Fakaaoga a Fakamoemoega Faka-te-Agaga ke Tavae Atu ei ki Tou Mafuaga

“KAFAI e se iloa ne se tagata a te taulaga vaka e fanatu a ia ki ei, e seai eiloa se matagi e fetaui ‵lei.” Ne fai a pati konei ne se tagata Loma poto i te senitenali muamua telā e fakasino atu ki te ‵tonu o te manatu me ke oko atu ki se koga tonu, e manakogina a fakamoemoega.

E tuku mai i te Tusi Tapu a fakaakoakoga o tino kolā ne fakatoka faka‵lei olotou fakamoemoega. Kāti e ‵tusa mo te 50 tausaga, ne galue ei a Noa o “faite te vaka mō te faka‵saoga o tena kāiga.” A te pelofeta ko Mose “ne kilo ‵tonu atu a ia ki te taui telā ka maua ne ia.” (Epelu 11:7, 26) A Iosua, telā ne sui ne ia a Mose, ne maua ne ia mai te Atua se fakamoemoega ke fakatakavale a te fenua o Kanana.—Teutelonome 3:21, 22, 28; Iosua 12:7-24.

I te senitenali muamua T.A., e mautinoa me ne fakamalosi aka a fakamoemoega faka-te-agaga o te apositolo ko Paulo ne pati a Iesu me i “te tala ‵lei tenei o te Malo ka talai atu ki te lalolagi nofoaki kātoa.” (Mataio 24:14) Ona ko te mea ne maua tonu ne ia a fekau mo fakaasiga mai te Aliki ko Iesu, e aofia i ei a tena tofiga “ke fakailoa atu a [te] igoa [o Iesu] ki fenua fakaa‵tea,” ne fai a Paulo mo fai se mea faigaluega i te faka‵tuga o fakapotopotoga Kelisiano i Asia Foliki mo Eulopa.—Galuega 9:15; Kolose 1:23.

Ao, ke oko foki loa ki tavini a Ieova i aso nei, ne fai ne latou a fakamoemoega ‵lei kae ne fakataunu foki mō te vikiga o te Atua. E mafai pefea o fakatoka ne tatou a fakamoemoega faka-te-agaga i aso nei? Ne a fakamoemoega e mafai o kausaki atu tatou ki ei, kae ne a mea aoga e mafai o fai ke oko atu ki ei?

E Tāua a Pogai ‵Tonu

Kāti e mafai o fakatoka a fakamoemoega i so se feitu o te olaga, kae ko oti ne fai ne te lalolagi tenei a tino ke kausaki atu ki fakamoemoega. Kae ko fakamoemoega faka-te-agaga e se ‵pau mo fakamoemoega faka-te-lalolagi. A pogai tāua mai i tua o fakamoemoega i te lalolagi ko te manako malosi ki koloa mo te fia fai tofi maluga mo se tulaga pule. Ko se faka‵tau eiloa i te ‵se māfai e kausaki atu ki te fakamoemoega ke maua a tulaga pule mo te takutakua! A fakamoemoega kolā e tuku atu i ei a tavaega ki a Ieova te Atua, e fetaui ‵lei eiloa mo te ‵tou tapuakiga ki a ia mo manakoga o te Malo. (Mataio 6:33) A vaegā fakamoemoega penā e māfua mai i te alofa ki te Atua mo tino mo te tapuaki fakamaoni ki te Atua.—Mataio 22:37-39; 1 Timoteo 4:7.

Ke na ‵tonu kae ‵ma a pogai e kausaki atu ei tatou ki fakamoemoega faka-te-agaga, faitalia me ko te momea aka o tauliaga i te taviniga io me ko te gasolo atu ki mua i te feitu faka-te-agaga. Kae i nisi taimi, e se mafai foki o fakataunu a fakamoemoega kolā e māfua mai i pogai ‵tonu. E mafai pefea o fakatoka ne tatou a fakamoemoega kae kausaki atu ki ei?

E ‵Tau o Manako Malosi ki ei

Mafaufau ki te auala ne fakaoti faka‵lei ei ne Ieova te faitega o te iunivesi. Mai i ana pati ne fai atu “ne oko atu ki te afiafi kae oko atu foki ki te taeao,” ne fakamailoga faka‵lei ne Ieova a te taimi ne fakaoti ei te faitega o nisi mea. (Kenese 1:5, 8, 13, 19, 23, 31) I te kamataga o vaitaimi ne faite ei ne ia a mea, ne iloa ‵lei ne ia ana fakamoemoega io me ko mea ke fai i te aso tenā. Kae ne fakataunu eiloa ne te Atua tena fuafuaga ke faite a mea. (Fakaasiga 4:11) “Kafai e manako a [Ieova] o fai se mea, e fai eiloa ne ia,” ko muna a te toeaina mua ko Iopu. (Iopu 23:13) Se mea fakafiafia eiloa ki a Ieova ke lavea atu “ana mea katoa ne faite” kae fai atu “ko oko eiloa i te ‵lei”!—Kenese 1:31.

