Waka a pasi fu soifri retifasi
Waka a pasi fu soifri retifasi
„Mi fu mi sei, na ini mi soifri retifasi mi sa waka.”—PSALM 26:11.
1, 2. (a) Fu san ede a soifri retifasi fu libisma na wan prenspari sani na ini a strei di abi fu du nanga a reti di Gado abi fu tiri? (b) Fa den sani di Yehovah meki èn di abi frustan, kan sori taki den e horibaka gi En leki tiriman?
DI Satan ben opo ensrefi teige Gado na ini a dyari fu Eden, dan a bigin wan strei di abi fu du nanga a reti di Gado abi fu de tiriman fu ala den sani di A meki. Baka wan pisi ten, a ben feni tu taki libisma ben o dini Gado soso te den ben o kisi wini fu dati (Yob 1:9-11; 2:4). Na so a soifri retifasi fu libisma ben tron wan prenspari sani na ini a strei di abi fu du nanga a reti di Yehovah abi fu tiri hemel nanga grontapu.
2 Awinsi den sani di Gado meki e tan hori a soifri retifasi fu den, noso awinsi den no du dati, toku Gado o tan a Moro Hei Tiriman fu ala ten. Ma toku, libisma nanga den yeye manpikin fu Gado kan sori sortu sei den e teki na ini a strei disi. Fa so? Fu di den kan bosroiti fu waka a pasi fu soifri retifasi, noso fu no du dati. Fu dati ede, a soifri retifasi fu wan sma na wan prenspari sani di e sori suma a sma de trutru.
3. (a) San Yob nanga David ben aksi Yehovah fu ondrosuku èn krutu? (b) Sortu aksi di abi fu du nanga soifri retifasi e opo kon?
3 Nanga ala frutrow Yob ben taki: „[Yehovah] sa wegi mi na tapu soifri wegi, èn Gado sa kon sabi a soifri retifasi fu mi” (Yob 31:6). Kownu David fu owruten Israel ben aksi Yehovah fu ondrosuku a soifri retifasi fu en, di a ben begi: „Krutu mi, o Yehovah, bika mi waka na ini mi eigi soifri retifasi, èn mi ben poti mi frutrow na Yehovah tapu, so taki mi no fadon” (Psalm 26:1). A de tumusi prenspari taki wi waka a pasi fu soifri retifasi tu! Ma san na soifri retifasi, èn san a wani taki fu waka a pasi fu soifri retifasi? San sa yepi wi fu tan waka a pasi fu soifri retifasi?
’Mi waka na ini mi eigi soifri retifasi’
4. San na soifri retifasi?
4 Den wortu ’soifri retifasi’ e meki wi prakseri wan sma di de opregti, regtfardiki, èn sondro fowtu. Ma fu waka na ini soifri retifasi wani taki moro leki fu du san reti nomo. A wani taki dati a sma e tyari ensrefi na wan fasi di fiti trutru, èn taki a e dini Gado nanga en heri ati. Satan ben feni taki Yob no ben e dini Gado nanga en heri ati, sobun a taigi Gado: „Fu kenki sani now, dan langa yu anu grantangi, èn fasi en te na ini en bonyo èn en meti èn tan luku efu a no sa fluku yu leti na ini yu fesi” (Yob 2:5). Efu wi e hori wi soifri retifasi, dan wi no o du a yoisti sani nomo, ma wi o abi a yoisti reide fu du dati tu.
5. San e sori taki wi no abi fu de volmaakti efu wi wani hori wi soifri retifasi?
5 Ma efu wan sma wani hori en soifri retifasi, dan dati no wani taki dati a musu de volmaakti. Kownu David no ben de volmaakti èn a ben meki wan tu seryusu fowtu na ini en libi. Toku Bijbel e taki dati a ben de wan man di ben waka „nanga soifri retifasi fu ati” (1 Kownu 9:4). Fu san ede? Fu di David ben lobi Yehovah. A ben e dini Gado nanga en heri ati. A ben de klariklari fu taki dati a fowtu, a ben teki a piri-ai di a ben kisi, èn a ben kenki a fowtu fasi fa a ben handri. Iya, wi kan si taki David ben hori en soifri retifasi, fu di a ben e dini en Gado, Yehovah, nanga en heri ati èn a ben lobi en trutru.—Deuteronomium 6:5, 6.
6, 7. San a wani taki fu waka na ini soifri retifasi?
