‘Ka Aaere na Taua Enua Nei’

“Ka aere na te tiroa o taua enua nei, e na te tipoto.”​—GENESE 13:17.

1. Eaa te ikuikuanga umere ta te Atua i oake kia Aberahama?

E REKA ana koe i te tutaka aere na roto i te enua, penei i tetai tere oriori aere na runga i tetai apinga akaoro i te openga epetoma? Ko tetai papaki e inangaro ana i te tutaka aere na runga i te patikara kia akaetaeta i te uaua e kia maata atu te akarakara aere. E ko etai atu e iki ana i te aere na raro ua ei mataara kia akamatau e kia mareka atu i tetai ngai. Tei matauia i taua au tu tere ra e poto ua te tuatau. Inara ka akamanako ana e mei teaa ra te manako o Aberahama i muri ake i te akakite anga te Atua kiaia e: “Ka tu, ka aere na te tiroa o taua enua nei, e na te tipoto; ka oronga oki au i te reira noou”!​—Genese 13:17.

2. I muri ake i te akaruke anga ia Aiphiti, kua aere a Aberahama kiea?

² Ka akamanako ana i te aerenga manako o taua au tuatua ra. Kua noo poto ua a Aberahama ki Aiphiti, ma tana vaine e etai atu. Te akakite maira a Genese pene 13 kia tatou e kua akaruke atu ratou ia Aiphiti e kua neke atu i ta ratou au anana ki “te pae i apatonga.” Aru mai “kua aere ua oki [a Aberahama] i tona aerenga, mei apatonga mai, e ki Betela roa.” I te tupu anga tetai manamanata i rotopu i tana au tiaki puaka e ta tona nepeu ko Lota e kua taka tikai e ka anoanoia nga tokorua kia kimi i te au ngai matie ke, kua oronga ua atu a Aberahama i te ikianga mua na Lota. Kua iki a Lota i te “ngai maniania katoa i Ioridana,” e o ruperupe “mei te kainga o Iehova ra,” e i te openga kua noo iora ki Sodoma. Kua tuatua atura te Atua kia Aberahama: “Ka nānā ana i to mata ki runga i tena ngai taau e noo na, ka akara, i te pae i apatokerau, e te pae i apatonga, e te pae i te itinga o te rā ra, e te pae i te opunga o te rā.” Penei mei tetai ngai teitei i te pae mai ia Betela, kua rauka ia Aberahama kia kite atu i tetai au  tuanga o te enua. Inara, e maata atu te ka tupu mai. Kua pati te Atua iaia kia “aaere na taua enua nei” e kia akamatau ki to te reira tu e te au ngai.

3. Penei e eaa ra ka ngata ai i te akamanako i te au teretere anga a Aberahama?

³ Noatu eaa te mamao i te rave anga a Aberahama i te reira i mua ake i te tae anga ki Heberona, kua maata roa atu tona matauanga ki te Enua Taputouia i te maataanga ia tatou. E manako ana i te au ngai tei taikuia i roto i teia papaanga​—te Pae i Apatonga, Betela, te Ngai Maniania ra i Ioridana, Sodoma, e Heberona. Te putakaiti ra ainei koe i te akamanako i tetai tutu e teiea ra taua au ngai ra? No te manganui e mea ngata tikai teia no te mea ko etai ua ake o to Iehova iti tangata tei atoro ana i te au ngai i tatau ana ratou no runga i roto i te Pipiria, i te aaere anga na te tiroa e te tipoto o te enua. Noatu rai, e tumuanga to tatou kia inangaro tikai i te kite no runga i te au ngai o te Pipiria. No teaa ra?

4, 5. (a) Akapeea ra te Maseli 18:15 i te piri anga atu ki te kite e te marama anga i te au enua Pipiria? (e) Eaa ra ta Zephania pene 2 e akatutu maira?

