Mga Pamangkot Gikan sa mga Bumalasa

Ano ang ginalandong sang kahimusan sang Jubileo nga tuig nga ginsambit sa ika-25 nga kapitulo sang Levitico?

Ginpatuman sang Mosaikong Kasuguan nga “sa ikapito nga tuig may yara inugpahuway subong bug-os nga pagpahuway sang duta.” Tuhoy sa sina nga tuig, ang mga Israelinhon ginsugo: “Indi mo pagsab-ugan ang imo uma sing binhi, kag indi mo pagpanapsan ang imo ulubasan. Ang dagakan sang imo alanyon indi mo pag-anihon, kag ang mga ubas sang imo puno sang ubas nga wala mapanapsi indi mo pagpamupuon. Dapat may isa ka bug-os nga tuig nga pagpahuway ang duta.” (Levitico 25:​4, 5) Busa, ang kada ikapito nga tuig dapat mangin isa ka tuig nga Inugpahuway para sa duta. Kag ang kada ika-50 ka tuig, pagkatapos sang tuig sang ikapito nga tuig nga Inugpahuway, mangin isa ka Jubileo. Ano ang dapat matabo sa sina nga tuig?

Ginsilingan ni Jehova ang Israel paagi kay Moises: “Pakabalaanon ninyo ang ikakalim-an nga tuig kag magbantala sing kahilwayan sa duta sa tanan nga pumuluyo sini. Mangin Jubileo ini para sa inyo, kag ibalik ninyo ang kada isa sa iya ginapanag-iyahan kag ibalik ninyo ang kada isa sa iya pamilya. Mangin Jubileo para sa inyo inang ikakalim-an nga tuig. Indi kamo magsab-ug sing binhi ukon mag-ani sang dagakan sang duta ukon magpamupo sang mga ubas nga sang wala mapanapsi nga mga puno sang ubas.” (Levitico 25:​10, 11) Ang Jubileo nagkahulugan sing duha ka sagunson nga tuig nga Inugpahuway para sa duta. Apang para sa mga pumuluyo sini, nagadala ini sing kahilwayan. Ang bisan sin-o nga Judiyo nga ginbaligya sa pagkaulipon dapat hilwayon. Ang ginpanubli nga propiedad nga napilitan nga ginbaligya sang isa ka tawo dapat ibalik sa iya pamilya. Ang Jubileo mangin tuig sang pagpasag-uli kag kahilwayan para sa dumaan nga Israel. Ano ang ginalandong sini para sa mga Cristiano?

Bangod sang pagrebelde sang una nga tawo nga si Adan, ang katawhan nangin ulipon sa sala. Ang kahimusan sang Dios sa paghilway sa katawhan gikan  sa pagkaulipon sa sala amo ang halad nga gawad ni Jesucristo.⁠ * (Mateo 20:28; Juan 3:​16; 1 Juan 2:​1, 2) San-o nahilway ang mga Cristiano sa kasuguan sang sala? Nagapatuhoy sa hinaplas nga mga Cristiano, si apostol Pablo nagsiling: “Ang kasuguan sinang espiritu nga nagahatag sing kabuhi nga nahiusa kay Cristo Jesus naghilway na sa imo gikan sa kasuguan sang sala kag sang kamatayon.” (Roma 8:2) Ang mga may paglaum nga mabuhi sa langit nakabaton sining kahilwayan sang ginhaplasan sila sang balaan nga espiritu. Bisan pa nga ang ila mga lawas undanon kag di-himpit, ginpahayag sila sang Dios nga matarong kag gin-adoptar sila subong iya espirituwal nga mga anak. (Roma 3:​24; 8:​16, 17) Para sa mga hinaplas subong isa ka grupo, ang Cristianong Jubileo nagsugod sang Pentecostes 33 C.⁠E.

Kumusta naman ang “iban nga mga karnero,” nga may paglaum nga mabuhi sing walay katapusan sa duta? (Juan 10:16) Para sa iban nga mga karnero, ang Isa ka Libo ka Tuig nga Paggahom ni Cristo mangin tion sang pagpasag-uli kag kahilwayan. Sa tion sining Isa ka Libo ka Tuig nga Jubileo, iaplikar ni Jesus ang mga benepisyo sang iya halad nga gawad sa matinuuhon nga katawhan kag magabaliskad sang mga epekto sang sala. (Bugna 21:​3, 4) Sa katapusan sang Isa ka Libo ka Tuig nga Paggahom ni Cristo, matigayon sang katawhan ang tawhanon nga kahimpitan kag bug-os nga mahilway gikan sa napanubli nga sala kag kamatayon. (Roma 8:21) Kon matuman na ini, matapos na ang Cristianong Jubileo.

[Nota]

[Retrato sa pahina 26]

Ang Isa ka Libo ka Tuig nga Jubileo​—⁠isa ka tion sang pagpasag-uli kag kahilwayan para sa “iban nga mga karnero”