Ke fakataunu ‵tou fakamoemoega, e ‵tau o ma‵nako malosi tatou ke fai a mea konā. Se a te mea ka fesoasoani mai ke ati aka se manakoga penā? E tiga eiloa ne fai te lalolagi pelā me se vai, ne kilo atu a Ieova ki te fakaotiga o ana galuega—se taemani gali i te vanimonimo telā e tuku atu i ei a vikiga mo te fakaaloalo ki a ia. E penā foki loa, e mafai o fakamalosi aka ‵tou manakoga ke fai a mea kolā e mafai o fai ne tatou mai te mafaufau ki ikuga mo mea aoga mai te faiga o te mea tenā. Tenā loa te mea ne tupu ki a Tony, telā ko 19 ana tausaga. Ne seki puli i a ia tena asiga muamua ki se ofisa lagolago o Molimau a Ieova i Eulopa ki Togala. Mai te taimi tenā, a te fesili telā ne mafaufau faeloa ki ei a Tony ko te, ‘Ka pefea te olaga ke nofo kae tavini atu i se koga penā?’ Ne seki gata te mafaufau o Tony ki ei kae ne taumafai eiloa a ia i te kausaki atu ki ei. Ko oko eiloa i tena fiafia me i nai tausaga mai tua ifo, ne talia a ia ke tavini atu i te ofisa lagolago!

A te ‵tou fesokotakiga mo nisi tino kolā ko oti ne taunu olotou fakamoemoega, e mafai o fakamalosi aka se manakoga ke kausaki atu ki ei. A Jayson, telā ko 30 ana tausaga, ne seki fiafia o kau atu ki te galuega talai i te taimi koi tamaliki talavou ei a ia. Kae mai tua o ana akoga lasaga lua, ne loto finafinau a ia ke kau atu ki te taviniga fakapaenia, kae fai mo fai se tino talai tumau o te Malo. Se a te mea ne fesoasoani atu ke ati aka ne Jayson a te manakoga ke paenia? Ne tali mai a ia: “A te sau‵tala mo nisi tino kolā ne paenia kae ga‵lue fakatasi mo latou i te galuega talai, ne lasi ‵ki te lotou fakamalosiga ki a au.”

E Aoga ke Tusi ki Lalo ‵Tou Fakamoemoega

E mafai o maina ‵lei atu i se manatu māfai e filifili faka‵lei a pati ke fakamatala atu. Ne iloa ne Solomona me e mafai o aoga a pati ‵lei e pelā eiloa me se lakau makaikai telā e takitaki ki ei a pulumakau, i te tukuatuga o takitakiga i te olaga. (Failauga 12:11) Kafai ko tusi ki lalo a pati konā, e mafai ei o faka‵mautakitaki i te mafaufau mo te loto. Kaia ne fakatonu atu ei a Ieova ki tupu o Isalaelu ke tusi eiloa ne latou se ‵kopi o te Tulafono mō latou? (Teutelonome 17:18) Tela la, e ma‵nako tatou ke tusi ki lalo ‵tou fakamoemoega mo auala ke fakataunu faka‵lei, mea faiga‵ta kolā e mafai o fe‵paki mo tatou mo auala ke manumalo i ei. E mafai foki o fesoasoani ke iloa atu a mataupu kolā e ‵poto tatou i ei, atamai kolā e mafai o maua ne tatou, mo tino kolā e mafai o fesoasoani kae ‵lago mai ki a tatou.

A te fakatokaga o fakamoemoega faka-te-agaga ne lasi ‵ki te lotou fesoasoani ki a Geoffrey, se paenia fakapito telā ko leva ne tavini atu i se koga talai ‵mao, i se fenua i Asia. Ne fepaki a ia mo se tulaga faigata i te mate fakapoi o tena avaga. Mai tua o se vaitaimi o fakama‵fuliga, ne fakaiku aka ne Geoffrey ke kau malosi atu a ia ki tena galuega talai, mai te fakatokaga o ana fakamoemoega. Mai tua o te tusiga ne ia ki lalo o ana palani ki se pepa, ne ‵talo atu a ia ke kamata ne ia a akoga faka-te-Tusi Tapu fou e tolu i te fakaotiga o te masina. I aso takitasi, ne mafaufau a ia ki ana galuega kae i taki sefulu o aso, e onoono a ia ki tena gasolo ki mua. E mata, ne taunu tena fakamoemoega? I te taimi ne lipoti mai ne ia ana akoga faka-te-Tusi Tapu e fa, ne mafai o tali mai a ia mo te fiafia ao!