⁴ Kua akakite mai te Tuatua a te Atua e: “Te rauka ra i te ngakau o te tangata akono ra te kite; e te kimi ra te taringa o te tangata pakari i te kite.” (Maseli 18:15) E maata ua atu te au tumu tuatua te ka rauka mai i tetai te kite, kareka ra ko te kite tika tikai te piri atura ki te Atua ko Iehova e tana au angaanga e mea puapinga maata roa atu ia. Papu tikai e, ko ta tatou e tatau ra i roto i te Pipiria e puapinga tikai ki te reira. (2 Timoteo 3:16) E akara, ra oki, e te o maira te marama anga. Koia oki ko te tu kite i te kite atu ki roto i tetai mea, kia kite me kore kia marama i te au pirianga i rotopu i to te reira au tuanga e te katoanga. E tika tikai teia i te au tumu no runga i te au ngai tei taikuia i roto i te Pipiria. Ei akatauanga, kua kite te maataanga ia tatou e teea a Aiphiti, inara mei teaa te maata o ta tatou i marama i te tuatua e kua aere atura a Aberahama  mei Aiphiti “ki te pae apatonga,” i muri mai ki Betela, i reira ki Heberona? Te marama ra ainei koe i te pirianga o taua au ngai ra?

⁵ Me kore penei kua aru ana koe i tetai papaanga tatau Pipiria te kapiti maira ia Zephania pene 2. I reira ka tatau koe i te au ingoa no te au oire, no te au tangata, e te au enua. Ko Gaza, Asekelona, Asedoda, Ekerona, Sodoma, e Nineve pera katoa a Kanaana, Moabi, Amona, e Asura kua taiku pouroaia i roto i taua pene okotai ra. Mei teaa ra toou puapingaia i te akamanako anga i taua au ngai ra tei nooia ana e te au tangata tikai, e au tangata tei o atu ki roto i te akatupuanga o te totouanga tu-Atua?

6. Eaa i rauka ai i tetai au Kerititiano te arikianga rekareka no te au mapu? (Akara i te pia.)

⁶ E manganui te aronga apiipii i te Tuatua a te Atua tei puapinga maataia mei te akara anga i te au mapu o te au enua Pipiria. Te rave ra ratou i teia, kare e no te tu umere i te au mapu, mari ra no te mea te kite ra ratou e na te taangaanga anga i te au mapu, ka rauka ia ratou i te akamaata atu i to ratou kite no te Tuatua a te Atua. Ka rauka katoa i te au mapu i te tauturu ia ratou kia akamaata atu i to ratou marama, te kite anga e akapeea te au tumu ta ratou i kite takere i te piri anga atu ki tetai akakiteanga ke mai. Ia tatou e akamanako ra i tetai au akaraanga, penei ka akaoonu katoa atu koe i toou arikianga rekareka no Iehova e ka maata atu te marama i roto i te au papaanga o tana Tuatua.​—Akara i te pia i te kapi 14.

E Tuke Maata me Kite i te Mamao

7, 8. (a) Eaa te apinga umere ta Samasona i rave tei o mai a Gaza? (e) Eaa te akakiteanga te kapiti maira i te puapinga ki te tu maroiroi umere o Samasona? (nga) Akapeea te kite e te marama no teia papaanga tei o mai a Samasona i te tauturu anga ia tatou?

⁷ I Te Au Akava 16:2, ka rauka ia koe i te tatau no runga i te Akava ko Samasona i Gaza. Ka kitea putuputuia te ingoa Gaza i roto i te au ripotianga nuti i teia tuatau, no reira penei ka rauka ua ia koe i te kite e noea mai a Samasona, i roto i te enua o te Philiseti vaitata atu ki te Pae Tai o Metiterenia. Ka akara ana i teianei i Te Au Akava 16:3: “Moe iorā Samasona e turuaipo akera; kua tu akera aia ki runga i taua turuaipo ra, kua rave iora i nga pa i te ngutupa o te oire ma nga pou katoa e rua, kiriti akera ïa i te reira ma te tea katoa, kua tuku akera ki runga i ona pakuivi, apai rava atura ki runga i te take maunga i vaitata i Heberona.”

