Mme Mbụme Ẹtode Mme Andikot
Mme Mbụme Ẹtode Mme Andikot
Nso ke isua Jubilee oro ẹtịn̄de ẹban̄a ke Leviticus ibuot 25 ada aban̄a?
Ibet Moses ọkọdọhọ ete “isọn̄ adia sabbath nduọk-odudu, . . . ke ọyọhọ isua itiaba.” Ẹkewụk nditọ Israel ẹban̄a isua oro ẹte: “[Kûtọ] in̄wan̄ fo, kûnyụn̄ udiọn̄ in̄wan̄ vine fo. Kûkpen̄e se n̄kpasịp eke ọkọbọhọde ọduọn̄ọ ke ini ukpen̄e fo, on̄wụmde; kûnyụn̄ utet etuek vine eke mûdiọn̄ke: yak isọn̄ enyene isua nduọk-odudu.” (Leviticus 25:4, 5) Ke ntem, isọn̄ ekenyene ndidia sabbath kpukpru ọyọhọ isua itiaba. Ndien kpukpru ọyọhọ isua 50, oro edi ke isua Sabbath ke itie itiaba ẹma ẹkebe, ẹkesidi isua Jubilee. Nso ikesitịbe ke isua oro?
Jehovah ọkọdọhọ Moses asian Israel ete: “Ẹnyụn̄ ẹdianade ọyọhọ isua aba ye duop ẹnịm, ẹnyụn̄ ẹtan̄a ubọhọ ke isọn̄ ẹnọ kpukpru mme andidụn̄ enye: mbufo ẹnịm enye ke jubilee; ndien kpukpru mbufo ẹfiak ke udeme mbufo, kpukpru ẹnyụn̄ ẹfiak ke orụk mbufo. Mbufo ẹnịm ọyọhọ isua aba ye duop ke isua jubilee; ẹkûtọ, ẹkûnyụn̄ ẹkpen̄e se n̄kpasịp eke ọkọbọhọde ọduọn̄ọ ke esịt on̄wụmde, ẹkûnyụn̄ ẹtet mfri vine esie eke mîdiọn̄ke.” (Leviticus 25:10, 11) Jubilee (kpa ọyọhọ isua aba-ye-duop) ekedi isua oro isọn̄ okodude ke Sabbath emi eketienede ọyọhọ Sabbath itiaba. Edi Jubilee ọkọwọrọ uwọrọ-ufụn ọnọ mme owo. Ẹkenyene ndisana mme Jew ekededi oro ẹkenyamde ẹsịn ke itie ufụn nyak. Ẹkenyene ndifiak nyak isọn̄ ubon oro nsọn̄ọn̄kpọ akanamde owo anyam nnọ ubon oro akanyamde. Jubilee ekesidi isua ifụre ye ubọhọ-ufụn ọnọ Israel eset. Nso ke enye ọwọrọ ọnọ mme Christian?
Nsọn̄ibuot akpa owo oro, Adam, ama ada ubonowo edisịn ke ufụn idiọkn̄kpọ. Ndutịm emi Abasi anamde ndida mfak ubonowo nsio ke ufụn idiọkn̄kpọ edi uwa ufak Jesus Christ. * (Matthew 20:28; John 3:16; 1 John 2:1, 2) Ini ewe ke ẹnam mme Christian ẹbọhọ ibet idiọkn̄kpọ? Apostle Paul ọkọdọhọ mme Christian oro ẹyetde aran ete: “Ibet Spirit uwem ke Christ Jesus ama anam mi mbọhọ ibet idiọk-n̄kpọ ye n̄kpa.” (Rome 8:2) Mbon oro ẹnyenede idotenyịn uwem eke heaven ẹnyene ubọhọ-ufụn emi ke ini ẹyetde mmọ aran ke edisana spirit. Okposụkedi mmọ ẹnyenede idem eke obụk ẹnyụn̄ ẹdide mme anana-mfọnmma owo, Abasi etebe mmọ ikpe onyụn̄ ada mmọ enyene nte nditọ eke spirit. (Rome 3:24; 8:16, 17) Jubilee mme Christian ọkọtọn̄ọ ye mbon oro ẹyetde aran nte otu ke 33 E.N.
Nso kaban̄a “mme erọn̄ en̄wen,” emi ẹnyenede idotenyịn edidu uwem nsinsi ke isọn̄? (John 10:16) Ih, kaban̄a mme erọn̄ en̄wen, Ukara Tọsịn Isua Christ edidi ini edinam n̄kpọ ẹtọn̄ọ ntak ẹfọn ye ini uwọrọ-ufụn. Ke Jubilee eke Tọsịn Isua Ukara emi, Jesus ayada uwa ufak esie anam ufọn ọnọ ubonowo oro enịmde ke akpanikọ onyụn̄ osio mme utịp idiọkn̄kpọ efep. (Ediyarade 21:3, 4) Ke utịt Ukara Tọsịn Isua Christ, ubonowo eyesịm mfọnmma onyụn̄ ọbọhọ ndammana idiọkn̄kpọ ye n̄kpa ofụri ofụri. (Rome 8:21) Ke ẹma ẹkenam oro, Jubilee Christian eyesịm utịt.
[Ikọ idakisọn̄]
^ ikp. 5 Ke akpanikọ, ẹkenọ Jesus ‘edikwọrọ uwọrọ-ufụn ọnọ mbuot ekọn̄.’ (Isaiah 61:1-7; Luke 4:16-21) Enye ọkọkwọrọ uwọrọ-ufụn eke spirit.
[Ndise ke page 26]
Jubilee eke Tọsịn Isua—ini edinam n̄kpọ ẹtọn̄ọ ntak ẹfọn ye ini uwọrọ ufụn “mme erọn̄ en̄wen”