Limanite pe rod bann bon Dirizan

“Sorti, mon dir ou, nou’n fini avek ou. Onon Bondye, sorti!”​—Oliver Cromwell; site par Leopold Amery, en manm Parlman Langleter.

Dezyenm Lager Mondyal ti lo son wityenm mwan destriksyon, e keksoz pa ti pe al byen pour Langleter ek son bann alye. Pour Leopold Amery ek lezot dan gouvernman, en sanzman dirizan ti neseser. Alors, le 7 Me, 1940, dan zot Lasanm Parlman, Msye Amery ti dir sa parol ki’n ganny site anler avek Premye Minis Neville Chamberlain. Trwa zour plitar, Msye Chamberlain ti sorti dan son fonksyon e Winston Churchill ti ranplas li.

ANNAN en dimoun pour dirize i en bezwen debaz imen, me pa nenport dirizan. Menm dan en fanmiy, en papa i bezwen kapab akonpli byen sa latas pour gid son madanm ek zanfan pour ki zot santi zot ere. Alor, mazinen ki kantite dimoun i ekspekte avek dirizan en pei oubyen dirizan lemonn! I pa sirprenan ki bann bon dirizan i rar pour trouve.

Se pour sa ki pour plizyer milye lannen, nou’n vwar bokou bokou kouronnman, revolisyon, kou-d-eta, lapwentman, eleksyon, lasasina, ek diferan sistenm gouvernman. Bann lerwa, premye minis, prens, prezidan, sekreter zeneral, ek diktater in antre sorti o pouvwar. Bann sanzman ki’n arive san ekspekte in tir menm bann dirizan pwisan o pouvwar. (Vwar bwat “Tire o Pouvwar en sel Kou,” lo paz 5.) Wi, i pa’n zanmen fasil pour trouv bann dirizan ki konpetan e ki reste o pouvwar pour bokou lannen.

“Nou bezwen aksepte” —Nou napa swa, non?

I pa sirprann nou alor ki bokou dimoun nepli annan lespwar pour trouv en bon dirizan. Dan serten pei, ou kapab vwar ki dimoun i dezespere e nepli enterese sirtou pandan letan eleksyon. Geoff Hill, en zournalis Lafrik, ti fer sa remark: “Souvan dimoun pa enterese oubyen pa partisip [dan eleksyon] ler zot santi ki zot napa pouvwar pour sanz sa lavi mizerab ki zot pe viv. . . . Lafrik kan dimoun pa vote, sa pa neseserman vedir ki zot satisfe. Souvannfwa,  sa i en protestasyon par bann ki santi ki personn pa pe ekout zot.” Pareyman dan zournal Letazini, en zournalis ti ekrir sa konsernan en eleksyon ki ti pe al ganny fer: “Mon swete ki ti a annan en kandida parfe ki pe pran par.” I ti azoute: “Napa en tel kandida. I pa pou zanmen annan enn koumsa. Nou bezwen aksepte.”

Eski vreman imen napa swa, zot zis “bezwen aksepte” bann dirizan enparfe? Eski lefe ki bann dirizan imen pa’n kapab satisfer zot bann sitwayen i prouve ki nou pa pou zanmen annan en bon dirizan? Non. I annan en pli bon dirizan. Lartik swivan pou montre lekel sa dirizan ki ideal pour bann imen e i pou diskite konman son servis i kapab benefisye bokou dimoun avek diferan lorizin, enkli ou.

[Portre lo paz 3]

Agos anler: Neville Chamberlain

Adrwat anler: Leopold Amery

Anba: Winston Churchill

[Portre lo paz 3]

Chamberlain: Foto par Jimmy Sime/Central Press/Getty Images; Amery: Foto par Kurt Hutton/Picture Post/Getty Images; Churchill: The Trustees of the Imperial War Museum (MH 26392)