Cappadocia​—Ples wea Pipol Stap Insaed Olketa Haos wea Wind and Wata Nao Wakem

APOSOL Peter story abaotem Cappadocia. Hem raetem first leta bilong hem for “pipol wea stap for lelebet taem long. . . Cappadocia,” and tu for olketa narawan. (1 Peter 1:1) Wanem kaen ples nao Cappadocia? Why nao pipol wea stap long there wakem olketa haos bilong olketa insaed ston? Hao nao gogo olketa savve long Christian teaching?

Wanfala man from Britain wea travel long staka ples, W. F. Ainsworth, hem sei olsem taem hem visitim Cappadocia long olketa year bilong 1840: “Mifala seknomoa lus insaed wanfala ples wea garem staka haefala ston wea sheip bilong samfala raon and sharp, and tol.” Datfala area long Turkey wea luk spesol tumas hem still mekem pipol wea visitim datfala ples sapraes fogud. Insaed olketa valley long Cappadocia olketa ston hia luk olsem olketa statue wea stap klosap tugeta olsem olketa grup soldia wea standap kwaet for gardim wanfala ples. Samfala luk olsem olketa tol pipe for smoke go ap long hem wea go ap long skae kasem 30 meter or winim. Olketa narawan raon long botom and gogo sharp antap, samfala sheip olsem box bat top part bilong olketa sharp, and samfala sheip olsem mushroom.

Wei wea sun shaen long olketa ston hia mekem olketa luk naes tumas and garem didifren kala insaed sem day! Long early morning olketa kala pink. Long midolday olketa white, and taem sun go daon hem mekem olketa garem mix brown and yellow kala. Wanem nao mekem disfala ples “garem staka haefala ston wea samfala sheip bilong olketa raon and sharp, and tol”? And why pipol long datfala ples wakem haos bilong olketa insaed ston?

Wind and Wata Nao Wakem

Cappadocia hem stap long midol bilong datfala Anatolian Peninsula, wea stap midolwan Asia and Europe. Disfala area wea luk olsem hem shud flat nomoa, hem garem tufala volcano. Planti million year bifor, tufala volcano hia bosta and mekem datfala area garem tufala kaen rok—hard basalt and soft tufa. Soft tufa hem asis bilong volcano wea kamap strong olsem rok and hem kala white.

Olketa river, rain, and wind isisi aotem datfala soft tufa wea mekem olketa bigfala valley kamap. Gogo steep saed bilong olketa valley hia isisi brek and diswan mekem staka rok wea tol, raon and sharp, for stap. Diswan mekem lukluk bilong datfala ples hem difren evribit from eni nara ples long earth. Samfala rok hia gogo garem staka hol fogud. Pipol wea stap long datfala ples digim go datfala soft rok and wakem olketa rum for stap insaed and taem famili kamap moa big olketa digim go moa samfala rum. Long hot season olketa rum hia cold naes and long cold season hem hot gud.

 Stap Long Ples wea Olketa Difren Kaen Pipol Meet

Sapos pipol wea stap insaed olketa cave hia long Cappadocia no stap long ples wea olketa difren kaen pipol meet maet bae olketa barava stap seleva. Datfala Silk Road wea planti pipol savve abaotem, hem road wea 6,500 kilometer wea start from Roman Empire go kasem China, and hem go thru long Cappadocia. Olketa bisnisman, pipol from Persia, Greece, and tu army bilong Rome savve travel go followim disfala road. Olketa man for travel hia tekem kam olketa niu religion.

Kasem mek-tu century B.C.E., samfala community bilong olketa Jew stap long Cappadocia. And olketa Jew from disfala area stap tu long Jerusalem long year 33 C.E. Olketa go long there for celebratem Festival Bilong Pentecost. So hem nao hao aposol Peter hem preach long olketa Jew bilong Cappadocia bihaen holy spirit hem pour aot. (Acts 2:1-9) Luk olsem samfala acceptim message wea hem talem and taem olketa go bak olketa tekem go datfala niu religion witim olketa. Dastawe, Peter hem tok for olketa Christian long Cappadocia long first leta bilong hem.

Bat, gogo olketa heathen teaching start for affectim olketa Christian long Cappadocia. Thrifala main church leader long Cappadocia long mek-foa century olketa strong for saedem teaching bilong Trinity wea no kam from Bible. Nem bilong olketa nao Gregory of Nazianzus, Basil the Great, and brata bilong hem Gregory of Nyssa.

Basil the Great apim tu wei for man garem living olsem monk. Olketa haos bilong olketa long Cappadocia wea olketa wakem insaed ston hem barava fitim kaen living olsem. Taem kaen community olsem kamap moa big, olketa wakem olketa church tu insaed samfala bigfala rok hia. Kasem mek-13 century, samting olsem thri handred church nao olketa wakem insaed olketa rok. Planti long olketa hia stap yet distaem.

Nomata distaem pipol no iusim olketa church and monastery hia, living bilong pipol long datfala ples no really change nomata planti handred year go pas finis. Planti pipol stap yet insaed olketa cave hia. Olketa wea visit go long Cappadocia sapraes long kleva wei wea pipol hia mekem olketa ston for kamap haos bilong olketa.

[Map long page 24, 25]

(For formatted text, lukim pablikeson)

CAPPADOCIA

CHINA (Cathay)