Papia e Palabra di Dios cu Curashi

“Bai profetisa na mi pueblo.”—AMOS 7:15.

1, 2. Ken Amos tawata, y kico Bijbel ta revela tocante dje?

UN TESTIGO di Yehova tawata den e ministerio ora cu un sacerdote a cana bin riba dje. E sacerdote a grit’e: ‘Stop di predica! Bai fo’i djaki!’ Kico e testigo a haci? El a haci loke e sacerdote a exigi di dje, of el a sigui papia e palabra di Dios cu curashi? Bo por haya sa e contesta pasobra e testigo ei a skirbi su experencianan den un buki cu ta carga su nomber—e buki biblico di Amos. Pero prome cu nos bai mas den detaye di Amos su encuentro cu e sacerdote, laga nos considera algun informacion di Amos su background.

² Ken Amos tawata? Ki tempo y na unda el a biba? Nos ta haya contesta riba e preguntanan ei na Amos 1:1, caminda nos ta lesa: “E palabranan di Amos, kende tawata entre e wardadonan di carne di Tekoa, . . . den e tempo di Uzias, rei di Huda, y den e tempo di Jeroboam, yiu homber di Joas, rei di Israel.” Amos tawata un habitante di Huda. Su stad natal tawata Tekoa, 16 kilometer suit di Herusalem. El a biba na fin di siglo 9 prome cu nos era, tempo cu Rei Uzias tawata goberna na Huda y Jeroboam II tawata rei di e reino di dies tribu di Israel. Amos tawata un wardado di carne. De echo, Amos 7:14 [NW] ta bisa cu e tawata no solamente “un cuidado di bestia”, sino tambe un “skerfdo di figo di palo di sicamor.” Pues, e tawata pasa un parti di aña trahando den cosecha. Su trabou tawata pa pasa bora of skerf e figonan. Nan tawata haci esaki pa e figonan hecha mas lihe. Tawata un trabou laf y agotador.

“Bai Profetisa”

3. Con un analisis di e ehempel di Amos por yuda nos si nos ta sinti cu nos no ta cualifica pa predica?

³ Amos ta bisa cu tur sinseridad: “Mi no ta profeta, ni mi no ta yiu di profeta.” (Amos 7:14) Amos no a nace como yiu di profeta ni no a haya ningun educacion como profeta. Pero di tur e hendenan na Huda, Yehova a scohe Amos pa cumpli cu Su obra. E tempo ei, Dios no a scohe un rei poderoso ni un sacerdote siña ni un cabesante rico. Esaki ta siña nos un les cu por trankilisa nos. Kisas nos no tin masha posicion den mundo ni educacion halto. Acaso esei mester laga nos sinti cu nos no ta cualifica pa predica e palabra di Dios? Di ningun manera! Yehova por ekipa nos pa proclama su mensahe—asta den teritorionan dificil. Como cu esei ta netamente loke Yehova a haci pa Amos, lo ta masha instructivo pa tur  hende cu ta desea di papia e palabra di Dios cu curashi, pa nan considera e ehempel cu e profeta balente ei a pone.

4. Dicon tawata dificil pa Amos profetisa den Israel?

⁴ Yehova a ordena Amos: “Bai profetisa na mi pueblo Israel.” (Amos 7:15) E asignacion ei tawata un desafio. E tempo ei, e reino di dies tribu di Israel tawata disfruta di pas, siguridad y prosperidad material. Hopi Israelita tawatin “cas di winter” y tambe “cas di zomer” cu a ser construi, no di bloki normal traha di klei, sino di “piedra [caro] bon corta.” Algun tawatin mueblenan elegante dorna cu ivor, y nan a bebe biña produci den “cunucunan di wendruif placentero.” (Amos 3:15; 5:11) Debi na esei, hopi hende tawata indiferente. De echo, e teritorio asigna na Amos kisas ta masha paresido na e teritorionan den cua algun di nos ta predica awe.

5. Ki actonan inhusto algun Israelita tawata haci?

⁵ Riba su mes no tawata robes pa e Israelitanan tin pocesion material. Sinembargo, algun a acumula rikesa pa medio di actonan deshonesto. E riconan tawata “oprimi e pobernan” y asta tawata “plecha esnan den necesidad.” (Amos 4:1) Comerciantenan poderoso, huesnan y sacerdotenan tawata uni pa estafa e pobernan. Laga nos ban bek un rato den pasado y observa loke e hombernan aki tawata haci.