6 Wi no musu sori soifri retifasi na ini wan pisi fu wi libi nomo; fu eksempre, a no abi fu du soso nanga na anbegi di libisma e anbegi Gado. Soifri retifasi abi fu du nanga a heri fasi fa wi e libi. David ben e „waka” na ini en soifri retifasi. „A wortu ’waka’ e sori go na ’a waka di wan sma e waka a pasi fu libi’, noso ’a fasi fa wan sma e libi’”, na so wan Bijbel e taki (The New Interpreter’s Bible). A psalm skrifiman ben e taki fu den sma di de „sondro fowtu na tapu a pasi fu den”, di a ben singi: „Koloku fu den sma di e hori densrefi na den frumane fu [Gado]; den e tan suku en nanga den heri ati. Fu tru, den no du nowan sani di no regtfardiki. Den waka den pasi fu en” (Psalm 119:1-3). Efu wi wani hori wi soifri retifasi, dan wi sa abi fu meki muiti ala ten fu du a wani fu Gado èn fu waka a pasi fu en.
7 Fu waka na ini soifri retifasi wani taki dati wi musu de loyaal na Gado ala ten, srefi na ini muilek situwâsi. Te wi e horidoro te tesi miti wi, te wi e tanapu kánkan awinsi wi e kisi frufolgu, noso te wi e kakafutu gi den tesi fu na ogri grontapu disi, dan a soifri retifasi fu wi o de krin fu si. Wi e ’prisiri na ati fu Yehovah’ fu di a man gi wan piki na a sma di e spotu en (Odo 27:11). Fu dati ede, wi kan taki nanga ala frutrow, neleki Yob: „Teleki mi lasti bro, mi no sa libi mi soifri retifasi!” (Yob 27:5) A di fu 26 Psalm e sori wi san o yepi wi fu waka na ini soifri retifasi.
„Krin den niri fu mi nanga na ati fu mi”
8. San yu e leri fu a begi di David ben begi Yehovah fu ondrosuku den niri fu en nanga na ati fu en?
8 David ben begi: „Ondrosuku mi, o Yehovah, èn tesi mi; krin den niri fu mi nanga na ati fu mi” (Psalm 26:2). Den niri de dipi na ini a skin. Na agersi fasi, den niri e sori go na den moro dipi prakseri nanga firi fu wan sma. Èn na agersi ati fu wan sma na a heri fasi fa a sma de na inisei, sobun, a e sori go na den reide fu san ede a e du sani, den firi fu en, èn a koni fu en. Di David ben aksi Yehovah fu ondrosuku en, dan fu taki en leti, a ben aksi Yehovah fu suku èn fu ondrosuku finifini san ben de den moro dipi prakseri nanga firi fu en.
9. Na sortu fasi Yehovah e krin den agersi niri èn na agersi ati fu wi?
9 David ben begi Yehovah fu krin den niri nanga na ati fu en. Fa Yehovah e krin a fasi fa wi de na inisei? David ben singi: „Mi o blesi Yehovah di gi mi rai. Fu tru, na netiyuru den niri fu mi meki mi kon bun baka” (Psalm 16:7). San dati wani taki? A wani taki dati a rai fu Gado ben doro dipi na ini na ati fu David, èn a ben man kenki den moro dipi prakseri nanga firi fu en, fu meki den kon bun baka. Na so a rai fu Gado, di wi e kisi nanga yepi fu En Wortu, nanga yepi fu den sma di e teki presi gi en, èn nanga yepi fu en organisâsi, kan meki wi kon bun baka te wi e meki a rai disi doro dipi na ini wi ati. Te wi e begi Yehovah doronomo fu krin wi na a fasi disi, dan dati sa yepi wi fu waka na ini soifri retifasi.
„Yu lobi bun-ati de na fesi mi”
10. San ben yepi David fu waka na ini a waarheid fu Gado?
10 „Yu lobi bun-ati de na fesi mi ai,” na so David ben taki moro fara, „èn mi ben waka na ini a waarheid fu yu” (Psalm 26:3). David ben sabi heri bun fa Gado handri na wan lobi-ati fasi, èn nanga warderi a ben e denki dipi fu san A du. „Blesi Yehovah, o mi sili,” na so a ben singi, „èn no frigiti ala den sani di a e du.” Aladi David ben e memre wan fu ’den sani di Gado du’, a ben singi go doro: „Yehovah e du regtfardiki sani èn na wan reti fasi a e krutu den afersi fu ala den wan di trawan e bedrigi. A ben meki Moses kon sabi den pasi fu en, srefi a fasi fa a ben handri nanga den manpikin fu Israel” (Psalm 103:2, 6, 7). Kande David ben e prakseri a ten fu Moses di den Egeptesma ben e bedrigi den Israelsma. Efu na dati a ben e prakseri, dan a ben musu fu naki en ati di a prakseri fa Yehovah meki Moses kon sabi fa A ben o frulusu den, èn dati gi David deki-ati fu tan waka na ini a waarheid fu Gado.
