Wokbaot Long Rod Blong Stret Fasin

“Mi mi stap mekem ol samting we i stret nomo. Plis yu sore long mi, yu sevem mi.”—OL SAM 26:11.

1, 2. (a) ?From wanem, stret fasin blong man i wan impoten samting we i joen wetem rul blong God antap long heven mo wol? (b) ?Olsem wanem ol man long heven mo wol oli save soemaot se oli wantem we Jeova i rul long olgeta?

 TAEM Setan i mekem stronghed long garen blong Iden, hem i stanemap kwestin ya: ?I stret we God i rul antap long olgeta laef samting long heven mo wol, no nogat? Biaen bakegen, hem i talem se ol man we oli kasem plante blesing long God, olgeta ya nomo bambae oli glad blong obei long Hem. (Job 1:​9-​11; 2:4) Taswe, stret fasin blong man i kam wan impoten samting we i joen wetem kwestin ya long saed blong rul blong Jeova antap long heven mo wol.

² Rul blong God i no dipen long stret fasin blong ol man. Be ol pikinini blong God long heven mo long wol oli gat janis blong soemaot sipos oli wantem we Jeova i rul long olgeta. ?Olsem wanem oli save soemaot samting ya? Oli save jusum blong mekem i stret oltaem no nogat. Olsem nao, God i save jajem ol wanwan man folem fasin blong olgeta blong mekem i stret no nogat.

3. (a) ?Job mo Deved tufala i wantem we Jeova i skelem wanem? (b) ?Wanem ol kwestin we oli stanap long saed blong stret fasin?

³ Job i talem wetem strong tingting se: “I gud God i skelem laef blong mi long skel we i stret gud, nao bambae hem i save luk we mi mi no mekem samting nogud nating.” (Job 31:6) Deved we i king blong Isrel bifo, hem tu i askem Jeova blong skelem stret fasin blong hem. Hem i prea se: “Hae God. Oltaem mi mi stap mekem ol samting we i stret, mo mi stap trastem gud yu. Plis yu talemaot we mi mi no mekem samting nogud.” (Ol Sam 26:1) !I impoten we yumi tu yumi wokbaot long rod blong stret fasin! ?Be wanem ya stret fasin? ?Mo olsem wanem yumi save wokbaot long rod blong stret fasin? ?Wanem samting bambae i halpem yumi blong no livim rod ya samtaem?

“Mi Mi Stap Mekem Ol Samting We i Stret”

4. ?Man we i wokbaot long rod blong stret fasin, hem i olsem wanem?

⁴ Man we i wokbaot long rod blong stret fasin, hem i wan gudfala man we i no gat poen long hem, hem i mekem i stret oltaem. Be i no ol aksin blong hem nomo we i stret. Tingting blong hem tu i stret, mo hem i ona long God fulwan long hat blong hem. Wan poen we Setan i putum agens long Job, hemia se tingting we i pulum Job blong ona long God, i no stret. Hem i se: “Sipos yu spolem bodi blong hem, bambae hem i tok nogud long yu, stret long fes blong yu.” (Job 2:5) Man we i wokbaot long rod blong stret fasin i no jes mekem aksin we i stret, be ol tingting we oli pulum hem blong mekem samting ya, olgeta tu oli mas stret.

5. ?Wanem i soem se man we i wokbaot long rod blong stret fasin i no wan man we i stretgud olgeta?

⁵ Hemia i no min se man we i wokbaot long rod blong stret fasin, hem i stretgud olgeta, nogat. King Deved i wan sinman, mo hem i mekem sam bigfala mastik long laef blong hem. Nating se i olsem, Baebol i talem se Deved i wan man we ‘fasin blong hem i stret gud.’ (1 King 9:4) ?From wanem Baebol i tok olsem long saed blong Deved? From we Deved i lavem Jeova. Hem i onagud long God long hat blong hem. Hem i luksave ol rong blong hem, hem i lesin long olgeta we oli stretem hem, mo hem i jenisim ol fasin blong hem we oli no stret. Yes, Deved i ona fulwan long God long hat blong hem mo hem i lavem Jeova, samting ya nao i soemaot se hem i wan man blong stret fasin.​—Dutronome 6:​5, 6.

