Fakaʼaogaʼi He ʼu Fakatuʼutuʼu Fakalaumālie Moʼo Faka Kolōliaʼi Tou Tupuʼaga
Fakaʼaogaʼi He ʼu Fakatuʼutuʼu Fakalaumālie Moʼo Faka Kolōliaʼi Tou Tupuʼaga
“KA MOLE ʼiloʼi e he tagata pe ko te ʼuafu fea ʼaē ka tau kiai, pea ʼe mole ina ʼiloʼi peʼe ko te matagi fea ʼaē ʼe agi mai.” ʼE fakamoʼoni ia te ʼu palalau ʼaia, ʼaē ʼe lau neʼe fai e te tagata filosofia Loma ʼo te ʼuluaki sēkulō, ʼe tonu ke kita fai he ʼu fakatuʼutuʼu moʼo takitaki ʼo tokita maʼuli.
ʼE maʼu ʼi te Tohi-Tapu te ʼu faʼifaʼitaki ʼo te ʼu hahaʼi neʼe ʼi ai tanatou ʼu fakatuʼutuʼu ʼi tonatou maʼuli. Ko Noe ʼaē neʼe gāue kinakina lolotoga taʼu e 50, neʼe “ina faʼu te aleka moʼo hāofaki tona famili.” Ko te polofeta ko Moisese “neʼe sio fakamaʼumaʼu ia ki te totogi ʼo te fakapale.” (Hepeleo 11:7, 26, MN ) Ko Sosue, ʼaē neʼe ina fetogi ia Moisese, neʼe fakatuʼutuʼu age e te ʼAtua ke ina hūfi ʼo toʼo te kele ʼo Kanaane.—Teutalonome 3:21, 22, 28; Sosue 12:7-24.
ʼI te ʼuluaki sēkulō ʼo totatou temi, ʼe mahino ia ko te ʼu fakatuʼutuʼu ʼa te ʼapositolo ko Paulo neʼe fai tāfito ʼo mulimuli ki te ʼui ʼa Sesu, “ko te logo lelei ʼaenī ʼo te puleʼaga ʼe faka mafola anai ʼi te kele katoa.” (Mateo 24:14, MN ) Ko te ʼu logo pea mo te ʼu meʼa ʼaē neʼe fakahā tonu age e te ʼAliki ko Sesu, mo tona hinoʼi ke ina “ave te Huafa [ʼo Sesu] ki te u puleaga,” neʼe ina uga ai ia Paulo ke liliu ko he tagata gāue maʼuhiga moʼo fakatuʼu te ʼu kokelekasio faka Kilisitiano ʼi Asia Veliveli pea mo te Eulopa.—Gaue 9:15; Kolose 1:23.
Ei, ko te kau kaugana ʼa Sehova ʼo te taʼiake fuli neʼe nātou fai te ʼu fakatuʼutuʼu lelei pea neʼe nātou fakahoko moʼo faka kolōliaʼi te ʼAtua. Kae e feafeaʼi hatatou fai he ʼu fakatuʼutuʼu fakalaumālie ʼi te temi nei? Koteā he ʼu fakatuʼutuʼu ʼe tou lava faiga kiai, pea koteā te ʼu potu ʼaoga ʼe tou lava fai moʼo fakahoko ʼo te ʼu fakatuʼutuʼu ʼaia?
