Pensa in quel che ancora te pol far par darghe glòria al Creador

“QUANDO un omo nte un barco no’l sà par ndove el va, no importa de ndove el vento el vien.” Chi che ga parlà questo l’è stà un filòsofo de Roma del primo sècolo. Quel che lu el ga dito l’è una verità: par saver ndove ndar ne toca gaver ogetivi.

La Bìblia la parla de persone che le ga fato ancora de pi par Geovà, o sia, le gavea ogetivi. Par esémpio, Noè el ga laorà intorno de 50 ani par far su “una arca par la salvassion dela so fameia”. Moisè “el vardea atento par el pagamento dela so ricompensa”. (Ebrei 11:7, 26) Giosuè el ga ricevesto un laoro de Geovà che l’era de ndar rento e ciapar la tera de Canaan. — Deuteronómio 3:21, 22, 28; Giosuè 12:7-24.

Gesù el ga dito che le ‘bone notìssie le saria predicade in tuta la tera’. (Mateo 24:14) Nel primo sècolo, quel che Gesù el ga dito el ga motivà el apòstolo Paolo a far ancora de pi par Geovà. Par via de messagi e vision che el ga ricevesto de Gesù, lu el ga ‘parlà de Gesù ale altre nassion’ e el ga giutà far congregassion nela Àsia Minor e anca nela Europa. — Ati 9:15; Colossensi 1:23.

I servi de Geovà sempre i ga volesto far ancora de pi par lu par darghe glòria. E noantri? Come podemo far ancora de pi par Geovà? Che ogetivi podemo gaver? E cossa podemo far par rivarghe?

L’è importante gaver la motivassion giusta

Le persone che no le serve a Geovà le ga ogetivi nela vita, come restar siore e gaver poder. Questo l’è un grando sbàlio. Ma quei che i serve a Dio i vol far de pi par lu e i ga ogetivi che i ze relassionadi cola so adorassion. I vol darghe glòria a Dio par meso de quel che i fà par el Regno. (Mateo 6:33) I fà cossita parché i ama a Dio e al pròssimo, e i ga come ogetivo adorar a Dio. — Mateo 22:37-39; 1 Timòteo 4:7.

Quando ndemo in serca de far ancora de pi par Geovà, gaver privilegi o esser persone meio, la nostra motivassion la ga de esser giusta. Ma anca se ghemo la motivassion giusta, gnanca sempre semo boni de rivarghe ai nostri ogetivi. Alora, come podemo gaver ogetivi e esser boni de rivarghe?

L’è importante gaver voia de far ancora de pi par Geovà

Pénseghe sora in come Geovà el ga creà el Universo. Le parole “la ze vegnesta la sera e la ze vegnesta la matina” le mostra che Geovà el gavea belche dessidio quel che el ndaria crear. (Génesi 1:5, 8, 13, 19, 23, 31) Quando el scominsiea a crear, lu el savea tanto ben qual che l’era el so ogetivo par cada toco de tempo. E Dio l’è stà bon de far quel che el gavea pensà. (Apocalisse 4:11) Giò el ga dito che tuto quel che Geovà el vol far lu el fà. (Giò 23:13) Sicuro che Geovà l’è restà tanto contento de veder tuto quel che el gavea fato. Par quela che lu el ga dito che “tuto l’era tanto bon”! — Génesi 1:31.

Par rivarghe ai nostri ogetivi, anca noantri ghemo de gaver tanta voia. Ma come gaverla? Ancora quando no ghen’era gnente nela Tera, Geovà l’era bon de veder quel che vegnaria fora: un bel posto che ghe daria glòria e onor. Dela stessa maniera, par noantri gaver voia de rivar ai nostri ogetivi, ghemo de pensar sora i resultadi e le benedission che gavaremo. Ga sucedesto una roba cossita con Tony, de 19 ani. Lu mai se ga desmentegà dela prima volta che el ga visità el Betel dela Europa. De quel giorno avanti, lu sempre el se domandea: ‘Come saria viver nte un posto cossita?’ Tony mai se ga fermà de pensar che quel che el volea podaria suceder. Lu el ga seità sforsarse par rivarghe a questo ogetivo. Ani dopo, lu l’è restà pròpio contento quando la so petission la ze stata aprovada par laorar in Betel!

Nantra roba che pol giutarne a gaver voia de rivar ai nostri ogetivi l’è star insieme de persone che le ze state bone de far ancora de pi par Geovà. Jayson, che el ga 30 ani, no’l ghe piasea de ndar ala predicassion quando l’era gióveno. Ma dopo che el ga finio la scola, lu el ga scominsià come pioniero regolar. Cossa che ga giutà Jayson a gaver una granda voia de esser pioniero? Lu el ga dito: “Parlar con altri che belche i era pionieri e laorar con lori nela predicassion me ga giutà a gaver una granda voia de esserlo anca mi.”

Meter par scrito i nostri ogetivi pol giutarne

Se te meti par scrito le to idee sarà pi fàcile de capirle. Salomon el ga dito che le parole de sabedoria pol giutarne a far bone dessision. (Eclesiasti 12:11) Se te meti par scrito te pensarè de pi nei to ogetivi. L’è par quela che Geovà el ga mandà i rè de Israel far una còpia dela Lege. (Deuteronómio 17:18) Alora, saria bon meter par scrito quel che volemo far par Geovà e quel che ndaremo far par esser boni. Anca podemo far una lista dele dificoltà che podemo gaver e come darghene fora con lore. Nantra roba che podemo far l’è saver quel che ghemo de imparar, le abilità che ne toca gaver e le persone che le pol giutarne.