6, 7. ?I minim wanem blong wokbaot long rod blong stret fasin?

⁶ Stret fasin i no joen wetem sam haf nomo blong laef blong man, olsem haf long saed blong wosip. Stret fasin i joen wetem olgeta haf blong laef blong yumi. Deved i “stap mekem ol samting we i stret,” no sam Baebol oli talem se hem i wokbaot long rod blong stret fasin. Wan buk (The New Interpreter’s  Bible) i eksplenem “tok ya ‘wokbaot’ se hemia ‘rod we yumi folem long laef’ no ‘fasin blong laef.’ ” Wan long ol man we oli raetem Ol Sam i singsing long saed blong “ol man we laef blong olgeta i stret,” i se: “Ol man we oli stap obei long [God] long olgeta tingting blong olgeta, mo we oli stap folem ol rul we hem i mekem, bambae oli save harem gud. Neva oli mekem samting we i rong, oltaem oli stap folem fasin blong hem.” (Ol Sam 119:​1-3) Man blong stret fasin, oltaem hem i lukaot rod blong mekem samting we God i wantem, mo i folem ol rod blong God.

⁷ Blong wokbaot long rod blong stret fasin, yumi mas ona fulwan long God long hat blong yumi, nating sipos yumi kasem hadtaem mo trabol. Taem yumi no letem ol traem oli winim yumi, taem yumi no kam slak from ol trabol we i kasem yumi, mo taem yumi no letem ol fasin blong rabis wol ya oli pulum yumi, yumi soemaot se yumi man blong stret fasin. Yumi ‘mekem Jeova i glad we i glad,’ from we yumi mekem se hem i gat wan ansa blong givim long man we i stap tok nogud long hem. (Ol Proveb 27:11) Taswe, i gud we yumi gat strong tingting olsem Job we i talem se: “Oltaem bambae mi mi strong blong talem se mi mi no mekem wan samting nogud, gogo kasem we mi mi ded.” (Job 27:5) Sam 26 i soemaot ol samting we oli save givhan long yumi blong wokbaot long rod blong stret fasin.

‘Klinim Kidni Mo Hat Blong Mi’

8. ?Yu yu lanem wanem long prea blong Deved blong askem Jeova blong klinim kidni mo skelem hat blong hem?

⁸ Deved i prea long Jeova se: “Plis yu lukluk long laef blong mi, blong faenemaot se mi mi wanem man [“blong klinim kidni blong mi,” NW ] mo yu skelem olgeta tingting [“hat,” NW ] blong mi.” (Ol Sam 26:2) Tufala kidni i stap dip insaed long bodi blong man. Baebol we oli raetem fastaem long lanwis Hibru, i yusum kidni olsem wan pijatok blong minim ol tingting mo filing blong yumi we ol narafala man oli no save. Mo hat i minim olgeta samting long saed blong yumi we oli haed​—ol tingting we oli pulum yumi blong mekem samting, ol filing, mo ol save we i stap long bren blong yumi. Taem Deved i prea blong askem Jeova blong lukluk long laef blong hem, hem i wantem se Jeova i jekemgud mo skelemgud ol tingting mo filing blong hem.

9. ?Olsem wanem Jeova i save klinim kidni mo hat blong yumi?

