Takinga Kinoia Inara e Mataora
Takinga Kinoia Inara e Mataora
“E mataora to kotou me akakinoia mai kotou e me ka takinga kinoia mai kotou e te tangata e te tapepe anga i te au tu pikikaa anake ia kotou na noku nei.”—MATAIO 5:11, NW.
1. Eaa ra te akapapuanga ta Iesu i oronga atu ki tana au pipi no runga i te tu mataora e te takinga kinoanga?
TE TONO mua anga a Iesu i tana au apotetoro kia tutu aere i te Patireia, kua akamatakite aia kia ratou e ka aro atu ratou i te patoianga. Kua akakite aia kia ratou: “E e makitakitaia kotou e te tangata katoatoa i toku nei ingoa.” (Mataio 10:5-18, 22) Inara, i mua atu ana, i roto i tana Tuatua i runga i te Maunga, kua oronga aia ki tana au apotetoro e ki tetai ke i te akapapu anga e kare taua patoianga e akakino tikai mai i to ratou tu mataora o te manako oonu. Ko te tika, kua kapiti katoa atu a Iesu i te mataora ki te takinga kinoanga ei au Kerititiano! Akapeea te takinga kinoanga i te oronga anga mai i te tu mataora?
Mamae Anga no te Tuatua Tika ua Nei
2. Kia tau kia Iesu e te apotetoro ko Petero, mei teaa ra te tu o te mamae te oronga maira i te tu mataora?
2 Te varu o te tu mataora ta Iesu i akakite mai koia oki: “E mataora te aronga tei takinga kinoia ana no te tuatua tika ua nei, i te mea no ratou te patireia o te au rangi ra.” (Mataio 5:10, NW) Te mamae anga no te reira uaorai kare ei akapaapaa anga. Kua tata te apotetoro ko Petero e: “Kia pāpāia ra kotou i ta kotou uaorai ara, ka akakoromaki ei kotou, eaa ua to reira akameitaki-anga? kia mate ra kotou ma te akono meitaki, ka akakoromaki ei kotou, e mea meitaki ïa i te Atua.” Kua akakite katoa mai aia e: “Auraka rava ra to kotou mate i te mate ta tangata, e te keia, e te rave tuatua kino, e te akamanamanata ia etai ke ra. Ei mate Kerisitiano tona ra, auraka aia e akama: ka akameitaki ra aia i te Atua i te reira.” (1 Petero 2:20; 4:15, 16) Kia tau ki ta Iesu au tuatua, te oronga maira te mamae anga i te tu mataora me akakoromakiia te reira no te tuatua tika ua nei.
3. (a) Eaa ra te aiteanga e kia takinga kinoia no te tuatua tika ua nei? (e) Eaa ra te tupu anga ta te takinga kino i akatupu ki runga i te au Kerititiano mua?
3 Kua vaitoia te tuatua tika mou na te akono anga atu i to te Atua anoano e tana au akauenga. No reira, te mamae anga no te tuatua tika ua nei, ko te aiteanga te mamae ra no te mea kua patoi atu tetai i te taomianga i te aatianga i te au turanga me kore te au umuumuanga a te Atua. Kua takinga kinoia te au apotetoro e te au arataki ngati Iuda no te kore anga e akamutu i te tutu anga i te ingoa o Iesu. (Angaanga 4:18-20; 5:27-29, 40) Kua akaparuparu ainei teia i to ratou rekareka me kare i te akamutu i ta ratou tutu anga? Kare rava! “Aere atura ratou mei te aroaro atu o te Sunederi, ma te rekareka, i te mea, no tona ingoa i manakoiaʼi ratou e tau ia ratou taua takinga-kino ra. E kare e rā i tukua ia ratou, i te apii anga atu e te tuatua anga atu ia Iesu Mesia, ki roto i te iero ra, e i tera are i tera are.” (Angaanga 5:41, 42) Kua oronga mai teia takinga kinoanga i te rekareka kia ratou e te akaou anga i to ratou maroiroi no te angaanga tutu anga. I muri mai, kua takinga kinoia te au Kerititiano mua e Roma no te patoi anga i te rave i te akamori anga i te emepera.
