Tile Sha Mimi
Tile Sha Mimi
“Mo yô, ka sha ishô yam m zenden ye.”—PASALMI 26:11.
1, 2. (a) Er nan ve mtil sha mimi u or a lu hange hange sha kwagh u hementor u Aôndo? (b) Akaauma aa tese ér Yehova kuma u hemen ve nena?
SHIGHE u Satan hemba ato ken sule u Eden la, a va a ikyaa sha iyol i Aôndo, sha kwagh u ian i hemen akaa a a gbe a la man ikyaa ne bende a hanma or sha won cii. Shi ka tse yô, a kaa wener orumace ngu civir Aôndo ka gbilin ga, kpa nan ngu civir Aôndo sha ci u kwagh u nana zua a mi la. (Yobu 1:9–11; 2:4) Tsô, mtil sha mimi u orumace hen Aôndo man perapera u nan la hingir vegher u hange hange u ikyaa i Yehova kuma u hemen tar sha won cii, shin á kuma u hemen ga la.
2 Ka mtil sha mimi u akaauma a Aôndo a gbe la una na ve a fa ér Aôndo kuma u hemen tar cii ga, kpa gba u orumace man ônov mba Aôndo mba ken jijingi cii vea pase mnenge ve sha kwagh u hementor u Aôndo ne. Vea pase nena? Vea pase sha u tsuan u tilen sha mimi shin tilen sha mimi ga. Nahan, ka mtil sha mimi u or la una na ve á fa mimi u nan ye.
3. (a) Kanyi Yobu man Davidi soo ér Yehova a kar ve shi a er a ve? (b) Ka mbampin mba nyi ve dugh sha kwagh u zenden sha mimi?
3 Yobu kaa gbar gbar wener: ‘Yehova karem ase sha ikaren i mimi, sha er ú fa mimi wam yô!’ (Yobu 31:6) Tor Davidi u Iserael u sha ayange a tsuaa la kpa er msen hen Yehova wener á kar mimi na, á kaa ér: ‘Er a mo jighilii TERE, gadia mo m zenden sha mimi, m suur sha TER a akpelan ga.’ (Pasalmi 26:1) Se kpa ka a inja u se zenden sha mimi! Kpa mimi kanyi, man ikyav i u zenden sha mimi la di ér nyi? Kanyi ia wase se se zende sha mimi her?
‘Mo M Zende sha Mimi Wam’
4. Mtil sha mimi kanyi?
4 Mtil sha mimi tese mlu u or eren kwagh wang, sha jighjigh man sha perapera, shi lun a ishô iyol kpaa. Nahan kpa, u tilen sha mimi la hemba di u eren kwagh u mimi tseegh la ken inya. Kwagh ne inja na yô ka u or lun tsev tsev sha u eren kwagh u vough shin mne u or nan ishima i nan cii sha u civir Aôndo. Satan yange gba ahon sha kwagh u Yobu ken kwaghôron na a Aôndo, tsô a kaa ér: “Naregh ase uwegh Ough, bende ikuhe [i Yobu] kua inyam na, tsô una venda U sha ishigh Yough je.” (Yobu 2:5) Gba u ishima ia mgbegha or ker sha inja shi nana er kwagh sha inja kpaa, ka nahan man nana tese ér nan tile sha mimi ye.
5. Kanyi i tese ér ka u or a lu vough ve nana fatyô u lun orperapera ga?
5 Nahan kpa, saa or nana lu vough ve nana lu orperapera ga. I mar Tor Davidi ken isholibo shi er akaabo a vesen ken uma na kpishi je. Kpa, Bibilo ôr kwagh na ér yange lu or u̱ zenden “a ishima i wang.” (1 Utor 9:4) Sha ci u nyi? Sha ci u Yehova doo Davidi ishima. Ishima na cii lu hen Aôndo. Lumun ibo na ken igbar, shi ngohol tsaha, nahan a kôôm igbenda na. Sha kpôô yô, Davidi tese perapera na sha gbenda u á civir Yehova Aôndo a ishima i môm kua mdoo u a doo un ishima kpaa la.—Duteronomi 6:5, 6.
6, 7. U zenden sha mimi la kua nyi kwagh kpa kere?
