Ayuk bin ya kakʼ ta koʼtantik spasel ta stojol te Jpaswanej kuʼuntike

«TE BARCO te yak ta beel ta mar te ma snaʼ banti ya xkʼot, tojolnax te yak ta beele». Jaʼ ini jaʼ la yal jtul filósofo romano ta sbabial siglo, sok ay bin jamal ya yakʼ ta naʼel: jaʼ te ya skʼan ay bin ya kakʼ ta koʼtantik spasel yuʼun ay swentail-a te jkuxlejaltike.

Ta Biblia ya jtatik ejemploetik yuʼun ants winiketik te ay bin la yakʼ ta yoʼtanik spasel. Jich bitʼil te Noé te jalaj 50 jaʼbil ta spasel jun arca «te banti col soc te machʼatic ay yuʼune». Te j-alwanej Moisés jaʼ bajt ta yoʼtan o jaʼ la yakʼ «sit tey a te [ta] mahtanile» (Hebreos 11:7, 26). Te Dios jaʼ la yakʼbey ta swenta te Josué —te la sjelolin jilel te Moisés— te akʼa yuʼuntay te skʼinal Canaán (Deuteronomio 3:21, 22, 28; Josué 12:7-24).

Ta sbabial siglo, te jpuk-kʼop Pablo bajt ta yoʼtan spasel te bin la yal jilel te Jesús ta swenta te ya «xpuhc ta halel ta swohlol bahlumilal scʼoblal te lec yachʼil cʼop yuʼun te cuentahinel yuʼun Dios» (Mateo 24:14). Te Jesús la yakʼ sba ta ilel ta najalsitil ta stojol te Pablo sok la skʼopon, jaʼ tijbot yoʼtan ta spukel ta alel te sbiil te Jesús «ta stojol jyanlumetic» sok koltaywan ta sjachel bayal congregacionetik ta Asia Menor sok ta Europa (Hechos 9:15; Colosenses 1:23).

Ta bayal jaʼbiletik talel, te j-abatetik yuʼun Dios ay bin lek yakʼoj ta yoʼtanik spasel sok skʼotesojik ta pasel swenta yichʼel ta mukʼ te Diose. ¿Bin nail ya skʼan ya jpastik yuʼun ay bin ya kakʼ ta koʼtantik spasel ta stojol te Jehová ta kʼajkʼal ini? ¿Bintik ya xjuʼ ya jpastik ta stojol, sok bin ya skʼan ya jpastik yuʼun ya jkʼotestik ta pasel?

Mukʼ skʼoplal te bin ya stijbotik koʼtantik

Ta swolol Balumilal bayal bin yakʼoj ta yoʼtanik spasel te ants winiketike, melel bayal bintik ya xjuʼ ta pasel. Pero, te bin ya xjuʼ ya jpastik ta stojol te Jehová ma pajaluk sok te bin ya smulanik spasel te ants winiketike. Te bin baem ta yoʼtanik sleel te ants winiketik jaʼ te kʼulejalil, te mukʼ skʼoplal ya xkʼotik sok te ya yichʼik mukʼ yaʼtelik. Pero, mame jaʼuk ya skʼan ya xbajt ta koʼtantik sleel te joʼotike. Ya kichʼtik ta mukʼ te Jehová te kʼalal ya kakʼ ta koʼtantik abatinel ta stojol sok te ya jletik te Wentainel yuʼune (Mateo 6:33). Te bin ya stij koʼtantik ta spasel jaʼ te skʼuxul koʼtantik ta stojol te Dios sok te ants winiketik (Mateo 22:37-39; 1 Timoteo 4:7).

