Storia di Bida

Un Educacion Cu A Sigui Henter Mi Bida

SEGUN E RELATO DI HAROLD GLUYAS

Pa mas cu 70 aña mi ta corda un esena di mi infancia. Mi ta corda con mi tawata sinta den cushina di Mama, mirando un etiket cu tawata bisa “Ceylon Tea” (Te di Ceylon). E etiket tawatin tambe un plachi di algun mohe pikiendo blachi di te den e cunucunan berde y bunita di Ceylon (awor Sri Lanka). E esena aki cu tawata masha leu mes for di nos area seco di Sur Australia, a stimula mi imaginacion masha hopi. Ceylon lo mester ta un pais bunita y excitante! E tempo ei mi no por a imagina cu lo mi a pasa 45 aña di mi bida como misionero riba e isla precioso ei.

NA APRIL 1922, mi a nace den un mundo hopi distinto for di esun djawe. Mi famia tawatin un cunucu isola di grano serca di e stad remoto Kimba, situa den e region central di e inmenso continente di Australia y na e rand sur di e gran desierto den interior. Bida tawata yen di peliger, y a encera un bataya constante cu secura, plaganan di insecto y calor sofocante. Mi mama a traha duro pa cuida Tata y nos seis yiu den un cas den mondi cu eigenlijk tawata djis un casita di zim.

Pero pa mi, e mondi tawata un luga excitante y di libertad. Mi ta corda con impresiona mi tawata como mucha mirando teamnan di toro rosa mondi of scuchando tormentanan fuerte di santo podera di e cunucunan. Pues, mi educacion den bida realmente a cuminsa hopi prome cu mi a cuminsa bai scol; un scol chikito  di un solo maestro cu a keda cinco kilometer for di nos cas.

Mi mayornan tawata religioso, maske nunca nan no a bai misa, principalmente debi na e distancia di nos cunucu pa stad. No obstante, na principio di decada di 1930, Mama a cuminsa scucha charlanan di Bijbel duna door di Hues Rutherford, cu nan tawata transmiti tur siman na un emisora di radio di Adelaide. Ami a kere cu Hues Rutherford tawata un pasto na Adelaide, y mi no tawata masha interesa. Pero tur siman Mama tawata spera ansiosamente riba e transmisionnan di Rutherford y a scucha atentamente segun cu su stem tawata sali cu interferencia for di nos radio anticua di bateria.

Un atardi cayente, cu hopi stof, un pickup bieu a yega para dilanti di nos cas, y dos homber bon bisti a baha. Nan tawata Testigo di Yehova. Mama a scucha nan mensahe y a contribui pa varios buki, cu el a cuminsa lesa mesora. E bukinan aki a haci un impresion asina profundo riba dje cu poco despues el a pidi Tata hib’e serca nos biciñanan pa asina e por a papia cu nan tocante loke el a siña.

E Beneficio di Bon Influencia

No mucho despues di esaki e bida pisa di mondi a obliga nos muda bai na e stad di Adelaide, 500 kilometer leu. Nos famia a cuminsa asocia cu Congregacion Adelaide di Testigonan di Yehova y a haci progreso spiritual. Nos mudansa a pone un fin tambe na mi educacion escolar. Mi a caba scol cu 13 aña so, y a yega te cu klas shete. Mi tawatin un caracter trankil, y esaki facilmente lo por a desvia mi for di metanan spiritual si no tawata pa e yudansa di varios ruman homber excelente—cu tawata pionero of predicado di tempo completo—cu a mustra un interes personal den mi.

Cu transcurso di tempo e influencia di e rumannan celoso aki a stimula mi interes den cosnan spiritual cu tawata como si fuera na soño. Mi a gusta nan compania y tawata admira nan spirito trahado. Pesei ora cu na un congreso na Adelaide na 1940 nan a haci un anuncio pa stimula sirbishi di tempo completo, mi a sorprende mi mes door di duna mi nomber. Mi no tawata ni batisa e tempo ei y mi tawatin masha tiki experencia den e predicacion. No obstante, un par di dia despues, mi a haya e invitacion pa join un grupo chikito di pionero na Warrnambool, un pueblo cu a keda rond di 500 kilometer for di Adelaide, den e estado biciña Victoria.

Apesar di e comienso indeciso aki, no a tarda hopi cu mi a desaroya un amor pa sirbishi di veld. Y mi ta contento di por bisa cu e amor ei no a fria atrabes di añanan. De echo, esei tawata un punto decisivo pa mi, y mi a cuminsa haci berdadero progreso spiritual. Mi a siña e balor di hala serca di personanan cu tin un amor pa cosnan spiritual. Mi a descubri con  nan bon influencia por saca lo miho cu tin den nos sin importa nos educacion, y tambe con loke nos siña di e manera aki por beneficia nos durante henter nos bida.

Fortaleci Door di Prueba

Mi tawatin un tempo cortico den e sirbishi di pionero ora cu nan a prohibi e obra di Testigonan di Yehova na Australia. Como cu mi no tawata sa sigur kico mi tin cu haci, mi a busca guia serca e rumannan, cu a mustra mi cu no tawata prohibi pa papia cu hende tocante Bijbel. Pues hunto cu e otro pioneronan, mi a cuminsa bai di cas pa cas cu un mensahe simpel for di Bijbel. Esaki a fortalece mi pa pruebanan cu tawatin djis mi dilanti.

