Gamita an Espirituwal nga mga Tumong ha Paghimaya ha Imo Maglalarang

“KON an usa nga tawo diri maaram kon ano nga pantalan an iya duduongan, an direksyon han hangin diri importante para ha iya.” Ini nga mga pulong, nga gintatagad nga ginsiring han usa nga Romano nga pilosopo han siyahan nga siglo, nagpapatin-aw han pagkatotoo nga basi magkaada hin direksyon an kinabuhi, importante an mga tumong.

An Biblia nagtatagana hin mga ehemplo han mga indibiduwal nga naghimo gud hin mga tumong. Nagtrabaho hi Noe hin mga 50 ka tuig, “ginhimo . . . an arka ha pagluwas ha iya panimalay.” Hi propeta Moises “naglalaom han bayad han balos.” (Hebreo 11:7, 26) An sumaliwan kan Moises nga hi Josue, kinarawat han hatag han Dios nga tumong nga sakupon an tuna han Kanaan.—Deuteronomio 3:21, 22, 28; Josue 12:7-24.

Ha siyahan nga siglo K.P., an espirituwal nga mga tumong ni apostol Pablo waray ruhaduha nga naimpluwensyahan gud han mga pulong ni Jesus nga “ini nga maopay nga sumat han ginhadian igwawali ha bug-os nga kalibotan.” (Mateo 24:14) Tungod kay nadasig han personal nga mga mensahe ngan mga bisyon tikang ha Ginoo nga hi Jesus, upod na an toka ha ‘pagdara han ngaran ni Jesus ha atubangan han mga Hentil,’ hi Pablo nagkaada importante nga bahin ha pag-organisa hin damu nga Kristiano nga mga kongregasyon ha Asia Minor ngan ha Europa.—Buhat 9:15; Kolosas 1:23.

Oo, an mga surugoon ni Jehova ha bug-os nga kasaysayan nagkaada pirme mag-opay nga mga tumong ngan nagtuman hito, para ha himaya han Dios. Paonan-o kita yana makakahimo hin espirituwal nga mga tumong? Ano nga mga tumong an mahimo naton pangalimbasogan nga makab-ot, ngan ano nga praktikal nga mga pitad an mahihimo naton basi makab-ot ito?

Importante an Husto nga mga Motibo

Mahimo magkaada mga tumong ha haros ngatanan nga bahin han kinabuhi, ngan may-ada liwat mga tawo dinhi hini nga kalibotan nga naghihimo gud hin mga tumong. Kondi, an teokratiko nga mga tumong diri pariho ha kalibotanon nga mga ambisyon. An nangunguna nga mga motibo ha luyo han damu nga mga tumong ha kalibotan amo an sobra nga paghingyap hin bahandi ngan an diri-matagbaw nga pag-ungara hin katungdanan ngan gahum. Sayop gud an pangalimbasog nga kab-uton an tumong nga magkaada gahum ngan kabantogan! An mga tumong nga naghahatag hin himaya kan Jehova nga Dios direkta nga may kalabotan ha aton pagsingba ha iya ngan ha aton pagsuporta ha Ginhadian. (Mateo 6:33) An hinungdan hito nga mga tumong amo an gugma ha Dios ngan ha igkasi-tawo ngan tungod kay katuyoan nira an pagkaada diosnon nga debosyon.—Mateo 22:37-39; 1 Timoteo 4:7.

Hinaot magin putli an aton mga motibo samtang naghihimo ngan nangangalimbasog kita nga makab-ot an espirituwal nga mga tumong, para man ito ha dugang nga mga pribilehiyo ha pag-alagad o ha paghimo hin personal nga pag-uswag ha espirituwal. Bisan pa hini, may-ada mga tumong nga naaghat han husto nga motibo nga napapakyas gihapon. Paonan-o kita makakahimo hin mga tumong ngan mapauswag an posibilidad nga matuman ito?

Kinahanglan an Marig-on nga Hingyap

Tagda kon paonan-o gintuman ni Jehova an paglarang ha uniberso. Pinaagi han mga pulong nga “nagkaada kakurulpon ngan nagkaada kaagahon,” gintigamnan ni Jehova an sunod-sunod nga mga peryodo han paglarang. (Genesis 1:5, 8, 13, 19, 23, 31) Ha tinikangan han tagsa nga peryodo han panahon ha paglarang, maaram gud hiya han iya tumong, o inuungara, para hito nga adlaw. Ngan gintuman han Dios an iya katuyoan ha paglarang. (Pahayag 4:11) “Kon ano an inuungara han [kan Jehova] kalag, bisan ito iya bubuhaton,” siring han patriarka nga hi Job. (Job 23:13) Sigurado nga makapatagbaw gud para kan Jehova nga makita an “ngatanan nga iya ginhimo” ngan sumiring nga ito “duro hin kaopay”!—Genesis 1:31.