6 Ka sha u civir Aôndo tseegh or a tese mimi u nan ga. Mimi bende a hanma kwagh u se eren cii. Davidi “zenden” sha mimi na. Bibilo i i yer ér The New Interpreter’s Bible la i kaa ér “ishemberti i pasen ieren i ‘zenden’ la i̱ pase inja uma i or eren yô.” Orpasalmi ôr kwagh u ior “mba gbenda ve u lu vough” la ér: “Mba i saan ve iyol yô, ka mba ve we mbampase [mba Aôndo] iko, ve keren Un a ishima ve cii la; shi ve eren ma ifer ga, kpa ve zenden sha igbenda Na” yô. (Pasalmi 119:1–3) Or u nan til sha mimi yô, gba u nana zer keren ishima i Yehova shi nana zenden sha igbenda na kpaa.
7 U zenden sha mimi yô ka u civir Aôndo a ishima i môm je kuan sha ashighe a ican je kpaa. Shighe u ka sea wa ishima a ican, sea tile dông shi sea hendan a ameen a tar u ifer ne yô, nahan ior ka ve nenge a mimi wase la. Ka ‘i saan Yehova iyol’ sha ci u se na un kwagh u una gema a kaa imo a or u á lu lahan un la yô. (Anzaakaa 27:11) Nahan yô, se mba a ityôkyaa i dedoo i se kange ishima er Yobu kpa kange nahan; a kaa wener: “Zan zan me kpe je kpaa, me gbihi mimi wam ga.” (Yobu 27:5) Pasalmi u sha 26 la tese se kwagh u una wase se u tilen sha mimi yô.
“Kar Ahi Am kua Ishima Yam”
8. Kanyi ú hen ken zamber u Davidi kaa a Yehova ér a kar ahi na kua ishima na laa?
8 Davidi er msen ér: ‘Time kwagh wam, TERE, karem doo doo, kar ahi am kua ishima yam kpaa.’ (Pasalmi 26:2) Ahi ka ilyeghegh ki ken atô u iyol i or. U ôron sha ikyav yô, ahi tile sha mbamhen mba orough man er ishima i lun nan ker la. Ishima di gema tile sha ityough ki mlu u or u ken atô la, inja na yô ka mlu u or u ka a na ve or er kwagh man inja i nan kua mkav u nan kpaa. Shighe u Davidi kaa a Yehova ér a kar un la, lu kaan wener a time sha mbamhen nav man mbamlu nav , shi a kar ve a nenge kpaa.
9. Yehova una kar ahi a ase man ishima yase sha nyi gbenda?
9 Davidi zamber a Aôndo ér a kar ahi na kua ishima na. Yehova karen kwagh u se lu ken atô la nena? Davidi yange wa icam wener: “Me wuese TER u A wesem henen, tugh kpaa, ishima yam ka i tesen mo.” (Pasalmi 16:7) Inja i icam i Davidi ne ér nyi? Inja na yô ér kwaghwan u Aôndo yange ya tor ken Davidi, nahan lu kôôm mbamhen nav man aeren a na kpaa. Se kpa aluer se ngohol kwaghwan u i we se ken Mkaanem ma Aôndo man sha ikyev i mbatomov nav man nongo na, shi se de ser a tema tor ken avese yô, kwagh a fatyô u lun nahan. Aluer hanma shighe se mba eren msen sônon Yehova ser a̱ kar se yô, kwagh ne una wase se u tilen sha mimi.
“Erdoo Wou Ngum sha Ashe”
10. Kanyi yange i wase Davidi u zenden sha mimi u Aôndo?
10 Davidi kaa ér ‘erdoo Wou ngum sha ashe; nahan ka sha mimi Wou m zenden ye.’ (Pasalmi 26:3) Davidi fa aeren a dedoo a Aôndo vindi vindi, shi yange i doo un u gbidyen kwar sha á kpaa. A wa icam ér: “Wuese TER, we uma wam, ma kwagh môm ken aeren a Na a doon la cii, a̱ de hungul we ga.” ‘Ieren’ i Aôndo igen za va Davidi ken ishima tsô shi á kaa ér: “TER eren akaaperapera, man shi er ijir i mimi sha ci u mba i kighir ve a ican yô. A pase Mose igbenda Na, man aeren a Na hen ônov mba Iserael.” (Pasalmi 103:2, 6, 7) Alaghga Davidi lu henen sha kwagh u Mbaigipiti lu nzughul a Mbaiserael sha u nyighen ve sha ayange a Mose la. Aluer ka nahan yô, mtem u Davidi tema lu henen er Yehova pase Mose igbenda i una kar ve una yima ve la yange una kôr un sha mtema nahan ishima ia taver un u zenden sha mimi u Aôndo.
