‘အိုယေဟောဝါ ကိုယ်တော် စီရင်ပြုပြင်တော်မူသောအရာများသည် အဘယ်မျှလောက် များပြားပါသည်တကား!’
ယေဟောဝါ၏ဖန်ဆင်းခြင်းလက်ရာ ခံ့ညားထည်ဝါမှု
‘အိုယေဟောဝါ ကိုယ်တော် စီရင်ပြုပြင်တော်မူသောအရာများသည် အဘယ်မျှလောက် များပြားပါသည်တကား!’
ကျွန်ုပ်တို့သည် ကျေးလက်တောရွာတွင် နေထိုင်သည်ဖြစ်စေ၊ မြို့ကြီးပြကြီးတွင် နေထိုင်သည်ဖြစ်စေ၊ တောင်ပေါ်၊ သို့မဟုတ် ပင်လယ်နားတွင် နေသည်ဖြစ်စေ ကျွန်ုပ်တို့ကို အံ့မခန်းဖွယ် ခံ့ညားထည်ဝါသော ဖန်ဆင်းခြင်းလက်ရာတော်များ ဝိုင်းရံလျက်ရှိ၏။ ယေဟောဝါသက်သေများ၏ ၂၀၀၄ ပြက္ခဒိန်သည် ယေဟောဝါဘုရားသခင်၏ အံ့မခန်းဖွယ်လက်ရာတော်များ၏မြင်ကွင်းစုံကို သင့်လျော်စွာ ဖော်ပြထားခြင်းဖြစ်သည်။
ကျေးဇူးသိတတ်သူတို့သည် ဘုရားသခင့်လက်ရာတော်များကို အမြဲစိတ်ဝင်စားကြ၏။ သာဓကအနေနှင့် “အရှေ့ပြည်သားအပေါင်းတို့၏ . . . ပညာရှိသမျှကိုလွန်ကဲ” သော ဉာဏ်ပညာရှိသူ ရှောလမုန်ကို သုံးသပ်ကြည့်ပါ။ သူ့အကြောင်း သမ္မာကျမ်းစာက ဤသို့ဆို၏– “လေဗနုန်အာရဇ်ပင်မှစ၍ အုတ်ရိုးတွင်ပေါက်တတ်သော ဟုဿုပ်ပင်တိုင်အောင်မြွက်ဆို၏။ သားမျိုး၊ ငှက်မျိုး၊ တွားတတ်သောအကောင်မျိုး၊ ငါးမျိုးများ၏အကြောင်းကိုလည်း မြွက်ဆို၏။” (၃ ဓမ္မရာဇဝင် ၄:၃၀၊ ၃၃၊ သမ္မာ) ရှောလမုန်၏ခမည်းတော် ဒါဝိဒ်မင်းသည် ဘုရားသခင့်လက်ရာတော်များကို ဆင်ခြင်သုံးသပ်လေ့ရှိသည်။ သူ၏ဖန်ဆင်းရှင်ကို ဤသို့ဟစ်ကြွေးရန် စေ့ဆော်ခံခဲ့ရသည်– “ကိုယ်တော်စီရင်ပြုပြင်တော်မူသောအရာများသည် အဘယ်မျှလောက်များပြားပါသည်တကား။ ရှိရှိသမျှကို ပညာတော်အားဖြင့် ဖန်ဆင်းတော်မူပါပြီ။ မြေကြီးသည် ဖန်ဆင်းတော်မူသောအရာများနှင့် ကြွယ်ဝပြည့်စုံပါ၏။”—ဆာလံ ၁၀၄:၂၄၊ သမ္မာ။ *