ʼE Maʼuhiga Ke ʼi Ai He ʼu Manatu Lelei
ʼE feala pe ke fai he ʼu fakatuʼutuʼu ʼi te ʼu potu fuli ʼo te maʼuli, pea ko te mālama ʼe ina fai tana ʼu fakatuʼutuʼu ki te hahaʼi. Kae ko te ʼu fakatuʼutuʼu faka teokalatike ʼe mole tatau mo ʼaē ʼo te mālama. Ko te ʼu manatu tāfito ʼaē ʼe maʼu e te ʼu fakatuʼutuʼu ʼi te mālama ʼe ko te holi fakavale ki te ʼu koloā pea mo te maʼu tuʼulaga pea mo te tuʼulaga pule. ʼE mole ko he fakatuʼutuʼu lelei he fia maʼu tuʼulaga pea mo te fia ʼiloa! Ko te ʼu fakatuʼutuʼu ʼaē ʼe nātou faka kolōliaʼi ia Sehova ʼAtua ʼe pipiki tonu mo tatatou tauhi kia te ia pea mo te ʼu gāue ʼo te Puleʼaga. (Mateo 6:33) Ko te ʼu taʼi fakatuʼutuʼu ʼaia ʼe haʼu mai te ʼofa ki te ʼAtua pea mo te kāiga, pea ʼe nātou faiga ke nātou tauhi ki te ʼAtua.—Mateo 22:37-39; 1 Timoteo 4:7.
ʼOfa pe ke tou fai tatatou ʼu fakatuʼutuʼu ʼaki he ʼu fakakaukau lelei, mokā tou faiga ki he ʼu fakatuʼutuʼu fakalaumālie, peʼe ko he ʼu fakatuʼutuʼu ki he tahi ʼu pilivilesio gāue peʼe ko hatatou tuputupu fakalaumālie takitokotahi. Kae māʼiape la mo te ʼu fakatuʼutuʼu ʼaē ʼe fai ʼaki he ʼu manatu lelei, ʼi ʼihi temi ʼe mole feala ke hoko. E feafeaʼi hatatou fai he ʼu fakatuʼutuʼu pea mo he ʼu puleʼaki moʼona fakahoko?
ʼE Tonu Ke Tou Holi Mālohi Kiai
ʼI te ʼosi fakatupu e Sehova ia te ʼatulaulau, ʼe ʼui fēnei ʼi te Tohi-Tapu “neʼe hoko mai te afiafi pea hoko mai mo te uhu,” ʼo fakaʼiloga ʼaki e Sehova te ʼu temi ʼaē neʼe ina fakahoahoa ai tana ʼu fakatupu. (Senesi 1:5, 8, 13, 19, 23, 31) ʼI te kamataʼaga ʼo te ʼu temi fuli ʼo tana fakatupu, neʼe ina ʼiloʼi lelei tana fakatuʼutuʼu ki te ʼaho ʼaia. Pea neʼe fakahoko katoa e te ʼAtua tana fakatuʼutuʼu ʼaē ke ina fakatupu te ʼu meʼa. (Apokalipesi 4:11) Neʼe ʼui fēnei e te pateliaka ko Sopo, “ ʼE ʼi ai te meʼa ʼe holi kiai tona nefesi [ʼo Sehova], pea ʼe ina fakahoko anai.” (Sopo 23:13) ʼE mahino neʼe lagi fiafia ʼaupito ia Sehova ʼi tana sio “kia meʼa fuli ʼaē neʼe ina fai” pea neʼe ina ʼui ʼe “lelei ʼaupito”!—Senesi 1:31.
Ke hoko tatatou ʼu fakatuʼutuʼu, ʼe tonu foki ke tou toe holi mālohi kiai. Koteā anai ka tokoni mai ke tou fakatuputupu he holi mālohi feiā? Logope neʼe fuafua noa pea mo lāvaki ia te kele, kae neʼe kua lava sio ia Sehova ʼe matalelei ʼaupito anai ia te kele, ko he meʼa ʼe ina faka maʼuhigaʼi anai pea mo faka kolōliaʼi ia ia. ʼO feiā mo tatou, ko tatatou holi ʼaē ke tou fakahoko te ʼu fakatuʼutuʼu ʼaē ʼe tou fai, ʼe feala ke fakatuputupu ʼi te metitasioʼi ʼo te ʼu fua lelei pea mo te ʼu tapuakina ʼo te fakahoko ʼo te fakatuʼutuʼu. Ko te meʼa ʼaia neʼe hoko kia Tony ʼaē ʼe taʼu 19. Neʼe mole galo tana ʼuluaki ʼaʼahi ia te pilō ʼa te kau Fakamoʼoni ʼa Sehova ʼi Eulopa ʼo te Potu Uesite. Talu mai ai, koʼeni te fehuʼi ʼaē neʼe tau hake ʼi te fakakaukau ʼa Tony, ‘E feafeaʼi ʼapē te maʼuli pea mo te gāue ʼi te taʼi ʼu fale ʼaia?’ Neʼe haga fakakaukauʼi aipe e Tony te gāue ʼi te ʼu fale ʼaia, pea neʼe faiga kiai. Hili te ʼu taʼu, neʼe fiafia ʼaupito ʼi te tali age ki tana kole ke gāue ʼi te filiale!