Ke Fakatoka Foki a Tamā Fakamoemoega

E mafai o foliga faigata mai muamua a nisi fakamoemoega. Ki a Tony, telā ne taku atu muamua, a te tavini atu i se ofisa lagolago a Molimau a Ieova, ne foliga mai fua pelā me se moemiti. Ne fai penā ona ko tena olaga ne seki fetaui ‵lei kae ne seki fai foki tena tukuatuga ki te Atua. Kae ne fakaiku aka ne Tony ke fakafetaui tena olaga ki auala o Ieova kae ke kausaki atu ki tena fakamoemoega ke fetaui ‵lei mō te papatisoga. Mai tua o te fakataunuga ne ia o te fakamoemoega tenā, ne taumafai a ia ke paenia lagolago kae paenia tumau, telā ne fakamailoga ne ia i tena kalena a te masina ke kamata i ei. Mai tua o tena tavini atu e pelā me se paenia mō se vaitaimi, ne seki toe fai ei a te tavini atu i te ofisa lagolago e pelā me se fakamoemoega telā e se mafai o kausaki atu ki ei.

E mafai foki o vaevae aka a fakamoemoega ‵lasi ki tamā fakamoemoega. A tamā fakamoemoega e mafai o fakataunu fakavave i te taimi e kausaki atu ei ki fakamoemoega ‵lasi. A te onoono atu faeloa ki te ‵tou gasolo ki mua e ‵tusa mo fakailoga ne fai ne tatou, e mafai o fesoasoani mai ke ‵saga tonu atu tatou ki ei. A te ‵talo atu faeloa ki a Ieova e uiga mo au palani, ka fesoasoani atu ke tumau koe i te kausaki atu ki ei. Ne fakamalosi mai a te apositolo ko Paulo: “‵Talo i taimi katoa.”—1 Tesalonia 5:17.

E Manakogina te Loto ‵Mautakitaki mo te Tumau i ei

Faitalia a ‵tou palani kolā ne fai faka‵lei mo se manakoga malosi ke fakataunu, e mafai o se taunu a nisi fakamoemoega. Kāti ne fanoanoa malosi a te soko ko Ioane Maleko i te taimi ne seki manako a te apositolo ko Paulo o ave a ia i te lua o malaga fakamisionale a Paulo! (Galuega 15:37-40) Ne tauloto a Maleko mai te tulaga tenei kae ne fakamafuli tena fakamoemoega ke uke atu ana mea e fai i te taviniga. Ne fai eiloa a ia penā. Fakamuli ifo, ne fakaasi mai ne Paulo tena fiafia ki a Maleko kae ne maua foki ne ia se fesokotakiga pili mo te apositolo ko Petelu i Papelonia. (2 Timoteo 4:11; 1 Petelu 5:13) Kāti te ‵toe tauliaga sili ne maua ne ia ko te tusiga o se tala fakaosofia e uiga ki te olaga mo te galuega a Iesu.

I te ‵tou kausaki atu ki fakamoemoega faka-te-agaga, e mafai foki o fe‵paki tatou mo nisi mea faiga‵ta. I lō te ‵fiu vave, e ‵tau o toe mafaufau, toe iloilo aka, kae toe fai a nisi fakama‵fuliga. Kafai ne ‵sae aka a tulaga faiga‵ta, e ‵tau mo tatou o kausaki atu ki mua mo te loto ‵mautakitaki kae tumau i ei. Ne fakatalitonu mai a pati konei a te Tupu ko Solomona: “Tuku atu ki a Ieova so se mea e fai ne koe kae ka manuia eiloa au palani.”—Faataoto 16:3.

Kae i nisi taimi, e se fetaui ‵lei a fakanofonofoga ke kausaki atu ki nisi fakamoemoega. E pelā mo te fakamasakisaki io me ko tiute faka-te-kāiga, e mafai o fai ei ke se taunu a nisi fakamoemoega. Ke mo a eiloa ma galo i a tatou a te manatu me i te ‵toe failoga sili ko te ola se-gata-mai—i te lagi io me ko te lalolagi Palataiso. (Luka 23:43; Filipi 3:13, 14) E mafai pefea o maua te mea tenei? A “te tino telā e fai ne ia te loto o te Atua ka tumau eiloa ki te se-gata-mai,” ne tusi mai te apositolo ko Ioane. (1 Ioane 2:17) E tiga eiloa e se mafai o oko atu tatou ki se fakamoemoega e tasi, kae koi mafai eiloa ne tatou o fakaasi atu te “mataku ki te Atua, kae tausi ki ana fakatonuga.” (Failauga 12:13) A fakamoemoega faka-te-agaga e fesoasoani mai ke ‵saga tonu atu tatou ki te faiga o te loto o te Atua. Tela la, ke na fakaaoga ne tatou a mea konā ke tavae atu ei ki te ‵tou Mafuaga.

[Ata]

Fakamoemoega Faka-te-Agaga ke Mafau‵fau ki ei

○ Faitau ki te Tusi Tapu i aso katoa

○ Faitau ki lōmiga takitasi o Te Faleleoleo Maluga mo te Ala Mai!

○ Ke momea aka te ‵lei o au ‵talo

○ Fakaasi atu a fuataga o te agaga

○ Taumafai ke uke atu au mea e fai i te taviniga

○ Ke momea aka tou magoi i te talai mo te akoako atu

○ Ati aka a atamai e pelā mo te talai atu i telefoni, i so se taimi, mo koga ga‵lue