Israel A Viola e Lei di Dios

6. Con comerciantenan Israelita a chica otro hende?

⁶ Prome nos ta bai e plasa. Einan comerciantenan deshonesto tawata haci “e efa mas chikito” y “e sekal mas grandi”, y asta nan tawata bende “bagas” pa trigo. (Amos 8:5, 6) E comerciantenan a horta nan clientenan di varios manera: door di bende nan tiki producto, na un prijs cu ta mucho halto y di calidad inferior. Despues cu e comerciantenan a chica delaster un cen for di e pobernan, e hendenan desafortuna ei tawatin cu bende nan mes como catibo. E ora ei e comerciantenan a cumpra nan pa e prijs di “un par di sandalia.” (Amos 8:6) Figura bo! E comerciantenan golos ei a haya cu nan paisanonan Israelita no a bal mas cu un simpel par di sandalia! Esaki si tawata un humiliacion di esnan den necesidad, y tambe un violacion flagrante di e Lei di Dios! Sinembargo, e mesun comerciantenan ei a warda “sabat.” (Amos 8:5) Si, nan tawata religioso, pero solamente di pafo.

7. Con bin e comerciantenan di Israel por a viola e Lei di Dios?

⁷ Con bin e comerciantenan no a haya castigo pa e echo cu nan a kibra e Lei di Dios cu ta manda: “Stima bo prohimo manera bo mes”? (Levitico 19:18) Pasobra esnan cu mester a percura pa hende cumpli cu e Lei—e huesnan—tawata compinchi di e comerciantenan. Na e porta di stad, caminda nan a trata casonan hudicial, e huesnan ‘a acepta placa pasa bou di mesa, y a nenga e pobernan nan derecho.’ En bes di proteha e pobernan, e huesnan a traiciona nan pa un soborno. (Amos 5:10, 12) Pues e huesnan tambe tawata ignora e Lei di Dios.

8. E sacerdotenan malbado tawata sera wowo pa ki clase di comportacion?

⁸ Mientrastanto, ki papel e sacerdotenan di Israel a hunga? Pa haya sa, nos tin cu dirigi nos atencion na un otro sitio. Wak e picanan cu e sacerdotenan a permiti “den cas di nan Dios”! Via Amos, Dios a bisa: “Un homber y su tata ta bai serca e mesun mucha mohe, pa profana mi nomber santo.” (Amos 2:7, 8) Figura bo! Un tata Israelita y su yiu homber ta comete inmoralidad sexual cu e mesun prostituta di tempel. Anto e sacerdotenan malbado ei a sera wowo pa tal inmoralidad!—Levitico 19:29; Deuteronomio 5:18; 23:17.

9, 10. E Israelitanan tawata culpabel di a viola cua mandamentonan di e Lei di Dios, y con por compara esei cu nos tempo?

⁹ Referiendo na otro comportacion pecaminoso, Yehova a bisa: “Riba pañanan tuma como garantia nan ta drumi banda di cada altar; y den cas di nan Dios nan ta bebe biña di  esnan cu a haya boet.” (Amos 2:8) Si, tanto e sacerdotenan como e pueblo en general a pasa por halto di e lei haya na Exodo 22:26 y 27, cu a bisa cu mester hiba un paña tuma como garantia bek prome cu anochi sera. En bes di haci esei, nan a uz’e como laken pa drumi ariba mientras nan a come y bebe na nan antoho na honor di diosnan falso. Y cu e boetnan cu nan a ranca for di e pobernan, nan a cumpra biña pa bebe na fiestanan religioso falso. Ta masha leu mes nan a dual for di e caminda di adoracion puro!

¹⁰ E Israelitanan sin ni un tiki berguensa tawata viola e dos mandamentonan di mas grandi di e Lei: stima Yehova y stima nan prohimo. Pesei Dios a manda Amos condena nan pa nan infieldad. Awe, e nacionnan di mundo, incluso esnan di cristiandad, ta refleha e mesun condicion corupto di Israel di antiguedad. Mientras cu algun hende ta prospera, hopi otro ta financieramente ruina y emocionalmente perhudica door di e practicanan inmoral di lidernan deshonesto di negoshi grandi, di politica y di religion falso. Sinembargo, Yehova ta interesa den esnan cu ta sufri y cu ta sinti nan motiva pa busc’e. Pesei el a asigna su sirbidonan djawe pa haci un obra mescos cu di Amos—predica Su palabra cu curashi.

11. Kico nos por siña for di e ehempel di Amos?

¹¹ Debi na e similaridadnan entre nos obra y esun di Amos, lo ta masha beneficioso pa nos analisa su ehempel. Eigenlijk, Amos ta mustra nos (1) ki mensahe nos mester predica, (2) con nos mester predica y (3) pakico ningun opositor no por stop nos trabou di predica. Laga nos analisa e puntonan aki un pa un.

Con Nos Por Imita Amos

12, 13. Con Yehova a mustra cu e tawata rabia cu e Israelitanan, y con nan a reacciona?