ʼE feala hatatou holi ki he fakatuʼutuʼu feiā, mo kapau ʼe tou fakatahi mo ʼihi kua nātou fakahoko he fakatuʼutuʼu feiā. Ko Jayson, ʼaē kua taʼu 30, neʼe mole ina leleiʼia te gāue fai faka mafola ʼi tona kei taʼu hogofulu tupu. Kae ʼi te ʼosi ʼo tana ako, neʼe pionie, ʼo fai faka mafola temi katoa. Koteā ʼaē neʼe tokoni kia Jayson ke ina fakatuputupu te holi ʼaē ke pionie? ʼE ina tali fēnei: “Ko te fai palalau mo ʼihi ʼe gāue pionie pea mo te gāue fakatahi mo nātou ʼi te minisitelio neʼe ina uga mālohi ʼau ki te faʼahi ʼaia.”
Ko Te Tohi ʼo Tatatou ʼu Fakatuʼutuʼu ʼe Lava Tokoni Mai
ʼE hoki mahino lelei he manatu mo kapau ʼe tou filifili te ʼu kupu ʼaē ka tou fakaʼaogaʼi. Neʼe ʼui e Salomone ko te ʼu kupu ʼaē ʼe totonu, ʼe mālohi ohage ko he ʼu meʼa hukihuki, moʼo takitaki tona maʼuli. (Tagata Tānaki 12:11) Ka tohi te ʼu kupu ʼaia, pea ʼe malave loloto ʼi totatou ʼatamai mo totatou loto. Ko te tupuʼaga ʼaia ʼo te fakatotonu e Sehova ki te ʼu hau ʼo Iselaele ke nātou tahi hiki te Lao. (Teutalonome 17:18) Koia ʼe lagi tou fia tohi ki he moʼi pepa, tatatou ʼu fakatuʼutuʼu pea mo te ʼu puleʼaki ʼaē moʼona fakahoko, ʼo fai he lisi ʼo te ʼu faigataʼaʼia ʼaē ʼe feala ke tou felāveʼi mo ia, pea mo te ʼu puleʼaki kiai. ʼE lagi tonu foki ke tou ʼiloʼi te ʼu puani ʼaē ʼe tonu ke tou ʼiloʼi lelei, mo te ʼu faʼahiga poto ʼe tonu ke tou maʼu, pea mo te ʼu hahaʼi ʼaē ʼe tonu ke tou tokoni ki ai pea mo nātou ʼaē ʼe lava tokoni mai kia tatou.
Kia Geoffrey, ko he pionie makehe kua fualoa tana gāue ʼi te telituale mamaʼo ʼi te fenua ʼi Asia. Maʼa ia ko te ʼu fakatuʼutuʼu fakalaumālie ʼaē neʼe ina fai neʼe tokoni age kia ia ke ina fakatokatoka tona maʼuli. Neʼe hoko te malaʼia kia ia ʼaki te mate fakafokifā ʼo tona ʼohoana. Hili te temi ʼo tana kua māhani leva mo tana putu, neʼe fakatotonu e Geoffrey ke ina fai he ʼu fakatuʼutuʼu ke maʼumaʼua katoa ʼi te gāue pionie. ʼI tana ʼosi tohi tana ʼu fakatuʼutuʼu, neʼe faikole ke ina kamata he ʼu ako Tohi-Tapu foʼou e tolu ʼi te fakaʼosi ʼo te māhina. ʼI te ʼaho fuli, neʼe ina vakaʼi tana gāue, pea ka katoa te ʼu ʼaho e hogofulu, pea ina vakaʼi te ʼu tuputupu kua ina fai. Neʼe lava koa tana fakatuʼutuʼu? ʼI tona fakahagatonu neʼe ina kamata te ʼu ako Tohi-Tapu foʼou e fā, pea neʼe fiafia ʼaupito ai!
