Shumisani Zwipikwa Zwa Muya U Itela U Ṋea Musiki Waṋu Vhugala

“ARALI muthu a sa ḓivhi uri u khou ya kha vhuimazwikepe vhufhio, ha vhilaeli nga ha uri muya u khou rwela ngafhi.” Eneo maipfi o ambiwa nga muḓivhi wa pfunzo dza maṱali wa ḓana ḽa u thoma ḽa miṅwaha wa Muroma, a tshi khou sumbedza uri ndi zwa ndeme u vha na zwipikwa u itela u ḓivha hune muthu a khou ya hone.

Bivhili i na tsumbo dza vhathu vhe vha vha vha tshi ḓivha u ḓivhetshela zwipikwa. Noaxe o fhedza miṅwaha i ṱoḓaho u vha ya 50 a tshi khou “fhaṱa gungwa ḽa u tshidza vha nnḓu yawe.” Muporofita Mushe o vha “ó lavhelesa malamba ané a ḓo a wana.” (Vha-Heberu 11:7, 26) Yoshua we a tevhela Mushe, o wana tshipikwa tshe a ṋewa nga Mudzimu tsha u kunda shango ḽa Kanana.—Doiteronomio 3:21, 22, 28; Yoshua 12:7-24.

Zwi tou pfala uri ḓanani ḽa u thoma ḽa miṅwaha C.E., zwipikwa zwa muapostola Paulo zwa muya zwo ṱuṱuwedzwa vhukuma nga maipfi a Yesu ane a ri “mafhungo-maḓifha aya a muvhuso wa ṱaḓulu a ḓo ḓivhadzwa mashangoni oṱhe.” (Mateo 24:14) A tshi ṱuṱuwedzwa nga mulaedza we a vhudzwa wone na mabono e a a vhona kha Murena Yesu, u katela na mushumo wa u ‘isa dzina ḽa [Yesu] phanḓa kha vha nnḓa,’ Paulo o mbo ḓi ita mushumo wa ndeme vhukuma wa u vhumba zwivhidzo zwa Vhakriste kha ḽoṱhe ḽa Asia Minor u swika Yuropa.—Mishumo 9:15; Vha-Kolosa 1:23.

Vhukuma, vhashumeli vha Yehova u bva kale vho vha vha tshi ḓivhetshela zwipikwa nahone vha zwi swikelela u itela u ṋea Mudzimu vhugala. Riṋe ri nga ḓivhetshela hani zwipikwa zwa muya ṋamusi? Ndi zwifhio zwipikwa zwine ra nga ṱoḓa u zwi swikelela, nahone ndi zwiga zwifhio zwa ndeme zwine ra nga zwi dzhia u itela u zwi swikelela?

Zwiṱuṱuwedzi zwo Teaho ndi zwa Ndeme

Zwipikwa zwi nga itwa kha masia maṅwe na maṅwe a vhutshilo, nahone ḽino shango ḽi na vhathu vhane vha ḓivhetshela zwipikwa. Naho zwo ralo, zwipikwa zwa lwa ṱaḓulu, a zwi fani na zwipikwa zwa shango. Vhunzhi ha zwiṱuṱuwedzi zwihulwane zwine zwa vha hone ndi zwa u lwela u ṱoḓou pfuma na u wana vhuimo na maanḓa. U tovhola zwipikwa zwa u ṱoḓou vha na maanḓa na u ṱoḓa vhuimo ha nṱha ndi zwipikwa zwo khakheaho vhukuma! Zwipikwa zwine zwa ṋea Yehova Mudzimu vhugala zwi a tshimbidzana na nḓila ine ra mu rabela ngayo na madzangalelo a Muvhuso. (Mateo 6:33) Zwipikwa zwo raloho zwi itiswa nga lufuno lwa u funa Mudzimu na vhaṅwe nga riṋe, zwi dovha zwa itiswa na nga u ṱoḓa hashu u ḓikumedza tshoṱhe kha Mudzimu.—Mateo 22:37-39; 1 Timotheo 4:7.