⁹ Deved i askem long God blong klinim kidni mo hat blong hem. ?Olsem wanem Jeova i save klinim ol samting long saed blong yumi we oli haed? Deved i singsing se: “Mi mi stap presem Hae God, from we oltaem hem i stap lidim mi, mo long naet, tingting blong mi [“kidni blong mi,” NW ] i stap toktok long mi, i stap soemaot rod long mi.” (Ol Sam 16:7) ?Wanem mining blong tok ya? Hemia i min se, advaes blong God i tajem ol dip filing mo tingting blong Deved, mo hem i holem ol advaes ya i stap blong i stretem ol tingting mo filing blong hem. Sem samting i save hapen long yumi sipos yumi glad blong harem mo tingting dip long ol advaes we yumi kasem tru long Baebol, tru long ol man we God i stap yusum, mo tru long ogenaesesen blong hem, mo sipos yumi letem ol advaes ya i tajem hat mo filing blong yumi. Yumi mas prea oltaem long  Jeova blong hem i klinim yumi long fasin ya. Samting ya bambae i givhan long yumi blong wokbaot long rod blong stret fasin.

“Oltaem Yu Stap Lavem Man Tumas”

10. ?Wanem i givhan long Deved blong wokbaot folem trutok blong God?

¹⁰ Deved i gohed moa i se: “Fasin ya blong yu we oltaem yu stap lavem man tumas, hem nao i stap lidim mi. Fasin ya we tingting blong yu i stap strong long man, hem nao i stap soemaot rod long mi.” (Ol Sam 26:3) Deved i savegud ol samting we God i mekem blong soem se hem i lavem man tumas, mo Deved i tingting dip long ol samting ya. Hem i singsing se: “Mi mi mas presem [Jeova], mo mi no save fogetem we hem i kaen tumas long mi.” Deved i gohed blong tokbaot wan samting we God i mekem we i “kaen tumas,” i se: “Taem Hae God i mekem kot, oltaem hem i stap givhan long man we narafala man i stap mekem i no stret long hem. Oltaem hem i stap mekem rod blong man olsem i kasem ol samting we hem i gat raet blong kasem. Bifo, hem i stap soemaot ol plan blong hem long Moses, mo i letem ol laen blong Isrel oli luk ol bigbigfala wok blong hem.” (Ol Sam 103:​2, 6, 7) Maet Deved i stap tingbaot olsem wanem ol man Ijip long taem blong Moses oli mekem i no stret long ol man Isrel. Ating hem i stap tingting dip long fasin blong Jeova, taem Hem i soemaot long Moses, plan blong hem blong sevem ol man Isrel. Nao samting ya i tajem hat blong Deved mo i mekem tingting blong hem i strong moa blong wokbaot folem trutok blong God.

11. ?Wanem i save givhan long yumi blong wokbaot long rod blong stret fasin?

¹¹ Sipos yumi stadi oltaem long Tok blong God mo tingting dip long ol save we yumi kasem, samting ya tu bambae i givhan long yumi blong wokbaot long rod blong stret fasin. Olsem nao, sipos yumi stap tingting long Josef we i ronwe long woman blong Potifa taem woman ya i wantem slip wetem hem, samting ya bambae i givim paoa long yumi blong ronwe long ol man mo woman we oli traem pulum yumi blong mekem rabis fasin, maet long ples blong wok, long skul, no long wan narafala ples. (Jenesis 39:​7-​12) ?Taem yumi gat janis blong kam rij no blong kasem haenem mo paoa long wol, eksampol blong hu i save givhan long yumi? Yumi save tingbaot Moses we i tanem baksaed long ol gudfala samting blong Ijip. (Hibrus 11:24-​26) Taem wan sik i kasem yumi, no wan narafala bigfala trabol, i gud yumi tingbaot Job we hem i stanap strong longtaem. Samting ya bambae i mekem tingting blong yumi i strong moa blong stap tru long Jeova. (Jemes 5:​11) ?Olsem wanem sipos ol man oli ronem mo kilim yumi? I gud yumi tingting long stori blong Daniel, taem oli sakem hem i go long hol we i fulap long ol laeon. !Samting ya i save mekem we yumi no fraet nating!​—Daniel 6:​16-​22.

“Mi No Save Go Stap Wetem Ol Man Blong Giaman”

12, 13. ?Yumi no mas kampani wetem hu?