Kamata Muʼa ʼAki He ʼu Fakatuʼutuʼu ʼe Fakahoko Gafua
ʼE ʼi ai te ʼu fakatuʼutuʼu ʼi te kamata ʼe lagi hage mai ʼe lelei ʼaupito. ʼI te manatu ʼa Tony, ʼaē neʼe kua tou palalau ki ai, ko te gāue ʼi te pilō ʼa te kau Fakamoʼoni ʼa Sehova ʼaē neʼe ina ʼaʼahi, neʼe ko he meʼa neʼe mole feala ke hoko kia ia. Ko tona maʼuli neʼe fakalāluvale, pea neʼe mole heʼeki ina foaki tona maʼuli ki te ʼAtua. Kae neʼe fakatotonu e Tony ke ina maʼuliʼi te ʼu fakatotonu ʼa
Sehova, pea neʼe ina fai te fakatuʼutuʼu ke liliu ʼo papitema. ʼI tana fakahoko te fakatuʼutuʼu ʼaia, neʼe ina fai te fakatuʼutuʼu ke pionie vaeluaʼi temi pea mo pionie katoa, ʼo ina fakaʼiloga ʼi tana kaletalio te ʼu ʼaho ʼaē neʼe kamata ai. Hili te temi neʼe lolotoga pionie ai, neʼe mole kei hage leva ki ai ia te gāue ʼi te filiale ko he fakatuʼutuʼu ʼe fakahoko gataʼa.ʼE lagi ko he tokoni fakapotopoto ʼaia kia tatou, ke tou vaevae tatatou fakatuʼutuʼu ʼaē ʼe fai ki he temi loaloaga, ʼo tou fai he ʼu fakatuʼutuʼu ʼe fakahoko gafua. Ko te tahi ʼu fakatuʼutuʼu ʼe feala ke hage kia tatou ko he ʼu fakaʼiloga ke tou faiga atu ki he fakatuʼutuʼu ʼe lahi ake. Ko tatatou vakavakaʼi putuputu te tuputupu ʼo tatatou faiga, ʼe lava tokoni mai ke tou manatuʼi tuʼumaʼu. ʼE toe tokoni mai pe foki ia te faikole tuʼumaʼu kia Sehova ʼo ʼuhiga mo tatatou ʼu fakatuʼutuʼu ke tou haga ʼalu ai. Neʼe fakaloto mālohiʼi fēnei e te ʼapositolo ko Paulo, “koutou faikole tuumau.”—1 Tesalonika 5:17.
ʼE ʼAoga Ia Te Loto Mālohi Pea Mo Te Faʼa Kātaki
Logola hatatou fakaʼaluʼalu lelei pea mo hatatou holi mālohi ke tou fakahoko te ʼu fakatuʼutuʼu, kae ʼe ʼi ai ʼihi fakatuʼutuʼu ʼe mole pe feala hona fakahoko. Neʼe lagi lotomamahi ʼaupito ia te tisipulo ko Soane Maleko ʼi te mole loto ʼa te ʼapositolo ko Paulo ke nātou kaugā ʼolo ʼi te lua folau faka misionea! (Gaue 15:37-40) Neʼe lagi tonu ke tāʼofi e Maleko ia te ako mai te lotomamahi ʼaia pea mo ina fakatonutonuʼi tana fakatuʼutuʼu ke fakalahi tana gāue. ʼE mahino neʼe ko te meʼa ʼaia neʼe ina fai. Ki muli age, neʼe kau ia Maleko ia nātou ʼaē neʼe palalau lelei kiai ia Paulo pea neʼe fiafia ʼi tana fakatahi mo te ʼapositolo ko Petelo ʼi Papiloni. (2 Timoteo 4:11; 1 Petelo 5:13) Lagi ko tana pilivilesio lahi ʼaē neʼe ina maʼu ʼi tona maʼuli faka teokalatike, neʼe ko tana fai te tohi ʼo te maʼuli pea mo te minisitelio ʼo Sesu.
