Napapasegsegang Ingen ta Maliket

“Mapalar kayo sano balawen da kayoy totoo, tan pasegsegangen da kayo, tan salitaen day amin a nengneng na mauges a sumpad sikayo, nisengeg ed siak.”​—MATEO 5:11.

1. Anto so impaseguro nen Jesus ed saray babangatan to nipaakar ed liket tan panamasegsegang?

 SANEN imbaki nen Jesus iray apostol to pian mangipulong ed Panarian, pinasakbayan to ni ira a nasagmak da so panamasegsegang. Oniay inkuan to ed sikara: “Gulaen da kayo naani na saray amin a katooan nisengeg ed ngaran ko.” (Mateo 10:5-18, 22) Balet, diad kasakbayan na Sermon to ed Palandey, pinaseguroan to iray apostol to tan arum nira a satan ya isusumpa so agmet mangekal na liket da. Diad tua, insiglaot ni ingen nen Jesus so liket ed pakasagmak da na panamasegsegang bilang Kristianos! Panon a mangitarok na liket so panamasegsegang?

Maniirap Nisesengeg ed Inkatunong

2. Unong ed si Jesus tan ed si apostol Pedro, anton klase na irap so mangitarok na liket?

² Say komawalo a rason na panliket ya indatak nen Jesus et: “Mapalar iray apasegsegang la  nisengeg ed katunongan; ta sikaray makankien na panariay tawen.” (Mateo 5:10) Say mismon panirap et aliwan makapaliket. Oniay insulat nen apostol Pedro: “Anto bilang a karayewan, no dia ed pankasalanan yo, tan natamtampal kayo, itepel yo? Bangbalet no dia ed panggawa yo na kaabigan tan napasegsegang kayo tan itepel yo, sayan peteg so makapaliket ed Dios.” Oniay inyarum to: “Kanian, aleg komon ya anggan siopa ed sikayo manlikna na irap a singa sakey ya akapatey, o matakew, o managgaway mauges, o lapud pibiang to ed gawa na arum a too: Balet ta no wala so napairap a singa Kristiano, agto ibaing; noag ingen igalang to so Dios ed sayan ngaran.” (1 Pedro 2:20; 4:15, 16) Unong ed saray salita nen Jesus, say panirap so mangitarok na liket sano susungdoan itan nisesengeg ed inkatunong.

3. (a) Anto so kabaliksan na kapasegsegang nisesengeg ed inkatunong? (b) Anto so epekto na panamasegsegang ed saray inmuunan Kristiano?

³ Say tuan inkatunong so nadetermina diad pangunor ed linawa tan saray ganggan na Dios. Sirin, say panirap nisesengeg ed inkatunong so mankabaliksan na panirap lapud reresistian na sakey so pananesdes a manumlang ed saray estandarte odino kakaukolanen na Dios. Saray apostol so pinasegsegang na saray Judion lider lapud ag-ira tinmundan nampulong ed ngaran nen Jesus. (Gawa 4:18-20; 5:27-29, 40) Kasin saman so amaandi ed liket da odino angamper ed pampupulong da? Andin balot! “Pinmaway [ira] ed arap na singbatan, a malikeliket ira lapud kinmana ra a nantepel na baing ed ngaran nen Jesus. Et inagew-agew ed templo tan ed saray kaabungan, ag-ira tinmunda a nambabangat tan nampupulong a si Jesus et Kristo.” (Gawa 5:41, 42) Sayan panamasegsegang so angitarok ed sikara na gayaga tan amasimbalo ed seseg da ed panagpulong a kimey. Diad saginonor, saray inmuunan Kristiano so pinasegsegang na saray Romano lapud agda labay so mandayew ed emperador.

4. Anto so pigaran rason no akin a napapasegsegang iray Kristiano?

⁴ Diad modernon panaon, saray Tasi nen Jehova so napapasegsegang lapud ag-ira ontutundan mangipupulong ed “saya ya ebanghelyo na panarian.” (Mateo 24:14) Sano sesebelan iray Makristianon pantitipon da, sikara so mabulos a manirap nen say ontundan mantitipon unong ya ingganggan na Biblia. (Hebreos 10:24, 25) Sikara so napapasegsegang lapud neutral a talindeg da bilang Kristiano odino lapud agda pangusar na dala. (Juan 17:14; Gawa 15:28, 29) Anggaman kuan, sayan talindeg da parad inkatunong so angitarok na akindalem a kareenan tan liket ed saray totoo na Dios natan.​—1 Pedro 3:14.

