Mga Pakiana Tikang ha mga Magbarasa

Ano an ginpapadagawan han kahikayan han tuig han Jubileo nga gin-unabi ha kapitulo 25 han Lebitiko?

An Mosaiko nga Balaud nagdeklara nga ha “tuig nga ikapito amo an tuig nga iparahuway ha mahal nga pagpahuway para han tuna.” May kalabotan hito nga tuig, an mga Israelita ginsugo: “Diri ka magtanom ha imo uma bisan ha pagkapon han imo urubasan. Hadton tinurok ha iya kalugaringon han imo diri ka magbari, ngan diri ka man liwat magkuha han mga ubas han balagon nga waray mo pagkaponi; kay ito amo an tuig ha mahal nga pagpahuway para han tuna.” (Lebitiko 25:4, 5) Tungod hito, an kada ikapito nga tuig sadang magin tuig han Sabbath para ha tuna. Ngan ha kada ika-50 ka tuig, katapos han tuig han ikapito nga Sabbath nga tuig, sadang magin Jubileo. Ano an sadang mahitabo hito nga tuig?

Hi Jehova nagsiring ha Israel pinaagi kan Moises: “Pagbaraanon niyo an ikakalim-an ka tuig, ngan igpahibaro an kagawasan ha bug-os nga tuna ha ngatanan nga umurukoy dida: ini maaamo an tuig ha karugyaw ha iyo: ngan an tagsatagsa ha iyo bumalik ha iya gintatag-iya, ngan an tagsa ka tawo ha iyo bumalik ha iya panimalay. An tuig nga ikakalim-an maaamo an tuig ha karugyaw [o, Jubileo] ha iyo: diri kamo magpugas, diri man liwat mag-ani hadton nanurok la dida, bisan pamuro han mga ubas nga diri kinapnan, nga aada ha iyo taranman.” (Lebitiko 25:10, 11) An Jubileo nangahulogan hin ikaduha nga sunod-sunod nga tuig han Sabbath para ha tuna. Kondi ha mga umurukoy hito, nagresulta ito hin kagawasan. An bisan hin-o nga mga Judio nga iginbaligya ngadto ha pagkauripon kinahanglan tagan hin kagawasan. An napanunod nga panag-iya nga bangin napiritan nga igbaligya han usa kinahanglan ibalik ha iya pamilya. An Jubileo sadang magin tuig han pagpahiuli ngan kagawasan para ha kadaan nga Israel. Ano an ginpapadagawan hito para ha mga Kristiano?

An pagrebelde han siyahan nga tawo, hi Adan, nagdara han katawohan ha pagkauripon ha sala.  An kahikayan han Dios ha paghatag ha katawohan hin kagawasan tikang ha pagkauripon ha sala amo an halad lukat ni Jesu-Kristo. * (Mateo 20:28; Juan 3:16; 1 Juan 2:1, 2) San-o makakagawas an mga Kristiano tikang ha balaud han sala? Ha pakiistorya ha dinihogan nga mga Kristiano, hi apostol Pablo nagsiring: “An balaud han espiritu ha kinabuhi kan Kristo Jesus nagluwas ha akon tikang ha balaud han sala ngan han kamatayon.” (Roma 8:2) Adton may-ada han paglaom nga kinabuhi ha langit nakarawat hini nga kagawasan ha panahon nga gindidihogan hira han baraan nga espiritu. Bisan kon an ira mga lawas unudnon ngan diri-hingpit, igindideklara hira han Dios nga matadong ngan ginkakarawat hira sugad nga iya espirituwal nga mga anak. (Roma 3:24; 8:16, 17) Para ha mga dinihogan sugad nga grupo, an Kristiano nga Jubileo nagtikang han Pentekostes 33 K.P.

Kumusta man an ‘iba nga mga karnero,’ nga may-ada paglaom nga kinabuhi nga waray kataposan ha tuna? (Juan 10:16) Para ha iba nga mga karnero, an Usa ka Yukot ka Tuig nga Pagmando ni Kristo magigin panahon han pagpahiuli ngan kagawasan. Durante hini nga Milenyal nga Jubileo, ipapadapat ni Jesus an mga kapulsanan han iya halad lukat ha matinoohon nga katawohan ngan wawad-on an mga epekto han sala. (Pahayag 21:3, 4) Ha pagtapos han Pagmando ni Kristo ha Milenyo, madadangat han katawohan an kahingpitan ngan bug-os nga makakagawas na ha napanunod nga sala ngan kamatayon. (Roma 8:21) Kon matuman na ito, an Kristiano nga Jubileo matatapos na.

[Footnote]

[Retrato ha pahina 26]

An Milenyal nga Jubileo—panahon han pagpahiuli ngan kagawasan para ha ‘iba nga mga karnero’