Manàn̈a Tanjon̈o Han̈amezan̈a Voninahitry Pamoron̈o

“IZIKOA fa tsy hainy lelahy araiky aia fitodiantsambo handihanany, mety aminany fo zay tany hitondrasany tsiko izy.” Io volan̈a nataony filozofy romanin̈y araiky tamy taonjato voanalohany tan̈y. Hita baka amizio fa ten̈a ilain̈y manan̈a tanjon̈o, fotony zen̈y mitariky atsika amy raha ataontsika amy fiain̈ana.

Amy Baiboly ao misy tantaranolo nanan̈a tanjon̈o. Tan̈atiny kadiriny 50 taon̈o tio Noa ‘nan̈amboatra sambofiara, hamonjian̈a fianakavian̈anany.” Mosesy paminan̈y “nizaha tsarabe hatsaran̈a handeha ho azony.” (Hebreo 11:7, 26) Nisy tanjon̈o koa Josoa, araiky nandimby Mosesy in̈y. Zan̈ahary nan̈iraka izy hangala tany Kanana.​—Deoteronomia 3:21, 22, 28; Josoa 12:7-24.

Tamy taonjato voanalohany, azo antoko tsarabe fa an̈isany raha ten̈a nandrisiky apostoly Paoly hanan̈a tanjon̈o, volan̈a Jesosy amy Matio 24:14: “Hambara amy tany jiaby misy olo antsendriky vaovao tsara mikasiky Fanjakan̈a ty.” Nandrisiky izy koa hafatra ndreky fahitan̈a namezany Jesosy Tompo izy in̈y. Salakady Paoly nitindren̈y ‘hitondra an̈arany Jesosy amy firenena hafa.’ Ke vokany, Paoly nanan̈a plasy maventy tamy fan̈oren̈ana fiangonan̈a kristianin̈y maro erany Azia Minora ndreky firaka ta Eropy.​—Asan’ny Apostoly 9:15; Kolosianina 1:23.

Hitantsika baka amy zen̈y fa rango zay, panompony Jehovah efa nanan̈a tanjon̈o man̈amia voninahitry Zan̈ahary, sady nifen̈y iro nanakatra tanjon̈ondro. Atsika ke? Mbala afaka manan̈a tanjon̈o koa ma atsika? Ino ma tanjon̈o mety takarintsika, avio karakory hanakarantsika izio?

Manàn̈a antony tsara handrisiky anao hanakatra tanjon̈onao

Raha jiaby amy fiain̈ana afaka asian̈a tanjon̈o aby. Sasany aminolo amy donia ty mba manan̈a tanjon̈o takarin̈y koa, fa izy fo tsy mitovy amy tanjon̈ony Kristianin̈y. Tihanjary pan̈arivo ndreky halaza antony voanalohany voanalohany mahavy iro manakatra tanjon̈o io. Kanefa tsy tsara raha zen̈y. Efa tanjon̈o mifandray amy fanompoan̈a Zan̈ahary ndreky asany Fanjakan̈anany fo baka, man̈amia voninahitry Jehovah. (Matio 6:33) Fitiavan̈a Zan̈ahary ndreky fitiavan̈a olo, avio fahafoizanten̈a amy Zan̈ahary io antony mandrisiky olo araiky hanakatra tanjon̈o karaha zen̈y.​—Matio 22:37-39; 1 Timoty 4:7.

Irarian̈a ho tsara fo antony manosiky atsika, na hampitombo fanompoan̈a tanjon̈ontsika, na koa hankatsara fifandraisantsika amy Zan̈ahary. Fa nata tsara antony mandrisiky atsika, ndraikindraiky mbala mety misy tanjon̈o tsy tatrantsika fo. Ke akory basy fomba anan̈antsika tanjon̈o, baka io akory atao manakatra izy?

Mila man̈iry mare

Diniha baka fomba nahavitany Jehovah niasa raha jiaby. Isaka vita fepotoan̈a famoron̈ana tsiaraikiaraiky, karaha ty nivolan̈iny: “Ke nisy andra hariva ndreky andra maraindrain̈y.” (Genesisy 1:5, 8, 13, 19, 23, 31) Mbala vo komansy fo izy, efa hainy Jehovah tsarabe raha tiany hatao, na koa tanjon̈onany, amy fepotoan̈a tsiaraikiaraiky. Ke vitany niasa raha jiaby, karaha efa niritriretany izy in̈y. (Apokalypsy 4:11) Karaha ty nivolan̈iny Joba, an̈isany razambentsika: “Zay raha tiany hatao ataony.” (Joba 23:13) Misora afapô mare Jehovah nahita “raha jiaby niasainy”, ke ho izy: “Tsara mare!”​—Genesisy 1:31.