Apabpabanday Nisesengeg ed si Kristo

5. Anto so manunan rason no akin a napapasegsegang iray totoo nen Jehova natan?

⁵ Say komasiam a rason na panliket ya impabitar nen Jesus diad Sermon to ed Palandey et manasaglawi met ed panamasegsegang. Inkuanto: “Mapalar kayo sano balawen da kayoy totoo, tan pasegsegangen da kayo, tan salitaen day amin a nengneng na mauges a sumpad sikayo, nisengeg ed siak.” (Mateo 5:11) Say manunan rason no akin a napapasegsegang iray totoo nen Jehova et lapud ag-ira kabiangan na kaplesan a marelmeng a sistema na bengabengatla. Oniay inkuan nen Jesus ed saray babangatan to: “No taga mundo kayo say mundo aroen to so saray kayarian to. Balet lapud aliwa kayo a taga mundo, noag say pinili ta kayo ed mundo, kanian say mundo busolen to kayo.” (Juan 15:19) Mipadpara, inkuan nen apostol Pedro: “Dia ed saya pankelawan da na saray managpauges ed sikayo so agyo itumbok ed sikara lanlamang ed alablabas a kamoanan, pabpabandayen da kayo.”​—1 Pedro 4:4.

6. (a) Akin a pabpabandayen tan papasegsegangen iray nakdaan tan saray kakaiba ra? (b) Kasin mamaandi na liket tayo so ontan a panamabanday?

⁶ Anengneng tayo la a saray inmuunan Kristiano so apasegsegang lapud ag-ira tinmundan angipulong diad ngaran nen Jesus. Oniay ingganggan nen Kristo ed saray patumbok to: “Sikayo so tasik . . . angga ed kasampotan na dalin.” (Gawa 1:8) Say matoor a nakdaan na saray alanaan  ya agagi nen Kristo, a tutulongan na matoor a kakaiba ran “baleg ya ulop,” so maseseg a manusumpal ed satan a ganggan. (Apocalipsis 7:9) Kanian, babakalen nen Satanas ‘iray nakdaan a kailalakan to [say bini na “bii,” say mangatatawen a kabiangan na organisasyon na Dios], a manguunor ed ganggan na Dios, tan mantatasi ed si Jesus.’ (Apocalipsis 12:9, 17) Bilang Tasi nen Jehova, mantatasi itayo ed si Jesus, say manuuley la natan ya Ari na gobiernon Panarian, a maneral ed saray gobierno na too ya onsusumpa ed matunong a balon mundo na Dios. (Daniel 2:44; 2 Pedro 3:13) Lapud saya et sikatayoy pabpabandayen tan papasegsegangen, balet maliket itayo a manirap nisesengeg ed ngaran nen Kristo.​—1 Pedro 4:14.

7, 8. Anto iray tilan sasalitaen na saray onsusumpa ed inmuunan Kristiano?

⁷ Imbaga nen Jesus a nepeg a manliket iray patumbok to anggano saray totoo et “salitaen day amin a nengneng na mauges” sumpad sikara nisesengeg ed sikato. (Mateo 5:11) Ontan so peteg ya alikna na saray inmuunan Kristiano. Sanen nipangaw si apostol Pablo diad Roma, nen ngalngali 59-61 K.P., oniay inkuan na saray Judion lider nipaakar ed saray Kristiano: “No nipaakar ed sayan sekta, akabatan mi a nasasalita sumpa ed ganaganay pasen.” (Gawa 28:22) Si Pablo tan Silas so naakusaan a “mangogotgot na mundo,” ya onkikiwas ira “sumpa ed saray ganggan nen Cesar.”​—Gawa 17:6, 7.

