E Splendor di Yehova Su Creacion

‘O Yehova, Ki Numeroso Bo Obranan Ta!’

SEA nos ta biba den cunucu of den stad, riba sero of canto di lama, nos ta rondona pa e splendor impresionante di creacion. Apropiadamente, e Kalender 2004 di Testigonan di Yehova ta presenta un panorama di e asombroso obranan di Yehova Dios su man.

Hende gradicido semper a mustra interes den e obranan di Dios. Tuma por ehempel Salomon, kende su sabiduria “tawata surpasa e sabiduria di tur e hombernan di oriente.” Bijbel ta bisa: “E tawata papia di e palonan, di e palo di seda cu tin na Libano te na e hisop cu ta crece na muraya; tambe e tawata papia di e bestianan, di parha, bestia cu ta lastra y pisca.” (1 Reinan 4:30, 33) Rei David, tata di Salomon, hopi biaha a medita riba Dios su obranan maestra. El a ser conmovi pa declara na su Creador: “O SEÑOR, ki numeroso bo obranan ta! Cu sabiduria bo a traha tur; tera ta yen di loke bo a crea.”—Salmo 104:24. *

Ta bon pa nos tambe observa y studia e creacion. Por ehempel, nos lo por ‘hisa nos wowo wak ariba’ y puntra: “Ta ken a crea e streyanan aki”? Wel, ta Yehova Dios, kende realmente tin ‘un grandesa di forsa y poder’!—Isaias 40:26.

Ora nos medita riba Yehova su obranan di creacion, con esei mester influencia nos? Den por lo menos tres manera. E por (1) recorda nos pa aprecia nos bida, (2) motiva nos pa yuda otro hende siña for di creacion y (3) stimula nos pa siña conoce nos Creador mas miho y apreci’e mas tanto.

Nos bida como hende, siendo hopi mas superior cu esun di “bestia cu no por rasona”, ta capasita nos pa observa y balora e maraviyanan di creacion. (2 Pedro 2:12) Nos wowonan por mira e paisahe elegante y bunita. Nos horeanan por tende e canto melodioso di parhanan. Y e echo cu nos ta conciente di tempo y di luga ta laga nos keda cu recuerdonan agradabel. Maske nos bida actual no ta perfecto, toch e ta bale la pena!

Mayornan por disfruta di nan yiunan su fasinacion natural cu creacion. Mucha gusta busca cocolishi canto di lama, caricia bestia of subi palo! Mayornan lo kier yuda nan chikitinnan mira e conexion cu tin entre e creacion y e Creador. E admiracion y respet profundo cu muchanan ta desaroya pa Yehova su creacion ta algo cu nan por keda cu ne pa resto di nan bida.—Salmo 111:2, 10.

Lo ta un gran falta di perspicasia di nos parti si nos mester admira e creacion pero keda sin duna credito na e Creador. E profecia  di Isaias ta yuda nos reflexiona riba e punto aki ora e ta bisa: “Bo no sa? Bo no a tende? E Dios Eterno, [Yehova], e Creador di e finnan di tera no ta bira cansa ni fatiga. Su comprondemento ta inscudriñabel.”—Isaias 40:28.

Si, Yehova su obranan ta duna prueba di su sabiduria sin igual, su poder incomparabel y su amor profundo pa nos. Ora nos ta mira e bunitesa cu tin rond di nos y ta mira den nan e cualidadnan di Esun cu a traha tur esei, laga esaki motiva nos pa bisa mescos cu David: “No tin ningun manera bo . . . , o Señor, tampoco no tin ningun obra manera bo obranan.”—Salmo 86:8.

Nos por tin sigur cu Yehova su obranan di creacion lo sigui fasina hende obediente. Atrabes di eternidad, nos lo tin un cantidad sin fin di oportunidad pa siña mas tocante Yehova. (Eclesiastes 3:11) Y mas nos siña tocante nos Creador, mas nos lo stim’e.

[Nota]

[Cuadro na pagina 9]

Elogio pa e Creador

Hopi cientifico apreciativo ta mira e man di Dios den creacion. Aki ta sigui algun ehempel:

“E goso y punto sobresaliente den mi ramo di ciencia ta bin na e momentonan sporadico cu mi descubri algo nobo y mi bisa mi mes: ‘Aha, ta asina Dios a hacie.’ Mi meta ta pa compronde un punta di Dios su plan.”—Henry Schaefer, profesor di kimica.

“Pa loke ta e causa di e expansion di Universo, ta keda na e lector pa e mes saca su conclusion, pero nos cuadro ta incompleto sin Dje [Dios].”—Edward Milne, cosmologo Britanico.

“Nos sa cu naturalesa ta ser describi mediante e matematica di mas miho cu tin pasobra ta Dios a cre’e.”—Alexander Polyakov, matematico Ruso.

“Den nos estudio di obhetonan natural nos ta considerando e pensamentonan di e Creador, birando familiarisa cu su conceptonan, interpretando un sistema cu ta di Dje y no di nos.”—Louis Agassiz, biologo Mericano.

[Plachi na pagina 8, 9]

Ezelspinguïn, Peninsula di Antartica

[Plachi na pagina 9]

Parke Nacional Grand Teton, Wyoming, Merca

[Reconocemento]

Jack Hoehn/Index Stock Photography