Karaha zen̈y koa atsika. Izikoa tiantsika ho tanteraka tanjon̈ontsika, atsika mila man̈iry mare hanakatra iro io. Ino han̈ampy atsika han̈iry mare karaha zen̈y? Nata mbala tsy pare ndreky tsisy raha foeky tambony tany teto, efa azony Jehovah antsain̈y karakory ny hiafarany. Efa hainy fa hisy vatosoa tsara mare amy lan̈itry an̈y, ke han̈amia voninahitry izy. Atsika koa afaka man̈ano karaha zen̈y. Saintsain̈a ino vokany ndreky hatsaran̈a ho azonao izikoa takanao tanjon̈onao. Zen̈y han̈ampy anao han̈iry mare hanakatra izio. Karaha zen̈y nataony Tony, tsaiky lelahy 19 taon̈o. Mbala tsaroany fo taminizy voanalohany nitsidiky birôny sampan̈any Vavolombelon̈o Jehovah ta Eropy Andrefa. Ke rango tamy zen̈y, ty fan̈ontanian̈a tsy nety nafaka tan̈aty jerinany: ‘Mba karakory eky mipetraka amy toeran̈a karaha io, ndreky manompo ao?’ Izy tsy voly nieritreritry fa mety tantirahin̈y fan̈irian̈anany zen̈y. Ke nifen̈y mare izy nanakatra izio. Tafara tatỳ, izikoa fa nivaly fangatahan̈anany hanompo amy sampan̈a io tao, ravoravo mare izy.

An̈isany han̈ampy atsika hanakatra tanjon̈o araiky koa, fiarahan̈a amy piaramanompo efa nahatakatra izio. Tamy Jayson mbala hely, ohatra, tsy tia nitory zen̈y foeky. Fa izikoa fa vita fianaran̈anany tamy lise, izy direkty nan̈ano pisava lalan̈a, ke nanjary panompo manontolo andra. Ino eky raha nahavy Jayson loso nan̈iry hanjary pisava lalan̈a? Efa 30 taon̈o izy ziô, ke karaha ty raha nambarany: “Ten̈a nisy vokany taminaka mare nikoran̈a ndreky niaraka nanompo taminolo efa pisava lalan̈a.”

Sorata tanjon̈onao

Hevitry araiky izikoa fa soratin̈y, loso mazava tsarabe. Solomona nivolan̈a fa volan̈a koa mety tsarabe, mety hahery mare karaha ataony raha hitombohan̈a aomby in̈y, ke izio hitaridalan̈a amy fiain̈ana. (Mpitoriteny 12:11) Soratra izikoa fa hitanao maso, loso misy vokany mare amy fonao ndreky jerinao. Zen̈y nahavy Jehovah nan̈iraka iro panjakany Israely aby io hanoratra bokiny Lalàn̈a. (Deoteronomia 17:18) Ke mety ho tiantsika koa hanoratra tanjon̈ontsika amy taratasy ndreky akory hanakaran̈a izy. Tsara koa izikoa atao listy ao iro raha mety ho sakan̈a, baka io ino vahaolan̈a. Mila hay koa ino raha tsara ho haintsika momba izio, ino fahaizan̈a mila hanan̈antsika, avio azovy olo afaka han̈ampy ndreky hanohan̈a atsika.

Geoffrey ziô, pisava lalan̈a manokan̈a efa ela tamy faritry mitokan̈a an Asie an̈y. Naty tampoko vadiny, ke ten̈a nan̈ampy izy mare fanan̈ana tanjon̈o mifandray amy fanompoan̈a. Izikoa izy efa nanomboko zatrazatra fiain̈ananany, izy nanapakevitry hifantoko amy fanompoan̈a, ke izy nieritreritry tanjon̈o mety takariny. Izikoa izio fa baka nisoratiny, izy nivavaka. Tanjon̈onany, izy nan̈iry hahita pianatra Baiboly telo vaovao an̈atiny fanjava araiky. Ke takany edy izio? Ia. Ravoravo izy, fotony nahazo pianatra Baiboly efatra vaovao.

Tanjon̈o madinidiniky antsendriky takara

Misy tanjon̈o sasany karaha sarotro takarin̈y oe. Tamy Tony, araiky nikoran̈intsika tio in̈y, hanompo amy Betela zen̈y karaha raha nôfy fo. Tamy fotoan̈a zen̈y baka, mbala tsy pare tsarabe fomba fiain̈ananany, sady izy koa mbala tsendriky vita batisa. Fa izy baka tio nanapakevitry fa hampifan̈araka fiain̈ananany amy fitsipiky Jehovah, ke nan̈ano tanjon̈o mba hahafeno fepetra amy batisa. Lera izy vita batisa amy zay, izy nanakatra tanjon̈o hafa, han̈ano pisava lalan̈a pan̈ampy, avio maharitry. Efa nimarkeny tamy kalandrie aby ladaty hanombohany izio. Izikoa efa nahampy fotoan̈a lavalava nan̈anaovany pisava lalan̈a, efa tsy mira nôfy tsy mety tantirahin̈y in̈y eky fanompoan̈a tamy birôny sampan̈a io.