ကျွန်ုပ်တို့လည်း ဖန်ဆင်းရာများကို ဆင်ခြင်သုံးသပ် လေ့လာသင့်သည်။ ဥပမာ၊ “အထက်သို့မော့ကြည့်” ပြီး “ထိုအရာတို့ကို အဘယ်သူဖန်ဆင်းသနည်း” ဟုမေးနိုင်သည်။ အဖြေမှာ “ပြင်းထန်သောစွမ်းအင် အလျှံပယ်၊” [ကဘ] ရှိပြီး အမှန်ပင် “တန်ခိုးနှင့်ပြည့်စုံတော်မူသော” ယေဟောဝါဘုရားသခင်ဖြစ်သတည်း!—ဟေရှာယ ၄၀:၂၆။
ယေဟောဝါ၏ဖန်ဆင်းခြင်းလက်ရာတော်များကို ဆင်ခြင်သုံးသပ်ခြင်းက မည်သို့အကျိုးသက်ရောက်သင့်သနည်း။ အနည်းဆုံး နည်းသုံးနည်းဖြင့် အကျိုးသက်ရောက်သင့်သည်။ (၁) ကျွန်ုပ်တို့၏ဘဝကို တန်ဖိုးထားမြတ်နိုးရန် သတိပေးနိုင်သည်၊ (၂) ဖန်ဆင်းရာများမှ လေ့လာသင်ယူတတ်ဖို့ သူတစ်ပါးအား ကူညီပေးရန် စေ့ဆော်ပေးနိုင်ပြီး (၃) ကျွန်ုပ်တို့၏ဖန်ဆင်းရှင်ကို ပိုမိုသိကျွမ်း၍ ကျေးဇူးသိတတ်ဖို့ လှုံ့ဆော်ပေးနိုင်သည်။
“စဉ်းစားဉာဏ်မရှိသော . . . တိရစ္ဆာန်” များထက် များစွာသာလွန်သော ကျွန်ုပ်တို့၏လူ့ဘဝသည် အံ့မခန်းဖွယ်ဖန်ဆင်းရာများကို လေ့လာဆန်းစစ်ကြည့်ပြီး တန်ဖိုးထားတတ်စေသည်။ (၂ ပေတရု ၂:၁၂) လှပတင့်တယ် ရှုချင်စဖွယ် တောတောင်ရှုခင်းများကို ကျွန်ုပ်တို့မျက်စိဖြင့် တွေ့ မြင်ရှုစားနိုင်သည်။ ကျွန်ုပ်တို့၏နားဖြင့် ငှက်များ၏ သာယာနာပျော်ဖွယ် တွန်ကျူးသံများကို ကြားနိုင်ကြ၏။ ထို့ပြင် အချိန်အခါ၊ နေရာဒေသကို သိသောစိတ်က အမှတ်ရစရာ ရည်ညွှန်းကိုးကားစရာအချက်များ ရှိစေသည်။ ကျွန်ုပ်တို့၏ လက်ရှိအသက်တာသည် မစုံလင်သော်လည်း အမှန်တကယ် အသက်ရှင်ရကျိုးနပ်ပေသည်!