11. San kan yepi wi fu waka a pasi fu soifri retifasi?
11 Te wi e studeri Gado Wortu doronomo èn te wi e denki dipi fu san wi e leri, dan dati sa yepi wi tu fu waka a pasi fu soifri retifasi. Fu eksempre, te wi e prakseri fa Yosef lon gowe gi a wefi fu Potifar di ben pruberi fu du hurudu nanga en, dan a no de fu taki dati a tori disi sa gi wi deki-ati fu lon gowe tu te sma na wrokope, na skoro, noso na wan tra presi e pruberi fu du a srefi sani nanga wi (Genesis 39:7-12). Fa a de te wi e kon na ini wan tesi pe wi e kisi na okasi fu kisi gudu, biginen, noso makti na ini a grontapu disi? Wi abi na eksempre fu Moses, di ben drai baka gi den kefalek sani nanga den gudu fu Egepte (Hebrewsma 11:24-26). Te wi e hori na prakseri fa Yob horidoro, dan seiker dati sa yepi wi fu abi wan moro fasti bosroiti fu tan loyaal na Yehovah awinsi sortu siki noso problema e miti wi (Yakobus 5:11). Fa a de te frufolgu miti wi? We, te wi e prakseri san Danièl ondrofeni na ini a lew-olo, dan dati sa gi wi deki-ati trutru!—Danièl 6:16-22.
„Mi no sidon nanga den man di no lobi waarheid”
12, 13. Gi sortu mati wi musu wai pasi?
12 David ben sori go na wan tra sani di ben gi en krakti fu hori en soifri retifasi. A ben taki: „Mi no sidon nanga den man di no lobi waarheid; èn den wan di e kibri san den de trutru, mi no e kon na pe den de. Mi no lobi a grupu ogriman kwetikweti, èn mi no e sidon nanga den ogrisma” (Psalm 26:4, 5). David ben weigri fu sidon nanga ogrisma. A no ben wani si takru mati na ai srefisrefi.
13 Fa a de nanga wi? Wi e weigri fu sidon nanga sma di no lobi waarheid te den de fu si na telefisi, video, felem, Internet, noso na tra fasi? Wi e tan farawe fu den wan di e kibri san den de trutru? Son sma na skoro èn na wrokope e du kande leki den de mati fu wi so taki den kan kori wi. A no de fu taki dati wi no ben sa wani kisi wan krosibei banti nanga den wan di no e waka na ini a waarheid fu Gado, a no so? Sma di fadon komoto na bribi kan taki dati den de opregti, ma den kan kibri sosrefi taki den abi na prakseri fu kori wi èn fu hari wi puru fu Yehovah, so taki wi no dini en moro. Fa a de te son sma na ini a Kresten gemeente e libi wan dobru libi? Den sosrefi, e kibri suma den de trutru. Jayson, di e dini now leki wan dinari ini a diniwroko, ben abi den sortu mati dati na ini en yongu yari. A e taki fu den, taki: „Wan dei, wan fu den taigi mi: ’A no abi trobi san wi e du now, bika te a nyun sistema kon, dan wi dede kaba. Wi no o sabi srefi taki wi misi wan sani.’ A sani disi di a taki, seki mi trutru. Mi wani de na libi te a nyun sistema kon.” A ben de wan koni sani di Jayson drai baka gi den sortu mati disi. „No kori unsrefi”, na so na apostel Paulus warskow. „Takru kompe e pori bun gwenti” (1 Korentesma 15:33). Iya, a de tumusi prenspari taki wi wai pasi gi takru mati!
’Mi sa meki ala den kefalek moi wroko fu yu bekènti’
14, 15. Fa wi kan „waka lontu na altari fu [Yehovah]”?