U nga ri ri nga vha na zwiṱuṱuwedzi zwo teaho musi ri tshi ḓivhetshela na u tovhola zwipikwa zwa muya, khamusi zwa u engedza vhuḓifhinduleli tshumeloni kana zwa u ita mvelaphanḓa ya muya ya muthu nga eṱhe. Naho zwo ralo, zwipikwa zwo teaho na zwone zwi nga kha ḓi sa ḓadzea nga zwiṅwe zwifhinga. Ri nga ḓivhetshela hani zwipikwa na u ita uri zwi ḓadzee?

Lutamo lwo Khwaṱhaho ndi lwa Ndeme

Ṱhogomelani nḓila ye Yehova a khunyeledza ngayo u sika fhethu hoṱhe. Yehova o ḓivhetshela tshifhinga tsho teaho tshine a fanela u tshi fhedza u itela u khunyeledza tsiko yawe nga maipfi ane a ri: “Ha vha madekwana, ha vha matsheloni.” (Genesi 1:5, 8, 13, 19, 23, 31) Mathomoni a ḓuvha ḽiṅwe na ḽiṅwe ḽa tsiko, o vha a tshi ḓivha tshipikwa tshawe tsha ḽeneḽo ḓuvha. Nahone Mudzimu o ḓadzisa ndivho yawe ya u sika zwithu. (Ndzumbululo 4:11) Musimulalushaka Yobo o ri: “[Yehova] u ita zwine mbilu yawe ya zwi funa.” (Yobo 23:13) Yehova a nga vha o fushea lungafhani musi a tshi vhona “zwoṱhe zwe a ita” nahone a tshi vhona “zwo naka”!—Genesi 1:31.

U itela uri zwipikwa zwashu zwi ḓadzee, na riṋe ri fanela u vha na lutamo lwo khwaṱhaho lwa u zwi ḓadzisa. Ndi mini zwine zwa nga ri thusa uri ri vhe na lutamo lwo khwaṱhaho nga u ralo? Naho shango ḽo vha ḽo vilingana, ḽi si na tshithu khaḽo,  Yehova o vha a tshi kona u vhona zwe ḽa vha ḽi tshi ḓo vha zwone—ḽo vha ḽi tshi ḓo vha tshiṅwe tshithu tsha ndeme tsho nakaho, tshe tsha vha tshi tshi ḓo mu ḓisela vhugala na ṱhonifho. Nga hu fanaho, lutamo lwashu lwa u ḓadzisa zwe ra ḓiimisela zwone lu nga ṱahulelwa nga u elekanya nga ha mvelelo na mbuyelo dza u ḓadzisa tshenetsho tshipikwa. Zwenezwo zwo tshenzhelwa nga Tony a re na miṅwaha ya 19. Ho ngo vhuya a hangwa lutamo lwawe lwa u tou thoma lwa u dalela ofisi ya davhi ḽa Ṱhanzi dza Yehova ngei Yuropa Vhukovhela. U bva tsheetsho Tony o vha a tshi dzulela u ḓivhudzisa u ri: ‘U dzula na u shuma fhethu ho raloho zwi nga vha zwi hani?’ Tony ho ngo vhuya a litsha u humbula nga ha u ya henefho fhethu, nahone a bvela phanḓa u lwela u ḓadzisa tshipikwa tshawe. O vha o takala lungafhani musi nga murahu ha miṅwaha a tshi ṱanganedzwa uri a ḓe a shume kha ḽeneḽo davhi!

U vha na vhukonani na vhathu vho no swikelelaho zwiṅwe zwipikwa zwi nga dovha zwa ita uri na riṋe ri lwele u ḓadzisa zwipikwa zwashu. Jayson ane a vha na miṅwaha ya 30, o vha a sa ḓiphini nga u shuma vhuḓinḓani ha tsimu musi a tshi kha ḓi vha muswa. Fhedzi musi a tshi tou fhedza tshikolo tsha murole wa nṱha, a mbo ḓi dzhenela tshumelo ya vhuvulanḓila nga u fhisea, nahone a mbo ḓi vha muhuweleli wa Muvhuso wa tshifhinga tshoṱhe. Ndi mini zwe zwa thusa Jayson uri a vhe na lutamo lwa u vha muvulanḓila? O fhindula a ri: “U davhidzana na vhaṅwe vhe vha vhuya vha vulanḓila na u shuma navho vhuḓinḓani zwo nkwama nga ho khwaṱhaho.”