4. Eaa ra etai au tumu i takinga kinoia ai te au Kerititiano?
4 I teia tuatau, kua takinga kinoia te Au Kite o Iehova no te patoi anga ratou no te kore anga e akamutu i te tutu anga i “te evangelia o te basileia nei.” (Mataio 24:14) Te araiia anga ta ratou au uipaanga Kerititiano, kua ariki puareinga ratou i te mamae no te kore anga e akamutu i te akaputuputu taokotai ra mei ta te Pipiria i akaue maira. (Ebera 10:24, 25) Kua takinga kinoia ratou no to ratou tu neutara Kerititiano me kore te patoi anga ratou i te akono tarevake i te toto. (Ioane 17:14; Angaanga 15:28, 29) Noatu rai, te oronga maata maira teia tu no te tuatua tika ki te au tangata o te Atua i teia tuatau nei i te au i roto roa e te tu mataora.—1 Petero 3:14.
Kua Akakinoia no Karaiti Nei
5. No teea tumu i takinga kinoia ai te au tangata o Iehova i teia tuatau?
5 Te iva o te tu mataora ta Iesu i akamanako ana i roto i tana Tuatua i runga i te Maunga kua akono katoaia ki te tumu manako no te takinga kinoanga. Kua akakite aia e: “E mataora to kotou me akakinoia mai kotou e me ka takinga kinoia mai kotou e te tangata e te tapepe anga i te au tu pikikaa anake ia kotou na noku nei.” (Mataio 5:11, NW) Te tumu tikai i takinga kinoia ai te au tangata o Iehova koia oki kare ratou i riro mai ana ei tuanga no teia akatereanga o te au mea kino. Kua akakite a Iesu ki tana au pipi e: “Naringa kotou no teianei ao, e inangaro mai to teianei ao i tona tikai: no te mea ra, kare kotou i to teianei ao, ko au i iki ia kotou no roto i teianei ao, i riri mai ei teianei ao ia kotou.” (Ioane 15:19) Mei te reira katoa, kua akakite te apotetoro ko Petero e: “E te va ua ra ratou i te mea kare kotou i kapiti katoa ia ratou i taua peu kanga maata ra, ma te akakino oki ia kotou.”—1 Petero 4:4.
6. (a) No teaa ra i akakinoia ai e i takinga kinoia ai te toenga e to ratou au oa? (e) Te akaparuparu ra ainei taua akakino anga i to tatou tu mataora?
6 Kua kite ke ana tatou e kua takinga kinoia te au Kerititiano mua no to ratou patoi anga no te kore anga e akamutu i te tutu anga i te ingoa o Iesu. Kua akaue a Karaiti i tana au pipi: “E ei kite oki kotou noku . . . e tae ua atu ki te openga o te enua ra.” (Angaanga 1:8) Ko te toenga tiratiratu no te au taeake akatainuia o Karaiti, te tauturuia ra e to ratou au oa tiratiratu te “aronga maata rava,” te rave maroiroi ra i taua akauenga. (Apokalupo 7:9) No reira, kua tamaki atura a Satani “i te toenga a tona uanga [te uanga a te “vaine,” te tuanga i te rangi no te akaaerenga a te Atua] ra, i tei mou marie i te tuatua-akakite a Iesu Mesia ra.” (Apokalupo 12:9, 17) Ei Au Kite o Iehova, te tuatua akakite nei tatou ia Iesu, ko te Ariki te tutara ra i teianei i te kavamani Patireia, te ka takore atu i te au kavamani a te tangata te arairai ra i to te Atua ao ou tuatua tika ra. (Daniela 2:44; 2 Petero 3:13) No teianei i akakinoia ai tatou e i takinga kinoia ai, inara te manako mataora nei tatou ia tatou uaorai i te mamae anga no te ingoa o Karaiti.—1 Petero 4:14.