မိဘများသည် ဖန်ဆင်းရာများအပေါ် မိမိတို့သားသမီးများ စိတ်ဝင်တစား စူးစမ်းလိုခြင်းကိုကြည့်ပြီး ပျော်ရွှင်မှုရရှိနိုင်သည်။ ကလေးသူငယ်များသည် ပင်လယ်ကမ်းခြေတွင် ခရုခွံများကောက်ရန်၊ တိရစ္ဆာန်ကို တယုတယ ပွတ်သပ်ရန်၊ သစ်ပင်တက်ရန် အလွန်နှစ်သက်ကြ၏! ယင်းကိုအခြေပြု၍ မိဘများသည် ဖန်ဆင်းရာများနှင့် ဖန်ဆင်းရှင် ဆက်စပ်မှုရှိကြောင်း ကလေးငယ်များအား သိနားလည်စေလိုကြပေမည်။ ထိုသို့ပြုလျှင် ကလေးတို့၏ ဘဝတစ်လျှောက်လုံးတွင် ယေဟောဝါ၏ဖန်ဆင်းခြင်းလက်ရာတော်များကို အံ့ဩမိန်းမော၊ ရိုသေခန့်ညားစိတ် စွဲငြိသွားနိုင်သည်။—ဆာလံ ၁၁၁:၂၊ ၁၀။
ဖန်ဆင်းရာများကို ချီးမွမ်းအံ့သြကြသော်လည်း ၎င်းတို့၏ဖန်ဆင်းရှင်ကို အသိအမှတ်မပြုပါက အလွန့်အလွန် အမြော်အမြင်ကင်းမဲ့ရာကျပေမည်။ ယင်းကို ဟေရှာယ၏ဤပရောဖက်ပြုချက်က ပြန်ပြောင်းသုံးသပ်စေသည်– “ထာဝရဘုရား[သခင်]သည် အစဉ်အမြဲတည်တော်မူသော ဘုရားသခင်ဖြစ်ကြောင်းကိုလည်းကောင်း၊ မြေကြီးစွန်းတိုင်အောင် ဖန်ဆင်းတော်မူသောအရှင် ဖြစ်ကြောင်းကိုလည်းကောင်း၊ မောတော်မူခြင်း၊ ပင်ပန်းတော်မူခြင်းမရှိ၊ စစ်၍မကုန်နိုင်သော ဉာဏ်နှင့်ပြည့်စုံတော်မူကြောင်းကိုလည်းကောင်း သင်သည် မသိ မကြားဖူးသလော။”—ဟေရှာယ ၄၀:၂၈။
မှန်ပါသည်၊ ယေဟောဝါ၏လက်ရာတော်များသည် ကိုယ်တော်၏ပြိုင်ဘက်ကင်းသောဉာဏ်ပညာနှင့် တန်ခိုးတော်ကို သက်သေထူသည့်အပြင် ကျွန်ုပ်တို့ကိုအလွန်ချစ်ကြောင်း ထင်ရှားစေသည်။ ကျွန်ုပ်တို့ဝန်းကျင်ရှိ အလှအပများကိုတွေ့ မြင်ပြီး ၎င်းတို့ကို ဖန်ဆင်းတော်မူသောအရှင်၏ အရည်အသွေးများကို သိမြင်လာသောအခါ ‘အိုယေဟောဝါ . . . ကိုယ်တော်နှင့်တူသောဘုရားသခင်မရှိပါ။ အမှုတော်နှင့်တူသောအမှုလည်းမရှိပါ” ဟုပြောခဲ့သော ဒါဝိဒ်၏စကားကို သံယောင်လိုက်ရန် လှုံ့ဆော်ခံရပါစေ။—ဆာလံ ၈၆:၈။
နာခံမှုရှိသောလူသားများသည် ယေဟောဝါ၏ဖန်ဆင်းခြင်းလက်ရာတော်များကို အစဉ်မပြတ်စိတ်ဝင်စားနေကြပါလိမ့်မည်။ ထာဝရကာလတစ်လျှောက် ယေဟောဝါအကြောင်း ကျွန်ုပ်တို့ပိုမိုသိရှိလာခွင့် များစွာရကြပါမည်။ (ဒေ. ၃:၁၁) ကိုယ်တော့်အကြောင်း သိရှိလာလေ ဖန်ဆင်းရှင်အား ပိုမိုချစ်မြတ်နိုးလာလေဖြစ်မည်။
