Piho ya Bashaeli ba Mubuso

Liñolo le li Zwa ku Alejandra

KU ÑOLA MAÑOLO i bile nzila ye nde hahulu ya ku paka ka yona. Nihaike fokuñwi ha ku zibahalangi kuli ki lifi ze ka zwa mwateñi, ba ba tundamena ku itusisa nzila ye, ba fumani limbuyoti ze tuna. Ba hupula kelezo ya mwa Bibele ye butali ye li: “Cala peu ya hao isali kakusasana, mi u si ke wa pumulisa mazoho a hao ka swalala; kakuli ha u zibi kuli ku ka mela peu ifi, kamba ye, kamba yani, kamba mwendi li ka mela hande ze peli.”—Muekelesia 11:6.

Alejandra, Paki wa mukulwani ya n’a s’a sebelelize fa ofisi ya mutai wa Lipaki za Jehova wa kwa Mexico ka lilimo ze bat’o ba ze lishumi, n’a sweli ku fiwa kalafo ya butuku bwa kansa. A kula hahulu kuli mane n’a palelwa nihaiba ku peta lika za n’a ezanga ka zazi. Kono ka ku sa bata ku keshebisa bukombwa bwa hae, Alejandra a kala ku ñola mañolo. A ñola ka za tukiso ya ku ituta Bibele ni batu fa mandu ye zamaiswanga ku si na tifo hamohocwalo ni ka za nombolo ya luwaile lwa bom’ahe. Hamulaho, a fa mañolo ao ku bom’ahe kuli ha ba nze ba eza bukombwa bwa bona bwa fa ndu ni ndu ite ba siye fa ndu kaufela fo ne ba si ka fumana mutu.

Ka nako ye swana yeo, Diojany, kalibe wa kwa Guatemala, n’a ile ku yo sebeleza kwa Cancún, kwa Mexico sina mubeleki wa fa lapa. Teñi k’o, a kopana ni Lipaki za Jehova mi a ikola ku ambolisananga ni bona ka za Bibele. Hasamulaho, malen’a hae ba hupula ku tutela kwa Mexico City mi ne ba bata ku ya ni yena. Diojany yena a zina-zina kakuli ne ku ka talusa kuli n’a si ke a bonananga ni Lipaki.

Malen’a hae ba mu sepisa kuli: “U si ke wa bilaela, Lipaki ba fumaneha kai ni kai. Lu ka ba bata lu sa fita fela.” A mano sepiswa cwalo, Diojany a lumela ku ya ni bona. Ba sa fita fela mwa Mexico City, malen’a Diojany ba bata Lipaki. Ka mabaka a s’a zibahali, ne ba palezwi ku ba fumana, nihaike ne ku na ni Lipaki ba ba fitelela 41,000 ni liputeho ze 730 mwa tolopo yeo.

Hañihañi, Diojany n’a zwafa kabakala kuli n’a palezwi ku fumana Lipaki kuli a zwelepili ku ba ni lipuhisano za Bibele ni bona. Zazi le liñwi mulen’a hae wa musali a to mu bulelela kuli: “Bona! Mulimu wa hao u utwile litapelo za hao.” A man’o mu tambeka liñolo, a mu bulelela kuli: “Lipaki ba ku siyezi liñolo le.” Ne li liñolo le ne li zwa ku Alejandra.

Diojany a yo lizeza luwaile bom’ahe Alejandra ni kaizel’a hae, Blanca, mi a lumela ku ituta Bibele. Hamulaho wa livikinyana, a yo bonana ni Alejandra mi ba tabela ku bonana. Alejandra a mu susueza ku tukufalelwa mwa tuto ya hae ya Bibele kuli a eze zwelopili ya kwa moya.

Likweli li sikai ku zwa f’o, mwa July 2003, Alejandra a timela mi a siyela balumeli ka yena mutala o munde wa tumelo ni bundume. Fa maswabi, buñata bwa batu be ne ba kopani ni Diojany ne ba susumelizwe ha ne ba mu utwile ha bulela kuli: “Alejandra ni lubasi lwa hae ba ni file mutala o munde. Ni ikatulezi ku sebeleza Jehova ni ku kolobezwa honafa. Ni nyolezwi hahulu ku bonana hape ni Alejandra mwa Paradaisi ye taha!”

Kaniti, liñolo li kona ku ba nto ye nyinyani. Kono, ze zwanga mwateñi li kona ku ba ze nde hahulu!