⁸ Kare e ekoko anga e, ko nga pa i te ngutupa e nga pou i te pae no tetai punanga ketaketa mei ia Gaza te tu e maatamaata e te teimaa tikai. E akamanako ua ana i te tamata anga i te amo i te reira! Kua pera a Samasona, inara i amo aia i te reira kiea, e mei teaa te tu o te tere tana i aere ei? I na, tei te pae tai a Gaza e mei te teitei rai paa o te tai. Inara, tei te tua itinga a Heberona mei tetai 900 mita te teitei​—e kakeanga teitei tikai! Kare e rauka ia tatou i te akapapu i te ngai tikai o “te take maunga i vaitata i Heberona,” inara mei tetai 60 kiro mita te oire mei Gaza mai​—e teitei tikai te kake anga! Ka riro te kite anga i te mamao tei o mai i te tuku i to Samasona tu maroiroi umere ki runga i tetai au turanga puapinga ou roa, me kare ainei? E e akamaara e eaa i rauka ai ia Samasona i te rave i taua au tu angaanga ra​—‘e kua aere viviki maira te vaerua o Iehova ki runga iaia.’ (Te Au Akava 14:6, 19; 15:14) Ei au Kerititiano i teia tuatau, kare tatou e tapapa atu i te vaerua o te Atua kia oake mai kia tatou i te maroiroi tuke ua ake  rai. Inara, ka rauka i taua vaerua ririnui rai i te akamaata atu i to tatou marama no te au mea oonu i te pae vaerua e ka akaetaeta mai ia tatou kia tau tatou ki te tangata i roto ra. (1 Korinetia 2:10-16; 13:8; Ephesia 3:16; Kolosa 1:9, 10) Ae, na te marama anga i te papaanga no runga ia Samasona e akapapu mai i te tika e ka rauka i te vaerua o te Atua i te tauturu ia tatou.

9, 10. (a) Eaa ra tei kapitiia mai ki roto i to Gideona autuanga ki rungao i to Midiana? (e) Akapeea to tatou kite no te ngai o te enua tei o mai i te tauturu anga i te akariro i teia papaanga ei mea puapinga maata?

⁹ Tetai papaanga ke mai e akaari maira i te puapinga o te kite i te au tu mamao koia oki ko te autuanga a Gideona ki rungao ia Midiana. Kua kite te maataanga o te aronga tatau i te Pipiria e kua akapouia e te Akava ko Gideona e tona nuku e 300 tetai pupu taokotaiia o te 135,000 aronga aru​—to Midiana, to Amaleka, e tetai atu tei puakapa ki te o ra i Iezereela, vaitata atu ki te puku maunga o More. Kua akatangi te au tangata o Gideona i te au pu, kua akangaangaa i te au kapu kia akaari mai i ta ratou au ramepa, e kua kapiki atura e: “Ko te koke a Iehova e ta Gideona.” Kua akakononinoni e kua akamataku teia i te au enemi, i reira kua akamata atura ratou i te ta i tetai e tetai. (Te Au Akava 6:33; 7:1-22) Ko tera ainei te tupuanga katoa, e tai raveanga viviki ua i roto i te poiri? E tatau atu rai i roto i Te Au Akava i te pene 7 e te 8. Ka kite ia koe e kua rave ua atu rai a Gideona i te tamaki. No te au ngai e manganui i taikuia mai, kare e rauka kia akaaiteia tetai papaki ki te au ngai tei kiteaia i teia tuatau nei, no reira penei kare ratou e kiteaia i roto i te au mapu Pipiria. Noatu rai, kua rava ua tei akatakaia, kia rauka ia tatou i te aru i te au angaanga a Gideona.

¹⁰ Kua arumaki atu a Gideona i te toenga o te au nuku o te pupu taokotai ra pati mai ia Bete-sita e oti i reira ki te tua apatonga o Abela-mehola, vaitata ki Ioridana. (Te Au Akava 7:22-25) Te karanga ra te papaanga e: “Tae aturā Gideona ki Ioridana, e kua aere atura ki tetai pae, koia e te au tangata e toru anere iaia ra, kua potopoto rai te aʼo, te arumaki ua ra.” I te tae anga ki tetai tua mai, kua arumaki atu rai te ngati Iseraela i te au enemi ki te tua apatonga ki Sukota e ki Penuela, vaitata ki Iaboka, i reira ki te au puku maunga ki Iogebea (vaitata atu ki Amani o teia tuatau, i Ioridana). Mei etai 80 kiro mita i te arumaki anga e te tamaki anga atu. Kua opukina e kua tamateia e Gideona e rua nga ariki o Midiana; i reira kua oki atu aia ki tona oire, ko Ophera, vaitata atu ki te ngai i akamata ai te tamaki anga. (Te Au Akava 8:4-12, 21-27) Te taka meitaki ra e, ko te tu maroiroi umere o Gideona e maata atu ia i nga mea miniti ua i te akatangi anga i te au pu, te takirikiri anga i te au ramepa, e te kapikipiki anga. E ka manako ana e akapeea i te kapiti anga atu ki te pakarianga tikai o te tuatua no runga i te au tangata akarongo: “E roa ua oki kia tuatua au ia Gideona [e etai atu] i te paruparu anga ra, toa rava atura oki i te tamaki.” (Ebera 11:32-34) Penei ka paruparu katoa rai te au Kerititiano  i te pae kopapa, inara kare ainei i te mea puapinga e kia tamou atu rai tatou i te rave anga i te anoano o te Atua?​—2 Korinetia 4:1, 16; Galatia 6:9.

