Informe di Proclamadonan di Reino

“Victimanan Lubida” Ta Ser Recorda

NA PRINCIPIO di aña 2001, Haykaz, un Testigo di Yehova di 15 aña, a bishita un exhibicion titula “Victimanan Lubida”, na Bern, Suisa. E exhibicion tawata tocante e persecucion cu Testigonan di Yehova a sufri na man di e nazinan. Na final di e bishita, Haykaz a bisa: “Mi a tende di e trato y sufrimento inhumano cu Testigonan di Yehova a experencia bou di e regimen nazi, pero esaki tawata prome biaha cu mi a mira documentonan autentico y potretnan di e tempo ei. E obhetonan exhibi, e informenan di testigo y e comentarionan di historiadonan na e exhibicion a haci un impresion profundo riba mi mente y curason.”

Poco tempo despues, ora cu Haykaz mester a skirbi un scriptie pa su examen final na scol secundario, el a scohe e topico “Testigonan di Yehova—E Victimanan Lubida di Nazismo.” Su maestro a bai di acuerdo cu e topico pero el a bisa Haykaz cu e mester inclui literatura no religioso den su fuentenan di informacion. Gustosamente Haykaz a bai di acuerdo cu esei. E di: “Mi a lesa algun buki tocante Testigonan di Yehova durante e era Nazi y a skirbi un resumen di nan. Tambe mi a describi mi impresion personal di e exhibicion ‘Victimanan Lubida.’ Mi scriptie di 43 pagina a inclui plachi y potret.”

Na november 2002, Haykaz a presenta su scriptie na compañeronan di scol, maestronan, famia y amigonan. Despues, tawatin un sesion di pregunta y contesta, cu a dun’e un oportunidad di splica su creencianan basa riba Bijbel. Ora cu un mucha mohe den auditorio a puntr’e dicon el a scohe e topico aki, Haykaz a splica cu hopi buki di historia no ta menciona Testigonan di Yehova y cu e tawata kier pa hende sa cu cuanto curashi e Testigonan a defende nan fe cristian. Kico tawata e resultado di su presentacion?

Haykaz a conta: “Mi compañeronan di scol a keda babuca. Nan no tawata sa cu Testigonan di Yehova como grupo a ser persigui ferosmente. Y hopi di nan no tawata sa tampoco cu e Testigonan encarsela den camponan di consentracion Nazi tawatin un simbolo special di identificacion—un triangulo biña.”

Despues di su presentacion, Haykaz a haya mas oportunidad pa papia cu su compañeronan di klas y por a splica nan e posicion basa riba Bijbel cu Testigonan tin pa cu transfusion di sanger, alcohol y moralidad. Haykaz a remarca: “Ningun di mi compañeronan di klas no a haci bofon di mi of tenta mi.” Es mas, e scol a pone su scriptie den e biblioteca di scol. Esei sigur lo yuda pa hende no lubida e posicion balente cu Testigonan di Yehova a tuma.