Kimianga i te Akoanga Puapinga Maata

KO TETAI oraanga puapinga e mea inangaro tikai ia. Te akoanga meitaki e te tu kia angaanga kia rotai ki te reira ko te au taviriia e rauka mai ei taua oraanga i roto i teia ao ngata tikai. Inara, kare te au tangata i ariki ua ana i te akarongo ki te akoanga puapinga. E manganui tei karanga ana e mea tau kia akono te tangata i tona oraanga kia tau ki tona uaorai au anoano. Ko te tika, te akaari maira te tataanga Pipiria e kua oronga a Satani, te enemi taito no te tu ngateitei tu-Atua, ki nga tangata mua i te tu akatakake anga. Kua akakite mai a Genese 3:5 i tana akaapaanga kia Eva: “Kua kite oki te Atua e, i te rā e kai ei korua i to reira [te rakau no te kite i te meitaki e te kino], ka puera ïa to korua mata, e ka riro korua mei te Atua ra te tu, i te kite i te meitaki e te kino.”

Kua rauka ainei ia Adamu raua ko Eva i te noo autu ua i muri mai, ma te kore te au tupuanga kino, tei arataki uaia e to raua uaorai au manako ra? Kare rava. Kua viviki raua i te maromaroa no te au tupuanga i te manako anga i te kite i te meitaki mei te kino. Kua topa raua i raro i to te Atua mareka kore e kua akamata i tetai oraanga kino i roto i te tu apa, ko te matenga te tupuanga openga. (Genese 3:16-19, 23) Te tupu nei te mate kia tatou katoatoa. Te karanga ra te Pipiria e: “No te tangata okotai ra [ko Adamu] i o mai ei te kino i te ao nei, e no te kino oki te mate; e kua taea katoaia oki te tangata ravarai e te mate, no te mea kua ara katoatoa.”​—Roma 5:12.

Noatu e te vai ra te au tupuanga kino no ta Adamu raua ko Eva i iki, e manganui te irinaki kore ra rai i te pakari o te akono anga i te akoanga a Tei Maani mai i te tangata. Inara, te akakite maira te Pipiria e ko te reira kua “akauruia mai e te Atua, e e mea meitaki,” e ka rauka i te reira i te tauturu ia tatou kia “tau tikai i te au angaanga memeitaki katoa ra.” (2 Timoteo 3:16, 17) Ka mataora tikai tatou me aru tatou i te akoanga i roto i te Pipiria. Ko te oraanga ngutuare tangata tetai ngai maata te tau ra teia.

Tu Tiratiratu i Roto i te Akaipoipo

Kia tau ki te Pipiria, kua akakoro te Atua i te akaipoipo kia riro ei mea tinamou. (Genese 2:22-24; Mataio 19:6) Pera katoa, te karanga ra te au Tuatua Tapu e “e [kia] viivii kore oki te roi,” te  aite anga e kare e tau teia pirianga kia akaviiviiia e te au piri anga ainga kare i akaipoipo. (Ebera 13:4) Inara, penei kua kite koe, e ko te au akaipoipo e manganui i teia tuatau kare e tau ana ki teia turanga. Ko etai au papaki tangata te matau ra i te akameamea i te ngai angaanga ki te aronga tataki tai kare i to ratou au tokorua. Kua pikikaa tetai ki to ratou au ngutuare tangata kia rauka oki i te akapou i tetai taime ma te tokorua akainangaro kare ra ko to ratou tokorua. Kua akaruke katoa etai i to ratou tokorua kia noo ki tetai patana mapu ake, i te maro anga e te akaraanga mapu maira e te mataora maira ratou, mei tei tupu ana ki to Veronica turanga, tei taikuia mai i te atikara i mua akenei.