11. Kanyi ia wase se u tilen sha mimi?
11 Kwagh u shi una wase se u tilen sha mimi yô, ka u henen Mkaanem ma Aôndo hanma shighe shi teman ving gbidyen kwar sha kwagh u se hen la. Ikyav i tesen yô, aluer se umbur er ngise Yosev venda u eren idya a kwase u Potifar je hingir sha ayem a tsôr tsôr la nahan, se kpa ishima ia taver se u nyôngoso imba kwagh la hen ijiir tom yase shin ken makeranta shin ma ijiir igen je kpaa. (Genese 39:7–12) Tsô aluer i kera mee se sha idya ga kpa i mee se ér se er akaa a a na se lu yôughyôugh shin kwagh u una na se za ti shin akaa a a na se lu shagba or di ye? Se nenge ikyav ken Mose, un lu venda icivir i tar u Igipiti la. (Mbaheberu 11:24–26) Aluer se umbur ishimataver i Yobu her yô, kwagh na la una nyôôso ishima i se kange ser, a lu angev shin ma nyi je ia er kpa se za hemen u civir Aôndo her la. (Yakobu 5:11) Kpa aluer mba tôvon se a ican di ye? Kwagh u er Daniel shin ihungwa i ubegha la kpa una taver se ishima ker.—Daniel 6:16–22.
“M Tem a Ugbilinmbaiorov Imôngo Ga”
12, 13. Ka unô ior nahan i doo u se palegha?
12 Davidi shi gbe ôron kwagh teren kwagh ugen u̱ wase un u tilen sha mimi la yô, á kaa ér: ‘M tem a ugbilinmbaiorov imôngo ga; lun yam a mbaayomov imôngo kpaa ga. M kôr mkohol u mbaerenakaabo ihom; m rumun u teman a mbaaferev imôngo ga.’ (Pasalmi 26:4, 5) Davidi lumun u teman a mbaaferev imôngo ga kuaa. A kôr mbaerenakaabo ihyom.
13 Se di ye? Se mba vende u nengen akaa a ugbilinmbaiorov ve eren sha televishen man sha icer i vidio kua senema man ajiir a sha Intanet a ka se tema se lamen a ior, shin ma gbenda ugen u teman a ior la, kpa? Se mba palegh mbaayomov kpa? Mbagen ken makeranta shin sha ijiir tom yase vea yer iyol ér ve mba ijende a vese kpa a lu sha ci u keren gbenda u vea zua a kwagh hen a vese tseegh. Sha mimi yô, se soo ser se ya ikyar taveraa a ior mba ve zenden sha mimi u Aôndo ga laa? Ior mba undun mimi ka ve senge ér ve mba eren kwagh u mimi kpa ve gema ve yer awashima ve u udugh se ér se de u civir Yehova la. Kpa aluer ior mbagen mba ken tiônnongo, mba ve we iwa ken atse ihiar ye? Mbara kpaa ka i taver u fan ishima ve jighlii. Orgen iti na ér Jayson, ka diakon hegen, un kpa sha shighe u lu gumor la lu a ahuraior a lun inja nahala. A ôr kwagh ve wener: “Iyange igenegh yô, môm ken a ve kaa a mo ér: ‘Se er uma sha ishima yase, kwagh u zan iyol ngu ga, shighe u tar u he ua va la, a lu ku tseegh tsô se kpe ye. Iliam la yange i tam ishima kwe je gande. Kam pe kpen zum u tar u he ua va la ga.’ ” Jayson maa mem ijende na vea ambaaior la teghelee. Paulu ta se icin wener: “De tsughun nen ayol a en ga, ujende mba bov mba vihin mbamlu mba dedoo.” (1 Mbakorinte 15:33) Ka a inja kpishi u se palegh ujende mba bov!
“Me Ôr Akaa Ou a Kpilighyol Cii”
14, 15. Se “ningir sha atse a [Yehova] a nanden nagh sha mi” la nena?
