Ngaahi Fehuʻi mei he Kau Lautohí

Ko e hā ʻoku tomuʻa fakatātaaʻi ʻe he fokotuʻutuʻu ʻo e taʻu Siupeli ʻoku lave ki ai ʻi he Livitiko vahe 25?

Naʻe tuʻutuʻuni ʻi he Lao ʻa Mōsesé ʻo pehē “ko hono fitu oe taʻu koe sabate ia ke mālōlō ai ae fonua.” ʻI he fekauʻaki mo e taʻu ko iá, naʻe fekauʻi ai ki he kau ʻIsilelí: “Oua naa ke to ai hoo goue, be auhani hoo goue vaine. Koia oku tubu iate ia be i he gaahi fua o hoo taʻu oua naa ke tuuji, be toli ae gaahi kalebi oe vaine tae auhani; he koe taʻu mālōlō ia ki ho fonua.” (Livitiko 25:​4, 5, PM) Ko ia ai, ko e taʻu hono fitu kotoa pē naʻe pau ke hoko ia ko ha taʻu Sāpate ki he fonuá. Pea ko e taʻu hono 50 kotoa pē, hoko atu ʻi he taʻu Sāpate hono fitú, naʻe pau ke hoko ai ha Siupeli. Ko e hā naʻe pau ke hoko ʻi he taʻu ko iá?

Naʻe tala ʻe Sihova ki ʻIsileli fakafou ʻia Mōsese: “Pea te mou tapui ʻa e taʻu ko hono nimangofulu, pea te mou fanongonongo taʻuʻataina ʻi he fonua ki he kau nofo kotoa: ko e siupeli ia kiate kimoutolu, pea te mou foki taki taha ki hono tofiʻa, pea foki taki taha ki hono famili. Ko e siupeli kiate kimoutolu ʻa e taʻu nimangofulu ko ia: ʻe ʻikai te mou to taʻu, pea ʻe ʻikai te mou tuʻusi hono ohi, pe toli hono taʻeʻauhani ke faʻoaki.” (Livitiko 25:​10, 11) Ko ha Siupeli naʻe ʻuhinga iá ko ha ongo taʻu Sāpate hokohoko ʻe ua ki he fonuá. Ka ki hono kakaí, naʻe ʻomai ai ʻa e tauʻatāina. Ko ha kau Siu pē naʻe fakatau pōpula naʻe pau ke fakatauʻatāinaʻi kinautolu. Ko e koloa tukufakaholo naʻe fakamālohiʻi nai ha taha ke ne fakatau atú naʻe pau ke toe fakafoki ia ki hono fāmilí. Ko e Siupelí ko ha taʻu ia ʻo e toe fakafoʻou mo e tauʻatāina ki ʻIsileli ʻo e kuonga muʻá. Ko e hā ʻokú ne tomuʻa fakatātaaʻi ki he kau Kalisitiané?

Ko e angatuʻu ʻa e ʻuluaki tangatá, ʻa ʻĀtama, naʻe ʻomai ai ʻa e faʻahinga ʻo e tangatá ki he pōpula ki he angahalá. Ko e tokonaki ʻa e ʻOtuá ki hono fakaʻatā ʻa e faʻahinga ʻo e tangatá mei he haʻisia ki he angahalá ko e feilaulau huhuʻi ʻa Sīsū  Kalaisí. * (Mātiu 20:28; Sione 3:​16; 1 Sione 2:​1, 2) Ko fē taimi ʻoku fakatauʻatāinaʻi ai ʻa e kau Kalisitiané mei he lao ʻo e angahalá? ʻI he tohi ki he kau Kalisitiane paní, naʻe pehē ʻe he ʻapositolo ko Paulá: “Ko e lao ʻa e Laumalie ko e Moʻuiʻanga, kuo ne fakatauʻataina koe mei he lao ʻa Angahala mo Mate, ʻi hoʻo tuʻu ʻia Kalaisi Sisu.” (Loma 8:2) Ko e faʻahinga ʻoku nau maʻu ʻa e ʻamanaki ʻo e moʻui ʻi hēvaní ʻoku nau maʻu ʻa e tauʻatāina ko ení ʻi he taimi ʻoku pani ai kinautolu ʻaki ʻa e laumālie māʻoniʻoní. Neongo ko honau ngaahi sinó ʻoku fakakakano mo taʻehaohaoa, ʻoku fakahaaʻi ʻe he ʻOtuá ʻoku nau māʻoniʻoni pea ohi kinautolu ko hono ngaahi foha fakalaumālie. (Loma 3:​24; 8:​16, 17) Ki he kau paní ʻi he tuʻunga ko ha kulupú, ko e Siupeli faka-Kalisitiané naʻe kamata ia ʻi he Penitekosi ʻo e 33 T.S.

Fēfē ʻa e “fanga sipi kehe,” ʻoku nau maʻu ʻa e ʻamanaki ʻo e moʻui taʻengata he māmaní? (Sione 10:16) Ki he fanga sipi kehé, ko e Pule Taʻu ʻe Afe ʻa Kalaisí ʻe fakamoʻoniʻi ko ha taimi ia ʻo e toe fakafoʻou mo e tauʻatāina. Lolotonga ʻa e Siupeli Mileniume ko ení, ʻe ngāueʻaki ai ʻe Sīsū ʻa e ngaahi ʻaonga ʻo ʻene feilaulau huhuʻí ki he faʻahinga ʻo e tangatá ʻoku tuí pea fakaleleiʻi ʻa e ngaahi nunuʻa ʻo e angahalá. (Fakahā 21:​3, 4) ʻI he aʻu ki he ngataʻanga ʻo e Pule Mileniume ʻa Kalaisí, ʻe aʻusia ai ʻe he faʻahinga ʻo e tangatá ʻa e haohaoa fakaetangatá pea te nau tauʻatāina kakato mei he angahala mo e mate tukufakaholó. (Loma 8:​21) ʻI hono fakahoko iá, ʻe ʻosi ai ʻa e Siupeli faka-Kalisitiané.

[Fakamatala ʻi lalo]

[Fakatātā ʻi he peesi 26]

Ko e Siupeli Mileniumé—ko ha taimi ia ʻo e toe fakafoʻou mo e tauʻatāina ki he “fanga sipi kehe”