Noatu rai, ko tetai tauta anga kia akareka i tetai uaorai noatu e eaa te au tutaki anga ra kare te reira e akatupu mai i tetai mataora mutu kore. Ka rauka ia Ronald i te akapapu mai i te reira. I te manako papu anga e ka rauka iaia i te akatikatika atu i tona oraanga, kua akaruke aia i tana vaine kia akamata i tetai ngutuare tangata ou ma te vaine tei riro mai ko tona tokorua akainangaro muna e ono mataiti e kua anau takere mai e rua nga tamariki nana. Inara, i tetai tuatau i muri mai te akaope anga aia i tona akaipoipo, kua akaruke tana vaine akainangaro iaia! I te openga ra kua oki atu a Ronald i te noo ki tona nga metua. Kua akataka mai aia i tona turanga e e mea “viivii.” Okotai uaia akaraanga. Ko taua tu tei akatupuia e te au anoano karapii kua oronga mai i tetai tupu anga maata no te au kopae anga e te pururu anga o te ngutuare tangata, te akatupu anga i te mamae ki te aronga tataki tai e manganui​—ki te aronga mamaata e te tamariki katoa.

I tetai tua, no te akono anga i te akoanga Pipiria te tupu maira te mataora tika tikai. Ko to Roberto turanga ia, tei karanga e: “Kia akameitakiia te akoanga a te Pipiria, kare au e ruti i taku vaine. Kare e rauka ia tatou te mataora tika tikai na te tuku anga atu ki te timataanga ma tetai ke kare ko to tatou tokorua, noatu e penei e akara anga manea taua tangata ra. Kua tauturu te apiianga Pipiria iaku kia akaperepere i toku tokorua, tei noo i te pae iaku no te au mataiti e manganui.” Kua riro te akoanga Pipiria “e auraka tetai e pikikaa ua atu i te vaine a tona ou anga ra” ei tuanga puapinga maata i roto i to Roberto oraanga. (Malaki 2:15) Na roto i teaa au tu e puapingaia ai tatou mei te akoanga tu-Atua ra?

Te Akonoanga i ta Tatou Tamariki

I te raungauru mataiti i topa akenei kua riro te manako i roto i te akonoanga i ta ratou tamariki ei mea marekaia, auraka oki te nga metua e akanoo i te au kotinga e manganui. I te akara anga e mea tau i te tuku ua i te tamariki kia rave i ta ratou uaorai au ikianga e ka akapeea me manako ana e te akono anga. Ko te akakoroanga ra kia kopaeia te tapupu anga i to ratou tupu anga. I roto i etai au ngai, kua akanoo katoaia te au akaaerenga apii akapapaia i te ngai, i rotopu i tetai atu au apinga, ka rauka te aronga apii i te iki me ka aere atu ratou ki te apii me kare ka rauka i te  iki i te maata o te tamataora anga me kore i te apiianga ka rauka mai ia ratou. Te akauenga a tetai apii no teia tu nei “kia tukunaia te tamariki kia kite i te akakite anga katoa o te au manako ngakau ma te kore te akava anga e te arai anga a tetai tangata mamaata.” I teia tuatau, te taumaro ra rai etai aronga ako i roto i te tu tangata i te au puapinga no te akatere anga i tetai tu o te ako anga, i roto katoa i te au turanga ta te nga metua e manako ra e e mea tau kia oronga atu i te ako anga aroa.

Eaa tei tupu? E maata te au tangata te irinaki ra e ko te au ravenga akatika ua no te akono anga i te tamariki te tuku maata tikai ra i te rangatiraanga ki te tamariki. Kua taki atu teia, ta ratou e manako ra, ki te kino maata e te taangaanga anga i te apinga akakona. Kua akakite mai tetai tareanga i Marike e vaitata ki te 70 patene te aronga tei pau mai e te manako ra e kare e rava ana te arataki anga a te metua i te tamariki e te au mapu tei anoanoia ra e ratou. I te tauta anga i te akataka mai i te au pupui anga i te apii e tetai ua atu au kino tei raveia e te au mapu, kua akaapa te manganui e no te “kore anga oki te akatere anga a nga metua.” E noatu e kare te au tupu anga ei mea kino, ka ruru te nga metua e te tamariki i te au ua kino no te akono tarevake anga i te tamariki.

Eaa ta te Pipiria e karanga maira no runga i teia turanga? Te akoanga Tuatua Tapu koia oki kia taangaangaia te mana taoonga o te metua ma te aroa e pera katoa ma te pakari. Te karanga ra te Pipiria e: “Kua mou rava te neneva ki roto i te ngakau o te tamariki: na te pāpā ra, na te ako, e akataka ke atu iaia.” (Maseli 22:15) E tika, kia tau te ako anga katoatoa a te metua ki te au turanga. E mea tau kia akatereia e te tu maru, te akatere-uaorai, e te manako anga i tetai ua atu papa anga tei orongaia. No reira e akairo te reira no te aroa. Te taangaanga anga i te mana taoonga o te metua na roto i tetai tu aroa, kare na roto i te tu kino tikai, te oronga ra i te akaraanga i te autu anga meitaki.