Cuater luna despues mi a haci 18 aña y nan a manda yama mi pa drenta servicio militar. Esaki a duna mi oportunidad pa defende mi fe dilanti di varios oficial militar y un hues. E tempo ei tawatin mas o menos 20 ruman homber den prizon di Adelaide debi na nan posicion neutral, y poco despues mi a join nan. Nos a ser asigna pa haci trabou forsa, construccion di caretera y cobamento di piedra. Esaki a yuda mi desaroya cualidadnan manera perseverancia y determinacion. Nos bon comportacion y posicion firme cu tempo a pone cu hopi di e wardadonan di preso a cuminsa respeta nos.

Ora mi a sali liber varios luna despues, mi a disfruta di un bon cuminda y a cuminsa traha pionero atrobe. Sinembargo, no tawatin hopi partner pa traha pionero cu ne, pesei e rumannan a pidi mi pa mi so bai traha den un area remoto di cunucu den Sur Australia. Mi a bai di acuerdo y a sali cu barco rumbo pa e Peninsula Yorke, ekipa cu solamente mi cosnan di predicacion y un bais. Ora mi a yega, un famia interesa a dirigi mi na un pension chikito caminda un señora bondadoso a trata mi manera su yiu. Den dia, mi tawata bai cu bais riba camindanan di tera, predicando den e pueblitonan plama tur rond di e peninsula. Pa por a predica na luganan leu, de bes en cuando mi tawata keda drumi den hotelnan chikito of pension. Den e manera aki mi a core cientos di kilometer y tawatin hopi experencia dushi. Nunca mi no a worry mucho cu mi tawata mi so den sirbishi, y segun cu mi tawata experencia con Yehova a percura pa mi, mi a hala mas serca di dje.

Con Mi A Trata cu Sintimentonan di Incapasidad

Na 1946, mi a haya un carta di invitacion pa drenta den e trabou biahero como un sirbido di e rumannan (cu awor yama superintendente di sircuito). Esaki a encera cu mi mester a bishita un cantidad di congregacion den un cierto sircuito. Mi tin cu admiti cu mi a haya e responsabilidadnan di e asignacion aki hopi dificil. Un dia mi a tende un ruman bisa un otro: “Harold no ta masha bon riba plataforma, pero den sirbishi e ta tremendo.” E comentario aki a anima mi masha hopi. Mi tawata bon conciente cu mi capasidadnan di duna discurso y di organisa tawata limita, pero pa mi, ta e trabou di predica tawata e actividad principal pa cristiannan.

Na 1947, nos tawata masha emociona cu e bishita di Ruman Nathan Knorr y Milton Henschel for di e sede di Testigonan di Yehova na Brooklyn. Esaki tawata e prome bishita asina desde cu Ruman Rutherford a bini na 1938. Nos a tene un congreso grandi na Sydney pareu  cu e bishita aki. Mescos cu hopi otro pionero hoben, mi tawata interesa den e entrenamento pa misionero cu nan tawata duna na e Scol Biblico di Galad di Watchtower cu a cuminsa resientemente na South Lansing, New York, Merca. Varios di nos presente tawata puntra nos mes si e scol tawata exigi pa bo tin hopi educacion pa bo por inscribi. Sinembargo, Ruman Knorr a splica cu si nos por a lesa un articulo den e revista Toren di Vigilancia y corda e puntonan clave, probablemente nos lo tin exito na Galad.

Ami a sinti cu mi educacion limita lo a descualifica mi. Pero pa mi sorpresa, varios luna despues mi a haya invitacion pa inscribi pa e entrenamento di Galad. Despues mi a ser acepta como studiante, y mi a asisti na e di 16 klas cu nan a tene na 1950. E scol aki a resulta di ta un experencia maraviyoso cu a duna mi masha hopi confiansa. Esei a siña mi cu logro academico no ta e factor principal pa exito. E rekisitonan principal ta mas bien diligencia y obediencia. Nos instructornan a anima nos pa haci nos best. Segun cu mi a haci caso di nan conseho, mi a progresa constantemente y mi por a sigui e curso hopi bon.

Di un Continente Seco pa un Isla Precioso

Despues di graduacion, ami cu dos otro ruman homber di Australia a keda asigna na Ceylon (awor Sri Lanka). Nos a yega na e ciudad capital, Colombo, na september 1951. E luga tawata cayente y sofocante, y nos sentidonan a haya un avalancha di bista, zonido y aroma nobo. Ora nos a baha for di e barco, un di e misioneronan cu tawata sirbi caba den e pais a duna mi bonbini cu un panfleta den su man cu a anuncia un discurso publico pa e siguiente diadomingo riba e plenchi di stad. Pa mi sorpresa, mi nomber tawata riba e panfleta como e orado! Bo por imagina con nervioso mi tawata. Pero e añanan cu mi a traha pionero na Australia a siña mi pa acepta tur asignacion cu mi haya. Pues cu Yehova su yudansa, mi a duna e discurso publico cu exito. Hunto cu e cuater ruman hombernan soltero cu ya caba tawata den e cas di misionero na Colombo, nos tres a cuminsa siña e idioma dificil Singala y participa den sirbishi di veld. Mayoria biaha nos tawata traha nos so, y nos tawata contento cu e hendenan local tawata respetuoso y hospitalario. No a tarda mucho cu asistencia na reunion a cuminsa aumenta.