¹² Deved i tokbaot wan narafala samting bakegen we i givhan long hem blong wokbaot long stret  fasin, i se: “Mi mi no save go stap wetem ol man blong giaman. Mi no gat bisnes nating wetem ol man ya we oli gat tu tingting. Mi mi no laekem kampani blong ol rabis man, mo mi no glad nating blong go sidaon wetem ol man nogud.” (Ol Sam 26:​4, 5) Deved i no joen nating wetem ol man nogud. Hem i no laekem nating kampani blong ol rabis man.

¹³ ?Olsem wanem long yu? ?Yu yu stap joen wetem ol man blong giaman, long ol stori we yu lukluk long televisin, ol video kaset, ol sinema, Intenet, no long sam narafala samting olsem? ?Yu yu stap longwe long ol man we oli gat tu tingting? Maet samfala long skul no long ples blong wok oli giaman se oli fren blong yu, jes blong trikim yu blong joen long rabis fasin blong olgeta. ?Yu yu rili wantem fren wetem olgeta we oli no stap folem trutok blong God? Ol man blong apostasi * oli save mekem olsem we oli wantem givhan long yu, be oli wantem nomo blong pulumaot yu long wosip blong Jeova. ?Olsem wanem sipos i gat samfala long Kristin kongregesen we oli mekem olsem se oli folem stret fasin, be oli stap mekem i nogud long fasin haed? Olgeta ya tu oli gat tu tingting. Wan man, nem blong hem Jayson, we naoia hem i wan man blong givhan long kongregesen, hem i tokbaot taem we hem i yangfala mo sam fren blong hem long taem ya we oli gat tu tingting. Hem i se: “Wan dei, wan long olgeta ya i talem long mi se: ‘I oraet nomo sipos yumi mekem rabis fasin naoia, from we taem niufala wol i kam, bambae yumi ded finis, mo bambae yumi no save nating ol samting we yumi mestem.’ Wantaem nomo, tok ya i wekemap tingting blong mi. Mi mi no wantem ded taem niufala wol i kamtru.” Jayson i waes, hem i no moa joen wetem fren ya. Aposol Pol i givim woning se: “Yufala i no go krangke. . . . ‘Ol stret man nomo, be ol fren blong olgeta we oli no stret, oli save spolem fasin blong olgeta.’ ” (1 Korin 15:33) !I impoten tumas we yumi no kampani wetem ol rabis fren!

‘Mi Stap Talemaot Ol Bigfala Wok Blong Yu’

14, 15. ?Olsem wanem yumi save ‘wokbaot raon long olta blong Jeova’?

¹⁴ Deved i gohed se: “Hae God. Mi wasem han blong mi blong soemaot we laef blong mi i klin long fes blong yu, nao mi stap wokbaot raon long olta blong yu, mi stap mekem wosip long yu.” ?Blong wanem? ‘Blong talem tangkiu long yu, mo blong talemaot olgeta bigbigfala wok blong yu.’ (Ol Sam 26:​6, 7) Deved i wantem we laef blong hem i klin, blong hem i save mekem wosip long Jeova mo talemaot ol samting we i givim ona long God.

¹⁵ Olgeta samting we oli yusum long taem bifo blong mekem trufala wosip long haos tapolen mo long tempol, oli “pija nomo blong soemaot ol samting we oli stap long heven.” (Hibrus 8:5; 9:​23) Olta i pija blong samting we Jeova i wantem, hemia sakrefaes blong Jisas Kraes we hem i akseptem blong pemaot ol man. (Hibrus 10:​5-​10) Taem yumi bilif strong long sakrefaes blong Jisas, i olsem we yumi wasem han blong yumi blong soemaot se laef blong yumi i klin mo yumi stap ‘wokbaot raon long olta blong Jeova.’​—Jon 3:​16-​18.

16. ?Sipos yumi talemaot ol bigbigfala wok blong God, olsem wanem samting ya i save mekem i gud long yumi?

