Assuarnaalluta inuuniarta

„Assuarnaallungami inuuvunga.“ — TUSSIAAT 26:11.

1, 2. (a) Sooq inuit assuarnaassusiat Guutip kisimi oqartussaanera pillugu akerleriissummut pingaaruteqarpa? (b) Pinngortitat sianissusillit Jehovap kisimi oqartussaaneranik tapersersuinertik qanoq ilillutik takutissinnaavaat?

EDENIP naatsiiviani Saatani pikitsitsilerami, Guutip pinngortitaminut tamanut eqqortumik kisimi oqartussaanera pillugu akerleriissut qilammut nunamullu pingaarutilik pilersippaa. Kingusinnerusukkut oqarpoq inuit aatsaat namminneq iluaqutigisinnaagunikku Guuti kiffartorfigiumassagaat. (Jobi 1:9-11; 2:4) Taamaalilluni inuit assuarnaassusiat Jehovap qilammi nunamilu kisimi oqartussaanera pillugu akerleriissummut pingaaruteqalerpoq.

² Naak pinngortitat assuarnaassusiat Guutip kisimi oqartussaaneranut aalajangiisuunngikkaluartoq, inuit anersaallu akerleriissummi qanoq inissisimanerlutik takutissinnaavaat. Qanoq ilillutik taamaaliorsinnaappat? Assuarnaatsumik inuuniarluni aalajangernikkut imaluunniit assuarnaatsumik inuunnginnikkut. Taamaattumik inuup assuarnaassusia taassuminnga naliliinissamut tunngaviulluarpoq.

3. (a) Jobi Daavilu suna tunngavigalugu Jehovamit nalilerneqarusussimappat? (b) Assuarnaassutsimut tunngatillugu qanoq aperisoqarsinnaava?

³ Jobi tatiginnilluni ima oqarpoq: „[Jehovap] uuttussavaanga oqimaalutaavinni eqqortuni, Guutillu assuarnaassusera nalujunnaassavaa.“ (Jobi 31:6, NV) Israelimi kunngi Daavip Jehova qinnuigaa assuarnaassutsini nalileqqullugu, ima oqarami: „Pinngitsuutinnga, [Jehova], assuarnaallunga inuugama [Jehovalu] tatigalugu; patajalissanngilanga.“ (Tussiaat 26:1) Uaguttaaq assuarnaatsumik inuunissarput pingaaruteqarpoq. Assuarnaassuserli suua, assuarnaatsumillu inuuneq qanoq paasisariaqarpa? Assuarnaatsumik inuujuarnissatsinnut suna iluaqutigisinnaavarput?

’Assuarnaallunga inuuvunga’

4. Assuarnaassuseq suua?

⁴ Assuarnaassuseq ilaatigut isumaqarpoq ileqqorissuuneq, naapertuilluarneq kukkujuitsuunerlu. Assuarnaassuserli tassaaginnanngilaq eqqortuliorneq. Ileqqussatigut peqqissutsimut Guutimullu qamannga pisumik tunniusimalluinnarnermut attuumassuteqarpoq. Saatanip Jobip pissutiginiagai apeqquserpai Guuti ima oqarfigigamiuk: „Atagu assat isatseriassagit [Jobip] uinnga saarngilu attorlugit, taava kiinnat toqqavillugu perloqqussagaluarpaatit!“ (Jobi 2:5) Assuarnaatsuussagutta eqqortuliuinnarnata aamma uummatikkut eqqortunik pissutiginiagaqartariaqarpugut.

5. Suup takutippaa assuarnaatsuujuassagaanni naammalluinnartuusariaqanngitsoq?

⁵ Assuarnaatsuussagaanni naammalluinnartuusariaqanngilaq. Kunngi Daavi naammalluinnartuunngilaq arlaleriarlunilu sualuttumik eqqunngitsuliorluni. Taamaattorli Biibilimi angutitut ’ilumoortumik [assuarnaatsumik, NV] uummateqartutut’ eqqartorneqarpoq. (1 Kunngit 9:4) Sooq? Daavip Jehova asammagu. Jehova uummammigut tunniusimalluinnarfigaa. Maniguulluni kukkunini nassuerutigai, naveersinnini akueraa periaatsinilu allanngortillugu. Aap, Daavip assuarnaassusia ersarippoq uummatikkut iluunngarluni Guutiminut Jehovamut tunniusimallunilu asannikkami. — 5 Mosesi 6:5, 6.