Segun cu tempo a pasa, mi a cuminsa pensa seriamente riba Sybil, un ruman mohe pionero masha atractivo cu mi a topa ora mi tawata riba barco bayendo Scol di Galad. E tawata rumbo pa e congreso internacional na New York. Despues, el a asisti na e di 21 klas y a ser asigna na Hong Kong na 1953. Mi a dicidi di skirbie, y nos a sigui coresponde cu otro te cu 1955 ora cu Sybil a join mi na Ceylon, caminda nos a casa.

Nos prome asignacion hunto como pareha misionero tawata Jaffna, un stad leu den nort di Sri Lanka. Meimei di decada di 1950, diferencianan politico a cuminsa dividi e comunidadnan Singales y Tamil, locual a forma e base pa conflictonan arma den decadanan despues. Tawata masha alentador pa mira Testigonan Singales y Tamil proteha otro pa lunanan largo durante e añanan dificil ei! E pruebanan aki a refina y fortalece e fe di e rumannan.

 E Trabou di Predica y Siña Hende na Sri Lanka

Nos tawatin mester di pasenshi y perseverancia pa ahusta na e comunidadnan hindu y moslem. Asina mes, nos a bin compronde ambos cultura y nan cualidadnan atractivo. Como cu normalmente stranheronan no tawata uza busnan local, hopi bes hende tawata keda wak nos cu curiosidad ora nos ta den bus. Sybil a dicidi cu ora nan keda wak, e ta smile cu nan. Nos tawata keda hopi contento ora cu e caranan yen di curiosidad contesta nos cu un bunita smile!

Na un ocasion, nan a para nos na un control riba caminda. Despues cu e bewaker na warda a puntra nos di unda nos ta y na unda nos ta bai, su preguntanan a bira mas personal.

“Ken e mohe aki ta?”

“Mi casa”, mi a contesta.

“Cuanto tempo bo tin casa?”

“Ocho aña.”

“Boso tin yiu?”

“No.”

“Holo! Anto boso a bai docter?”

Na principio e curiosidad natural aki a sorprende nos, pero cu tempo nos a mir’e como un expresion di berdadero interes personal cu e pueblo local tawatin den otro hende. De echo, esei tawata un di nan cualidadnan mas atractivo. Si un persona djis para un rato den un luga publico, un hende ta acerc’e y puntr’e bondadosamente si e por a yud’e cu algo.

Cambionan y Reflexion

Atrabes di añanan, nos a disfruta di varios asignacion fuera di nos trabou di misionero na Sri Lanka. Mi a ser asigna pa sirbi den e trabou di sircuito y di districto y como miembro di e Comite di Sucursal. Pa 1996, mi tawatin 70 y pico aña. Mi tawatin e goso di a sirbi pa 45 aña como misionero na Sri Lanka. Na e prome reunion cu mi a asisti na Colombo, tawatin rond di 20 hende presente. E cantidad ei a aumenta awor te na mas cu 3.500! Ami cu Sybil ta considera hopi di e rumannan stima aki como nos yiunan y nietonan spiritual. No obstante, ainda tawatin hopi trabou mas pa haci den e pais, trabou cu a exigi e energia y habilidad di personanan mas jong cu nos. Cu esaki na mente, nos a acepta un invitacion di e Cuerpo Gobernante pa bolbe bek Australia. Esaki a permiti parehanan cualifica y mas jong drenta Sri Lanka como misionero y tuma nos luga.

Awor mi tin 83 aña, y tanto ami como Sybil ta contento cu ainda nos salu ta suficiente bon cu nos por sigui den sirbishi di pionero special na mi teritorio bieu na Adelaide. Nos sirbishi ta mantene nos mentalmente alerta y flexibel. Tambe el a yuda nos reahusta na un estilo di bida hopi distinto den e pais aki.

Yehova a sigui percura pa tur nos necesidadnan material, y e rumannan den nos congregacion local ta duna nos hopi amor y apoyo. Resientemente mi a haya un asignacion nobo. Awor mi ta sirbi como secretario di nos congregacion. Pues, mi a descubri cu segun cu mi ta haci esfuerso pa sirbi Yehova fielmente, mi entrenamento ta sigui. Ora mi wak bek riba e añanan cu a pasa, constantemente mi ta keda asombra cu un mucha simpel y trankil di cunucu por a ricibi un educacion asina maraviyoso, uno cu a sigui durante henter su bida.

[Plachi na pagina 26]

Dia nos a casa, 1955

[Plachi na pagina 27]

Den sirbishi di veld cu Rajan Kadirgamar, un ruman local, 1957

[Plachi na pagina 28]

Ami cu Sybil awe