Akapeea ra te Manako e te Tu o te Tangata?

11. Eaa te tere tei o mai i mua ake e i muri ake i te tae anga te ngati Iseraela ki Kadesa?

¹¹ Penei ka akara etai papaki ki te au mapu o te Pipiria i te akara i te au ngai, inara i toou manako e ka oake mai te au mapu i te marama ki te manako o te tangata? E akamanako ana ei akaraanga i te ngati Iseraela tei neke atu mei te Maunga i Sinai ki te tua i te Enua Taputouia. I te tapupu aere anga i te arataa, kua tae atu ratou i te openga ki Kadesa (me kore, Kadesa-baranea). Te akaari maira a Deuteronomi 1:2 i teia ei aerenga no tetai 11 ra, no tetai 270 kiro mita. Mei reira kua tono atu a Mose e 12 tangata tutaka ki roto i te Enua Taputouia. (Numero 10:12, 33; 11:34, 35; 12:16; 13:1-3, 25, 26) Kua aere te au tangata tutaka ki te tua apatokerau na te Pae i Apatonga, penei kua pati atu ia Bere-seba, e oti i reira ki Heberona, e tae atura ki te au kotinga i te tua apatokerau o te Enua Taputouia. (Numero 13:21-24) No te mea kua ariki ratou i te ripoti tau kore a te okotai ngauru tangata tutaka, kua akaori aere uaia i reira te ngati Iseraela na roto i te metepara no te 40 mataiti. (Numero 14:1-34) Eaa ta teia e akaari maira no runga i to ratou akarongo e te inangaro i te irinaki ki roto ia Iehova?​—Deuteronomi 1:19-33; Salamo 78:22, 32-43; Iuda 5.

12. Eaa ta tatou ka taopenga no runga i te akarongo o te ngati Iseraela, e eaa ka tau ei kia akamanako atu tatou no runga i taua apinga ra?

¹² E akamanako no runga i teia mei te turanga manako o te enua. Naringa te ngati Iseraela i akono i te akarongo e i aru i te tuatua a Iosua raua ko Kaleba, e mamao ainei ta ratou ngai ka aere e tae atu ei ki te Enua Taputouia? Mei te 16 kiro mita rai a Kadesa mei Berelahai-roi mai, te ngai i noo ana a Isaaka raua ko Rebeka. Tei raro ake i te 95 kiro mita ki Bere-seba, tei kiteaia e ko tetai ope mai i te tua tonga o te Enua Taputouia. (Genese 24:62; 25:11; 2 Samuela 3:10) I te aere anga mai mei Aiphiti ki te Maunga i Sinai e oti i reira e 270 kiro mita ki Kadesa, vaitata rai e tei te ngutupa ua ratou o te Enua Taputouia. No tatou, tei te ngutupa roa tatou o te Parataito taputouia no te enua nei. Eaa ra te apiianga no tatou? Kua akapiri atu te apotetoro ko Paulo i te turanga o te  ngati Iseraela ki te akoanga: “E teianei, e akamaroiroi tatou i te akao i taua akaangaroianga ra, ko te topa atu aea tetai, mei ia ratou i topa i te akarongo kore.”​—Ebera 3:16–​4:11.

13, 14. (a) I roto i teea turanga i apai ei te ngati Gibeona i tetai takainga tau? (e) Eaa te akaari maira i te tu manako o te ngati Gibeona, e eaa te apiianga ka tau kia tamou mai tatou mei teia?

