En Buska di un Bon Lider

“Mi ta pidi bo pa bai, i nos ta kla ku bo. Den nòmber di Dios, bai!”—Oliver Cromwell; sitá dor di Leopold Amery, miembro di Parlamento Britániko.

Pa ocho luna kaba Segundo Guera Mundial tabata kousando bastante destrukshon, i kos no tabata bayendo bon pa Gran Bretaña ni su aliadonan. Leopold Amery i mas hende den gobièrnu tabata haña ku mester a bin un kambio di liderato. P’esei, dia 7 di mei 1940, den e Kámara di Komunnan, Amery a dirigí e palabranan menshoná ariba na Promé Minister Neville Chamberlain. Tres dia despues, Chamberlain a baha komo Promé Minister i Winston Churchill a tuma su puesto.

HENDE tin un nesesidat básiko di bon liderato, pero no ta ken ku ta por ta lider. Asta den un famia, e esposa i yunan lo ta felis solamente si e tata tin e kapasidat pa dirigí e famia. Imaginá bo anto kiko ta e eksigensianan pa ser un lider nashonal òf mundial! No ta nada straño ku ta masha difísil pa haña bon lider.

Konsekuentemente, pa míles di aña masha hopi koronashon, revolushon, gòlpi di estado, nombramentu, elekshon, asesinato i kambio di régimen a tuma lugá. Masha hopi rei, promé minister, prens, presidente, sekretario-general i diktadó a subi na poder i despues baha. Kambionan inesperá a kore ku asta gobernantenan poderoso. (Wak e kuadro “Diripiente for di Poder,” na página 5.) No opstante, ta masha difísil pa haña liderato kompetente i duradero.

“Nos Tin Ku Keda Kontentu ku Loke Tin”—Òf Nò?

No ta nada straño anto ku hopi hende a pèrdè speransa di haña un bon lider. Den algun pais, e indiferensia i desesperashon ku ta biba bou di e hendenan ta sali na kla foral den tempu di elekshon. Geoff Hill, un reportero na Afrika, a komentá: “Ora hende ta sinti nan impotente pa trese kambio den e miseria ku nan ta biba, mayoria ta keda sin [bai vota] i no ta interesá mes den polítika. . . . Na Afrika, ora hende keda sin bai vota, esei no nesesariamente ke men ku nan ta satisfecho. Mayoria biaha,  esei ta representá un gritu di ousilio di parti di esnan ku ta sinti ku nan no ta hañando oido.” Meskos tambe, un kolumnista di korant na Merka a skirbi relashoná ku un elekshon ku tabata den kurpa: “Mare tabatin un kandidato perfekto den e kontienda elektoral.” Anto el a agregá: “No tin un kandidato asina. Nunka sa tin tampoko. Nos tin ku keda kontentu ku loke tin.”

Ta moda di hasi mes no tin? Humanidat tin ku “keda kontentu” ku lidernan imperfekto? E echo ku lidernan humano no por a kumpli ku e nesesidatnan di nan súpditonan ta nifiká ku hamas nos lo por haña un bon lider? Nò, pasobra e mihó liderato ta disponibel. E siguiente artíkulo lo konsiderá ken ta e lider ideal di humanidat i kon su servisio por benefisiá miónes di hende di tur gremio—abo tambe.

[Plachi na página 3]

Man robes ariba: Neville Chamberlain

Man drechi ariba: Leopold Amery

Abou: Winston Churchill

[Rekonosementu]

Chamberlain: Potrèt ta di Jimmy Sime/Central Press/Getty Images; Amery: Potrèt ta di Kurt Hutton/Plachi Post/Getty Images; Churchill: The Trustees of the Imperial War Museum (MH 26392)