7, 8. Eaa ra ta te aronga patoi e tapepe pikikaa maira no runga i te au Kerititiano mua?
7 Kua akakite a Iesu e kia akamanako mataora tana au pipi ia ratou uaorai noatu e me ‘te tapepe maira te au tangata i te au tu pikikaa’ ia ratou nona ra. (Mataio 5:11, NW) Kua tupu tikai teia ki te au Kerititiano mua. I te mouria anga te apotetoro ko Paulo i Roma, mei te 59-61 T.N., kua karanga te au arataki ngati Iuda o reira ra no te au Kerititiano e: “I tenana pupu, kua akakinoia ïa e kare e ngai toe, kua kite matou.” (Angaanga 28:22) Kua akaapaia a Paulo raua ko Sila no te ‘taruri ke anga i te pa enua,’ e “kare anake e tau ta ratou tuatua i ta Kaisara ra.”—Angaanga 17:6, 7.
8 Te tata anga no te au Kerititiano i te tuatau no te Patireia o Roma, kua akakite te tangata tuatua enua ko K. S. Latourette e: “E tukeke te au akaapaanga. No te mea kua patoi ratou i te rave i te au oroa peikani kua tapaia te au Kerititiano ei aronga irinaki kore i te Atua. No te akaatea maata anga mai ratou mei te oraanga i te ngai tangata—te au oroa peikani, te au tamataora a te katoatoa . . .—kua akavaavaaia ratou ei aronga makitakita i te au tangata ravarai. . . . Kua karangaia no te reira e kua aravei taokotai mai te tane e te vaine i te po . . . e kua aru mai te pirianga ainga tau kore. . . . E ko te tika anga kua akono uaia [te Akamaara Anga o to Karaiti matenga] ki mua i te aroaro o te aronga irinaki ra e i akamataia ai te au koumuumu anga e te akaatinga putuputu ra te au Kerititiano i te pepe e te kai ra i to te reira toto e te kopapa.” Pera katoa, no te mea e kua patoi te au Kerititiano mua i te rave i te akamori anga emepera, kua akaapaia ratou ei au enemi no te Au-Enua.
9. Akapeea te au Kerititiano i te anere mataiti mua i te ariu anga ki te au akaapaanga pikikaa tei raveia ki runga ia ratou, e eaa ra te turanga i teia tuatau?
9 Kare taua au akaapaanga pikikaa i arai ana i te au Kerititiano mua i te rave i ta ratou angaanga no te tutu anga i te tuatua meitaki o te Patireia. I te 60-61 T.N., kua rauka ia Paulo i te tuatua i te “evangelia” e “i te ao katoa nei, e te akatupu nei i te meitaki” e tei “akakiteia akenei ki te tangata ravarai i raro ake i teianei rangi.” (Kolosa 1:5, 6, 23) Te tupu nei te reira i teia tuatau. Te akaapa pikikaaia ra te Au Kite o Iehova, mei te au Kerititiano rai i te anere mataiti mua. Inara, i teia tuatau te puapinga nei te angaanga no te tutu anga i te karere o te Patireia e te oronga maira ki te aronga tei o atu ki roto i te reira i te tu mataora maata.
Kua Mataora e kua Takinga Kinoia Mei te Au Peroveta Rai
10, 11. (a) Akapeea a Iesu i te taopenga anga i tana akamanakoanga i te iva o te tu mataora? (e) No teaa ra i takinga kinoia ai te au peroveta? Oronga mai i te au akaraanga.