ʼI tatatou faigaʼi ke tou fakahoko tatatou ʼu fakatuʼutuʼu fakalaumālie, ʼe toe feala ke hoko he ʼu tōtō. ʼE mole tonu ke tou holomuli ai, kae ʼe tonu ke tou toe vakaʼi mo toe fakafuafua lelei pea mo fakatonutonuʼi. Ka hoko he ʼu faigataʼaʼia, ʼe tonu ke tou faiga ke tou tuputupu ʼaki he loto mālohi pea mo he faʼa kātaki. ʼE fakaloto mālohiʼi fēnei tatou e te Hau poto ko Salomone, “Tuku tau ʼu gāue kia Sehova totonu, pea ko tau ʼu fakatuʼutuʼu ʼe tuʼu mālohi anai.”—Tāʼaga Lea 16:3.
Kae ʼi ʼihi temi ʼe mole lagi feala ke fakahoko ʼihi fakatuʼutuʼu ʼuhi ko he ʼu ʼaluʼaga. Ohage la, ʼe mole tou lava fakahoko anai ʼihi fakatuʼutuʼu ʼuhi ko te mahaki peʼe ko te ʼu maʼua faka famili. Kae ʼaua naʼa galo ia tatou ʼi he temi ko te totogi ʼaē ʼe lahi ʼaupito, ʼe ko te maʼuli heʼegata—ʼi selo peʼe ʼi te Palatiso ʼi te kele. (Luka 23:43; Filipe 3:13, 14) ʼE maʼu feafeaʼi te totogi ʼaia? Neʼe tohi fēnei e te ʼapositolo ko Soane, “kia ia ae e ina fai te finegalo o te Atua e mauli o talu ai.” (1 Soane 2:17) Tatau aipe peʼe mole faka fealagia e totatou ʼaluʼaga ke tou fakahoko he faʼahiga fakatuʼutuʼu, kae ʼe kei feala pe ke tou “manavasiʼi ki te ʼAtua moʼoni pea mo taupau tana ʼu fakatotonu.” (Tagata Tānaki 12:13) ʼE tokoni mai te ʼu fakatuʼutuʼu fakalaumālie ke tou haga tokakaga ʼo fakahoko te finegalo ʼo te ʼAtua. Koia tou fakaʼaogaʼi te ʼu fakatuʼutuʼu fakalaumālie moʼo faka kolōliaʼi totatou Tupuʼaga.
[Talanoa ʼo te pasina 22]
Ko He ʼu Fakatuʼutuʼu Fakalaumālie Ke Fakakaukauʼi
○ Te lau ʼo te Tohi-Tapu ʼi te ʼaho fuli
○ Te lau ʼo te ʼu nusipepa fuli ʼo Te Tule Leʼo mo te Réveillez-vous !
○ Te hikihiki ʼo te lelei ʼo tatatou ʼu faikole
○ Te maʼuliʼi ʼo te fua ʼo te laumālie
○ Te fakalahilahi ʼo te gāue
○ Te liliu ʼo faiva age ʼi te fai faka mafola pea mo te faiako
○ Te fakatuputupu ʼo te ʼu faiva ʼi te fagonogono ʼi te fai telefoni, mo te fagonogono faigamālie pea mo te fagonogono ʼi te ʼu fale gāue