⁸ Diad sulat to nipaakar ed saray Kristiano diad panaon na Romanon Empiryo, oniay inkuan nen manag-awaran a si K. S. Latourette: “Nanduruma so akusasyon ed sikara. Lapud ag-ira akibiang ed saray paganon seremonya, saray Kristiano so inakusaan ya ateista. Lapud impulisay da iray aktibidades ed komunidad​—saray paganon piesta, saray panliliket na totoo. . .​—sikara so minudmora bilang managbusol na katooan. . . . Inakusaan met iray lalaki tan bibii a mantitipon ed labi . . . tan nagagawa so mabanday a panaakdol. . . . Say [Memoryal na impatey nen Kristo] a seselebraan dia lambengat ed imaton na saray mananisia so gapoan na saray dengel-dengel a saray Kristiano so mabetbet a mangibabagat na ugaw tan kakanen da so dala tan laman to.” Niarum ni, lapud ag-akibiang iray inmuunan Kristiano diad panagdayew ed emperador, sikara so inakusaan a kalaban na Estado.

9. Panon so inkiwas na saray inmunan-siglon Kristiano ed saray palson akusasyon ed sikara, tan anto so kipapasen natan?

⁹ Saratan a palson akusasyon so ag-angamper ed saray inmuunan Kristiano a manumpal ed ganggan ya ipulong so maong a balita na Panarian. Nen 60-61 K.P., imbaga nen Pablo a say “ebanghelyo” so ‘angiter na bunga tan tinmubo dia ed mundo’ tan “nipulong ed amin a pinalsa ed leksab na tawen.” (Colosas 1:5, 6, 23) Ontan met so nagagawa natan. Saray Tasi nen Jehova so palson aakusaan, a singa saray Kristiano nen inmunan siglo. Ingen, natan et onaaligwas so panangipulong ed mensahe na Panarian tan mamapaliket ed saramay mibibiang ed satan.

Maliket Iran Napasegsegang Singa Saray Propeta

10, 11. (a) Panon a sinampotan nen Jesus so impangonsidera to ed koma-siam a rason na panliket, tan akin? (b) Akin a pinasegsegang iray propeta? Mangiter na saray alimbawa.

¹⁰ Sinampotan nen Jesus so impangonsidera to ed komasiam a rason na panliket diad impangikuan ton: “Manggayaga kayo . . . ta ontan met so impamasegsegang da ed saray propetas ya akaunan nambilay nen sikayo.” (Mateo 5:12) Saray propeta ya imbaki nen Jehova a mamasakbay ed agmatoor ya Israel so ag-inawat tan mabetbet a pinasegsegang. (Jeremias 7:25, 26) Pinekderan itan nen apostol Pablo, diad impangisulat to: “Anto ni naani so ibagak? Ta onkulang ak naani na panaon pian salitaen ko so nipaakar ed . . . saray propeta, a lapu ed pananisia . . . nanako’ra na inkamudmora tan lewelewet; on, lalo ni ed say inkabalor tan saray pangawan.”​—Hebreos 11:32-38.

¹¹ Legan na uley na marelmeng ya Arin Ahab tan say akulaw to, si Jezabel, dakel ed saray  propeta nen Jehova so pinapatey panamegley na kampilan. (1 Arari 18:4, 13; 19:10) Si propeta Jeremias so nipangaw tan diad saginonor et imbantak ed mapitek a bobon. (Jeremias 20:1, 2; 38:6) Si propeta Daniel so imbuntok ed ungib na saray leon. (Daniel 6:16, 17) Amin na saratan a sakbay-Kristiano a propeta so apasegsegang lapud indepensa ra so puron panagdayew ed si Jehova. Dakel a propeta so pinasegsegang na saray Judion relihyoson lider. Tinawag nen Jesus iray eskriba tan Fariseo ya ‘ananak na saray amatey ed saray propeta.’​—Mateo 23:31.

12. Akin ya ipapasen tayon pribilehyo bilang Tasi nen Jehova so napasegsegang a singa saray propeta nensaman?

¹² Natan, sikatayo ran Tasi nen Jehova so mabetbet a napapasegsegang lapud maseseg tayon ipupulong so maong a balita na Panarian. Sikatayo so aakusaan na saray kakabusol tayo bilang ‘agresibon managkomberte,’ balet amta tayo la a saray matoor a managdayew ed si Jehova nensaman so nidunget met ed ontan a panagkritiko. (Jeremias 11:21; 20:8, 11) Ipasen tayon pribilehyo so panirap lapud satan met so sengegan na impanirap na saray matoor a propeta nensaman. Insulat nen babangatan a Santiago: “Panuliranan yo, agagik, so impantepel tan say anos na saray propetas, a nansalita’ra ed ngaran na Katawan. Nia, ibilang tayo a mapalar so saray managtepel.”​—Santiago 5:10, 11.