10 Kua taopenga a Iesu i tana akamanakoanga no te iva o te tu mataora i te na ko anga e: “E rekareka . . . , i te reira mataara kua takinga kino ratou i te au peroveta i mua ake ia kotou.” (Mataio 5:12, NW) Kare i arikiia mai ana te au peroveta ta Iehova i tono atura kia akamatakite ia Iseraela tiratiratu kore e kua takinga kino putuputuia. (Ieremia 7:25, 26) Kua akapapu mai te apotetoro ko Paulo i teia tika anga, i te tata anga e: “E eaa tu rai taku tuatua? e roa ua oki kia tuatua au . . . te au peroveta ra . . . i te akarongo, . . . e mate maata to tetai pae i te akavaavaa, e te pāpā, e te ruru, e te tapeka i roto i te are tapekaanga.”—Ebera 11:32-38.
11 I te tuatau i tutara ai te ariki kino ko Ahaba raua ko tana vaine, ko Iezebela, e manganui te au peroveta a Iehova tei tamateia ki te koke. (1 Ariki 18:4, 13; 19:10) Kua tukunaia te peroveta ko Ieremia ki roto i te patiti e i muri mai kua titiriia atu ki roto i te vaarua vari. (Ieremia 20:1, 2; 38:6) Kua titiriia te peroveta ko Daniela ki roto i te vaarua o te au riona. (Daniela 6:16, 17) Kua takinga kino pouroaia teia au peroveta Kerititiano o mua ana no te mea kua paruru ratou i te akamori anga ma a Iehova. E manganui te au peroveta tei takinga kinoia e te au arataki akonoanga ngati Iuda. Kua kapiki a Iesu i te aronga tata e te au Pharisea e e ‘tamariki na te aronga i ta i te au peroveta ra.’—Mataio 23:31.
12. Eaa ra tatou ei Au Kite o Iehova ra ka akamanako ei e akangateitei anga te reira kia takinga kinoia mei te au peroveta taito rai?
12 I teia tuatau, te takinga kino putuputuia ra tatou ei Au Kite o Iehova no te mea te rave maroiroi ra tatou i te tutu anga i te tuatua meitaki o te Patireia. Te akaapa ra to tatou au enemi ia tatou no te ‘rave tutu anga maroiroi,’ inara kua kite tatou e kua aro ana taua aronga akamori tiratiratu o Iehova i mua ake ia tatou i te au akaapa anga aiteite. (Ieremia 11:21; 20:8, 11) Te akamanako nei tatou i te reira ei akangateitei anga kia mamae no taua tumu rai i mamae ei te au peroveta tiratiratu taito ra. Kua tata te pipi ko Iakobo e: “E rave, e aku au taeake, i te au peroveta ko tei tuatua mai ma te ingoa o te Atu ra, ei akaraanga i te akaruru anga i te kino e te akakoromaki. I na oki, te karanga nei tatou e, kua meitaki te aronga i tamou marie i te akakoromaki.”—Iakobo 5:10, 11.
Au Tumu Oonu kia Mataora
13. (a) Eaa ra tatou i akamaroiroi koreia ai e te takinga kinoanga? (e) Eaa ra te tauturu maira ia tatou kia vai ngaueue kore, e eaa ra ta teia e akapapu maira?
13 Kare i akamaroiroi koreia no te takinga kino, kua akapumaanaia tatou i te manako anga e te aru ra tatou i te au takainga vaevae o te au peroveta, te au Kerititiano mua, e to Iesu Karaiti uaorai. (1 Petero 2:21) Te kite nei tatou i te akamerengoanga oonu mei te au Tuatua Tapu, mei te au tuatua te aru maira a te apotetoro ko Petero e: ‘E aku au akaperepere e, auraka e poitirere i te takinga-kino maata i roto ia kotou ei timata anga ia kotou, mei te mea e kua rokoia kotou i tetai mea ke: Kia akakinoia kotou i te ingoa o te Mesia ra, e ao to kotou; no te mea te noo ra te vaerua kakā, te vaerua o te Atua, ki runga ia kotou: kua akakinoia aia e ratou, kua akameitakiia ra e kotou.’ (1 Petero 4:12, 14) Kua kite tatou mei te tupuanga e ka rauka ia tatou i te vai ngaueue kore anga i raro ake i te takinga kino anake ra no te mea te noo ra te vaerua o Iehova ki runga ia tatou e te akamaroiroi maira ia tatou. Te turuanga a te vaerua tapu e akapapu anga ia e tei runga ia tatou ta Iehova akameitaki anga, e te oronga maira teia i te tu mataora maata kia tatou.—Salamo 5:12; Philipi 1:27-29.