Geoffrey el ga laorà par un tempo come pioniero spessial nela Àsia. Gaver el ogetivo de far ancora de pi par Geovà lo ga giutà a sentirse calmo. Ma par desgràssia, de colpo la so dona la ze morta. Ghe ga ocoresto un tempo par meter tuto aposto nela so vita. Dopo, lu el ga dessidio gaver ogetivi che ndaria giutarlo a seitar ocupà nela predicassion. Lu el ga scrito nte un papel quel che lu el volea far e el ga fato orassion par esser bon de gaver tre studi dela Bìblia fin el fin del mese. Tuti i giorni lu el vardea quel che el gavea scrito e a cada diese giorni lu el vedea se l’era ndato avanti o nò. Sarà che lu l’è stà bon de rivarghe al so ogetivo? Si. Geoffrey l’è restà tanto contento parché lu l’è stà bon de gaver quatro studi dela Bìblia!

Scomìnsia con pìcoli ogetivi

Pol esser fadiga far tante robe che volemo. Tony, che ghemo parlà vanti, el volea laorar in Betel. Par lu, questo parea esser sol un insogno. El pensea cossita parché el gavea de far cambiamenti nela so vita par obedir a Geovà e no’l se gavea gnancora dedicà a Dio. Alora, Tony el ga dessidio cambiar par far la volontà de Geovà e el ga bio el ogetivo de batesarse. Dopo che l’è stà bon de farlo, lu el ga bio el ogetivo de esser pioniero aussiliar e anca regolar. Lu el ga metesto par scrito el giorno che el ndaria scominsiar a far queste robe. Dopo de un tempo, Tony el ga sentio che el podea gaver el ogetivo de laorar in Betel.

Anca noantri podemo capir quai che i ze i nostri ogetivi pìcoli e i nostri ogetivi pi grandi. Intanto che rivemo ai pìcoli, vedemo che semo boni de rivarghe a quei pi grandi. Pensar sempre nei ogetivi che semo belche rivà e pregar sempre par domandar el aiuto de Geovà, ne giutarà a no desister de rivar ai nostri ogetivi. El apòstolo Paolo el ne ga dato questo consìlio: “Preghé sempre”. — 1 Tessalonissensi 5:17.

No stà mia desister, ma seita sforsarte

Una bona programassion e una granda voia ndarà giutarne a far ancora de pi par Geovà. Ma ghen’è ogetivi che l’è fadiga de rivarghe. Podemo imaginar come el dissìpolo Gioani Marco l’è restà disgustà quando el apòstolo Paolo no’l ga volesto menarlo insieme nel so secondo viaio missionàrio. (Ati 15:37-40) Marco el ga imparà che le robe no le saria sempre come lu el volea e che el gavea de cambiar i so ogetivi par far de pi par Geovà. E lu el ga fato pròpio cossita. Pi tardi Paolo el ga parlà ben de Marco, e Marco el ga laorà insieme col apòstolo Piero in Babilònia. (2 Timòteo 4:11; 1 Piero 5:13) Marco el ga bio anca un grando privilègio: Geovà lo ga doperà par scriver un Vangelo sora la vita e la predicassion de Gesù.

Intanto che proemo far de pi par Geovà, pol esser che qualcossa ne intrighe. Ma, invesse de desister, podemo pensar se semo pròpio boni de rivarghe ai ogetivi. Fursi gavaremo de cambiar e seitar sforsarse. El rè Salomon el ne assa sicuri de questa roba: “Fìdaghe a Geovà tuto quel che te fè, e i to progeti i ndarà ben”. — Proverbi 16:3.

Ghen sarà situassion che fursi no le ne assarà far de pi par Geovà. Par esémpio, problemi de salute e tender dela nostra fameia. Ma no ghemo de desmentegarse del nostro ogetivo pi importante: viver par sempre. (Luca 23:43; Filipensi 3:13, 14) Ma come che podemo gaver la vita eterna? El apòstolo Gioani el ga scrito: “Quel che el fà quel che Dio el vol el viverà par sempre”. (1 Gioani 2:17) Stesso che no semo boni de far ancora de pi par Geovà adesso, podemo seitar a ‘temer el vero Dio e obedir ai so comandamenti’. (Eclesiasti 12:13) I nostri ogetivi i ne giutarà a seitar meter Geovà in primo posto nela nostra vita. Alora, seitemo pensar in quel che ancora podemo far par dar glòria al Creador.

[Quadro]

Ogetivi che podemo gaver

○ Leder la Bìblia tuti i giorni

○ Leder tuti i artìcoli dela Sentinela e Despertai!

○ Far meio le nostre orassion

○ Gaver le qualità del fruto del spìrito

○ Sforsarse par far altri laori par Geovà

○ Predicar e insegnar meio

○ Gaver abilità quando predichemo par telèfono, nel comèrsio e intanto che semo drio far altre robe