 Basi matuman an aton mga tumong, kinahanglan liwat magkaada kita marig-on nga hingyap nga makab-ot ito. Ano an mabulig ha aton nga mapatubo an sugad nga duro nga hingyap? Bisan han panahon nga an tuna waray pamayhon ngan waray sulod, abanse nga nakikita na ni Jehova an resulta—usa nga maopay pagkit-on nga hiyas ha kawanangan, nga nagdadara hin himaya ngan dungog ha iya. Ha pariho nga paagi, mapapatubo an aton hingyap nga tumanon an aton karuyag buhaton pinaagi ha pagpamalandong ha mga resulta ngan mga kapulsanan han pagkab-ot hito nga tumong. Ito an eksperyensya han 19-anyos nga hi Tony. Waray gud niya hingalimti an iya siyahan nga impresyon han iya pagbisita ha usa nga sanga nga opisina han mga Saksi ni Jehova ha Weste nga Europa. Tikang hito nga panahon padayon, an pakiana nga ginhinunahuna ni Tony amo ini, ‘Maano daw la an pag-ukoy ngan pag-alagad ha lugar nga pariho hito?’ Waray gud umundang hi Tony ha paghinunahuna mahitungod hito nga posibilidad, ngan padayon nga nangalimbasog hiya nga makab-ot ito. Nalipay gud hiya han naaprobahan an iya aplikasyon ha pag-alagad ha sanga nga opisina paglabay hin pipira ka mga tuig!

An aton pakig-upod ha iba nga nakakab-ot na hin usa nga tumong makakaaghat liwat ha aton nga maghingyap nga makab-ot ito. Hi Jayson, nga 30 anyos, waray maruyag ha pakigbahin ha ministeryo ha kanataran han tinedyer pa hiya. Kondi han matapos hiya ha high school, nagpayunir dayon hiya, salit nagin bug-os-panahon nga parasamwak han Ginhadian. Ano an nakabulig kan Jayson nga mapatubo an hingyap ha pagpayunir? Hiya binaton: “An pakiistorya ha iba nga nagpapayunir ngan an pagbuhat upod ha ira ha ministeryo nakaimpluwensya gud ha akon.”

Nakakabulig an Pagsurat han Aton mga Tumong

An diri-matin-aw nga ideya nagigin matin-aw ngan klaro kon aton iginpapahayag ito pinaagi han mga pulong. Naobserbahan ni Salomon nga an husto nga mga pulong mahimo magin gamhanan pariho hin mga tiunay, ha paghatag hin direksyon ha kinabuhi. (Eklesiastes 12:11) Kon iginsusurat ito nga mga pulong, naisisilsil gud ito ha hunahuna ngan kasingkasing. May iba pa ba nga hinungdan kon kay ano nga ginsugo ni Jehova an mga hadi han Israel nga maghimo hin sinurat nga kopya han Balaud? (Deuteronomio 17:18) Salit bangin karuyag naton isurat an aton mga tumong ngan an pamaagi ha pagkab-ot hito, nga iginsusurat an mga ulang nga aton ginlalaoman ngan an mga paagi ha paglampos hito. Mapulsanon liwat an pagkilala han mga butang nga kinahanglan naton hibaroan, an mga kaabtik nga kinahanglan naton pagtag-iyahon, ngan an mga indibiduwal nga makakabulig ngan makakasuporta ha aton.

An paghimo hin espirituwal nga mga tumong nagkaada makapakalma nga epekto kan Geoffrey, usa nga maiha na nga espesyal nga payunir ha nabubulag nga teritoryo ha usa nga nasud ha Asia. Makasurubo, diri linalaoman nga namatay an iya asawa. Katapos han peryodo han pagpahiuyon, nagdesisyon hi Geoffrey nga magin okupado gud ha iya ministeryo sugad nga payunir pinaagi ha pagkaada mga tumong. Katapos isurat an iya mga plano, mainampoon nga ginhimo niya an tumong nga magtikang hin tulo nga bag-o nga pag-aram ha Biblia ha kataposan han bulan. Kada adlaw, iya ginrepaso an iya nabuhat, ngan kada napulo ka adlaw, iya gin-usisa an iya pag-uswag. Nakab-ot ba niya an iya tumong? Pinaagi han iya pagreport hin upat nga bag-o nga pag-aram ha Biblia, malipayon nga nabaton niya ito nga pakiana hin oo!

Himoa nga mga Tigaman an mga Tumong nga Mahimo Matuman ha Sulod hin Halipot nga Panahon

May-ada mga tumong nga baga hin makuri hinduro makab-ot ha tinikangan. Para kan Tony, nga gin-unabi kanina, an pag-alagad ha sanga nga opisina han mga Saksi ni Jehova baga hin usa nga inop. Tungod ito kay diri maopay an estilo han pagkinabuhi hadto, ngan waray pa ngani hiya  magdedikar ngadto ha Dios. Kondi nagdesisyon hi Tony nga ipahiuyon an iya kinabuhi ha mga paagi ni Jehova ngan ginhimo niya nga tumong nga magin kuwalipikado para ha bawtismo. Katapos makab-ot ito nga tumong, nagin tumong niya nga mag-auxiliary payunir ngan mag-regular payunir, ngan ginmarkahan niya ha iya kalendaryo an mga petsa nga iya ginplanohan para ha pag-auxiliary ngan ha pagregular payunir. Katapos niya magpayunir ha sulod hin pipira ka panahon, an pag-alagad ha sanga nga opisina baga hin posible na matuman nga tumong.

