Bulenga bua bifukibua bia Yehowa

“Yehowa, mona mudi bungi bua mishindu ya midimu yebe!”

NANSHA tuetu basombele ku musoko anyi mu tshimenga tshinene, pa mukuna anyi muinshi mu tshibatabata pabuipi ne mâyi, tudi banyunguluka kudi bifukibua bidi ne bulenga bua dikema. Ke bualu kayi Calendrier des Témoins de Jéhovah 2004 kadi kaleja bimfuanyi bia bintu bia dikema bidi Nzambi muenze.

Bantu bena dianyisha batu misangu yonso banyisha bintu bidi Nzambi muenze. Angata tshilejilu tshia Solomo. Uvua ne lungenyi ‘lupite lungenyi lua bantu bonso ba ku Est.’ Bible udi wamba ne: ‘Wakajingulula malu onso a mitshi yonso, ku mutshi wa cèdre wakadi ku mukuna wa Lebanona too ne mitshi ya hisopa yakadi misase pa tshimanu tshia nzubu; wakamba kabidi malu onso a nyama ne nyunyi ne bintu bidi bidikoka panshi ne a minyinyi ya mu mâyi.’ (1 Bakelenge 4:30, 33) Mukalenge Davidi tatuende wa Solomo uvua misangu mivule welangana meji bua bintu binene bidi Nzambi muenze. Muoyo wakamusaka bua kuambila Mufuki wende ne: ‘Yehowa, mona mudi bungi bua mishindu ya midimu yebe! Wewe wakenza buonso buayi ne lungenyi luebe; buloba budi buule tente ne bintu biwakufuka.’​—Musambu 104:24. *

Tuetu petu tudi ne bua kuikala tubandila bifukibua ne tubilonga. Tshilejilu, tudi mua ‘kubandisha mêsu etu kulu’ ne kudiebeja ne: “Wakafuka bintu ebi nganyi?” Bushuwa, n’Yehowa Nzambi udi ne ‘bukole buende bunene’ ne udi ne ‘bukole bua bukokeshi’!​—Yeshaya 40:26.

Mmushindu kayi udi dielangana meji bua bintu bidi Yehowa mufuke ditulenga? Didi ditulenga mu mishindu mitue ku isatu. Didi mua (1) kutuvuluija bua kunanga muoyo utudi nawu, (2) kutusaka bua kuambuluisha bakuabu bua kulonga malu a bifukibua, ne (3) kutusaka bua kufika ku dimanya ne ku dianyisha Mufuki wetu bikole menemene.

Tudi bapite “nyama [idi] kayiyi lungenyi” kule ne kule bualu tudi ne mushindu wa kutangila bintu bia dikema bidi Nzambi mufuke ne wa kubianyisha. (2 Petelo 2:12, MMM) Tshilejilu, mêsu etu adi mua kumona mpata mu bulenga buende buonso. Matshi etu adi mua kumvua miadi milenga ya nyunyi. Dimanya dia dîba ne miaba didi dituvuluija miaba itukadi bamone. Nansha mutudi katuyi bapuangane mpindieu, kuikala ne muoyo mbualu buimpe be!

Baledi badi mua kusanka padibu bamona bana babu bananga bintu bidi Nzambi mufuke. Tshilejilu, bana batu basue kukuata mpasu mu bisuku, kumuna tumbotshia ne tululu, kubanda ku mitshi! Bidi bimpe bua baledi kumvuijabu bana diumvuangana didi pankatshi pa bintu bidibu bamona ebi ne Mufuki. Dianyisha ne kanemu bidi bana bapeta bua bintu bidi Yehowa mufuke bidi mua kushala mu lungenyi luabu matuku abu onso a muoyo.​—Musambu 111:2, 10.

Tuetu tuanyisha bifukibua kadi tubenga kutumbisha Mufuki bidi bileja dipanga dia meji dia menemene. Mulayi wa Yeshaya udi utuambuluisha bua kuelangana meji bua bualu ebu. Udi wamba ne: ‘Kuakumanya anyi? Kuakumvua anyi? Yehowa udi Nzambi wa tshiendelele, Mufuki wa nseke yonso  ya pa buloba too ne ku mfudilu kuabu. Yeye kêna uteketa nansha, kêna upungila nansha, kakuena muntu udi mua kumanya kujingulula kuende kua malu biakebaye kukumanya.’​—Yeshaya 40:28.

Kakuyi mpata, bintu bidi Yehowa muenze bidi bijadika meji ende adi mapite meji makuabu onso, bukole buende budi bupite bukole bukuabu buonso ne dinanga dikole didiye nadi kutudi. Patudi tumona bulenga bua bintu bidi bitunyunguluke ne tujingulula ngikadilu ya udi mubienze bionso, tudi ne bua kumvua muoyo utusaka bua kuambulula mêyi a Davidi a ne: ‘Mukalenge, kakuena umue bu wewe; kakuenaku minga midimu bu midimu yebe.’​—Musambu 86:8.

Tudi ne bua kuikala bajadike ne: bantu badi batumikila Yehowa nebatungunuke ne kuanyisha bikole bintu bidiye mufuke. Patuikala ne muoyo wa tshiendelele, netulonge malu a Yehowa mutudi basue. (Muambi 3:11) Ne patudi tulonga malu a bungi adi atangila Mufuki wetu eu, tudi tufika kabidi ku dimunanga bikole menemene.

[Mêyi adi kuinshi]

[Kazubu mu dibeji 9]

Butumbi kudi Mufuki

Bena siyanse ba bungi bena dianyisha badi bamona ne: Nzambi ke udi mufuke bintu. Tangila bilejilu bidi bilonda ebi:

“Diumvuija dia malu a siyanse andi ndonga ne disanka didimu bidi bilua mu bikondo ebi bindi mmanya tshintu tshipiatshipia mu mpukapuka ne ndiambila ne: ‘Ke mushindu uvua Nzambi mutshienze.’ Tshipatshila tshianyi ntshia kumanyaku nansha kasunsukila ka meji a Nzambi.”​—Henry Schaefer, mulongeshi wa chimie.

“Bua tshidi tshienzeje bua tshibuashibuashi kuikalatshi tshialabale, mubadi nkayende ambe tshidiye mumone, kadi ngumvuilu wetu wa tshiledi tshia dialabala dia tshibuashibuashi ngua tshitupa patudi tupua [Nzambi] muoyo.”​—Edward Milne, mulongi wa tshibuashibuashi wa mu Grande-Bretagne.

“Tudi bamanye ne: bintu bifuka badi babiumvuija ne makumi matambe buimpe bualu Nzambi wakabifuka.”​—Alexander Polyakov, mumanyi wa makumi wa mu Russie.

“Patudi tulonga bintu bifuka, tudi tukonkonona meji a Mufuki, tubala ngenyi yende, tumvuija ngenzelu wa malu udi muikale Wende yeye, kadi ki ng’wetu tuetu to.”​—Louis Agassiz, mumanyi wa malu a bintu bia muoyo wa mu Amerike.

[Tshimfuanyi mu mabeji 8, 9]

Nyunyi ya manchot, mu Antarktike

[Tshimfuanyi mu dibeji 9]

Parke wa Grand Teton, ku Wyoming, mu États-Unis

[Mêyi a dianyisha]

Jack Hoehn/​Index Stock Photography