14 „Mi sa wasi den anu fu mi fu sori taki mi no abi fowtu srefisrefi, èn mi sa waka lontu na altari fu yu, o Yehovah”, na so David taki moro fara. Fu san ede? „Fu taki yu tangi nanga wan tranga sten di ala sma kan yere, èn fu meki ala den kefalek moi wroko fu yu bekènti” (Psalm 26:6, 7). David ben wani tan tyari ensrefi na wan krin fasi, so taki a ben kan anbegi Yehovah èn meki bekènti taki a e dini Gado nanga en heri ati.
15 Ala sani di ben abi fu du nanga a tru anbegi na a tabernakel èn bakaten na a tempel, ben e ’prenki den sani di de na hemel èn den de leki wan skaduw fu den sani disi’ (Hebrewsma 8:5; 9:23). Na altari ben e sori taki Yehovah ben wani teki a srakti-ofrandi fu Yesus Krestes di ben o frulusu libisma (Hebrewsma 10:5-10). Wi e wasi wi anu fu sori taki wi no abi fowtu èn wi e „waka lontu na altari fu [Yehovah]” fu di wi e sori taki wi e bribi na ini a srakti-ofrandi dati.—Yohanes 3:16-18.
16. Fa wi e kisi wini te wi e fruteri tra sma fu den wondruwroko fu Gado?
16 Te wi e prakseri fu ala den sani di kon de fu di a lusu-paiman pai, dan wi ati e furu nanga tangi taki Yehovah nanga en wan-enkri Manpikin du so wan sani gi wi, a no so? Fu dati ede, meki wi de nanga tangi na ati te wi e fruteri tra sma fu den wondruwroko di Gado du sensi a ten di a meki libisma na ini a dyari fu Eden te go miti a ten pe a o meki ala sani kon bun baka na ini a nyun grontapu fu En (Genesis 2:7; Tori fu den Apostel 3:21). A Kownukondre preikiwroko èn a meki di wi e meki disipel, e kibri wi na yeye fasi trutru! (Mateyus 24:14; 28:19, 20) Te wi e tan du disi fayafaya, dan dati sa yepi wi fu tan abi wan tranga howpu gi a ten di e kon. A sa yepi wi fu tan abi wan tranga bribi na ini den pramisi fu Gado, èn fu tan lobi Yehovah nanga tra sma.
„Mi lobi fu de na ini na oso fu yu”
17, 18. Fa wi musu si den Kresten konmakandra?
17 A tabernakel, nanga na altari pe sma ben e tyari ofrandi, ben de a moro prenspari presi fu anbegi Yehovah na ini Israel. Fu di David ben lobi fu de na a presi dati, meki a begi: „Yehovah, mi lobi fu de na ini na oso fu yu èn a presi pe a glori fu yu e tan.”—Psalm 26:8.
18 Wi lobi fu kon makandra na presi pe wi e leri sani fu Yehovah? Ibri Kownukondre zaal pe sma kan kisi leri na yeye fasi ibri wiki, de leki a moro prenspari presi fu tru anbegi na ini a libimakandra. Boiti dati, wi abi sosrefi den alayari kongres, kring konmakandra, èn spesrutu dei konmakandra. Na den konmakandra disi wi e taki fu den „frumane” fu Yehovah. Efu wi leri fu „lobi den pasa marki”, dan wi sa de fayafaya fu go na den konmakandra èn wi sa poti prakseri na san e taki drape (Psalm 119:167). A e gi wi krakti trutru fu de nanga tra sma di abi a srefi bribi leki wi, di e broko den ede nanga a tanbun fu wi, èn di e yepi wi fu tan waka a pasi fu soifri retifasi!—Hebrewsma 10:24, 25.
’No puru mi libi’
19. Sortu sondu David no ben wani du?
19 David ben sabi heri bun sortu bakapisi wan sma kan kisi te a no e waka moro na ini a waarheid fu Gado. Fu dati ede David ben begi: „No puru mi sili makandra nanga sondari, èn no teki mi libi makandra nanga man di abi brudu-paiman, di abi ogridu na ini den anu, èn di abi reti-anu di lai nanga tyuku” (Psalm 26:9, 10). David no ben wani de wan fu den sma di e du ogridu, noso di e teki tyuku.
20, 21. San kan meki wi tron sma di no lobi Gado?