Te kʼalal ay bin ya kakʼ ta koʼtantik spasel swenta ya x-abatinotikxan ta stojol te Jehová o yuʼun ya jlekubtestikxan te jtaleltik, jaʼ ya skʼan ya stij koʼtantik te skʼuxul koʼtantik ta stojol te Jehová sok te yantike. Manchukme jich-abi, ayniwan ma xjuʼ kuʼuntik skʼotesel ta pasel te bin ya jkʼan ya jpastike. ¿Bin-utʼil ya xjuʼ ya jkʼotestik ta pasel te bin ya jkʼan ya jpastike?

Mukʼ skʼoplal te sok spisil koʼtantik ya jkʼan ya jpastik

Jnop kaʼiytik te bin-utʼil te Jehová la spas te bintik ay ta chʼulchan sok ta Balumilal. La yakʼbey yorail te bintik la spase, sok te jayeb tiempo jalaj ta spasel jujun te bintik la spase la spajbey skʼoplal sok «jun cʼahcʼal» (Génesis 1:5, 8, 13, 19, 23, 31). Te kʼalal la sjach te yaʼtele, snaʼojix-a te bintik ya spas sok te bin-utʼil ya spase. Juʼ yuʼun spasel spisil te bin snopoj-ae (Apocalipsis 4:11). Te Job jich la yal ta stojol te Jehová: «Ya spas te bin ya scʼan yoʼtan stuquel» (Job 23:13). Kʼax tseʼelniwan yoʼtan la yaʼiy sba te Jehová te kʼalal «la yil spisil te bintic la spas» sok la yal te «mero lec cʼoht» (Génesis 1:31).

Teme ay bin ya jkʼan ya jpastik, ya xjuʼ kuʼuntik teme yuʼun-nix ya jkʼantik sok spisil koʼtantik-ae. ¿Bin ya skoltayotik ta skʼanel sok spisil koʼtantik? Te kʼalal ma chajpanbiluk sok jochol-a te Balumilal, te Jehová snopojix ta yoʼtan-a te bin yilel ya xkʼot te kʼalal ya schajpan: jaʼ te yaxnax stʼujbilal ta yolil chʼulchan sok te ya yichʼ albeyel yutsil skʼoplal ta swenta te jaʼ yaʼtel skʼabe. Jaʼnix jich te joʼotike, swenta spisil koʼtantik ya jpastik te bin jnopojtik, ya skʼan ya jnop ta koʼtantik te lekilal ya jtatik o te bin lek ya xlokʼ-a te kʼalal ya jkʼotestik ta pasel. Jaʼ jich la spas te Tony, te 19 yaʼbilal. Maʼyuk bin-ora chʼay ta yoʼtan te bin yaʼiyel la yaʼiy sba te kʼalal la yulaʼtay te Betel yuʼun te testigoetik yuʼun Jehová ta Europa occidental. Jaʼto tal-abi, jajch sjojkʼoybey sba binwan yilel te ya xkuxin sok te ya x-abatin tey-a. Spisil-ora jich la snop sok la spas tulan yuʼun ya x-abatin tey-a. Nopanax awaʼiy te stseʼelil yoʼtan te kʼalal cheʼoxeb jaʼbil ta patil albot te ya xjuʼ ya x-abatin ta Betel.

Teme ya jokintik te machʼatik la skʼotesikix ta pasel te bin snopojik-ae, ya stij koʼtantik yuʼun jich ya jpastik-euk. Te Jayson, te 30 yaʼbilal, ma smulan scholel skʼop Dios-a te kʼalal jchʼielto-ae, pero te kʼalal laj yuʼun te escuela och ta precursor sok bayal ora la schol skʼop Dios. ¿Bin tijbot yoʼtan yuʼun ya x-och ta precursor? Jich ya yal: «Bayal la skoltayon te kʼopojon sok te hermanoetik te precursoretik sok te la jokinlanik ta scholel skʼop Dios».