14. Eaa ra te au tumu i rekareka ai tatou kia takinga kinoia no te tuatua tika ua nei?
14 Ko tetai atu tumu e eaa te patoianga e te takinga kino no te tuatua tika ua nei i akariro ei ia tatou kia mataora koia oki te akapapu maira te reira e te noo nei tatou ma te akono tau i te Atua ei au Kerititiano mou. Kua tata te apotetoro ko Paulo e: “E te aronga katoa e maara tikai e akono i te Atua, ei roto rai i te Mesia ra ia Iesu, e takinga-kino katoaia ïa.” (2 Timoteo 3:12) E maata to tatou mataora i te manako anga e te tamou marie anga tatou i te tu tiratiratu i raro ake i te timata anga te oronga maira i tetai pauanga ki ta Satani akaaoanga e pouroa te au mea angaia a Iehova te tavini ra Iaia no te manako noinoi. (Iobu 1:9-11; 2:3, 4) Te rekareka nei tatou e kua o atu tatou, noatu e meangiti ua te reira, i te akatapuanga i to Iehova tu ngateitei tuatua tika ra.—Maseli 27:11.
E Rere ua no te Rekareka i te Tutaki
15, 16. (a) Eaa ra te tumu i oronga mai ei a Iesu no tatou nei kia “rekareka e e rere ua ma te rekareka” ra? (e) Eaa te tutaki anga te akaputuia ra i te au rangi no te au Kerititiano akatainuia, e akapeea ra to ratou au oa te “mamoe ke atu” e tutaki katoaia ai?
15 Kua oronga a Iesu i tetai atu tumu no te rekareka no te akakinoia anga e te takinga kinoia anga mei te au peroveta taito rai. I te vaitata anga ki te openga o te iva o te tu mataora, kua akakite aia e: “E rekareka e e rere ua ma te rekareka, i te mea e e maata ta kotou tutaki i te au rangi ra.” (Mataio 5:12, NW) Kua tata te apotetoro ko Paulo e: “E utunga te mate no te ara; kareka te ora mutu kore ra, e mea oronga uaia mai e te Atua i roto i to tatou Atu ia Iesu Mesia.” (Roma 6:23) Ae, te ‘tutaki maata’ ko te ora ia, e kare te reira tutaki anga e ka rauka ia tatou i te tutaki. E apinga oronga rangatiraia mai te reira. Kua tuatua a Iesu e tei te “au rangi ra” te tutaki no te mea no ko mai ia Iehova te reira.
16 Kua rauka i te aronga akatainuia “te korona ora,” koia oki, i to ratou tu, e oraanga mate kore ma Karaiti i te rangi. (Iakobo 1:12, 17) Ko te aronga e manakonakoanga i te enua nei, ko te “mamoe ke atu,” te akara ra ki mua te raukaanga te ora mutu kore i roto i tetai parataito i te enua nei. (Ioane 10:16; Apokalupo 21:3-5) No teia nga pupu nei, ko te ‘tutaki anga’ kare e rauka na roto i te angaanga. Ko te aronga akatainuia e te “mamoe ke atu” ka rauka mai ta ratou tutaki anga no te “rai o te aroa ua” o Iehova, i akakeuia ai te apotetoro ko Paulo kia tuatua e: “Kia akameitakiia te Atua [“no tana apinga oronga,” NW] kare e tika kia tuatua ra.”—2 Korinetia 9:14, 15.