20 A disiten grontapu lai nanga sma di e du ala sortu sani di no fiti kwetikweti. Na telefisi, na ini tijdschrift, èn na ini felem, sma e kisi deki-ati fu libi wan yayolibi, sobun, fu libi wan doti, fisti libi sondro fu syen (Galasiasma 5:19). Son sma no man tapu fu luku sani di abi fu du nanga seks, soleki seks buku nanga seks felem, èn furu tron disi e meki taki den e go du hurudu. Den sortu sani disi kan abi krakti makriki tapu yonguwan spesrutu. Na ini son kondre a de wan gwenti fu hori nanga wan sma, èn tini kan kisi a denki taki den musu fu du disi tu. Furu yongu boi e bigin hori nanga meisje, noso meisje e bigin hori nanga boi, aladi den yongu tumusi fu trow. Fu di den seks firi fu den e kon moro tranga, meki a no e teki langa fosi den e bigin du sani di no fiti kwetikweti, èn te fu kaba den e go so fara taki den e du hurudu srefi.
21 Ma dati no wani taki dati den ogri sani na ini a grontapu disi no kan abi krakti tapu bigisma. Nofo tron sma e du bisnis fu bedrigi trawan èn den e teki bosroiti soso fu kisi wini gi densrefi nomo, èn dati e sori taki den no e hori den soifri retifasi moro. Te wi e waka a pasi fu grontapu, dan dati sa meki wi kon de farawe fu Yehovah. Meki wi „tegu gi san ogri, èn lobi san bun”, èn meki wi tan waka a pasi fu soifri retifasi.—Amos 5:15.
„O frulusu mi èn sori taki yu feni mi bun”
22-24. (a) Sortu deki-ati yu e feni na ini den lasti wortu fu Psalm 26? (b) Fu sortu trapu wi sa taki na ini na artikel di e kon?
22 Leki lasti sani, David e taigi Gado: „Mi fu mi sei, na ini mi soifri retifasi mi sa waka. O frulusu mi èn sori taki yu feni mi bun. Mi eigi futu seiker sa tanapu na tapu wan plata presi; na mindri den ipi sma di kon makandra, mi sa blesi Yehovah” (Psalm 26:11, 12). A fasti bosroiti di David ben teki fu tan hori en soifri retifasi, abi furu fu du nanga a begi di a ben begi fu kisi frulusu. Dati e gi wi furu deki-ati! Aladi wi na sondusma, toku Yehovah sa yepi wi efu wi teki a fasti bosroiti fu waka a pasi fu soifri retifasi.
23 Meki a fasi fa wi e libi èn ala san wi e du na ini wi libi, sori taki wi e lespeki èn e warderi a tiri fu Gado. Ibriwan fu wi kan begi Yehovah fu aksi en fu ondrosuku den moro dipi prakseri nanga firi fu wi èn fu meki wi kon bun baka. Ala ten wi kan prakseri a waarheid fu Gado te wi e studeri en Wortu fayafaya. Awinsi san wi e du, meki wi tan wai pasi gi takru mati, èn meki wi blesi Yehovah na mindri den ipi sma di kon makandra. Meki wi teki prati fayafaya na a Kownukondre preikiwroko èn meki wi tan meki disipel, aladi wi no e gi pasi noiti taki grontapu e pori a tumusi warti banti di wi abi nanga Gado. Te wi e du muiti fu tan waka a pasi fu soifri retifasi, dan wi kan abi a frutrow taki Yehovah sa sori taki a feni wi bun.
24 Fu di wi musu sori soifri retifasi na ini ala san wi e du, meki wi musu luku bun nanga wan trapu di kan kori wi trutru, namku a trapu fu gebroiki sopi pasa marki. Wi sa taki fu disi na ini na artikel di e kon.
Yu e memre disi ete?
• Fu san ede a de so taki a soifri retifasi fu libisma, na wan prenspari sani di e sori suma den de trutru?
• San na soifri retifasi, èn san a wani taki fu waka a pasi fu soifri retifasi?
• San sa yepi wi fu waka a pasi fu soifri retifasi?
• Efu wi wani tan hori wi soifri retifasi, dan nanga sortu ogri wi musu luku bun èn san wi no musu du?
[Aksi fu a tori disi]
[Prenki na tapu bladzijde 14]
Yu e tan denki dipi fu den sani di Yehovah du fu di a abi lobi bun-ati?
[Prenki na tapu bladzijde 14]
Yu e aksi Yehovah doronomo fu ondrosuku den moro dipi prakseri fu yu?
[Prenki na tapu bladzijde 15]
Te wi e tan hori wi soifri retifasi te tesi e miti wi, dan wi e prisiri na ati fu Yehovah
[Prenki na tapu bladzijde 17]
Yu e gebroiki den sani di Yehovah e gi fu yepi yu fu tan waka a pasi fu soifri retifasi?