14 Davidi shi kaa ér:‘Me nyian ishô iyol; ka nahan man me ningir sha atse a Ou a nanden nagh sha mi ye, TERE.’ Una nyian ishô iyol ér nena? ‘Sha er me er, á ungwa imo i ishughun yô, man me ôr akaa Ou a kpilighyol cii kpaa yô.’ (Pasalmi 26:6, 7) Davidi yange soo ér una lu iyol wang sha er una fatyô u civir Yehova shi una pase er un civir Aôndo yô.
15 Hanma kwagh u yange í eren sha ci u mcivir u mimi ken tabernakel shi ken masejime í va eren ken tempel cii lu “mure u akaa a Sha man ve lu eren tom ye.” (Mbaheberu 8:5; 9:23) Atse a nanden naagh la tile sha iyol i Yehova kegh u ngohol naagh ku Yesu Kristu na u paan orumace la. (Mbaheberu 10:5–10) Se nyian ishô iyol, se “ningir sha atse a [Yehova] a nanden nagh sha mi” la sha u nan naagh ku Yesu kura jighjigh.—Yohane 3:16–18.
16. Tom u pasen mbagenev akaakpilighyol a Aôndo la ngu u wase se nena?
16 Shighe u ka sea hen sha akaa a naagh ku ipaa la ku er nahan, ishima yase ka i mgbogh a iwuese hen Yehova man Wan na u môm môm la ga zee? De se pase nen mbagenev akaakpilighyol a Aôndo la a iwuese i se lu a mi ken ishima la, se hii sha shighe u yange gba or ken sule u Eden la zan zan se za ar sha shighe u Aôndo una va sôr akaa jimin cii ken tar u he la. (Genese 2:7; Aerenakaa 3:21) Man tom u pasen kwagh u Tartor shi geman ior mbahenen ne ngu kor se ken jijingi kpen kpen! (Mateu 24:14; 28:19, 20) Ka sea tume tyough eren ú yô, ú wase se se za hemen u lun a ishimaveren, shi ka ú seer taver jighjigh wase u se lu a mi sha uityendezwa mba Aôndo la man mdoo u Yehova a doo se ishima kua mbawanndor avese kpaa la.
“Iyou You i U Tem Ker la, Doom Ishima”
17, 18. Doo u se nenge mbamkombo Mbakristu nena?
17 Tabernakel aa atse na a nanden iniav sha mi la cii lu ijiir i Mbaiserael kohol her u civir Yehova yô. Ijiir la doo Davidi ishima kpishi tsô a er msen ér: ‘TERE, iyou You i U tem ker la, doom ishima, kua ijiir henpe iengem You i lu la.’—Pasalmi 26:8.
18 Ka doon se u kohol hen ajiir a se tem imôngo sha u henen kwagh u Yehova la kpa? Hanma Iyou i Tartor yô ka ijiir i mcivir u mimi hen haregh u í maa i̱ la; i̱ kua kwaghtesen u ken jijingi u i tesen ker la cii. Heela tseegh ga, hanma inyom yô, ka se lu a mbamkohol mba vesen man mbamkohol mba ningir man sema u mkohol u iyange i môm. Ka ken mbamkombo mban ka se hen “mbampase” mba Yehova ye. Aluer mbampase mban ‘ve doo se ishima tsung’ yô, se zaan mbamkombo mban sha gbashima shi se ver ishima zum u se ze ve la. (Pasalmi 119:167) Ka sea lu vea ior mba nan jighjigh avese imôngo mba kwagh wase a gbe ve ishima shi ve wasen se u tilen sha mimi her la nahan ka i kundu se iyol kpen kpen! —Mbaheberu 10:24, 25.
‘De Ngohol Uma Wam Kera Ga’
19. Ka asorabo a nyi Davidi soo u lun a ibo sha mi ga?
19 Er Davidi fa kwagh u aluer un de u zenden sha mimi u Aôndo ve una er un la vindi vindi yô, a zamber Aôndo ér: ‘De ngohol uma wam kera a u mbaasorabo la imôngo ga, shin uma wam a ior mba haan awambe la kpaa ga, mba ifer i dang i lu ve sha ave, man uwegh vegh ku yanegh ku iv a inyaregh ki yamen ishô a mi la.’ (Pasalmi 26:9, 10) Yange Davidi soo ér i magh un imôngo a mbaasorabo mba ve lu a ibo sha inja i dang shin ve iv a inyaregh ki yamen ishô ken ave poo la ga.