¹² Como Testigonan di Yehova, nos ta consentra nos ministerio cristian riba e trabou di predica e Reino y haci disipel. (Mateo 28:19, 20; Marco 13:10) Sinembargo, nos ta hala atencion tambe na e spiertamentonan di Dios, mescos cu Amos a declara cu Yehova lo a trece huicio desfaborabel riba e malbadonan. Por ehempel, Amos 4:6-11 ta mustra cu Yehova bes tras bes a laga Israel sa cu e ta rabia cu nan. Yehova a laga e pueblo sinti “falta di pan”, el a “laga di manda awasero pa [nan]”, el a suta nan cu “biento cayente y beskem” y a manda “un plaga” meimei di nan. E susesonan aki a motiva Israel pa repenti? Dios a bisa: “Boso no a bolbe serca mi.” Si, e Israelitanan a rechasa Yehova bes tras bes.

¹³ Yehova a castiga e Israelitanan cu no a repenti. Pero prome, nan a haya un spiertamento profetico. Di acuerdo cu esaki, Yehova a declara: “SEÑOR Dios no ta haci nada, sin cu e revela su conseho secreto na su sirbidonan, e profetanan.” (Amos 3:7) Mescos cu Dios a revela na Noe cu e Dilubio ta bin y a bis’e pa e duna un spiertamento, asina tambe Yehova a bisa Amos duna un spiertamento final. Lamentablemente, Israel no a haci caso di e mensahe dibino ei y a keda sin tuma e pasonan corecto.

14. Ki similaridadnan tin entre e tempo di Amos y nos tempo?

¹⁴ Sin duda lo bo ta di acuerdo cu tin algun similaridad remarcabel entre e tempo di Amos y nos tempo. Hesucristo a predeci hopi calamidad cu lo a tuma luga durante e tempo di fin. Tambe el a predeci cu lo bai tin un obra di predicacion mundial. (Mateo 24:3-14) Pero mescos cu den tempo di Amos, mayoria hende awe no ta haci caso di e señal di e tempo ni di e mensahe di Reino. E hendenan ei lo haya nan cu e mesun consecuencia cu e Israelitanan cu no a repenti. Yehova a spierta nan: “Prepara pa contra cu bo Dios.” (Amos 4:12) E Israelitanan a contra cu Dios door di experencia su huicio desfaborabel ora cu Asiria a conkista nan. Awe, e mundo malbado aki lo ‘contra cu Dios’ na Armagedon. (Revelacion 16: 14, 16) Pero, tanten cu Yehova ta sigui mustra pasenshi, nos ta stimula mas tanto hende posibel pa: ‘Busca Yehova, pa boso por biba.’—Amos 5:6.

Con pa Enfrenta Oposicion Mescos Cu Amos

15-17. (a) Ken Amasias tawata, y con el a reacciona riba e declaracionnan di Amos? (b) Amasias a lansa ki acusacion contra Amos?

¹⁵ Nos por imita Amos no solamente den loke nos ta predica, sino tambe den con nos ta predica. Esei ta ser resalta den capitulo 7, caminda nos ta haya e sacerdote menciona na cuminsamento di e articulo aki. Tawata “Amasias, sacerdote di Bet-el.” (Amos 7:10) E stad Bet-el tawata e centro di Israel su religion apostata, cu a inclui adoracion di bishe. Pues Amasias tawata un sacerdote di e religion di Estado. Con el a reacciona riba Amos su declaracionnan expresa cu curashi?

¹⁶ Amasias a bisa Amos: “Bai, abo mirado, hui bai na tera di Huda, y come pan ayanan y profetisa ayanan! Ma no profetisa na Bet-el mas, pasobra e ta un santuario di rei y un cas real.” (Amos 7:12, 13) Cu otro palabra, Amasias a bisa: ‘Bai bo cas! Nos tin nos mes religion caba.’ Tambe Amasias a purba instiga gobierno pa prohibi e actividadnan di Amos. El a bisa Rei Jeroboam II: “Amos a conspira contra bo meimei di e cas di Israel.” (Amos 7:10) Si, Amasias a acusa Amos di traicion! El a bisa Rei: “Asina Amos ta bisa: ‘Jeroboam lo muri pa medio di spada, y Israel siguramente lo sali for di su tera bai den exilio.’”—Amos 7:11.