Ya skoltayotik teme ya jtsʼibaytik te bin ya jkʼan ya jpastik

Te kʼalal ya kaltik te bin ya jnoptik, ya xkʼotxan ta koʼtantik. Te Salomón la yal «te cʼopetic yuʼun te machʼatic ay spʼijil yoʼtanic hich cʼohemic te bin utʼil chʼix» te jaʼ ya skʼan ya yal te ya stojobtesotik ta jkuxlejaltik (Eclesiastés 12:11). Te kʼalal ya yichʼ tsʼibayel te kʼopetike, ya xkʼub jilel ta koʼtantik sok ta jpensartik. Jaʼ yuʼun, te Jehová la yalbey ta mantal te ajwaliletik yuʼun Israel te akʼa slokʼtayik ta tsʼibayel te Ley (Deuteronomio 17:18). Jich yuʼun, jaʼniwan lek te ya jtsʼibaytik te bintik ya jkʼan ya jpastik sok te bin-utʼil ya jpastik, jaʼnix jich ya xjuʼ ya jtsʼibaytik te bintikwan ya xjuʼ ya smakotik sok te bin-utʼil ya jsitintaytik. Jaʼnix jich ya skʼan ya kiltik bintik temaetik ya skʼan ya jnoptik, bintik ya skʼan ya jnoptik spasel sok machʼatik ya xjuʼ ya skoltayotik.

Te Geoffrey, te jaʼ precursor especial te bayalix jaʼbil ya x-abatin ta chʼin lumetik ta Asia, la sta koltayel te kʼalal bayalxan bin la yakʼ ta yoʼtan spasel ta stojol te Jehová. Ta oranax laj te yinam. Jun tiempo ta patil, te Geoffrey la snop te ay bin ya spas yuʼun jaʼ ya xbajt ta yoʼtan te bitʼil ay ta abatinel ta precursor. Nail la stsʼibay ta jun te bin ya skʼan ya spase sok la skʼanbey koltayel te Jehová, tey-abi la yal te ta jun u ya skʼan ya sta oxtul ants winiketik te ya skʼan ya snopik te Bibliae. Jujun kʼajkʼal ya yil te yaʼtel, sok ta jujun lajuneb kʼajkʼal ya yil bin-utʼil ta bael. ¿Juʼbal yuʼun spasel te bin la snope? Sok stseʼelil yoʼtan ya yal te juʼe, melel ¡chantul te machʼatik jajch snojptes ta Biblia!, ma oxtuluknax.

Jpastik nail te bin ma kʼax tulan o ma jal ta pasel

Ayniwan bin ya jkʼan ya jpastik te ma xjuʼ kuʼuntik spasel ya kaʼiytik. Te Tony te la kalbeytikix skʼoplal, skuyoj-a te maʼyuk bin-ora ya xjuʼ ya x-abatin ta Betel yuʼun te testigoetik yuʼun Jehová, melel ma lek-a te skuxlejal sok ma yakʼoj sba ta stojol-a te Diose. Pero la spas tulan te jich ya xkuxin te bitʼil ya smulan te Jehová yuʼun ya yichʼ jaʼ. Tey-abi, och ta precursor auxiliar, ta patil ta precursor regular; pero la stsʼibay ta calendario te bin-ora snopoj ya sjach-ae. Patil te aʼtej ta precursor, la yil te ya xjuʼ ya x-aʼtej ta Betel.

Teme ay bin jnopojtik ya jpastik te tulan o jal ta pasel ya kiltike, te bin ya skoltayotik jaʼ te kʼunkʼun ya jpastik bael. Melel teme ya kiltik te yak ta juʼel kuʼuntike, jich ma xchebaj koʼtantik. Jaʼnix jich ya xjuʼ ya kalbeytik te Jehová te bin jnopoj ya jpastik, jaʼme ya skoltayotik yuʼun ya jkʼotestik ta pasel. Te jpuk-kʼop Pablo jich la yal: «Aʼtelinahic me scʼoponel Dios» (1 Tesalonicenses 5:17).