6, 7. Assuarnaalluni inuuneq qanoq isumaqarpa, taamatullu inuussagaanni suna pisariaqarpa?

⁶ Assuarnaassuseq inuunerup ilaannaanut aalajangersimasumut, assersuutigalugu upperisarsiornikkut tunniusimanermut, attuumassuteqanngilaq. Inooriaatsimut tamarmut attuumassuteqarpoq. Daavi assuarnaalluni ’inuuvoq’ imaluunniit oqariaaseq hebræerisut allassimaqqaarfinni atorneqartoq malillugu assuarnaalluni ’saqivoq’.  „Oqaluut hebræerisooq ’saqivoq’ ’inuunerup aqqutaani saqivoq’-mik imaluunniit ’inooriaaseq’-mik isumaqarpoq,“ The New Interpreter’s Bible-imi taama allassimavoq. (Atuagaq IV, qupp. 782; 1996) ’Assuarnaallutik inuusut’ pillugit tussiaasiortoq ima oqarpoq: „Pilluarpoq oqaaqqissaarutaanik maleruaasoq, taassuminngalu ujarlersoq uummatimigut iluunngarluni. Taanna iluanngitsumik iliunngilaq, aqqutigeqqusaasigulli ingerlalluni.“ (Tussiaat 119:1-3) Assuarnaassuseq tassaavoq Guutip piumasaatut iliorniartuarneq taassumalu aqqutigeqqusaanik maleruaaniartuarneq.

⁷ Assuarnaalluni inuussagaanni Guutimut ilumoorfiginnilluni tunniusimasariaqarpoq, allaat artornartunik atugaqaraluarluni. Misilinneqarnermi pinertusaaraangatta, assortorneqarnermi aalajaakkaangatta imaluunniit silarsuarmi guutiitsumi usserneqarnerit akioraangatsigit assuarnaatsuulluta takutittarparput. Jehovap uummataa nuannaartittarparput taassuma mitallersini akisinnaammagu. (Ussatit 27:11) Taamaaliorutta Jobitut oqarsinnaavugut: „Toqussara tikillugu assuarnaattuassaanga.“ (Jobi 27:5, NV) Tussiaat 26-mi ersersinneqarpoq suna iluaqutigalugu assuarnaalluta inuusinnaasugut.

„Minguiakkit uummatiga tartukkalu“

8. Daavip uummatini tartunilu misissoqqullugit Jehovamut qinnutaa qanoq paasisariaqarpa?

⁸ Daavi ima qinuvoq: „Misilinnga [Jehova], misissunnga, misissuiffigikkit [minguiakkit, NV] uummatiga tartukkalu.“ (Tussiaat 26:2) Tartut timip ilorpiaaniipput. Taakku Biibilimi inuup eqqarsaataanut misigissusiinullu ilorlerpaanut assersuutitut atorneqartarput. Uummallu assersuutaavoq inuup ilorlikkut pissusiinut tamanut — pissutiginiagaanut, misigissusiinut sianissusianullu. Daavip Jehova misissoqqulluni qinnuigigamiuk, eqqarsaatimi misigissutsimilu ilorlerpaat misissorluarneqarnissaat qinnutigaa.

