Ripoti a te Aronga Tutu Patireia

“Te Au Tangata Tei Akangaropoinaia” kua Akamaaraia

I TE akamataanga o te 2001, kua atoro atu a Haykaz, e Kite no Iehova e 15 mataiti te pakari, i “Te Au Tangata Tei Akangaropoinaia,” e akaariarianga i Bern, Tuiterani, tei akara i te takinokino anga a te Nazi i te Au Kite o Iehova. I te openga o tana atoro anga, kua karanga a Haykaz e: “Kua rongo ana au i te takinokinoanga tau kore e te mamae tei kiteaia e te Au Kite o Iehova i raro ake i te tutaraanga a te Nazi, inara ko teia tikai te taime mua i kite mai ei au i te au pepa tata e te au tutu tika tikai o taua taime ra. Te au akaariarianga, te au ripoti a te aronga kite mata, e te au tuatua a te aronga tuatua enua i ko i te akaariarianga kua akaruke mai i tetai manakoanga oonu i runga i toku manako e toku ngakau.”

I etai tuatau i muri mai, i te patiia anga a Haykaz kia tata i tetai ripoti no tona pupu apii i te apii maata, kua iki aia i te tumu manako “Te Au Kite o Iehova​—Te Au Tangata Akangaropoinaia tei Takinokinoia e te Akatere Anga Nazi.” Kua akatika tona puapii i te tumu manako inara kua akakite atu kia Haykaz e ka inangaroia aia kia kapiti mai i te au puka no te ao nei i roto i tana au tumuanga. Kua ariki rekareka a Haykaz. “Kua tata au i tetai tataanga poto ua no etai au puka taku i kite mai no runga i te Au Kite o Iehova i te taime o te tuatau Nazi. Kua akataka katoa au i toku uaorai manako no te akaariarianga o te ‘Au Tangata Akangaropoinaia.’ Kua kapitiia mai i roto i teia ripoti e 43 kapi te au akatutuanga e te au tutu.”

I roto ia Noema 2002, kua oronga atu a Haykaz i tana ripoti ki tona au oa apii, te au puapii, te pamiri, e te au oa. I muri akera, e tuanga tetai no te uianga e te pauanga, tei oronga kiaia i tetai tuatau kia akataka i tona au irinaki tei akatumuia ki runga i te Pipiria. I te ui mai anga tetai tamaine i roto i te aronga akarongorongo maira e eaa oki aia i iki ei i teia tumu manako, kua akataka atu a Haykaz e e kare oki te au puka tuatua enua e manganui e taiku ana i te Au Kite o Iehova e kua inangaro aia kia kite mai te tangata e i akapeea te Au Kite i te paruru mataku kore anga i to ratou akarongo Kerititiano. Te tupuanga no tana akakiteanga?

“Kua umere tikai toku au oa apii,” i karanga ei a Haykaz. “Kare oki ratou i kite ana e kua takinga kino tikaiia te Au Kite o Iehova ei pupu. Pera katoa, kare te manganui i kite ana e kua aao te Au Kite tei mouriaia i roto i te au puakapa tamamaeanga Nazi i tetai akatakaanga takake​—e toroenga vareau.”

Aru mai i tana akakitekiteanga, kua maata mai te tuatau ia Haykaz i te tuatuaanga ki tona au oa apii e kia uriuri i te turanga tei akatumuia ki runga i te Pipiria o te Au Kite no runga i te pamuanga toto, te kava, e te au tu akono tau. “Kare roa tetai o toku au oa apii i aviri me kore i urutoe mai ana iaku,” i karanga ei a Haykaz. Pera katoa, kua tukunaia tana ripoti i teianei ki roto i te ngai vairanga puka i te apii. Ka tauturu te reira i te akapapu e kare roa te turanga mataku kore o te Au Kite o Iehova e akangaropoinaia.