¹⁶ ?Taem yu yu tingbaot ol gudfala samting we ransom i mekem long yumi, hat blong yu i fulap long tangkiu long Jeova mo Pikinini blong hem? Sipos yes, i gud yu talemaot ol bigbigfala wok blong God long ol narafala man. Hemia ol bigfala wok blong hem, stat long taem we hem i wokem faswan man long garen blong Iden, go kasem taem we bambae hem i mekem ol samting i kamgud bakegen long niufala wol. (Jenesis 2:7; Ol Wok 3:​21) !Mo tu, wok blong talemaot Kingdom mo pulum ol man oli kam disaepol, hem i protektem gud yumi long saed blong spirit! (Matiu 24:14; 28:19, 20) Sipos yumi bisi oltaem long wok ya, bambae hop blong yumi long fiuja i stap klia, bambae bilif blong yumi long ol promes blong God i stap strong, mo yumi stap soemaot oltaem se yumi lavem Jeova mo ol man.

“Mi Mi Laekem Haos Blong Yu Tumas”

17, 18. ?Wanem tingting we yumi mas gat long saed blong ol Kristin miting?

¹⁷ Haos tapolen blong God wetem olta blong hem mo ol sakrefaes, hemia stamba ples we ol man Isrel oli kam long hem blong mekem wosip long Jeova. Deved i prea blong talemaot we hem i glad blong stap long ples ya, i se: “Hae God, mi mi laekem haos blong yu tumas. Haos ya i ples we yu yu stap long hem long bigfala paoa blong yu.”​—Ol Sam 26:8.

¹⁸ ?Olsem wanem long yu? ?Yu yu laekem tumas blong joen wanples wetem ol narafala blong lanem moa long saed blong Jeova? Haos Kingdom wetem ol tijing long saed blong spirit we yumi kasem long ples ya, hem i stamba ples blong mekem trufala wosip. Mo tu, evri yia i gat distrik asembli, seket asembli mo spesel dei asembli. Long ol miting olsem,  yumi tokbaot “ol rul” blong Jeova. Sipos yumi lanem blong “laekem olgeta tumas,” bambae yumi wantem go long olgeta miting mo bambae yumi lesingud long ol tok we i kamaot. (Ol Sam 119:167) !Yumi haremgud tumas blong kam wanples wetem ol Kristin brata sista blong yumi we oli laekem yumi tumas mo we oli wantem givhan long yumi blong gohed blong wokbaot long rod blong stret fasin!​—Hibrus 10:24, 25.

“Plis Yu No Spolem Mi”

19. ?Wanem ol sin we Deved i no wantem se God i faenem long hem?

¹⁹ Deved i save finis ol nogud frut we i kamaot taem wan man i livim rod blong trutok blong God. Taswe, hem i prea long God se: “Taem yu spolem ol man nogud, plis yu no spolem mi. Taem yu panisim ol man blong kilim man, plis yu no makem mi wetem olgeta. Plis yu no kaontem mi wetem ol man ya we oli stap mekem ol rabis fasin oltaem, mo oltaem oli rere nomo blong holem mane blong oli givhan long man long fasin we i no stret.” (Ol Sam 26:​9, 10) Deved i no wantem we God i kaontem hem wetem ol man blong mekem rabis fasin mo ol man we oli kasem doti mane.

20, 21. ?Wanem i save pulum yumi blong folem fasin blong ol man we oli no lavem God?

²⁰ Tede, wol i fulap long olkaen rabis fasin. Ol stori long televisin, ol buk, mo ol sinema, oli leftemap rabis fasin blong seks​—olsem fasin blong ‘mekem nogud wetem woman, mekem ol samting blong sem, mo mekem ol samting we oli nogud olgeta.’ (Galesia 5:​19) Samfala oli folem fasin ya blong lukluk ol doti pija blong seks, mo plante taem samting ya i lidim olgeta blong mekem rabis fasin long saed blong seks. Ol yangfala nao oli foldaon moa long trap ya. Long sam kantri we ol man oli folem fasin blong askem woman blong goaot wetem olgeta, ol yangfala tu oli harem se oli mas mekem fasin ya. From samting ya, plante long olgeta, hat blong olgeta i pam from wan gel be oli yang tumas blong mared. Nao tingting blong wantem mared i kam strong tumas long olgeta, mo i no longtaem oli foldaon long rabis fasin long saed blong seks.