Atsika koa afaka man̈ano karaha zen̈y. Tsara izikoa mba rasaintsika madinidiniky antsendriky tanjon̈o araiky, izikoa karaha mbala lavidavitry ezaka. Arakaraka atsika mahatakatra araiky amindro io baka mahavy atsika loso mahaimahatakatra araiky maventiventy. Izikoa zahavantsika matetitetiky fandrosoan̈a vitantsika, atsika loso mifantoko fo amy tanjon̈ontsika io. Mivavaka matetiky amy Jehovah momba tanjon̈ontsika io koa ten̈a han̈ampy atsika. Apostoly Paoly nandrisiky atsika: “Aza voly mivavaka.”​—1 Tesalonianina 5:17.

Mitaky fahavon̈osan̈a ndreky fahazotoan̈a

Misy tanjon̈o sasany mbala tsy taka fo ndray atsika efa nan̈oman̈a tsara ndreky man̈iry mare. Kivy mare ohatra Jaona Marka koa fa tsy nindesiny apostoly Paoly niaraka taminany, tamy dia misionera faharoe nataony in̈y. (Asan’ny Apostoly 15:37-40) Nangala fianaran̈a baka tamizin̈y Marka, ke nitady fomba hafa afaka hampitombosan̈a fanompoan̈a. Hita fa nataony ankitin̈y raha zen̈y, fotony tafara tatỳ, Paoly nivolan̈a raha tsara momba izy. Baka io Marka niaraka taminy apostoly Petera ta Babylony. (2 Timoty 4:11; 1 Petera 5:13) Tombontsoa farany maventy nazony, izy nahazo fan̈ahy masin̈y ke nanoratra tantarampiain̈any Jesosy ndreky fanompoan̈anany.

Mety ho tojy raha manakantsakan̈a koa atsika lera fa manakatra tanjon̈ontsika arapan̈ahy in̈y. Fa atsika tsy tokony ho kivy, fa tsara izikoa mba dinihintsika iro fandrosoan̈a efa vitantsika. Tsara koa mandiniky tsao mbala afaka takarin̈y fo tanjon̈ontsika io, sa mila soaran̈a hafa. Ndray misy sakan̈a, atsika mila mifen̈y mandroso fo. Ke raha zen̈y mitaky fahavon̈osan̈a ndreky fahazotoan̈a. Solomona panjaka hendry nivolan̈a: “Raha jiaby ataonao ankin̈a amy Jehovah, fa hahomby edy raha iritriretinao hatao.”​—Ohabolana 16:3.

Fa ndraikindraiky, misy raha tsy afaka ialan̈a. Mety hisakan̈a atsika tsy hahatakatra tanjon̈ontsika, ohatra, resaka tsy fahasalaman̈a na koa andraikitry an̈atiny fianakavian̈a. Fa tsy mila adin̈antsika foeky fa kadô maventy ho azontsika, fiain̈ana tsisy farany, andan̈itry an̈y na amy Paradisa ambony tany eto. (Lioka 23:43; Filipianina 3:13, 14) Karakory ma azahoan̈a zen̈y? Apostoly Jaona nanoratra: “Lan̈iany olo man̈ano sitrapony Zan̈ahary, ho velon̈o mandrakizay.” (1 Jaona 2:17) Ndray raha misy atsika tsy man̈ambela atsika hanakatra tanjon̈o araiky, atsika mbala afaka mavozo Zan̈ahary ndreky mitandrin̈y didinany fo. (Mpitoriteny 12:13) Tanjon̈o arapan̈ahy io man̈ampy atsika hifantoko fo amy fan̈anaovan̈a sitrapony Zan̈ahary. Ke alô izio hampiasaintsika han̈amezan̈a voninahitry Pamoron̈o atsika io.

[Efajoro]

Tanjon̈o arapan̈ahy afaka iritriretin̈y

○ Mamaky Baiboly isanandra

○ Mamaky nimero tsiaraikiaraiky amy Tilikambo Fiambesan̈a ndreky Mifohaza!

○ Mankatsara vavaka

○ Manan̈a toetry vokatra fan̈ahy

○ Mampitombo fanompoan̈a

○ Mankatsara fahaizan̈a mitory ndreky mampianatra

○ Mankatsara fahaizan̈a mitory amy telefony, tsy arapotoan̈a ndreky amy faritany efa matetiky itorian̈a