Sma e suku bun tiriman

„Mi e taigi yu, gowe fu dyaso, bika wi no wani abi noti fu du nanga yu moro. Na ini a nen fu Gado, gowe!”—Disi na san Oliver Cromwell ben taki wan leisi, èn Leopold Amery, wan memre fu na Ingrisi Asamblei, taki den wortu disi baka.

A di fu Tu Grontapufeti ben e feti aiti mun kaba, èn soso takru bakapisi ben kon fu en. Boiti dati, sani no ben e waka bun gi Ingrisikondre nanga den kondre di ben e horibaka gi en na ini a feti. Leopold Amery nanga tra tiriman fu a kondre ben feni taki wan tra tiriman ben musu kon. Fu dati ede, tapu 7 mei 1940, na a konmakandra fu na Asamblei fu Ingrisikondre, Masra Amery taigi Neville Chamberlain, a fosi minister fu Ingrisikondre, den wortu di skrifi na a bigin fu na artikel. Dri dei baka dati, Masra Chamberlain libi a wroko fu en, èn Winston Churchill kon na ini en presi.

ALA libisma abi wan sma fanowdu fu tiri den, ma a no ala tiriman o man du a wroko fu wan tiriman. Srefi na ini wan osofamiri a papa musu man teki fesi efu a wani taki en wefi nanga den pikin fu en de koloku. Fu dati ede wi kan frustan omeni a tiriman fu wan kondre, noso fu grontapu musu man du! Sobun, wi no musu fruwondru taki a muilek fu feni wan bun tiriman.

Fu dati ede, dusundusun yari kaba, sma e poti omeni kownu na wroko. Dusundusun yari kaba, someni revo ben de, èn sma teki tirimakti abra nanga tranga, noso den poti tra tiriman na wroko; sma e go stem gi wan tra tirimakti, den e kiri tiriman, noso den tyari wan tra fasi fu tiri kon. Ibri tron baka, wan tra kownu, fosi minister, bigi granman, presidenti, sekretarsi-generaal, noso ogri-ati tiriman ben tron tiriman. Srefi tranga tiriman ben abi fu saka, te a situwâsi na ini a kondre ben kon kenki wantronso. (Luku a faki di nen „Wantronso sma puru en leki tiriman,” na tapu bladzijde 5.) Toku a ben muilek fu feni wan tiriman di bun èn di ben man tan na wroko.

„Wi musu teki en leki fa a de”, noso wan tra fasi de?

Fu dati ede wi no musu fruwondru taki furu sma lasi a howpu taki wan ten o kon taki wi o abi wan bun tiriman. Na ini son kondre, yu kan si krin taki na a ten di sma musu go stem gi wan tra tirimakti, a gersi leki den no e broko den ede srefisrefi nanga a tori disi èn taki den lasi howpu. Geoff Hill, wan koranti skrifiman na ini Afrika, skrifi: „Sma no e firi fu go stem, noso den no e go stem te den denki taki den no man feni wan lusu gi den problema di e miti den. . . . Na ini Afrika, te sma no e go stem, dan a no de so taki den e feni taki ala sani  e go bun. Nofo tron den wani sori na a fasi disi taki den e suku yepi fu di den abi a firi taki nowan sma wani poti prakseri na den problema fu den.” Na so wan sani wan koranti skrifiman fu Amerkankondre ben skrifi tu di a ten ben o doro taki sma ben musu go stem. A taki: „Mi ben winsi taki wan sma di bun dorodoro ben o du muiti fu tron presidenti.” A taki moro fara: „So wan sma no de. Noiti so wan sma o de. Wi musu teki en leki fa a de.”

A de so trutru, taki libisma sa abi fu tan teki tiriman di no de volmaakti, fu di den musu ’teki den leki fa den de’? Tiriman no ben man gi a pipel fu den san den abi fanowdu, ma disi wani taki dati noiti wi o abi wan bun tiriman? Kwetikweti. Wi kan kisi a moro bun tiriman di de fu feni. Na artikel di e kon sa sori wi suma na a moro bun tiriman gi libisma èn fa den sani di a o du leki tiriman kan tyari wini kon gi furu milyunmilyun sma, awansi fu pe den komoto noso awansi suma den de, èn dati wani taki na yu sosrefi.

[Prenki na tapu bladzijde 3]

Tapusei, na a kruktu-anusei: Neville Chamberlain

Tapusei, na reti-anusei: Leopold Amery

Na ondrosei: Winston Churchill

[Sma di abi a reti fu den prenki]

Chamberlain: Photo by Jimmy Sime/Central Press/Getty Images; Amery: Photo by Kurt Hutton/Picture Post/Getty Images; Churchill: The Trustees of the Imperial War Museum (MH 26392)