Maopay liwat nga bahinon naton an aton mga tumong nga maiha makab-ot ngadto ha pipira nga mga tumong nga mahimo matuman ha sulod hin halipot nga panahon. An mga tumong nga masayon matuman mahimo magin mga tigaman han aton natutuman samtang nangangalimbasog kita nga makab-ot an mga tumong nga maiha makab-ot. An regular nga pagrepaso han aton pag-uswag may kalabotan ha sugad nga mga tigaman makakabulig ha aton ha pagtipig han aton hunahuna nga nakasentro. An pauroutro nga pag-ampo kan Jehova mahitungod han aton mga plano mabulig liwat ha aton nga magpabilin ha tumong. ‘Mag-ampo ha waray udong-udong,’ nagsagdon hi apostol Pablo.—1 Tesalonika 5:17.

Kinahanglanon an Determinasyon Ngan Pagkamapinadayunon

Bisan pa han pagkaada naton hin mga plano nga ginhunahuna hin maopay ngan hin marig-on nga hingyap ha pagtuman hito, nagpapabilin nga imposible an pipira nga mga tumong. Sigurado nga inabat gud hin kapakyasan an disipulo nga hi Juan Markos han waray maruyag hi apostol Pablo nga ig-upod hiya ha ikaduha nga pagbiyahe ni Pablo sugad nga misyonero! (Buhat 15:37-40) Kinahanglan mahibaro hin leksyon hi Markos tikang hini nga kapakyasan ngan ipahiuyon an iya tumong para ha dugang nga pag-alagad. Matin-aw nga nahibaro gud hiya hin leksyon. Ha urhi, positibo nga gin-unabi hi Markos ni Pablo ngan nagpahimulos hin duok nga pakig-upod kan apostol Pedro ha Babilonya. (2 Timoteo 4:11; 1 Pedro 5:13) Bangin an iya pinakadaku nga pribilehiyo amo an pagsurat hin usa nga giniyahan nga asoy mahitungod han kinabuhi ngan ministeryo ni Jesus.

Ha aton pangalimbasog nga makakab-ot hin espirituwal nga mga tumong, kita liwat mahimo makaeksperyensya hin mga kapakyasan. Imbes nga manluya, kinahanglan naton repasuhon an aton mga nahimo, usisahon utro ito, ngan magpahiuyon. Kon bumangon an mga ulang, kinahanglan determinado ngan mapinadayunon nga mangalimbasog kita ha pag-uswag. “Isarig an imo mga buruhaton kan Jehova, ngan an imo mga tinguha matutukod,” ginpapasarig kita han maaramon nga hi Hadi Salomon.—Proberbios 16:3.

Kondi, tungod han mga kahimtang, usahay imposible an pagkab-ot han pipira nga mga tumong. Pananglitan, an maluya nga kahimsog o mga obligasyon ha pamilya mahimo makaulang ha aton ha pagkab-ot han pipira nga mga tumong. Hinaot diri gud naton hingalimtan nga an ultimo nga premyo amo an kinabuhi nga waray kataposan—ha langit o ha Paraiso ha tuna. (Lukas 23:43; Filipos 3:13, 14) Paonan-o ini makakab-ot? “An nagbubuhat ha kaburut-on han Dios nagpapadayon ha gihapon,” nagsurat hi apostol Juan. (1 Juan 2:17) Bisan kon an aton kahimtang bangin diri nagtutugot ha aton nga makab-ot an usa nga tumong, mahimo pa gihapon kita ‘mahadlok ha Dios, ngan bantayan an iya mga sugo.’ (Eklesiastes 12:13) An espirituwal nga mga tumong nabulig ha aton nga magpabilin nga nakasentro ha pagbuhat han kaburut-on han Dios. Salit gamiton naton ito ha paghimaya ha aton Maglalarang.

[Kahon ha pahina 22]

Espirituwal nga mga Tumong nga Angay Tagdon

○ Pagbasa han Biblia kada adlaw

○ Pagbasa han tagsa nga gowa han An Barantayan ngan Awake!

○ Pagpauswag ha kalidad han aton mga pag-ampo

○ Pagpakita han mga bunga han espiritu

○ Pangalimbasog para ha dugang nga pag-alagad

○ Pagin mas epektibo ha pagsangyaw ngan pagtutdo

○ Pagpatubo han mga kaabtik sugad han pagsangyaw pinaagi han telepono, ha diri-pormal nga paagi, ngan ha komersyal nga mga lugar