²¹ Ol nogud fasin oli save pulum ol man mo woman tu, i no ol yangfala nomo. Taem oli mekem bisnes long fasin we i no stret, mo oli tekem disisen we i mekem i gud long olgeta nomo, hemia i soemaot se oli no gat stret fasin. Sipos yumi wokbaot folem ol fasin ya blong wol, bambae yumi mas go longwe long Jeova. I moagud we yumi ‘tanem baksaed long fasin we i no stret mo folem fasin we i stret.’ Olsem  nao, yumi save gohed oltaem blong wokbaot long rod blong stret fasin.​—Amos 5:​15.

“Plis Yu Sore Long Mi, Yu Sevem Mi”

22-24. (a) ?Lastok blong Sam 26 i leftemap tingting blong yumi blong mekem wanem? (b) ?Long nekis stadi, bambae yumi tokbaot wanem trap?

²² Deved i finisim prea blong hem wetem tok ya: “Mi mi stap mekem ol samting we i stret nomo. Plis yu sore long mi, yu sevem mi. Hae God, oltaem yu yu stap mekem we mi mi stap sef long olgeta trabol, nao from samting ya bambae mi mi presem yu long fes blong olgeta man blong yu.” (Ol Sam 26:11, 12) Deved i joenem tok we i soem strong tingting blong mekem i stret, wetem tok blong askem Jeova blong sevem hem. !Hemia i leftemap tingting blong yumi bigwan! Nating se yumi sinman, be Jeova i rere blong givhan long yumi sipos yumi gat strong tingting blong wokbaot long rod blong stret fasin.

²³ I gud yumi soemaot long evri haf blong laef blong yumi, se yumi tinghae mo yumi gat respek long hae rul blong God. Yumi wanwan i save askem long Jeova blong skelem mo klinim ol tingting mo filing blong yumi. Sipos yumi stadigud long Tok blong God, bambae yumi tingting oltaem long trutok. Yumi mas stap longwe long ol rabis fren mo yumi mas presem Jeova wetem kongregesen blong hem. I gud yumi wok strong blong talemaot Kingdom mo pulum ol man oli kam disaepol blong Kraes. Yumi neva mas letem ol fasin blong wol oli pulum yumi mo spolem gudfala fasin fren we yumi gat wetem God. Sipos yumi traehad oltaem blong wokbaot long rod blong stret fasin, yumi save sua se Jeova bambae i blesem yumi.

²⁴ Stret fasin i joen wetem olgeta haf blong laef blong yumi. Taswe yumi mas lukaot blong no foldaon long wan trap we i save givim ded​—hemia fasin blong dring tumas. Bambae yumi tokbaot samting ya long nekis stadi.

[Futnot]

[?Yu Yu Tingbaot?

• ?From wanem i stret we God i jajem ol man long heven mo wol folem stret fasin blong olgeta?

• ?Wanem ya stret fasin? ?I minim wanem se yumi wokbaot long rod blong stret fasin?

• ?Wanem bambae i givhan long yumi blong wokbaot long rod blong stret fasin?

• ?Blong wokbaot long rod blong stret fasin, yumi mas lukaot blong no foldaon long wanem samting?

[Kwestin]

[Tok blong pija long pej 14]

?Yu yu stap askem long Jeova oltaem blong i skelem tingting blong yu?

[Tok blong pija long pej 14]

?Ol wok blong Jeova we oli soem se hem i lavem man tumas, oli stap oltaem long tingting blong yu?

[Tok blong pija long pej 15]

Taem wan traem i kasem yu nao yu stanap strong, Jeova i glad long yu

[Tok blong pija long pej 17]

?Yu yu stap yusum olgeta samting we Jeova i givim blong halpem yu blong wokbaot long rod blong stret fasin?