Maŋtsɛyeli Jajelɔi Bɔ Amaniɛ

Wolo ni Jɛ Alejandra Ŋɔɔ

WOLOŊMAA efee gbɛ ko ni mɔɔ shi jogbaŋŋ ni atsɔɔ nɔ ayeɔ odase. Eyɛ mli akɛ anyɛŋ ashwã afɔ nɔ ni baanyɛ ajɛ mli aba lɛ nɔ moŋ, shi ajɔɔ mɛi ni yaa nɔ amɛkɛ dɛŋdade nɛɛ tsuɔ nii lɛ babaoo diɛŋtsɛ. Amɛkaiɔ Biblia mli ŋaawoo ni nilee yɔɔ mli nɛɛ akɛ: “Leebi lɛ dũ odũmɔnii lɛ, ni gbɛkɛ hu kaajie onine yɛ he; ejaakɛ oleee emli nɔ ni baahi, enɛ jio, enɛ jio, aloo ekolɛ enyɔ lɛ fɛɛ baahi pɛpɛɛpɛ jio.”—Jajelɔ 11:6.

Odasefonyo oblayoo ko ni atsɛɔ lɛ Alejandra ni kɛ aaafee afii nyɔŋma esɔmɔ yɛ Yehowa Odasefoi anitsumɔhe nine ni yɔɔ Mexico lɛ, miitsa ehe yɛ kansa hela ni gbaa enaa lɛ hewɔ. Eshihilɛ lɛ mli bawo wu, ni egbɔjɔ kwraa aahu akɛ enyɛɛɛ ni etsu daa gbi nitsumɔ ni akɛwo edɛŋ lɛ he nii. Shi kɛlɛ, akɛni Alejandra sumɔɔɔ ni ekuɔ ehiɔ efɔɔ esɔɔmɔ nitsumɔ lɛ nɔ hewɔ lɛ, eto eyiŋ akɛ ebaaŋma woji kɛmaje. Eŋma saji ni kɔɔ shĩa Biblia mli nikasemɔ he gbɛjianɔ ni ato ni aheee nɔ ko lɛ he, ni ekɛ enyɛ telifon nɔmba fata he. Kɛkɛ ni ekɛ woji ni eŋmala lɛ hã enyɛ koni eshi enɛɛmɛi yɛ shiai ni gbɔmɛi bɛ mli lɛ anaa, beni ekɛ ehe woɔ shĩa kɛ shĩa sɔɔmɔ nitsumɔ lɛ mli lɛ.

Yɛ nakai beaŋ nɔŋŋ lɛ, gbekɛ yoo fioo ko ni atsɛɔ lɛ Diojany, ni jɛ Guatemala lɛ yatsu nii akɛ abaawa yɛ Cancún, Mexico. Beni eyɔɔ jɛmɛ lɛ ekɛ Yehowa Odasefoi ná sanegbaa, ni emii shɛ Biblia mli sane ni ekɛ amɛ gba lɛ he. Yɛ sɛɛ mli lɛ, enitsumɔtsɛmɛi lɛ kpɛ amɛyiŋ akɛ amɛbaafa kɛya Mexico Maŋtiase lɛ mli, ni amɛmiisumɔ koni efata amɛhe kɛya. Diojany shashao shi akɛ ebaaya ejaakɛ no baatsɔɔ akɛ ekɛ Odasefoi lɛ naŋ sharamɔ dɔŋŋ.

Enitsumɔtsɛmɛi lɛ kɛ nɔmimaa kɛɛ lɛ akɛ: “Kaaha enɛ miigba onaa, Odasefoi lɛ yɛ he fɛɛ he. Wɔbaatao amɛsɛɛ gbɛ kɛji akɛ wɔyashɛ jɛmɛ amrɔ nɔŋŋ.” Yɛ gbɛkpamɔ ni yɔɔ miishɛɛ nɛɛ hewɔ lɛ, Diojany kpɛlɛ nɔ akɛ ekɛ amɛ baaya. Beni amɛyashɛ Mexico Maŋtiase lɛ mli lɛ, Diojany nitsumɔtsɛmɛi lɛ tao Odasefoi lɛ asɛɛgbɛ. Yɛ yiŋtoo ko hewɔ lɛ, amɛnine eyashɛɛɛ amɛnɔ, eyɛ mli akɛ Odasefoi ni fa fe 41,000 kɛ asafoi 730 sɔŋŋ yɔɔ nakai maŋtiase lɛ mli.

Etsɛɛɛ nɔŋŋ ni Diojany nijiaŋ bɔi wujee ejaakɛ enyɛko ekɛ Odasefoi lɛ akpe kɛha Biblia mli sanegbaa lɛ nɔtsamɔ lolo. Gbi ko lɛ, oblayoo ni etsuɔ nii ehaa lɛ lɛ ba eŋɔɔ ebakɛɛ: “Naakpɛɛ sane! O-Nyɔŋmɔ lɛ eha osɔlemɔi lɛ ahetoo.” Beni yoo lɛ kɛ wolo ni aŋma lɛ haa lɛ lɛ ekɛɛ akɛ: “Odasefoi lɛ eshi wolo nɛɛ amɛha bo.” Eji wolo ni jɛ Alejandra ŋɔɔ.

Diojany kɛ Alejandra nyɛ kɛ enyɛmi yoo Blanca ná sanegbaa, ni ekpɛlɛ Biblia mli nikasemɔ nɔ. Yɛ otsii fioo komɛi asɛɛ lɛ, ekɛ Alejandra kpe ni amɛná miishɛɛ akɛ amɛkɛ amɛhe ekpe. Alejandra wo lɛ hewalɛ koni eya nɔ ebɔ mɔdɛŋ yɛ e-Biblia nikasemɔ lɛ mli bɔni afee ni enyɛ eya ehiɛ yɛ Yehowa jamɔ mli.

Yɛ nyɔji fioo komɛi asɛɛ yɛ July afi 2003 lɛ, Alejandra gbó, ni eshi hemɔkɛyeli kɛ ekãa he nɔkwɛmɔnɔ kpakpa efɔ shi eha enanemɛi heyelilɔi lɛ. Beni afeɔ eyara lɛ, eta mɛi babaoo atsui mli beni amɛnu akɛ Diojany miiwie akɛ: “Alejandra kɛ eweku lɛ efee nɔkwɛmɔnɔ kpakpa kɛha mi. Mitswa mifai shi akɛ masɔmɔ Yehowa koni abaptisi mi amrɔ nɔŋŋ. Kwɛ bɔ ni mishweɔ akɛ mana Alejandra ekoŋŋ yɛ Paradeiso ni baa lɛ mli!”

Hɛɛ, wolo ni aŋmaa baanyɛ afee nɔ ko ni he ehiaaa tsɔ. Shi kwɛ bɔ ni hewalɛ ni enaa yɛ mɔ nɔ lɛ baanyɛ afee nɔ ni anyaa he ni hiɔ shi daa ha!