Enọ Ahwo nọ A s’Ebe

Eme Ukpe Obusino nọ a fodẹ evaọ obe Iruo-Izerẹ uzou avọ 25 na u dikihẹ kẹ?

Ọghẹnẹ o jie uzi kẹ ahwo Izrẹl nọ “ukpe avọ ihrẹ na o rẹ jọ orọ ẹdijala eriosehọ riẹriẹriẹ kẹ otọ na.” Ọ vuẹ rai nọ: “[Ukpe ẹdijala na] wha rẹ kọ ibi họ otọ rai hi hayo bru egha ọgbọ evaene rai hi. Nọ ibi ekakọ nọ wha nyaseba evaọ oke ivuẹvu e tẹ dhẹ ze, wha re vu ai vievie he, yọ evaene rai nọ wha bru egha rai hi, wha rẹ kọrọ ibi rai kokohọ vievie he. Otọ na u re wo ukpe soso orọ eriosehọ riẹriẹriẹ.” (Iruo-Izerẹ 25:4, 5) Fikiere, ukpe avọ ihrẹ kpobi o rẹ jọ ukpe ẹdijala kẹ otọ na. Yọ ikpe ẹdijala ihrẹ e tẹ ruọ emu no, ukpe nọ u lele i rie, koyehọ ukpe avọ udhuvẹ-gbikpe o rẹ jọ Ukpe Obusino. Kọ eme a re ru evaọ ukpe yena?

Jihova o jie uzi kẹ ahwo Izrẹl nọ: “Wha re ru ukpe avọ udhuvẹ-gbikpe na fihọ ọrẹri hrọ je woro obusino evaọ ẹkwotọ na rọkẹ ahwo nọ a be rriae kpobi. O rẹ te jọ Ukpe Obusino kẹ owhai, omomọvo rai o ve zihe kpohọ otọ riẹ, yọ omomọvo rai o re zihe bru uviuwou riẹ. Ukpe avọ udhuvẹ-gbikpe na o rẹ jọ Ukpe Obusino kẹ owhai. Wha rẹ kọ ibi hi hayo vu eware nọ eye ọvo e dhẹ ze no udevie ibi ekakọ nọ wha nyaseba ha hayo kọrọ ibi erọ evaene nọ wha bru egha rai hi hi.” (Iruo-Izerẹ 25:10, 11) Ukpe Obusino na yọ ukpe ẹdijala re, nọ u re lele ukpe ẹdijala avọ ihrẹ. Koyehọ ikpe ẹdijala ivẹ nọ e rọ kpahe ohwohwo. Ukpe Obusino na o tẹ jẹ jọ ukpe nọ a re ro siobọno erigbo kpo. A rẹ kẹ ohwo Ju kpobi nọ a zẹ hayo nọ ọ zẹ omariẹ kpohọ igbo uvẹ re o kpo. Otẹrọnọ ohwo jọ ọ zẹ uwou hayo otọ riẹ fiki oghẹrẹ nọ eware e rrọ kẹe, a re zihe iei kẹe re. Enẹ a jẹ hae jọ orẹwho Izrẹl ru oke anwae re ohwo ọvo ọ gbẹ jọ ọrigbo rifihọ họ. Etọ orua jọ i gbe je zihe ruọ erọ orua ọfa ha. Kọ eme oyena u wuhrẹ Ileleikristi?

Uzioraha Adamu o wha riẹ ze nọ mai kpobi ma rọ rrọ erigbo uzioraha. Rekọ Ọghẹnẹ o vi Jesu Kristi ze ti whu kẹ omai re ma sai no igbo na. * (Matiu 20:28; Jọn 3:16; 1 Jọn 2:1, 2) Oke vẹ a ti ro si Ileleikristi no igbo uzioraha na? Evaọ ileta nọ Pọl ukọ na o kere se Ileleikristi nọ a rọ ẹzi wholo, ọ ta nọ: “Keme uzi ẹzi ọfuafo na nọ o rẹ rọ uzuazọ kẹ enọ e rrọ usu kugbe Kristi Jesu na u si owhai no igbo uzi uzioraha gbe orọ uwhu no.” (Ahwo Rom 8:2) Onana u dhesẹ nọ Ileleikristi nọ i wo ẹruore obọ odhiwu kpobi, a si rai no igbo evaọ oke nọ a rọ ẹzi ọfuafo wholo ai. Dede nọ a gbẹ rrọ ahwo-akpọ, yọ a gba ha, Ọghẹnẹ o kuenu kẹ ae inọ a kiẹrẹe, je se ai emọ riẹ. (Ahwo Rom 3:24; 8:16, 17) Ukpe Obusino Ileleikristi nọ a rọ ẹzi wholo na u muhọ evaọ Pẹntikọst 33 C.E.

Kọ ẹvẹ kpahe “igodẹ efa” nọ i wo ẹruore inọ a te rria otọakpọ bẹdẹ bẹdẹ na? (Jọn 10:16) Esuo Odu-Ikpe Kristi o ti fiobọhọ kẹ ae no uye nọ a yẹ rai fihọ na. Evaọ Odu-Ikpe nọ Jesu o ti su na, o ti ru nọ ahwo kpobi nọ a yoẹme kẹe a ti ro wo erere no idhe ẹtanigbo riẹ ze. O ve ti si ai no igbo uzioraha gbe uwhu. (Eviavia 21:3, 4) Nọ odu-ikpe na o te re no, yọ ahwo kpobi a zihe ruọ ahwo nọ a rrọ gbagba no. Oke yena yọ ma no igbo uzioraha gbe uwhu nọ Adamu avọ Ivi a fi omai họ na no riẹriẹriẹ. (Ahwo Rom 8:21) Kẹsena Ukpe Obusino Ileleikristi u ve kuhọ.

[Ẹme-Obotọ]

[Uwoho]

Ukpe Obusino Odu-Ikpe na yọ oke nọ eware e te rọ wariẹ woma kẹ “igodẹ efa” na, a ve ti no igbo uzioraha gbe uwhu