Bobotse Bja Tlholo Ya Jehofa

“Morêna, Medirô ya Xaxo xa se ka Boati!”

GO SA šetšwe gore re phela dinaga-magaeng goba ditoropong, godimo dithabeng goba tlase-tlase kgaufsi le lewatle, re dikologilwe ke bobotse bjo bo kgahlišago kudu bja tlholo. Ka mo go swanetšego, 2004 Calendar of Jehovah’s Witnesses e bonagatša diswantšho tše dibotse tša mediro e kgahlišago kudu ya Jehofa Modimo.

Batho bao ba nago le tebogo ba be ba dutše ba lebiša tlhokomelo ya bona medirong ya Modimo. Ka mohlala, nagana ka Salomo, yoo bohlale bja gagwe ‘e bego e le bjo bogolo go feta bja bohle ba ka Bohlabela.’ Beibele e re: “Ó be a tseba xo bolêla tša dihlare tša merôkwana tša Libanoni le tša semelanyana se se hloxaxo morakong, le tša diphôôfôlô le tša dinonyana, le tša dixaxabi le tša dihlapi.” (1 Dikxoši 4:30, 33) Kgoši Dafida e lego tatago Salomo, gantši o be a naganišiša ka mediro e dirilwego ka bokgwari ya Modimo. O ile a tutueletšega go botša Mmopi wa gagwe gore: “Morêna, medirô ya xaxo xa se ka boati! O e dirile xohle ka bohlale; lefase le tletše dibopiwa tša xaxo.”—Psalme 104:24. *

Le rena re dira gabotse ge re bogela le go ithuta ka tlholo. Ka mohlala, re ka ‘lebelela godimo’ gomme ra botšiša ka mo go swanetšego gore: “Ké mang e a di hlodilexo?” Ee, ke Jehofa Modimo, yo a nago le “matla a maxolo” e le ruri!—Jesaya 40:26.

Go naganišiša ka mediro ya tlholo ya Jehofa go swanetše go re kgoma bjang? Go swanetše go re kgoma ka bonyenyane ditsela tše tharo. Go ka (1) re gopotša gore re tšeele bophelo bja rena godimo, (2) gwa re tutueletša go thuša ba bangwe go ithuta go tšwa tlholong, gomme (3) gwa re hlohleletša go tseba le go thabela Mmopi wa rena ka mo go tletšego kudu.

Bophelo bja rena re le batho, bjo bo fetago kgole bja “diphôôfôlô tše di se naxo thlaoloxanyô,” bo re thuša go bogela le go lebelela dimakatšo tša tlholo e le tša bohlokwa. (2 Petro 2:12) Mahlo a rena a ka bona naga e botse. Ditsebe tša rena di ka kwa melodi ya dinonyana. Le gona, nako le lefelo leo re lego go lona di ka re gopotša dilo tšeo e bago dikgopotšo tše di rategago. Gaešita le ge bophelo bja rena bja lehono bo sa phethagala, bo tloga bo swanetše go phelwa!

Batswadi ba ka thabela go bona bana ba bona ba kgahlegela tlholo. Bana ba tloga ba rata go hwetša dikgapetla tša dikgopa lebopong la lewatle, go rua seruiwa le go namela sehlare! Batswadi ba tla nyaka go thuša bana ba bona go bona tswalano magareng ga tlholo le Mmopi. Poifo le tlhompho tšeo bana ba bago le tšona ka tlholo ya Jehofa di ka dula di le gona bophelong bja bona ka moka.—Psalme 111:2, 10.

E be e tla ba mo go sa kwagalego ge nkabe re be re kgahlišwa ke tlholo eupša re palelwa ke go leboga Mmopi. Boporofeta bja Jesaya bo re thuša  go lebiša tlhokomelo ntlheng yona ye ge bo re: “A xa O tsebe? A xa O ešo wa kwa? Morêna ké Modimo wa neng le wa neng, Mohlodi wa mexomô ya lefase; xa a lape, xa a fêle matla, ké yo thlaloxanyô e sa fihlelwexo.”—Jesaya 40:28.

Ee, mediro ya Jehofa e nea bohlatse bja bohlale bja gagwe bjo bo sa bapišwego, matla a gagwe a magolo kudu le lerato la gagwe le legolo leo a re ratago ka lona. Ge re bona bobotse bjo bo re dikologilego gomme re lemoga dika tša Yo a di dirilego ka moka, anke re tutueletšegeng go bolela bjalo ka Dafida gore: “Xa xo mo-ka-Wêna [Jehofa, NW], xa xo se-ka-tirô-tš’axo.”—Psalme 86:8.

Re ka kgonthišega gore batho bao ba kwago ba tla tšwela pele ba kgahlišwa ke mediro ya Jehofa ya tlholo. Re tla ba le dibaka tše di sa felego tša go ithuta mo go oketšegilego ka Jehofa go iša ka mo go sa felego. (Mmoledi 3:11) Le gona ge re tšwela pele re ithuta ka yena, ke mo re tlago go rata Mmopi wa rena le go feta.

[Mengwalo ya ka tlase]

[Lepokisi go letlakala 9]

Go Tumiša Mmopi

Bo-rathutamahlale ba bantši bao ba nago le tebogo ba lemoga seo Modimo a se dirilego tlholong. Ye e latelago ke mehlala e sego kae:

“Go ba bohlokwa ga modiro wa-ka wa tša thutamahlale le lethabo la-ka go wona di tla ka sewelo dinakong tšeo ke bago le kwešišo ka selo se itšego se sefsa gomme ke ipotša gore: ‘Go ra gore ke kamoo Modimo a se dirilego ka gona.’ Pakane ya-ka ke go kwešiša karolwana ya thulaganyo ya Modimo.”—Henry Schaefer, moprofesara wa dikhemikhale.

“Mabapi le selo seo se bakilego gore Legohle le be gona, mabapi le go katološwa ga lona, mmadi o swanetše go itirela phetho, eupša kwešišo ya rena e a hlaelela ntle le Yena [Modimo].”—Edward Milne, seithuti sa tlhago ya legohle sa mo-Brithania.

“Re a tseba gore tlhago e hlaloswa ka ditsela ka moka tše kaone-kaone tše di kgonegago tša dipalo ka gobane e hlodilwe ke Modimo.”—Alexander Polyakov, setsebi sa dipalo sa mo-Russia.

“Nyakišišong ya rena mabapi le dilo tša tlhago, re seka-seka dikgopolo tša Mmopi, re tlwaelana le dikgopolo tša gagwe, gomme re hlatholla tshepedišo ya Gagwe e sego ya rena.”—Louis Agassiz, rathutaphedi wa mo-Amerika.

[Caption on page 8]

Di-“penguin” tša Gentoo, Peninsuleng ya Antarctic

[Caption on page 9]

Serapa sa Diphoofolo seo se lego Thabeng e Kgolo ya Teton, Wyoming, U.S.A.

[Caption on page 9]

Jack Hoehn/Index Stock Photography