17. Eaa ra tatou ka mataora ai me takinga kinoia mai e te akatutu anga i te ‘rere ua ma te rekareka’?
17 Ki te au Kerititiano, kare e roaia ko etai ia ratou ka takinga kinoia e te Emepera ko Nero, kua tata te apotetoro ko Paulo e: “Te rekareka katoa nei ra tatou i te tumatetenga; kua kite oki tatou e, na te au tumatetenga e akatupu i te akakoromaki; E na te akakoromaki e akatupu i te kite; e na te kite e akatupu i te tatari: Kare oki te tatari e taakama mai.” Kua karanga katoa aia e: “E rekareka i te [ma]nakonako anga; e akakoromaki i te mate.” (Roma 5:3-5; 12:12) Noatu e e manakonakoanga i te rangi me kare i te enua nei to tatou, e maata roa atu ta tatou tutaki anga no te tu tiratiratu i raro ake i te timata anga i tetai ua atu apinga te tau ra ia tatou. Kare e kotingaia to tatou rekareka no te manakonako anga i te noo anga e tuatua ua atu i te tavini anga e te akapaapaa anga i to tatou Metua aroa ra, ko Iehova, i raro ake i to tatou Ariki ko Iesu Karaiti. Te “rere [akatutu ra tatou] ma te rekareka.”
18. Te vaitata maira te openga e eaa ra te tapapaia ra no te pa enua, e eaa ra ta Iehova ka rave?
18 I roto i etai au enua, te takinga kinoia nei rai te Au Kite o Iehova. I roto i tana totou no runga i te openga o teia akatere anga o te au mea nei, kua akamatakite maira a Iesu i te au Kerititiano mou e: “E makitakitaia mai kotou e te pa enua ravarai i toku nei ingoa.” (Mataio 24:9) Te vaitata atura tatou ki te openga, ka akatupu a Satani i te pa enua kia akakite mai i to ratou makitakita anga no runga i te au tangata o Iehova. (Ezekiela 38:10-12, 14-16) E akairo anga teia i te tuatau no Iehova kia rave i te angaanga. “E akamaata oki au iaku uaorai, e e akatapu iaku uaorai; e kiteia oki au e te mata o te au enua e manganui; e kite oki ratou e ko Iehova au.” (Ezekiela 38:23) Ka akatapu ei i reira a Iehova i tona ingoa maata e te akaora anga i tona au tangata mei roto mai i te takinga kinoanga. No reira, “e mataora te tangata tei tamou marie ua atura.”—Iakobo 1:12, NW.
19. Ia tatou e tatari ra i te ‘ra maata o Iehova,’ eaa ra ta tatou ka rave?
19 I te vaitata anga mai ‘taua ra maata o Iehova,’ kia rekareka rai tatou no te mea ‘i manakoiaʼi tatou e tau i taua takinga-kino ra’ no to Iesu ingoa. (2 Petero 3:10-13, NW; Angaanga 5:41) Mei te au Kerititiano mua rai, kia rave ua atu rai tatou ‘kare e tukua i te apii anga e te tuatua anga ia Iesu Mesia’ e tona kavamani Patireia ia tatou e tatari ra i to tatou tutaki i roto i to Iehova ao ou tuatua tika ra.—Angaanga 5:42; Iakobo 5:11.
Na te Akamanako Akaou Anga
• Eaa ra te aiteanga e kia mamae no te tuatua tika ua nei?
• Eaa ra te tupuanga ta te takinga kino i akatupu ki runga i te au Kerititiano mua?
• Eaa ra ka karangaia ai e kua takinga kinoia te Au Kite o Iehova mei te au peroveta taito rai?
• Eaa ra tatou ka “rekareka e e rere ua ma te rekareka” i te takinga kino angaia?
[Au Uianga Apii]
[Au Tutu i te kapi 16, 17]
“E mataora to kotou me akakinoia mai kotou e me ka takinga kinoia mai kotou e te tangata”
[Akameitakianga]
Group in prison: Chicago Herald-American