U Ṅwala Fhasi Zwipikwa Zwashu zwi nga Thusa

Muhumbulo u sa pfaliho u a pfesesea na u konadzea musi wo tou ambiwa nga maipfi. Salomo o ṱhogomela uri maambiwa a vhaṱali a nga vhulivhisi vhune ha livhisa muthu vhutshiloni. (Muhuweleli 12:11) Musi eneo maipfi o ṅwalwa fhasi, a a kwama vhukuma muhumbulo na mbilu. Ndi ngazwo Yehova o vhudza mahosi a Isiraele uri a ḓi-ṅwalele luṅwalo lwa Mulayo. (Doiteronomio 17:18) Nga zwenezwo, ri nga ṅwala fhasi zwipikwa zwashu na nḓila ine ra nga zwi ḓadzisa ngayo, ro ṅwala zwikhukhulisi zwine ra nga zwi lavhelela na nḓila dza u zwi kunda. Zwi nga dovha zwa vha zwa ndeme u ṱhogomela masia ane ra fanela u vha na nḓivho khao, vhutsila vhune ha ṱoḓea na vhathu vhane vha nga ri thusa na u ri tikedza.

U ḓivhetshela zwipikwa zwa muya zwo khwaṱhisa Geoffrey, ane a vha muvulanḓila o khetheaho wa tshifhinga tshilapfu tsimuni i re thungo mashangoni a ngei Asia. O khauwa mbilu vhukuma musi musadzi wawe a tshi fa zwi songo lavhelelwa. Tshifhingani tsha tshanduko vhutshiloni hawe, Geoffrey o mbo ḓi phetha nga u dzula o farakanea nga vhuḓinḓa hawe ha vhuvulanḓila nga u ḓivhetshela zwipikwa. Nga murahu ha musi o no ṅwala fhasi zwine a khou dzudzanya u zwi ita, o mbo ḓi rabela uri a kone u thoma pfunzo tharu ntswa dza Bivhili mafheloni a ṅwedzi. Ḓuvha ḽiṅwe na ḽiṅwe o vha a tshi vusulusa zwe a zwi swikelela, nahone nga murahu ha maḓuvha a fumi, a ṱolisisa mvelaphanḓa yawe. Naa o swikelela tshipikwa tshawe? O fhindula nga uri ee, ngauri o vhiga pfunzo dza Bivhili nṋa ntswa!

Ivhani na Zwipikwa zwa Tshifhinga Tshipfufhi u Itela u Vhona Mvelaphanḓa

Zwiṅwe zwipikwa zwi nga vhonala zwi tshi konḓa u zwi ḓadzisa. Kha Tony we a bulwa u thomani, u shuma kha davhi ḽa Ṱhanzi dza Yehova zwo vha zwi tshi nga muḽoro. Zwo vha zwo tou ralo nga uri vhutshilo hawe ho vha hu si havhuḓi na luthihi, nahone o vha a sa athu ḓiṋekedza kha Mudzimu. Fhedzi Tony o mbo ḓi phetha nga  u ita uri vhutshilo hawe vhu tendelane na nḓila dza Yehova nahone a zwi ita tshipikwa tshawe uri a fanelee u lovhedzwa. Musi o no swikelela tshenetsho tshipikwa, a ḓivhetshela tshipikwa tsha uri a vhe muvulanḓila a thusaho na u vha muvulanḓila wa tshifhinga tshoṱhe a tshi swaya yeneyo mvelaphanḓa kha khalenda yawe. Nga murahu ha u vulanḓila lwa tshifhinganyana, u shuma kha ofisi ya davhi zwo vha zwi si tsha ḓo nga tshipikwa tshi sa swikelelei.

Zwi nga vha zwavhuḓi uri ri fhandekanye tshipikwa tshashu tshihulwane nga zwipikwa zwa tshifhinga tshipfufhi. Zwipikwa zwine zwa ḓadzea nga u ṱavhanya zwi nga shuma sa zwone zwine zwa ri sumbedza mvelaphanḓa yashu ya u ḓadzisa tshipikwa tshashu tshihulwane. U ṱolisisa mvelaphanḓa yashu misi yoṱhe zwi nga ri thusa uri ri dzule ro sedza phanḓa kha tshipikwa tshashu tshihulwane. U rabela misi yoṱhe kha Yehova nga ha zwe ra dzudzanya u zwi ita, zwi ḓo ri thusa uri ri dzule ro farelela kha ḽeneḽo buḓo. Muapostola Paulo o ṱuṱuwedza a ri: “Ni so ngo litshedza u rabela!”—1 Vha-Thesalonika 5:17.