Te kiteaia ra te au tupu anga meitaki me akonoia teia ako anga. Te karanga ra a Arturo, ko tetai tangata e 30 mataiti no Meiko mai tei akaipoipo ua akenei, e: “Kua akamarama mai toku metua tane i te reira kiaku e ki toku ai taeake e tei ia raua ko toku metua vaine te mana tika anga i roto i te ngutuare tangata. Kare roa raua i tapupu ana i te papa ia matou. Inara, e maata to raua taime i te tuatua ua mai kia matou. Ei tangata mamaata i teianei, te akaperepere nei au i te oraanga meitaki taku e rekareka nei, e kua kite au e kua tupu mai te maata anga no te arataki anga meitaki tei rauka mai iaku.”

E Akono i te Akoanga Puapinga Maata

Te vai ra i roto i te Tuatua a te Atua, te Pipiria, te akoanga puapinga maata tei orongaia mai ki  te tangata ravarai. Kare ta te reira arataki anga i kotingaia ki te akanoonoo anga ngutuare tangata. Te tauturu ra te reira i te akapapa ia tatou i roto i te au mataara e manganui no te mea te apii maira te reira ia tatou e ka akapeea me rave i te angaanga i roto i teia ao e kare te maata anga e inangaro ana i te ariki mai e kia akatereia to ratou oraanga e tetai Tumu pakari teitei ei meitaki no ratou uaorai.

Kua oronga mai te Atua ko Iehova, Tei Anga i te tangata ravarai, i teia akapapu anga na roto i te tata tamaro ko Davida: “E apii atu au ia koe, e akakite atu ei kia koe i taau arataa kia aere ra; e ako atu au ia koe; ei runga ia koe toku mata vaoo ei.” (Salamo 32:8) Ka rauka ainei ia koe i te akamanako e eaa te aite anga o te reira kia akara mai Tei Anga ra ia tatou e rauka ai i te paruru ia tatou mei te au kino ra? Te uianga no tatou taki tai, e, ko teia oki: ‘Ka ariki akaaka ainei au i ta Iehova arataki anga paruru?’ Te akakite aroa maira tana Tuatua kia tatou e: “E irinaki kia Iehova ma to ngakau katoa ra; auraka ra e irinaki ki toou uaorai kite. Auraka e akangaropoina iaia i toou katoa ra au aerenga; e nana e akakite kia koe i toou ra au arataa.”​—Maseli 3:5, 6.

I te kite anga ia Iehova te umuumuia ra te tauta anga e te akatapuanga, inara ka rauka te reira i te au tangata ravarai na roto i te Pipiria. Ko te mataara no te oraanga tana i akamaroiroi mai te “mou maira i te taputou no te oraanga i teianei e ka aru mai.” E aite anga puapinga maata tikai te reira i te manako anga i te au akameitaki anga ta te reira ka oronga mai.​—1 Timoteo 4:8, NW; 6:6.

Me te reka ra koe i te kite e te oronga maira te Pipiria i te au akameitakianga te tupu maira no te akono rotai anga i te reira, e akariro i te tatau anga e te manakonako oonu anga i te Tuatua a te Atua ko te mea maata ia i roto i toou oraanga. Na te rave anga i te reira e tauturu ei ia koe kia autu i te aro atu i te au akaaoanga o teia tuatau e tetai ua atu apinga te vai ra ki mua. Kapiti atu, ka kite koe i te manakonako anga no te noo anga i roto i to te Atua ao ou, te ngai ka apiiia mai te katoatoa e Iehova e ka maata atu to ratou au.​—Isaia 54:13.

[Tutu i te kapi 5]

Ka rauka i te akoanga a te Pipiria i te akaketaketa i te pirianga akaipoipo

[Au Tutu i te kapi 6]

Ko te akoanga Pipiria te tumu anga no te arataki anga meitaki, inara te akatika ra te reira i te tamataora

[Au Tutu i te kapi 7]

Ko te aronga te akono ra i te akoanga Pipiria ka rekareka i tetai oraanga tau