[အောက်ခြေမှတ်ချက်]
^ အပိုဒ်၊ 4 ယေဟောဝါသက်သေများ၏ ၂၀၀၄ ပြက္ခဒိန် နိုဝင်ဘာ/ဒီဇင်ဘာကိုရှု။
[စာမျက်နှာ ၉ ပါ လေးထောင့်ကွက်]
ဖန်ဆင်းရှင်အား ချီးမွမ်းစကား
ကျေးဇူးသိတတ်သော သိပ္ပံပညာရှင်များစွာသည် ဖန်ဆင်းခြင်းဆိုင်ရာ ဘုရားသခင့်လက်ရာတော်ကို အသိအမှတ်ပြုကြသည်။ ဥပမာအချို့ကို အောက်တွင် ဖော်ပြထား၏–
“သိပ္ပံနယ်ပယ်မှာ အသစ်သောအရာတစ်ခုခုကို ရှာဖွေတွေ့ ရှိတဲ့အခါ ‘ဘုရားသခင် ဒီလိုပြုလုပ်ထားတာကိုး’ လို့ ကိုယ့်ကိုယ်ကို ပြောဆိုရချိန်လေးတွေဟာ ကျွန်တော့်အတွက် စွဲမှတ်စရာ၊ ပျော်စရာအချိန်တွေပါပဲ။ ကျွန်တော့်ပန်းတိုင် ကတော့ ဘုရားသခင့်အစီအစဉ်ရဲ့ အစိတ်အပိုင်းလေးတစ်ခုကို သိနားလည်နိုင်ဖို့ ဖြစ်တယ်။”—ဟင်နရီ ရှေဖာ၊ ဓာတုဗေဒပါမောက္ခ။
“စကြဝဠာကြီး ပြန့်ကားနေတာကိုထောက်ရှုပြီး ဒီစကြဝဠာကြီးဖြစ်ပေါ်လာပုံနဲ့ပတ်သက်ရင် စာရှုသူကိုယ်တိုင် ဆင်ခြင်သုံးသပ် ကောက်ချက်ချဖို့သာဖြစ်တယ်၊ ဒါပေမဲ့ ဖြစ်ပေါ်ရတဲ့အကြောင်းရင်းမှာ ကိုယ်တော် [ဘုရားသခင်] မပါရင်တော့ ပြီးမှာမဟုတ်ပါဘူး။”—အက်ဒွက် မီးလ်န်၊ ဗြိတိသျှ နက္ခတ္တဗေဒပညာရှင်။
“ဘုရားသခင်ကိုယ်တော်တိုင် ဖန်ဆင်းထားတဲ့အတွက် သဘာဝတရားကို အကောင်းဆုံးသင်္ချာပညာရပ်နဲ့ပဲ ဖော်ပြနိုင်တယ်ဆိုတာကို ကျွန်ုပ်တို့သိကြ ပါတယ်။”—အလက်ဇန္ဒား ပိုလ်ယာကော့ဖ်၊ ရုရှားလူမျိုး သင်္ချာပညာရှင်။
“သဘာဝရုပ်ဝတ္ထုတွေကို လေ့လာကြတဲ့အခါ ဖန်ဆင်းရှင်ရဲ့သုံးသပ်ချင့်ချိန်နည်းတွေကို ဆန်းစစ်လေ့လာနေတာ၊ ကိုယ်တော်ရဲ့အကြံအစည်တွေကို သိလာကြတာ၊ ကိုယ်တော့်နည်းစနစ်ကို အဓိပ္ပာယ်ဖော်နေကြတာဖြစ်တယ်၊ ကိုယ့်အကြံ အစည်၊ ကိုယ့်နည်းတွေမဟုတ်ပါဘူး။”—လူးဝိစ် အဂ္ဂါစဇ်၊ အမေရိကန် ဇီဝဗေဒပညာရှင်။
[စာမျက်နှာ ၈၊ ၉ ပါ ရုပ်ပုံ]
ဂျဲန်တူး ပင်ဂွင်ငှက်များ၊ အန္တာတိတ်ဒေသ
[စာမျက်နှာ ၉ ပါ ရုပ်ပုံ]
ဂရန်းတီးတန်အမျိုးသားဥယျာဉ်ကြီး၊ အမေရိကန်ပြည်ထောင်စု၊ ဝိုင်အိုမင်ပြည်နယ်
[Credit Line]
Jack Hoehn/Index Stock Photography