¹⁷ Den esun frase ei, Amasias a hinca tres mentira. El a bisa: “Asina Amos ta bisa.” Pero Amos nunca no a pretende di ta e fuente di e profecia. Al contrario, semper e tawata bisa: ‘Asina Yehova ta bisa.’ (Amos 1:3) Tambe Amasias a acusa Amos di a bisa: “Jeroboam lo muri pa medio di spada.” Pero manera ta para skirbi na Amos 7:9, Amos a profetisa: “Lo mi [Yehova] lanta contra e cas di Jeroboam cu spada.” Dios a profetisa cu e calamidad ei lo  bin riba “e cas” di Jeroboam, esta, su desendientenan. Ademas, Amasias a pretende cu Amos a bisa: ‘Israel lo bai den exilio sigur-sigur.’ Pero Amos a profetisa tambe cu cualkier Israelita cu bolbe bek na Dios lo haya bendicion. Ta bisto cu Amasias a papia mitar berdad den un intento pa haya un prohibicion oficial riba Amos su obra di predica.

18. Ki similaridadnan tin entre e metodonan cu Amasias a uza y esnan cu miembronan di clero djawe ta uza?

¹⁸ Bo a nota e similaridadnan entre e metodonan cu Amasias a uza y e metodonan cu hende cu ta opone Yehova su pueblo djawe ta uza? Mescos cu Amasias a purba silencia Amos, asina tambe cierto pastonan, religiosonan di alto rango y patriarcanan di nos dia ta purba stroba e trabou di predica di e sirbidonan di Yehova. Amasias a acusa Amos falsamente di traicion. Awe, algun miembro di clero tambe ta acusa Testigonan di Yehova falsamente di ta un menasa pa siguridad nacional. Y mescos cu Amasias a acudi na Rei pa yud’e bringa contra Amos, asina clero djawe hopi bes ta acudi na aliadonan politico pa yuda nan persigui Testigonan di Yehova.

Opositornan No Por Stop Nos Trabou di Predica

19, 20. Con Amos a reacciona riba e oposicion di Amasias?

¹⁹ Con Amos a reacciona riba e oposicion di Amasias? Prome, Amos a bisa e sacerdote: “Bo ta bisa: ‘No profetisa contra Israel.’” Anto sin basila, Dios su profeta balente e ora ei a papia palabranan cu Amasias sigur lo no kier a tende. (Amos 7:16, 17) Amos no a laga Amasias intimid’e. Ki un excelente ehempel pa nos! Nos tampoco lo no desobedece nos Dios den e asunto di papia e palabra di Dios, ni sikiera den paisnan caminda e Amasiasnan moderno ta instiga persecucion cruel. Mescos cu Amos, nos ta sigui proclama: ‘Asina Yehova ta bisa.’ Y opositornan nunca no por stop nos trabou di predica, pasobra ‘e man di Yehova’ ta cu nos.—Echonan 11:19-21.

²⁰ Eigenlijk Amasias mester tawata sa cu su menasanan lo no tin ningun resultado. Amos a splica caba dicon ningun hende riba tera lo no por stop e di papia—y asina nos ta yega na e di tres punto pa nos analisa. Segun Amos 3:3-8, Amos a uza un serie di pregunta y ilustracion pa mustra cu nada no ta sosode sin un causa. Anto e ora ei el a haci e aplicacion aki: “Leon a gruña! Ken lo no tin temor? Señor DIOS a papia! Ken por laga di profetisa?” Cu otro palabra, Amos a bisa su oyentenan: ‘Mescos cu bo no por keda sin haya miedo ora bo tende un leon gruña, asina ami tampoco no por keda sin predica e palabra di Dios, ya cu mi a tende Yehova duna ordo pa hacie.’ Temor pa Dios, esta, respet profundo pa Yehova, a impulsa Amos pa papia cu curashi.

21. Con nos ta reacciona riba Dios su ordo pa nos predica e bon nobo?

²¹ Nos tambe ta tende e encargo di Yehova pa predica. Con nos ta reacciona? Mescos cu Amos y mescos cu e prome siguidonan di Hesus, cu Yehova su yudansa nos ta papia Su palabra cu curashi. (Echonan 4:23-31) Ni persecucion instiga pa opositor, ni e indiferencia di e hendenan na ken nos ta predica lo no silencia nos. Demostrando e mesun celo cu Amos, Testigonan di Yehova rond mundo ta ser motiva pa sigui declara e bon nobo cu curashi. Nos tin e responsabilidad di spierta hende tocante Yehova su benidero huicio. Pero kico e huicio ei ta encera? Nos ta haya e contesta den e siguiente articulo.

Con Lo Bo Contesta?

• Den ki circunstancia Amos a cumpli cu e encargo cu Dios a dun’e?

• Mescos cu Amos, kico nos mester predica?

• Cu ki actitud nos mester haci nos trabou di predica?

• Dicon opositornan no por stop nos actividad di predica?

[Preguntanan di Estudio]

[Plachi na pagina 10]

Dios a scohe Amos, un skerfdo di figo, pa haci Su trabou

[Plachinan na pagina 13]

Bo ta proclamado Yehova su mensahe cu curashi, mescos cu Amos?