9. Assersuutaasumik tartuvut uummaterpullu Jehovap qanoq minguiartarpai?

⁹ Daavip Jehova qinnuigaa tartuni uummatinilu minguiaqqullugit. Jehovap inuttut ilorlikkut pissusivut qanoq minguiartarpai? Daavi ima erinarsorpoq: „[Jehova] unnersiutigissavara siunnersormanga, unnuami allaat ilukkut ajoqersuunneqartarpunga.“ (Tussiaat 16:7) Tamanna qanoq paasisariaqarpa? Tassa Jehovap siunnersuutai ajoqersuineralu Daavip ilorlikkut pissusiini sorlaqalersimapput, taamaalillutillu eqqarsaatai misigissusiilu ilorlerpaat perorsarneqarlutillu iluarsineqarput. Eqqarsaativut misigissutsivullu ilorlerpaat taamatuttaaq perorsarneqarsinnaallutillu iluarsineqarsinnaapput Guutip oqaasia, taassuma peqatigiissortai taannalu sinnerlugu uagutsinnut oqaaseqartartut aqqutigalugit ajoqersorneqarnerput pingaartitsilluta eqqarsaatigisarutsigu ilutsinnilu sorlaqalersittarutsigu. Minguiaqqulluta Jehova qinnuigiuarutsigu, assuarnaalluta inuunissatsinnut iluaqutigissavarput.

 „Ajunngissutsit takkunniitippara“

10. Suna iluaqutigalugu Daavi Guutip unneqqarissusiani inuusinnaava?

¹⁰ Daavi ima nangippoq: „Ajunngissutsit takkunniitippara, unneqqarissutsinnilu inuuvunga.“ (Tussiaat 26:3) Daavip Jehovap ajunngisaarluni imaluunniit ilumoorfiginnilluni tunniusimalluni iliuusii ilisimavai pingaartitsillunilu eqqarsaatigeqqissaartarlugit. Daavi ima erinarsorpoq: „Tarniga, nersoruk [Jehova], ajunngitsuliaalu tamaasa puiornaveerlugit!“ ’Ajunngitsuliaasa’ ilaat eqqarsaatigalugu ima nangippoq: „[Jehova] iliortarpoq naapertuilluartumik iluartumillu qunutitaasunut tamanut. Ilisimatippaa Mosesi aqqutigisaminik, Israelikkullu suliaminik.“ (Tussiaat 103:2, 6, 7) Daavip immaqa Mosesip nalaani Israelikkut Egyptenimiunit ’qunutitaasimanerat’ eqqarsaatigaa. Taamaassimappat Jehovap Israelikkut aniguisinneqarnissaannut atatillugu ’aqqutigisaminik’ Mosesimik paasititsisimaneranik eqqarsaatiginnini Daavip qamuuna killitsissutigisimassavaa, taamaalillunilu Guutip unneqqarissusiani inuujumalluni aalajangernera nakussatsinneqarsimassaaq.

11. Assuarnaalluta inuunissatsinnut suut iluaqutigisinnaavavut?

¹¹ Uaguttaaq Guutip oqaasianik atuaqqissaartuarneq ilikkakkatsinnillu eqqarsaatiginneqqissaartuarneq assuarnaalluta inuunissatsinnut iluaqutigisinnaavavut. Assersuutigalugu Josefi Potifarip nuliata ileqqorluttumik qaninniarnerinit qimaanera eqqarsaatigisinnaavarput, tamannalu suliffitsinni, atuarfimmi allamiluunniit qaninniarnernik assingusunik qimarratiginninnissatsinnut iluaqutigissavarput. (1 Mosesi 39:7-12) Taavami nunap piinik pigissaarnerunissamut, qaffasinnerusumik atorfeqarnissamut silarsuarmiluunniit nuimanerusumik inissisimaffeqarnissamut usserniarneqarutta? Taava Mosesi eqqarsaatigisinnaavarput, taassuma Egyptenimi ataqqinaatigisinnaasaraluani tamaasa iperarpai. (Hebræerit 11:24-26) Jobip pinertusaarneranik eqqarsaatiginninnerup napparsimagaluarluta unamminiarnartunilluunniit allanik nalaataqaraluarluta Jehovamut ilumoorfiginnittuarniarluta aalajangernerput nakussatsissinnaavaa. (Jaaku 5:11) Malersorneqaruttalu Danieli løvit inaanniittoq eqqarsaatigisinnaavarput. Taamaalilluta sapiissuseqarnerulissaagut! — Danieli 6:17-23.

„Sallutuut peqatigisarinngilakka“

12, 13. Kikkut ilagisartagariniassanngilavut?