U Ḓiimisela na u Konḓelela zwi a Ṱoḓea

Hu sa londwi nzudzanyo dzashu dzavhuḓi na lutamo lwo khwaṱhaho lwa u ḓadzisa zwipikwa zwashu, zwiṅwe zwipikwa zwi fhedza zwi songo ḓadzea. Yohane Marko a nga vha o vho o nyabwa lungafhani musi muapostola Paulo a tshi hana u ṱuwa nae lwendoni lwa Paulo lwa vhuvhili lwa vhurumiwa! (Mishumo 15:37-40) Marko o vha a tshi fanela u guda kha honoho u nyabwa na u ita dziṅwe tshanduko kha tshipikwa tshawe u itela tshumelo yo engedzeaho. Zwi vhonala uri Marko o guda yeneyo ngudo. Nga murahu, Marko o ambiwa zwavhuḓi nga Paulo nahone a ḓiphina nga vhukonani havhuḓi na muapostola Petro ngei Babele. (2 Timotheo 4:11; 1 Petro 5:13) Khamusi ndugelo khulwanesa ye a vha nayo yo vha i ya u ṅwala mafhungo o hevhedzwaho a vhutshilo na vhuḓinḓa ha Yesu.

Musi ri tshi khou tovhola zwipikwa zwa muya, na riṋe ri nga vha na zwithithisi. Nṱhani ha uri ri nyabwe, ri fanela u vusulusa, u ṱolisisa zwavhuḓi tshipikwa tshashu na u ita dziṅwe tshanduko. Musi hu tshi vha na zwikhukhulisi, ri fanela u ita vhuḓidini ho engedzeaho u itela u ita mvelaphanḓa ro ḓiimisela na u konḓelela. Khosi Salomo u khwaṱhisedza nga maipfi ane a ri: “Kumedzela Yehova mishumo yau yoṱhe, uri hu vulee zwine wa zwi elekanya.”—Mirero 16:3.

Naho zwo ralo, zwiimo zwi nga ita uri u tovhola zwiṅwe zwipikwa zwi vhonale zwi si nga si konadzee. Sa tsumbo, mutakalo u si wavhuḓi kana vhuḓifhinduleli ha muṱa zwi nga kha ḓiita uri ri sa kone u swikelela zwipikwa zwashu. Ri songo vhuya ra hangwa uri tshiphuga tshee ra sedza phanḓa khatsho ndi vhutshilo vhu sa fheli—ṱaḓulu kana paradisoni kha ḽifhasi. (Luka 23:43; Vha-Filipi 3:13, 14) Zwenezwi zwi nga konadzea hani? Muapostola Yohane o ṅwala a ri: “Ane a ita zwiné Khotsi a zwi funa u ḓi dzula e hone na lini na lini.” (1 Yohane 2:17) Naho zwiimo zwashu zwi tshi nga kha ḓiita uri ri sa kone u ḓadzisa zwiṅwe zwa zwipikwa zwashu, ri nga kona u ‘ofha Mudzimu na u tevhedza milayo yawe.’ (Muhuweleli 12:13) Zwipikwa zwashu zwa muya zwi ri thusa uri ri dzule ro sedza phanḓa kha u ita zwine Mudzimu a zwi funa. Nga zwenezwo kha ri zwi shumise u itela u ṋea Musiki washu vhugala.

[Bogisi kha siaṱari 22]

Zwipikwa zwa Muya Zwine ra nga zwi Ṱhogomela

○ U vhala Bivhili ḓuvha ḽiṅwe na ḽiṅwe

○ U vhala khandiso iṅwe na iṅwe ya Tshiingamo na Awake!

○ U khwinisa nḓila ine ra rabela ngayo

○ U sumbedza zwiaṋwiwa zwa muya

○ U swikelela tshumelo yo engedzeaho

○ U vha na mafulufulu kha mushumo wa u huwelela na wa u funza

○ U vha na vhutsila ha u ṱanziela nga luṱingo, u ṱanziela lu songo dzudzanywaho, na kha vhoramabindu