Mame xchebaj koʼtantik sok jpastikxan tulan

Manchukme ya jchaptik ta lek te bin ya jkʼan ya jpastik sok ya jpastik sok spisil koʼtantik, aynix ma xjuʼ kuʼuntik. Nopanax awaʼiy bin yaʼiyel la yaʼiy sba te Juan Marcos kʼalal ma ikʼotix bael yuʼun te jpuk-kʼop Pablo ta yulaʼtayel te congregacionetik (Hechos 15:37-40). Manchukme la smel yoʼtan, te Marcos la sta ta ilel te ya skʼan ya sjeltay te bin snopoj ya spas teme ya skʼan ya smukʼubtesxan te yaʼtel ta stojol Dios. Jich la spas. Melel ta patil, te Pablo lek kʼopoj ta stojol te Marcos, soknix la smulan sjokinel te jpuk-kʼop Pedro ta Babilonia (2 Timoteo 4:11; 1 Pedro 5:13). Te mukʼul majtanil te la sta te Marcos jaʼ te akʼbot stsʼibay te bin kʼax ta skuxlejal sok te bin-utʼil la schol skʼop Dios te Jesús.

Ayniwan bin ya smakotik jtebuk ta spasel te bin jnopojtik ta stojol te Diose. Pero mame xchebaj koʼtantik, kiltik te bin juʼemix kuʼuntik spasel, jchaʼkiltik te bin jnopojtik ya jpastik sok akʼa jlekubtestikxan te bin yakotik ta spasel. Te kʼalal ay bin ya smakotik, mukʼ skʼoplal te manchuk ya xchebaj koʼtantik sok akʼa jpastikxan tulan. Te pʼijil ajwalil Salomón jich la yal: «Aʼbeya ta scʼab Jehová te bintic yac apas, hich me ya xcʼoht ta pasel te bin chapal awuʼune» (Proverbios 16:3).

Manchukme ya jpastik tulan, ayniwan ma xjuʼ kuʼuntik spasel te bin jnopojtik ta stojol Dios ta skaj tulan chamel o te ya skʼan ya kiltik te jfamiliatik. Pero, mame xchʼay ta koʼtantik te jaʼme mukʼul majtanil te ya jtatik te jkuxlejaltik ta sbajtelkʼinal chikan teme ta chʼulchan o ta nichimal kʼinal (Lucas 23:43; Filipenses 3:13, 14). ¿Bin-utʼil ya jtatik? Te jpuk-kʼop Juan jich la stsʼibay: «Te machʼa ya spas te bin ya scʼan yoʼtan te Diose, sbahtel qʼuinal ya xcuxaj stuquel» (1 Juan 2:17). Manchukme ay ma xjuʼ kuʼuntik spasel te bin jnopojtike, yame xjuʼ ya kichʼtik ta mukʼ te Dios sok te ya jchʼuunbeytik te mantaliletik yuʼune (Eclesiastés 12:13). Te kʼalal ay bin ya kakʼ ta koʼtantik spasel ta stojol te Diose, ya skoltayotik yuʼun jaʼ ya xbajt ta koʼtantik spasbeyel te skʼanojel yoʼtane. Jaʼ yuʼun jpastik tulan ta spasel sok ta stael swenta jich ya kichʼtik ta mukʼ te Jpaswanej kuʼuntike.

[Recuadro]

Te bintik ya xjuʼ ya jpastik

○ Skʼoponel te Biblia ta jujun kʼajkʼal

○ Skʼoponel Te J-ilkʼinal ta toyol sok te ¡Wikʼame asit!

○ Te ya jlekubtestikxan te bitʼil ya jkʼopontik te Diose

○ Te ya kakʼtik ta ilel te sit ya yakʼ te chʼul espíritu

○ Te ya jcholtikxan skʼop Dios

○ Te ya jlekubtestikxan te bitʼil ya jcholtik skʼop Dios sok te bitʼil ya xnojpteswanotik ta Biblia

○ Te yakuk jnoptikxan scholel skʼop Dios ta teléfono, ta negocioetik sok bayuk banti ayotik