Aralem Iran Rason ed Pagmaliw a Maliket

13. (a) Akin ya ag-itayo nadidismaya ed panamasegsegang? (b) Anto so ontulong ed sikatayo pian makatalindeg a malet, tan anto so papaneknekan na satan?

¹³ Ag-itayo nadidismaya ed panamasegsegang lapud naliligliwa itayo ed panutumbok ed saray bakat na saray propeta, saray inmuunan Kristiano, tan si Kristo Jesus a mismo. (1 Pedro 2:21) Makagamor itayo na aralem a liket manlapud Kasulatan, a singa diad saray onggendan a salita nen apostol Pedro: “Inararok ira, agyo komon pankelawan so inmapoy a panali ed sikayo, ya onsabi ed sikayo pian pakasalian yo, singa bilang bengatla a pankelawan a nagawaan ed sikayo. No napabpabanday kayo ed ngaran nen Kristo, mapalar kayo, ta say espiritu na gloria tan espiritu na Dios dia ed sikayo so panayaman da.” (1 Pedro 4:12, 14) Amta tayo unong ed eksperiensya a makatalindeg itayo lambengat a malet ed panamasegsegang lapud walad sikatayo so espiritu nen Jehova tan papabiskegen itayo na satan. Say tulong na masanton espiritu so paneknek a bebendisyonan itayo nen Jehova, tan mangitarok itan ed sikatayo na baleg a liket.​—Salmo 5:12; Filipos 1:27-29.

14. Antoray rason tayo a manliket ed panamasegsegang nisesengeg ed inkatunong?

¹⁴ Say sakey nin rason no akin a say isusumpa tan panamasegsegang nisesengeg ed inkatunong so mamapaliket ed sikatayo et lapud pepekderan na satan a manbibilay itayo bilang tuan Kristianos a walaan na maridios a debosyon. Oniay insulat nen apostol Pablo: “Amin so  saray malabay a manbilay ed sinasanto ed Kristo Jesus, manako’ra naani pamasegsegang.” (2 Timoteo 3:12) Sikatayo so malikeliket no nodnonoten tayo a say panmamatoor tayo legan na subok so mangitatarya na kaaruman ya ebat ed angat nen Satanas ya amin a pinalsa nen Jehova so manlilingkor ed Sikato lapud personal a pankaabigan da. (Job 1:9-11; 2:3, 4) Maliket itayo lapud walaan itayo na betang, anggaman melmelag itan, diad kiyalangon na matunong ya inkasoberano nen Jehova.​—Uliran 27:11.

Onlukso ed Liket Lapud Tumang

15, 16. (a) Anton rason so inter nen Jesus ed sikatayo pian ‘manggayaga tan manliket a mapalalo’? (b) Anton tumang so nigana ed tawen parad saray alanaan a Kristiano, tan panon met a natumangan so kakaiba ran ‘arum a karnero’?

¹⁵ Inter nen Jesus so kaaruman a rason pian manliket no papaugesen tan papasegsegangen ira a singa saray propeta nensaman. Diad pansampot na komasiam a rason na panliket, oniay inkuanto: “Manggayaga kayo tan manliket kayon mapalalo [“onlukso kayo ed liket,” NW]; ta balbaleg so tumang yo ed tawen.” (Mateo 5:12) Oniay insulat nen apostol Pablo: “Say bayar na kasalanan say patey; bangbalet say langkap ya andi bayar na Dios say bilay ya andi-angga ed Kristo Jesus a Katawan tayo.” (Roma 6:23) On, say ‘balbaleg a tumang’ et say bilay, tan aliwa itan a singa upa a naalmoan tayo. Satan et andi-bayar a langkap. Inkuan nen Jesus a satan a tumang et nanlapu “ed tawen” lapud nanlapu itan ed si Jehova.