¹³ Tetai tu tuke​—tetai no te irinaki anga ki roto i te Atua kia akatupu i tona anoano​—koia oki ko tei kite papuia mei te tupuanga Pipiria tei akao mai i te ngati Gibeona. I muri ake i to Iosua arataki anga i te ngati Iseraela ki tetai tua mai i te Kauvai Ioridana ki roto i te enua ta te Atua i taputou ki te uanga o Aberahama, kua tau te taime no te akaatea i te ngati Kanaana. (Deuteronomi 7:1-3) Te kapiti maira te reira i te ngati Gibeona. Kua akapou te ngati Iseraela ia Ieriko e Ai e kua puakapa vaitata mai ki te pae ia Gilagala. Kare te ngati Gibeona i inangaro kia mate ei au ngati Kanaana tei taumaaia, no reira kua tono ratou i te au komono ki ko ia Iosua i Gilagala. Kua akavare pikikaa ua e no vao mai ratou i te ngai o te ngati Kanaana kia rauka ia ratou i te tomo ki roto i tetai koreromotu pirianga oa ma te ngati Epera.

¹⁴ Kua tuatua atura taua au komono ra e: “Mei te enua mamao roa mai to au tavini nei, no te ingoa o to Atua ra o Iehova.” (Iosua 9:3-9) I te akaraanga na to ratou kakau e te au apinga kai i akapapu mai e no te ngai mamao mai ratou, inara ko te tikaanga mei te 30 kiro mita ua rai a Gibeona mei Giligala. Kua irinaki atura, kua papau i reira a Iosua e tona au mataiapo i tetai koreromotu pirianga oa ma Gibeona e te au oire i vaitatao tei piri atu kia Gibeona. Ko te tiriki a te ngati Gibeona e ravenga ua ainei ia no te kopae atu i te tamateangaia? Kare, te akaata maira te reira i te anoano kia rauka mai te akaperepereanga a te Atua o Iseraela. Kua mareka roa akera a Iehova no te ngati Gibeona kia riro “ei pāpā vaie i taua rā ra, e ei kave vai, na te uipaanga katoa ra, e no te atarau a Iehova,” i te tari vaie no te atarau o te atinga. (Iosua 9:11-27) Kua akaari ua atu rai te ngati Gibeona i te inangaro kia rave i te au angaanga akaaka i roto i te angaanga a Iehova. Penei ake, tei rotopu tetai papaki ia ratou i te Netini tei oki mai mei Babulonia e kua tavini i ko i te iero tei akatu akaouia. (Ezera 2:1, 2, 43-54; 8:20) Ka rauka ia tatou i te aru i to ratou tu manako na te tauta anga kia tamou marie i te au ma te Atua e na te inangaro anga i te rave i te au tukuanga angaanga akaaka i roto i tana angaanga.

Kia Rave Maata Atu Rai Tatou

15. Eaa ka inangaroia ai te akatakaanga i te ngai o te enua no runga i te au Tuatua Tapu Ereni Kerititiano?

¹⁵ Te o maira te akatakaanga i te ngai o te au enua Pipiria ki roto i te au papaanga o te au Tuatua Tapu Ereni, mei te au tere tutaka e te angaanga mitinari a Iesu e te apotetoro ko Paulo. (Mareko 1:38; 7:24, 31; 10:1; Luka 8:1; 13:22; 2 Korinetia 11:25, 26) I roto i te au papaanga ka  aru mai, e tamata i te akamanako i te au tere tutaka tei o mai.

16. Akapeea te au Kerititiano i Berea i te akaari anga i to ratou arikianga rekareka kia Paulo?

¹⁶ I te rua o tona tere mitinari (raini vareau i runga i te mapu), kua tae atu a Paulo ki Philipi, ko Ereni i teianei. Kua akakitekite atu aia i reira, kua tapekaia e i reira kua akamataraia mai, e kua neke atu ki Tesalonia. (Angaanga 16:6–​17:1) I te akatupu anga te ngati Iuda i tetai orureau, kua raurau atu a Paulo i te au taeake i Tesalonia kia aere ki Berea, tetai 65 kiro mita te mamao. Kua puapingaia te angaanga orometua a Paulo i Berea, inara kua aere mai te ngati Iuda kua akamaitu atu i te tangata. No reira, “kua tuku atura te au taeake ia Paulo i reira, kia aere tika atu aia ki tai,” e “e te aronga i arataki ia Paulo, kave atura ratou iaia ki Atene.” (Angaanga 17:5-15) I te akara anga, kua inangaro te aronga irinaki ou ua i te aaere ua no te 40 kiro mita ki te Tai Aegean, tutaki i te patete i runga i tetai pai, e tere atura no tetai 500 kiro mita. Ka ngata rai taua tu tere ra, inara kua ariki ua te au taeake i taua au tu ngata e no reira kua akaroa atu i to ratou tuatau ma teia komono tutaka o te Atua.

