Lipoti a Ē Faalauiloa le Malo

O se Tusi Mai iā Alejandra

UA LOA ona avea le tusia o tusi ma auala aogā e avatu ai se molimau. E ui e foliga mai i nisi taimi e lē maua ai ni iʻuga lelei, ae o i latou e finafinau pea e faia lenei auala, ua matuā faamanuiaina. E latou te manatua le fautuaga atamai a le Tusi Paia e faapea: “O le taeao ia e lūlū ai au saito, aua foʻi le mapu lou lima i le afiafi; auā e te lē iloa po o lē fea e manuia, o lenei, po o lenā, pe gatusa ona lelei o ia mea e lua.”—Failauga 11:6.

O Alejandra, o se Molimau talavou sa auauna i le ofisa o le lālā o Molimau a Ieova i Mekisikō pe tusa ma le sefulu tausaga, ae sa faia sona togafitiga o le chemotherapy mo le kanesa. Sa tulaga leaga lona maʻi ma oo ai ina matuā vaivai o ia na lē mafai ai ona faia ona tiute masani i aso taʻitasi. Ae peitaʻi, e leʻi manaʻo o ia e lafoaʻia lana faiva, o lea na filifili ai Alejandra e tusia ni tusi. Sa ia tusia e faatatau i le fuafuaga o suʻesuʻega faale-Tusi Paia i aiga e aunoa ma se totogi, ma tusia ai le numera o le telefoni a lona tinā. Ona ia avatu lea o tusi i lona tinā ina ia alu atu e tuu i fale ia sa lē maua atu i ai ni tagata a o talaʻi mai lea fale i lea fale.

I le taimi lenā, sa iai se teine mai Guatemala e igoa iā Diojany, na alu atu e faigaluega o se teine teufale i Cancún, i Mekisikō. A o iai Diojany i inā, na feiloaʻi ai o ia ma Molimau a Ieova, ma sa fiafia e faia ni talanoaga faale-Tusi Paia ma i latou. Mulimuli ane, na siitia atu lona pule i Mekisikō ma sa mananaʻo latou te ō ma Diojany. Sa faatalatū le teine e alu auā o le a lē toe feiloaʻi ai ma Molimau.

Sa faamautinoa atu e lona pule iā te ia e faapea: “Aua e te popole, e iai lava Molimau i so o se mea. O le taimi lava tatou te taunuu atu ai, ona tatou ō loa lea e suʻe i latou.” Ona o lenā faamoemoe fiafia, na ioe ai Diojany e ō ma lona pule. Na taunuu atu loa i le aai o Mekisikō, ona ō loa lea o le pule o Diojany e saʻili ia Molimau. Ae atonu na iai se māfuaaga na latou lē mauaina ai Molimau, e ui lava e sili atu i le 41,000 Molimau, ma faapotopotoga e 730 e iai i le aai.

Na lotovaivai Diojany ona o le lē mafai ona ia mauaina Molimau ina ia faaauau pea ana talanoaga faale-Tusi Paia. I se tasi aso, na alu atu ai le pule tamaʻitaʻi o Diojany ma faapea atu: “O se mea e ofo ai! Ua faafofoga lou Atua i au tatalo.” Na tuu atu iā te ia se tusi ma faapea atu: “O lea na tuu e Molimau le tusi lenei mo oe.” O se tusi mai iā Alejandra.

Sa faafesootaʻi atu loa e Diojany le tinā ma le uso o Alejandra, o Blanca, ma taliaina ai se suʻesuʻega faale-Tusi Paia. Ina ua mavae ni nai vaiaso, sa la feiloaʻi fiafia ai loa ma Alejandra. Sa faalaeiauina o ia e Alejandra ina ia faaauau pea lana suʻesuʻega faale-Tusi Paia ina ia mafai ai ona ia agaʻigaʻi i luma faaleagaga.

I ni nai masina mulimuli ane, iā Iulai 2003, na maliu ai Alejandra, ae ua tuua ai se faaaʻoaʻoga lelei o le faatuatua ma le lototele i ona uso talitonu. I le falelauasiga, sa matuā ootia le toʻatele ina ua latou feiloaʻi atu ia Diojany, ma faalogo atu o ia faapea mai: “Ua avea lava ia Alejandra ma lona aiga o se faaaʻoaʻoga mataʻina mo aʻu. Ua ou manaʻo lava e auauna iā Ieova ma ia vave ona papatisoina aʻu. Maʻeu loʻu faanaunau ou te toe vaai iā Alejandra i le Parataiso o loo sau!”

Ioe, atonu o se mea faatauvaa se tusi. Ae e mafai ona maua ai ni iʻuga fiafia e faavavau!