20, 21. Kanyi ia na ve se hingir u dondon a eren a ior mba cian Aôndo ga?
20 Aeren a hôngorough dumbur ken tar u ainge ne. Man ka televishen kua usenema man umagazin je ve lu hemban samber a “ijimba eren” ne ye. (Mbagalatia 5:19) Mbagen hingir ikpan i ufoto mba ijimbagh, mba ashighe kpishi ka ve na or nan za hingir u eren idya la. Kwagh ne hemba benden a agumaior cii. Ken ityar igen yô, ieren i sôôr kwase zenden a mi la ka ieren i uter, nahan mbayev mba kiriki kpaa maa na jighjigh ér gba u vea lu a ishiôr. Ikyaior man ikya ukase ka ve hingir u hian a mbagenev je ve lu a kuma u eren ivaa cuku tsô kpaa ga. Kwagh ne ngu a maa isharen i yaven a mbagen ken a ve i za sende, tsô maa ve hingir u eren aeren a dang je i za kua idya sha mi kpaa.
21 Mbaganden kpa akaabo de ve ga. Aluer or ngu nyighen mbagenev ken kpenga u eren shi nan ngu eren akaa a sha mtsera u nan tseegh yô, kwagh ne tese ér nan ban a mimi. U dondon aeren a tar ne la una wase se kwagh môm ga, una na se hemba gban a gba ica a Yehova. Nahan de se ‘kôr nen kwaghbo ihyom man kwagh u dedoo a̱ doo se ishima’ shi se za hemen u tilen sha mimi kpaa.—Amoshi 5:15.
“Paam, Zungwem Mhôônom”
22–24. (a) Ka ishimataver i nyi ú zough a mi ken mkaanem ma kuren Pasalmi 26 laa? (b) Ka hôn u nyi se lu timen sha mi ken kwaghngeren u a dondo nee?
22 Davidi mase kuren kwaghôron na a Aôndo ér: ‘Kpa mo yô, ka sha ishô yam m zenden ye; paam, zungwem mhôônom. Nguhar wam tile hen ijiir i shambe shambe; me wuese TER ken mbamkohol mba iorov je.’ (Pasalmi 26:11, 12) Ishima i Davidi kange wener una zende sha ishô na sha u tilen sha mimi la i̱ zua sha kwagh u yange zamber wener i paa un la. Kwagh ne ka kwagh u taver se ishima kpen kpen! Shin er se lu mbaasorabo nahan kpa, aluer se kange ishima ser se tile sha mimi yô, Yehova una wase se.
23 Yô, se na nen hementor u Aôndo icivir shi se tese sha hanma ieren yase cii ser ngu se a inja kpaa. Hanmô wase nana fatyô u eren msen hen Yehova ér a kar mbamhen mba nanegh man ishima i nan shi a time sha mi kpaa. Se timen nen ken Mkaanem ma Aôndo hanma shighe, sha er se hungur a mimi na ga. Nahan se nôngo nen sha afatyô wase cii, se palegh nen u teman imôngo a ubombaiorov kpa se wuese nen Yehova ken atô u ior nav. De se er nen tom u pasen ior kwagh u Tartor shi geman ior hingir mbahenen ne sha gbashima, mayange je se na nen tar ian ser u bende a mlu wase u dedoo u se lu vea Aôndo la ga. Er se lu nôngon sha afatyô wase cii u tilen sha mimi nahan, se lu nen a vangertiôr ser Yehova una gbihi se mayange ga.
24 Er mtil sha mimi a samber sha hanma kwagh u se eren yô, gba u se fa hôn ubo ubo ugen—ka msôrom ma cihin je la. Se time nen sha kwagh ne ken kwaghngeren u a dondo ne.
Baver We Kpa?
• Er nan ve i lu shami u ôron akaa a i gbe á la ijir sha kwagh u mtil sha mimi ve laa?
• Mtil sha mimi kanyi, man ikyav i or zenden sha mimi la ér nyi?
• Kanyi ia wase se u tilen sha mimi?
• Aluer se a soo u tilen sha mimi yô, ka akaabo a nyi i gbe u se fa shi se palegh á?
[Study Questions]