17. Eaa te ka rauka ia tatou kia ariki rekareka atu me marama ana i te mamao i rotopu ia Mileto e Ephesia?

¹⁷ I te toru o tona tere (raini matie i runga i te mapu), kua tae atu a Paulo ki te ava i Mileto. Kua unga atura aia i te au tangata pakari o te putuputuanga o Ephesia, mei etai 50 kiro mita te mamao. Ka akamanako ana i taua aronga pakari ra i te akaruke anga i te au angaanga ke atu kia aere ki ko ia Paulo. Kare e kore kua rekareka ratou i te tuatua aere anga no runga i te araveianga ia ratou e aere ra. I muri ake i te aravei anga ia Paulo e te akarongo anga iaia e pure ra, “aue anake iora ratou ravarai, takave maira ki runga i te kaki o Paulo, kua ongi maira iaia.” I reira “kua kave atura ratou iaia ki te pai” kia aere atu ki Ierusalema. (Angaanga 20:14-38) E maata tikai ta ratou no te akamanako e te tuatua no runga i to ratou oki anga ki Ephesia. Kare ainei koe e akakeuia ana e te arikianga rekareka ta ratou i akaari na te aere mamao anga kia aravei atu i te orometua tutaka tei rauka i te ako e te akamaroiroi ia ratou? Te kite ra ainei koe i tetai apinga i roto i teia te ka rauka ia koe i te taangaanga i roto i toou oraanga?

E Apii i Taua Enua ra e Eaa te Vai ra ki Mua

18. Eaa ta tatou ka akapapu kia rave no runga i te au ngai o te Pipiria?

¹⁸ Te akaari maira te au akaraanga i taikuia atu i te puapinga o te akamatau anga ki te enua ta te Atua i oake ki te ngati Iseraela e e puapinga tikai te reira ki te au papaanga o te Pipiria. (E ka rauka ia tatou kia akamaata atu i to tatou marama kia o mai te apii anga atu no runga i te au enua puapinga takapini aere i roto i te au papaanga o te Pipiria.) Ia tatou e kapiti atura ki to tatou kite e te marama no runga tikai i te Enua Taputouia, kia akamaara tatou i tetai umuumuanga puapinga maata no te ngati Iseraela kia tomo e kia rekareka i te enua “taʼe a vai ua te u e te meli.” Koia oki kia mataku ia Iehova e kia akono i tana au akauenga.​—Deuteronomi 6:1, 2; 27:3.

19. Eaa nga parataito e rua tei tau kia manako tamou atu rai tatou?

¹⁹ Aiteite katoa i teia tuatau, ka anoanoia tatou kia rave i ta tatou tuanga, i te mataku ia Iehova e te tamou marie anga ki tona au arataa. Na te rave anga i te reira, ka tauturu tatou i te akamaata anga e te akamanea anga i te parataito pae vaerua e vai nei i teianei i roto i te putuputuanga Kerititiano i te ao katoa. Ka tupu maata ua atu rai to tatou kite no runga i to te reira au tu e te au akameitakianga. E kua kite tatou e e maata atu rai te ka aere mai. Kua arataki a Iosua i te ngati Iseraela ki tetai tua mai i Ioridana ki roto i tetai enua uua, e te merengo tikai. I teianei e tumuanga meitaki tikai to tatou kia akara ma te irinaki ki mua i te Parataito tikai, i te enua meitaki e vai maira i mua ia tatou.

Maara Ainei ia Koe?

• Eaa tatou ka inangaro ei kia akamaata atu i to tatou kite e te marama no runga i te au enua Pipiria?

• Ko teea akatakaanga o te enua tei akamanakoia i roto i teia atikara tei tauturu maata tikai ia koe?

• Eaa te apiianga tei akaketaketa maataia mai kia koe ia koe e apii maata atura no runga i te ngai o te enua tei o mai ki tetai au tupuanga?

[Au Uianga Apii]

[Pia/Tutu i te kapi 14]

“See the Good Land”

I ko i te au uruoaanga i te 2003 e te 2004, kua ariki rekareka atu te Au Kite o Iehova i te poroutia “See the Good Land.” Ko teia puka ou, te ka rauka vaitata mei te 80 reo, kua ki i te au mapu e te au tiati karakara katoa te akatutu maira i te au ngai tuke tuke o te ao i roto i te Pipiria, no te Enua Taputouia tikai i te au tuatau tukeke.