¹² Aamma alla iluaqutigalugu Daavi assuarnaattuarsinnaasimavoq. Ima erinarsorpoq: „Sallutuut peqatigisarinngilakka, peqquserluttut ilagineq ajorpakka. Ajortut katersorsimasut uumigaakka, iluaatsullu issiaqatigineq ajorpakka.“ (Tussiaat 26:4, 5) Daavip guutiitsut issiaqatigiumanngilai. Ilagisartakkat ajortut uumigai.

 ¹³ Uagummi? Uaguttaaq fjernsynikkut, videokkut, filmikkut internetikkut allatigulluunniit inuit sallutuut peqatigiumanngilavut? „Peqquserluttut“, tassa kinaassusivimminnik isertuisartut, qanillinaveersaartarpavut? Atuarfimmi suliffimmiluunniit immaqa inuit ilaasa ajunngitsumik perusunnata ikinngutigisuusaartarpaatigut. Sallusuissut Guutimeersoq malillugu inuunngitsut qanimut attaveqarfigiumavavut? Tunussisut ilumoortuusaarlutik siunertavitsik isertorsinnaavaat, tassa Jehovamut kiffaajunnaarnissarput. Ilagiinniittut ilaat marloqiusamik inooriaaseqarunik, qularnanngitsumik taakkuattaaq tamanna isertorpaat. Qatanngut angut Jaysonimik atilik, maanna ilagiinni kiffartortuusoq, inuusuttuulluni taamaattunik ikinnguteqarpoq. Ima oqaluttuarpoq: „Ilaanni taakkua ilaata ima oqarfigaanga: ’Qanorluunniit ilioraluarutta soqutaanngilaq, silarsuassaq nutaaq takkuppat toqoreersimassagatta. Arajutsisaqarluta nalussavarput.’ Tupaqaanga silattuaqillungalu. Silarsuassaq nutaaq takkuppat toqungarusunngilanga.“ Jaysonip silatusaarluni kammalaatit taakku attaveqarfigiunnaarpai. Apustili Paulusi ima mianersoqqusivoq: „Tammarnaveeritsi! Ikinngutipalaaqarneq ileqqorikkaluartunut aseruutissiisarpoq.“ (1 Korinthimiut 15:33) Ajortunik ilagisartagaqannginnissaq inuunermut pingaaruteqarluinnarpoq!

’Tupinnartuliatit tamaasa oqaluttuariniarpakka’

14, 15. Qanoq ililluta Jehovap ’pilliiviutaa kaavillugu ingerlaaqataasinnaavugut’?

¹⁴ Daavi ima nangippoq: „Assakka asappakka pinngitsuussusermi. Maanna pilliiviutit kaavillugu ingerlaaqataasinnaanngorpunga, [Jehova], qujaniutit tussiutigiitigalugit, oqaluttuaralugit tupinnartuliatit tamaasa.“ (Tussiaat 26:6, 7) Sooq Daavi minguitsoorusuppa? Jehova pallorfigisinnaajumallugu taannalu pillugu oqaluussisinnaajumalluni ileqqussatigut minguitsoorusuppoq.

¹⁵ Tupermi naapeqatigiittarfimmi kingusinnerusukkullu naalaffimmi pallorfiginninnermut ilumoortumut atassuteqartut tamarmik tassaapput ’qilammiittut assinginnaat tarrartaannaallu’. (Hebræerit 8:5; 9:23) Pilliivik Jiisusi Kristusip pilliutaanut Jehovap inuiaat utertinneqaatissaattut akueriumasaanut atatillugu Jehovap piumasaanut assersuutaavoq. (Hebræerit 10:5-10) Pilliummik tamatuminnga upperinninnitsinnik ersersitsinikkut ’assavut pinngitsuussusermi asappavut’ Jehovallu ’pilliiviutaa kaavillugu ingerlaaqataalluta’. — Johannesi 3:16-18.

