Report Dagiti Manangiwaragawag iti Pagarian

Pananglaglagip ‘Kadagiti Nalipatan a Biktima’

IDI rugrugi ti 2001, ti agtawen iti 15 a Saksi ni Jehova nga agnagan iti Haykaz binisitana ti “Dagiti Nalipatan a Biktima,” maysa nga eksibit idiay Bern, Switzerland, mainaig iti panangidadanes dagiti Nazi kadagiti Saksi ni Jehova. Kalpasan ti panagbisitana, kinuna ni Haykaz: “Nangngegko idin ti narungsot a pannakatrato dagiti Saksi ni Jehova iti sidong ti rehimen ti Nazi, ngem damok ita a makita dagiti autentiko a dokumento ken retrato iti dayta a panawen. Dagiti eksibit, report dagiti nakasaksi, ken komento dagiti historiador iti eksibit tinignayda unay ti isip ken pusok.”

Naminsan, idi nadutokan ni Haykaz a mangaramid iti report para iti klaseda, pinilina ti suheto a “Dagiti Saksi ni Jehova​—Dagiti Nalipatan a Biktima ti Nazismo.” Pinatgan ti maestrona dayta a suheto ngem kinunana ken ni Haykaz a masapul nga iramanna dagiti sekular a literatura kas reperensiana. Siraragsak nga immanamong ni Haykaz. “Nagsuratak iti maysa a sumario ti sumagmamano a rinepasok a libro maipapan kadagiti Saksi ni Jehova idi panawen ti Nazi. Dineskribirko met ti personal a riknak maipapan iti ‘Dagiti Nalipatan a Biktima’ nga eksibit. Iti dayta a 43 a panid a report, nairaman dagiti ilustrasion ken retrato.”

Idi Nobiembre 2002, indatag ni Haykaz ti reportna kadagiti kaeskuelaan, mannursuro, pamilia, ken gagayyemna. Kalpasanna, adda saludsod ken sungbat a paset ti presentasion, ket dayta ti nangted kenkuana iti gundaway a mangilawlawag kadagiti naibatay-Biblia a patpatienna. Idi a ti maysa a babai nga agdengdengngeg insaludsodna no apay a dayta ti pinilina a topiko, inlawlawag ni Haykaz nga adu a libro ti historia ti saan a nangdakamat kadagiti Saksi ni Jehova ket kayatna a maammuan dagiti tattao no kasano a situtured nga indepensa dagiti Saksi ti pammatida kas Kristiano. Ania ti resulta ti presentasionna?

“Nagsiddaaw dagiti kaeskuelaak,” kinuna ni Haykaz. “Dida ammo a dagiti Saksi ni Jehova siuulpit a naidadanesda kas maysa a grupo. Maysa pay, adu ti di makaammo nga adda naisangsangayan a pakabigbigan dagiti Saksi a naipupok kadagiti kampo konsentrasion​—maysa a kolor ube a trianggulo.”

Kalpasan ti presentasion, intuloy ni Haykaz ti nakisarita kadagiti kaklasena ket inlawlawagna ti naibatay-Biblia a takder dagiti Saksi ni Jehova mainaig iti panangyalison iti dara, arak, ken moralidad. “Awan kadagiti kaeskuelaak ti nanguyaw wenno nangumsi kaniak,” kinuna ni Haykaz. Kanayonanna, naitalimeng iti libraria ti eskuelaan ti inaramidna a report. Makatulong dayta tapno sigurado a saan a malipatan ti natibker a takder dagiti Saksi ni Jehova.