Ko te atikara tei kapitiia mai te tou ra ki tetai au mapu na roto i te au numero o te kapi i roto i te tataanga akatouia, mei te [15]. Me kua rauka ia koe teia poroutia ou, e akapou i tetai taime i te akamatau ki te au tu akataka meitakiia te ka tauturu ia koe kia akamaata atu i toou kite e te marama anga no te Tuatua a te Atua.

(1) E maata te au mapu te kapiti maira i te tetai papaanga me kore te pia e akataka maira i te au akamaramaanga ki te au akairo takake me kore i te au akairaanga i runga i te mapu [18]. (2) Te maataanga o te au mapu te kapiti maira i tetai vaito i roto i te au maire e te au kiro mita te ka tauturu ia koe kia marama i te maatamaata me kore i te mamao tei o mai [26]. (3) I te maataanga o te taime te tou ra te kakao ki te apatokerau, kia marama koe i te arataki anga [19]. (4) E putuputu te taime kua takaraia te au mapu ei akakite mai i te au ngai teitei katoatoa [12]. (5) Takapini i te au tapa o te reira, penei e au reta/numero to te mapu kia rauka ia koe i te akamanako i tetai grid, te ka rauka ia koe kia taangaanga i te kimi i te au oire me kore i te au ingoa [23]. (6) I roto i nga kapi papaanga e rua no te au ingoa o te ngai [34-5], ka kite koe i te numero o te kapi i roto i te tataanga kua akatouia, tei aru putuputuia mai e te ngai o te grid, mei te E2 te tu. I muri ake i te taangaanga anga koe i teia au tu no etai au taime ua, penei ka poitirere koe i te kite e e tauturu maata tikai teia i te akamaata anga atu i toou kite e te akaoonu anga atu i toou marama i te Pipiria.

[Tutu/Mapu i te kapi 16, 17]

TIATI O TE AU NGAI NATURA

(No runga i teia, akara i te puka)

A. Pae Tai o te Tai Maata

E. Ngai Mataataa Tua Opunga o loridana

1. Ngai Mataataa o Asera

2. Tuanga Pae Tai o Dora

3. Au Kainga o Sarona

4. Ngai Mataataa o Philisetia

5. Te O Maata i te Itinga Opunga

a. Ngai Mataataa o Megido

e. Te O o Iezereela

NGA. Au Maunga i te Opunga o Ioridana

1. Au Puku Maunga o Galilea

2. Au Puku Maunga o Karamela

3. Au Puku Maunga o Samaria

4. Sephela (au puku maunga akaaka)

5. Enua Puku Maunga o Iuda

6. Metepara o Iuda

7. Pae Apatonga

8. Metepara o Parana

I. Araba (Te O Area Ua)

1. Te Pa o Hula

2. Ngai o te Tai o Galilea

3. Te O o Ioridana

4. Tai Kavakava (Tai Mate)

5. Araba (tua tonga o te Tai Kavakava)

KE. Au Maunga/Enua Teitei Titika Itinga o Ioridana

1. Basana

2. Gileada

3. Amona e Moabi

4. Maunga Paraa o Edoma

MO. Au Maunga o Lebanona

[Mapu]

Maunga Heremona

More

Abela-mehola

Sukota

Iogebea

Betela

Gilagala

Gibeona

Ierusalema

Heberona

Gaza

Bere-seba

Sodoma?

Kadesa

[Mapu/Tutu i te kapi 15]

(No runga i teia, akara i te puka)

KANAANA

Megido

GILEADA

Dotana

Sekema

Betela (Luza)

Ai

Ierusalema (Salema)

Betelehema (Eupharata)

Mamera

Heberona (Makapela)

Gerara

Bere-seba

Sodoma?

PAE APATONGA

Rehobota?

[Au Maunga]

Moria

[Au Vai]

Tai Kavakava

[Au Kauvai]

Ioridana

[Tutu]

Kua aaere a Aberahama i te enua

[Mapu i te kapi 18]

(No runga i teia, akara i te puka)

Toroa

SAMOTERAKIA

Neapoli

Philipi

Amephipoli

Tesalonia

Berea

Atene

Korinetia

Ephesia

Mileto

RODA