghakutali uko kukukhumbikwa ŵapharazgi ŵanandi cha ku Asia. Kweni vinthu vikasintha apo muwoli wake wakafwa mwamabuchi. Vinthu vikati vyasintha, Geoffrey wakasankha kulutizga kuchita waka upayiniya. Wakalemba na kulomba kuti para pajumpha mwezi umoza waŵe na masambiro gha Baibolo ghatatu. Zuŵa lililose wakawonangapo ivyo wakalemba ndipo para pajumpha mazuŵa 10 wakawonanga umo wakuchitira. Kasi wakafiska chilato chake? Enya! Paumaliro wa mwezi wakaŵa na masambiro gha Baibolo ghanayi. Ndipo wakakondwa chomene.

Yambani na Kujiŵikira Vilato Vyakanyengo

Pakwamba, vilato vinyake vingawoneka vyakusuzga kuvifiska. Tony, uyo tamuzunura pakwamba wakawonanga kuti vingachitika yayi kuti wakateŵetere pa ofesi ya Ŵakaboni ŵa Yehova. Chifukwa cha umo wakachitiranga vinthu kumasinda, kweniso kuti pa nyengo iyi wakaŵa kuti wandajipeleke kwa Chiuta. Kweni Tony wakasankha kwamba kuchita vinthu mwakukolerana na nthowa za Yehova ndipo wakajiŵikira chilato kuti wabatizike. Wakati wabatizika, wakajiŵikiraso chilato kuti wambe upayiniya wakanyengo kweniso wanyengozose ndipo wakalemba madeti ghakwambira. Wakati wachita upayiniya kwa nyengo yichoko waka, wakawona kuti kukateŵetera ku ofesi ntchilato chakuti wangaleka kufiska yayi.

Nase tingachita makora kwamba na kujiŵikira vilato vyakanyengo kufuma apo ndipo tingajiŵikira vilato vya nyengo yitali. Kwamba na vilato vyakanyengo ndivyo vingatovwira kuti tifiske vilato vya nyengo yitali. Para nyengo zose tikuwona umo tikuchitira mbwenu vitovwirenge kuti tiŵike maghanoghano ghithu ghose ghaŵe pa vilato vithu. Para nyengo zose tikulomba kwa Yehova, watovwirenge kuti tifiske vilato vithu. Mpositole Paulosi wakati “nyengo zose mulombenge.”—1 Ŵatesalonika 5:17.

Mukwenera Kuŵikapo Mtima na Kuzizipizga

Nyengo zinyake nanga tingajiŵikira vilato ivyo tikuwona kuti tingakwaniska, kweni tingatondeka kuvifiska. Msambiri Yohane Mariko wakakhuŵara chomene apo mpositole Paulosi wakaleka kumutora paulendo wake wachiŵiri wa umishonale! (Milimo 15:37-40) Mariko wakasambirapo kanthu ndipo wakasintha vilato vyake kuti wachite uteŵeti wakusazgikira. Paumaliro vikamwendera. Pakati pajumpha nyengo, Paulosi wakamuzunura Mariko ndipo wakaŵa paubwezi wakukhora chomene na mpositole Petrosi ku Babuloni. (2 Timote 4:11; 1 Petrosi 5:13) Wakaŵaso na mwaŵi wakulemba umoyo na uteŵeti wa Yesu.

Nase nyengo zinyake pangaŵa vinthu vinyake ivyo vingatitondeska kufiska vilato vithu vyauzimu. M’malo mwakugongowa na kuleka waka, tikwenera kuweleramo vilato vithu na kusanga nthowa za umo tingavifiskira. Para tasangana na masuzgo, tikwenera kuŵikapo mtima kweniso kuzizipizga. Themba Solomoni ilo likaŵa lavinjeru chomene likati: “Peleka kwa Yehova chose icho ukuchita, ndipo ivyo ukughanaghana vikwenderenge makora.”—Zintharika 16:3.

Nyengo zinyake vyakuchitika pa umoyo vingapangiska kuti tiwonenge kuti tingafiska yayi vilato vinyake. Mwachiyelezgero tingalwara panji tingaŵa na udindo wakusazgikira mu banja ndipo vingapangiska kuti titondeke kufiska vilato vithu. Tingaluwanga yayi kuti icho tose tikukhazga ni umoyo wamuyirayira, kwali pano pa charu chapasi panji kuchanya. (Luka 23:43; Ŵafilipi 3:13, 14) Kasi munthu wangasanga wuli umoyo wamuyirayira? Mpositole Yohane wakati “uyo wakuchita khumbo la Chiuta wakukhalilira muyirayira.” (1 Yohane 2:17) Nangauli tingatondeka kufiska vilato vinyake chifukwa cha umo vinthu viliri kwa ise, kweni tikwenera kulutilira kopa “Chiuta waunenesko na kusunga malango ghake.” (Mupharazgi 12:13) Vilato vyauzimu vikutovwira kuti tilutilire kuchita khumbo la Chiuta. Mphanyi taŵikapo mtima kuŵa na vilato vyauzimu kuti tilumbe Mlengi withu.

[Bokosi]

Vilato Vyauzimu Vyakuti Mughanaghanirepo

○ Kuŵerenga Baibolo zuŵa lililose

○ Kuŵerenga Gongwe la Mulinda na Wukani!

○ Kumanya umo mungalombera malurombo ghawemi

○ Kulongora vipambi vya mzimu

○ Kuchita mauteŵeti ghakusazgikira

○ Kusazgirako luso lwa kusambizga na kupharazga

○ Kusazgirako luso lwa kupharazga pa foni, mwamwaŵi, kweniso ku malo uko kukusangika ŵanthu ŵanandi