Te Mekameka o ta Iehova Au Mea i Angaia

“Tumatatini Taau ra Angaanga, e Iehova E!”

NOATU e te noo ra tatou ki roto i tetai ngai i vao mai me kore i roto i tetai oire, teitei ki runga i te au maunga me kore i raro i te pae taatai, te koropiniia ra tatou e te mekameka umere tikai o te au mea i angaia. Kua tau i reira, te akaari ra te 2004 Calendar of Jehovah’s Witnesses i tetai tutu purotu o ta te Atua ko Iehova au mea umere tikai tei angaia e te rima.

I akaari ua ana rai te au tangata ariki ia ratou uaorai ma ta te Atua au angaanga. Ei akaraanga, e akamanako ia Solomona, tona kite “e maata rava atura te karape i to te aronga katoa i te itinga o te rā ra.” Te karanga ra te Pipiria e: “Kua tuatua oki aia i te rakau, mei te arezi i runga ia Lebanona, e tae ua atu ki te isopa e tupu i runga i te patu ra: e kua tuatua oki aia i te au puaka, e te au manu, e te au mea e totoro aere ua ra, e te ika.” (1 Ariki 4:30, 33) Kua putuputu ana te metua tane o Solomona, te Ariki ko Davida, i te akamanako oonu anga i runga i te au rave anga karape a te Atua. Kua akakeuia aia kia karanga ki Tei Anga mai iaia: “Tumatatini taau ra angaanga, e Iehova e! e au ravenga pakari anake rai taau: kua ki te enua nei i taau ra apinga.”​—Salamo 104:24. *

Ka tau katoa tatou kia akara meitaki e kia apii i te au mea i angaia. Ei akatauanga, penei ka “nānā na i to [tatou] mata ki runga, ka akara” e ka ui: “Naai te reira i anga?” Eaa oki, na te Atua ko Iehova, tei iaia ra te “ririnui” e tei tika tikai te “mana maata”!​—Isaia 40:26.

Akapeea te akamanako oonuanga i runga i ta Iehova au angaanga i anga e akakeu ra ia tatou? Na roto oki i nga mataara e toru. Ka rauka i te (1) akamaara ia tatou kia akaperepere i to tatou oraanga, (2) akakeu ia tatou kia tauturu i etai ke kia apiiia mei te au mea i angaia, e te (3) akakeu ia tatou kia kite pu tikai e kia ariki rekareka i Tei Anga mai ia tatou.

To tatou oraanga ei au tangata, tei teitei roa atu i to te “puaka manako kore,” te akariro ra ia tatou kia akara e kia akaperepere i te au umere anga no te au mea i angaia. (2 Petero 2:12) Ka kite to tatou nga mata i te manea o te enua. Ka akarongo to tatou nga taringa i te au imene tangi reka a te au manu. E to tatou tu ki te tuatau e ki tetai ngai te oronga maira kia tatou i te au kiteanga no te akamanakoanga tei riro mai ei au akamaaraaraanga akaperepereia. Noatu e kare to tatou oraanga i teia taime nei e apa kore ra, e puapinga tikai tetai kia ora ua atu!

Ka rekareka te au metua i te umere natura o ta ratou tamariki ki te au mea i angaia. Mei teaa te rekareka i te tamariki i te kite mai anga i te au poreo i runga i te tapa taatai, kia akaperepere i tetai animara, kia kake i tetai tumu rakau! Ka inangaro te au metua i te tauturu i ta ratou aronga mapu ra kia kite i te pirianga i rotopu i te au mea i angaia e Tei Anga mai. Te umere e te ngateitei ta te tamariki e akatupu ra no ta Iehova au mea i angaia ka vai rai kia ratou i te roaanga o te oraanga.​—Salamo 111:2, 10.

E mea poto tikai to tatou akaraanga me ka akara manea ua tatou i te au mea i angaia inara kua  poka i te ariki rekareka i Tei Anga mai. Ka tauturu te totou a Isaia kia akamanako tikai tatou i runga i teia tumu manako i te karanga anga te reira: “Kare koe i kite? kare koe i akarongo? e mutu kore to te Atua ra, ko Iehova, ko tei anga i te enua e tae ua atu ki te openga ra; kare aia e paruparu, e kare oki e roiroi; kare oki tona kite e kitea me kimi.”​—Isaia 40:28.

Ae, te akapapu maira te au angaanga a Iehova i tona pakari aite koreia, tona mana taumaro koreia, e tona inangaro oonu no tatou. Me kite tatou i te manea te takapini ra ia tatou e kua kite mai i te au tu o Tei anga i te au mea katoatoa, kia akakeuia tatou kia tuatua i te au tuatua a Davida: “Kare atu tei aite kia koe . . . , E Iehova, e kare ua atu au angaanga mei taau ra.”​—Salamo 86:8, NW.

Kua akapapuia tatou e ka umere ua atu rai te au tangata akarongo i ta Iehova au angaanga i anga mai. I te au tuatau mutu kore, tei ia tatou te au atianga kia kite maata atu no runga ia Iehova. (Koheleta 3:11) E te maata ta tatou ka kite mai no runga iaia, te maata i to tatou aroa ki Tei Anga mai ia tatou.

[Tataanga Rikiriki i Raro]

[Pia i te kapi 9]

Akapaapaa Anga no Tei Anga Mai

Te kite ra te manganui o te au taineti ariki rekareka ra i te rima o te Atua ra i roto i te au mea i angaia. Te ka aru mai e nga mea akaraanga:

“Kua aere mai te puapinga e te mataora ki taku taineti i roto i tetai au atianga aere i te kite mai anga i tetai apinga ou e te tuatua anga kiaku rai, ‘A i akapera a te Atua i te rave anga i te reira.’ Taku akakoroanga koia oki kia marama i tetai tuanga meangiti ua o ta te Atua parani.”​—Henry Schaefer, poropeta no te kemikara.

“Ki to te tupuanga o te Ao e pini ua ake, no runga i te turanga o te akamaataanga, tei runga te reira i te tangata tatau kia taopenga, inara kare ta tatou tutu e oti meitaki me kare oki Aia [te Atua].”​—Edward Milne, tangata apii Peritane i te cosmos.

“Kua kite tatou e kua akataka meitakiia mai te reva natura e te tu tareanga meitaki roa atu no te mea na te Atua oki i anga i te reira.”​—Alexander Polyakov, tangata kite karape Rutia i te tare.

“I roto i ta matou apiipii i te au apinga natura te akamanako ra matou i te au manakoanga no Tei Anga mai, tatau anga i tana au akamataanga, akara meitaki anga i tetai akaaereanga Nana oki e kare na matou.”​—Louis Agassiz, tangata apii Marike no te au mea ora.

[Tutu i te kapi 8, 9]

Au penguin Gentoo, Penitura Antarctic

[Tutu i te kapi 9]

Grand Teton National Park, Wyoming, Marike

[Akameitakianga]

Jack Hoehn/Index Stock Photography