16. Guutip tupinnartuliaanik allanut oqaluussissutiginninneq qanoq iluaqutigissavarput?

¹⁶ Utertitsissut qanoq iluaqutiginerlugu eqqarsaatigigaangatsigu, Jehova ernitualu uummatikkut iluunngarluta qujamasuffigisannginnerpavut? Taamaattumik Jehovap tupinnartuliai pillugit — naatsiivimmi Edenimi inummik pinngortitsineraniit silarsuassamini nutaami sunik tamanik iluarsiilluinnarfissaa ilanngullugu — allat qujamasungaarluta oqaluttuutsigik. (1 Mosesi 2:7; Apustilit Suliaat 3:21) Guutip naalagaaffianik oqaluussissutiginneqataanerput ajoqersuganngortitsiortoqataanerpullu anersaakkut illersuutigeqaarput. (Matthæusi 24:14; 28:19, 20) Suliaq tamanna ulapputigisarutsigu siunissamut nuannersumik neriuutissaqartuassaagut, Guutip neriorsuutai upperilluinnartuassavavut Jehovamillu inoqatitsinnillu qamannga pisumik asannittuassalluta.

„Nuannaraara ineqarfiit“

17, 18. Kristumiut ataatsimiinneri qanoq isigisariaqarpavut?

¹⁷ Tupeq naapeqatigiittarfik pilliivilik Israelimi Jehovamik pallorfiginninnermi qitiuvoq. Daavip pallorfiginniffimmik tamatuminnga nuannarinninnini ima oqaatigaa: „[Jehova], nuannaraara ineqarfiit, najugaq naalannangaarsutsivit inigisaa.“ — Tussiaat 26:8.

¹⁸ Jehova pillugu ilinniarfitsinni qatanngutitta naapeqatigisarnerat nuannaraarput? Naalagaaffilersaarfiit tamarmik aalajangersimasumik ilinniartitsiffiusut najukkami pallorfiginninnermut ilumoortumut qitiupput. Aamma ataatsimeersuaarartarlutalu ataatsimeersuartarpugut. Taakkunani Jehovap ’oqaaqqissaarutaanik’ eqqaasinneqartarpugut. ’Oqaaqqissaarutai nuannaringaarutsigik’ ataatsimiigiarusussuataartassaagut, aamma najuutsilluta tusarnaaqqissaartassaagut. (Tussiaat 119:167) Uppeqatit qanoq innitsinnik soqutiginnittut assuarnaallutalu inuuinnarnissatsinnik ikiuerusuttut ilagisarnerat qiimmassaataasorujussuuvoq. — Hebræerit 10:24, 25.

 „Inuunera nunguteqinagu“

19. Ajortuliornerit suut Daavip iliuuseriumanngilai?

¹⁹ Daavip nalunngilluinnarpaa sallusuissummik malinnikkunnaarneq qanoq navianartigisoq, taamaattumillu ima qinuvoq: „Peernaveeringa ajortuliortunut tappullunga, inuunera nunguteqinagu ilaliullugu toqutsisunut, assammikkut kanngunartuliungaarsimasunut talerpiilu akilersinnerluutinik ulikkaartunut.“ (Tussiaat 26:9, 10) Daavip guutiitsut kannguttaatsuliortartut akilersinnerluutinillu akilersittartut assigerusunngilai.

20, 21. Suut guutiitsut aqqutaannut saatsissinnaavaatigut?

²⁰ Ullumikkut silarsuarmi inuunerlunnerit atuagassiani, aviisini, filmini fjernsynimilu takuneqarsinnaasut imaaginnalerput. Biibilimi ’ileqqorlunnermik’ taaneqarput. Aamma ’soqqusaassutsimik’ ’piitaassutsimillu’ taaneqarsinnaapput. (Galatiamiut 5:19; aamma takuuk Ny Verden Oversættelsen-imi quppernerup ataani ilanngussaq.) Ilaat atuagassianik tiingasulersaarutinik atuanngitsoorsinnaajunnaarsimapput, tassa ileqqoq ajortoq inuunerlunnermik kinguneqarajuttartoq. Ingammik inuusuttut tamakkunannga sunnertiapput. Nunat ilaanni inuusuttuaqqat peerariittarnerat nalinginnaasuuvoq, allaat isumaqalersinneqartarput pinngitsooratik peeraqartariaqarlutik. Inuusuttorpassuit ajuutiginnillutik misigissutsiminnit aqunneqartarput, naak katinnissaminnut inuusuppallaaraluarlutik. Kinguaassiuutitigut pilerissutsiminnik naammassinninniarlutik inuunerlunnissamut usserneqartarput, tamannalu kinguaassiuutitigut inuunerlunnermik kinguneqartarpoq.