¹⁶ Saray alanaan so makaawat ed “balanget na bilay,” salanti, imortal a bilay a kaiba nen Kristo diad tawen. (Santiago 1:12, 17) Saraman so walaan na mangaraldalin ya ilalo, say ‘arum a karnero,’ so maniilalon manawir ed andi-anggaan a bilay diad mangaraldalin a paraiso. (Juan 10:16; Apocalipsis 21:3-5) Parad saratan a duaran grupo, say “tumang” et aliwan sakey a bengatla a nalmoan da. Saray alanaan tan say ‘arum a karnero’ so makagamor ed tumang da lapud “alablabas a grasya” nen Jehova, ya amakiwas ed si apostol Pablo a mangikuan: “Salamat ed Dios lapu  ed langkap to ya agnibalikas.”​—2 Corinto 9:14, 15.

17. Akin a makapanliket itayo tan piguratibo itayon ‘onlukso ed liket’ sano napapasegsegang itayo?

¹⁷ Oniay insulat nen apostol Pablo nipaakar ed saray Kristiano, ya arum ed sikara so maruksan pinasegsegang nen Emperador Nero: “Manliket itayo ni ed saray kairapan tayo: tan amta tayo a say kairapan, mangiter na anos; tan say anos, pakapatnagan; tan say pakapatnagan, ilalo; tan say ilalo agmangibabaing.” Inkuan to met: “Manliket ed ilalo; masungdo ed kairapan.” (Roma 5:3-5; 12:12) Balanglan mangatatawen odino mangaraldalin so ilalo tayo, say tumang ed panmamatoor tayo legan na subok et abalbaleg a tuloy nen say antokaman a makanepegan ya awaten tayo. Agnasabsabaan so gayaga tayo diad paniilalo tayon manbilay ya andi-anggaan pian panlingkoran tan dayewen so maaron Ama tayo, si Jehova, diad panuley nen Arin Jesu-Kristo. Sikatayo so piguratibon ‘onlukso ed liket.’

18. Anto so nailaloan a gawaen na saray nasyon legan a manasingger so anggaan, tan anto so gawaen nen Jehova?

¹⁸ Diad arum a daldalin, saray Tasi nen Jehova so apasegsegang tan siansia nin papasegsegangen. Diad propesiya to nipaakar ed kasampotan na sistema na bengabengatla, oniay impasakbay nen Jesus ed saray tuan Kristiano: “Gulaen da kayo naani na saray amin a nasyon nisengeg ed ngaran ko.” (Mateo 24:9) Legan itayon manasingger ed anggaan, sugsogan nen Satanas iray nasyon a busolen da so totoo nen Jehova. (Ezequiel 38:10-12, 14-16) Satan so panaon a pakatandaan ya onkiwas la si Jehova. “Pabalegen ko so inkasiak lanlamang, tan pasantoen ko so inkasiak lanlamang, tan ipakabat ko naani so inkasiak lanlamang ed pakanengneng na dakel a nasyon; et naamtaan da ak naani a siak si Jehova.” (Ezequiel 38:23) Si Jehova sirin so mamasantos ed matalonggaring a ngaran to tan mangiliktar ed totoo to manlapud panamasegsegang. Kanian, maliket odino “mapalar so too a mantepel.”​—Santiago 1:12.

19. Legan tayon tatalaranan so baleg ya “agew nen Jehova,” anto so nepeg tayon gawaen?

¹⁹ Diad lalon panasingger na baleg ya “agew nen Jehova,” manliket itayo lapud sikatayo so ‘kinmana a nantepel na baing ed ngaran nen Jesus.’ (2 Pedro 3:10-13; Gawa 5:41) Singa saray inmuunan Kristiano, komon ta ‘ag-itayo ontutunda ed pangibangat tan pangipulong a si Jesus et Kristo’ tan ed gobiernon Panarian to legan tayon tatalaranan so tumang tayo ed balon mundo nen Jehova.​—Gawa 5:42; Santiago 5:11.

Bilang Panrepaso

• Anto so kabaliksan na panirap nisesengeg ed inkatunong?

• Anto so epekto na panamasegsegang ed saray inmuunan Kristiano?

• Akin a nibaga a saray Tasi nen Jehova et napasegsegang a singa saray propeta nensaman?

• Akin a nayarian tayo so ‘manggayaga tan manliket a mapalalo’ sano napapasegsegang itayo?

[Tepetepet Parad Panagaral]

[Saray litrato ed pahina 16, 17]

“Mapalar kayo sano balawen da kayoy totoo, tan pasegsegangen da kayo”

[Credit Line]

Grupo a walad prisoan: Chicago Herald-American