²¹ Inersimasut ajortumik sunnerneqanngitsoorsinnaanngillat. Niuernermi peqquserlunneq aalajangerniarnermilu namminissarsioqqajaaneq assuarnaassuseqarpiannginnermut ersiutaapput. Silarsuup aqqutaasigoorneq Guutimit ungasilliartuutaavoq. Taamaattumik ’ajortoq uumiginiartigu ajunngitsorlu nuannaralugu’, assuarnaatsumillu inuujuarniarta! — Amosi 5:15.

„Aniguisinnga saammaallungalu“

22-24. (a) Tussiaat 26 oqaatsinik qiimmassaataasunik sunik naggaserneqarpa? (b) Allaaserisami tulliuttumi suna sammineqassava?

²² Daavip Guutimut qinnutini ima naggaserpaa: „Assuarnaallungami inuuvunga aniguisinnga saammaallungalu! Aalajaappoq maanna  isikkama tummisaat. Katersorsimasuni unnersiutigissavara [Jehova].“ (Tussiaat 26:11, 12) Daavip nammineq assuarnaattuarnissaminik aalajangiusimanninnini aniguisinneqaqqulluni, imaluunniit utertinneqaqqulluni qinnutiminut attuumassuteqartippaa. Tamanna uagutsinnut qiimmassaataavoq. Assuarnaatsumik inuunissaq aalajangiusimagutsigu ajortiliugaluarluta Jehova ikioqqulluta qinnuigisinnaavarput.

²³ Qanortoq inooriaatsitsigut ersersitsigu Guutip kisimi oqartussaanera sutigut tamatigut ataqqillugulu pingaartikkipput. Eqqarsaativut misigissutsivullu ilorlerpaat misissoqqullugit minguiaqqullugillu tamatta immikkut Jehova qinnuigisinnaavarput. Eqiasuilluta oqaasianik atuaqqissaarnikkut sallusuissut Guutimeersoq eqqaamajuarsinnaavarput. Qanortoq qanorluunniit akeqassagaluarpat ajortunik ilagisartagaqarnaveersaarta ’katersorsimasunilu Jehova unnersiutigalugu’. Qanortoq kajumilluta Guutip naalagaaffianik oqaluussissutiginneqataallutalu ajoqersuganngortitsiortoqataasa Guutimullu erlinnangaartumik attaveqarnerput silarsuarmit navianartorsiortinneqartinngisaannartigu. Assuarnaatsumik inuuniarluta sapinngisarput tamaat iliuuseqarutta, qularutigissanngilarput Jehovap iluarissagaatigut.

²⁴ Assuarnaassuseq inooriaatsimut tamarmut attuumassuteqarmat eqqumaffigisariaqakkatsinnik napiaaniuterpassuaqarpoq. Tamakkua ilagaat imigassamik atornerluineq, tamannalu allaaserisami tulliuttumi sammineqassaaq.

Eqqaamavigit?

• Sooq pinngortitat sianissusillit assuarnaassusertik tunngavigalugu nalilerneqarsinnaappat?

• Assuarnaassuseq suua, assuarnaallunilu inuuneq qanoq paasisariaqarpa?

• Assuarnaalluta inuunissatsinnut suut iluaqutigisinnaavavut?

• Assuarnaattuassagutta navianartut suut pinaveersaartariaqarpavut?

[Atuaqqissaarnermi apeqqutit]

[Qupp. 12-mi assiliartaq]

Eqqarsaatitit ilorlerpaat misissoqqullugit aalajangersimasumik Jehova qinnuigisarpiuk?

[Qupp. 12-mi assiliartaq]

Jehovap ilumoorfiginnilluni tunniusimanera eqqaamajuarpiuk?

[Qupp. 13-mi assiliartaq]

Misilinneqarnitsinni assuarnaattuaraangatta Jehovap uummataa nuannaartittarparput

[Qupp. 15-mi assiliartat]

Assuarnaatsumik inuusinnaaqqulluta Jehovap pilersitai atorluarpavut?