အောက်မေ့ဖွယ်ရာ ဖွားမြင်မှု
အောက်မေ့ဖွယ်ရာ ဖွားမြင်မှု
‘ယနေ့တွင် သခင်ခရစ်တော်တည်းဟူသော ကယ်တင်သောအရှင်သည် သင်တို့အဖို့အလို့ငှာ ဖွားမြင်ခြင်းကိုခံတော်မူပြီ။’—လုကာ ၂:၁၁။
လွန်ခဲ့သောအနှစ်နှစ်ထောင်ခန့်က ဗက်လင်မြို့သူတစ်ဦးသည် သားယောက်ျားတစ်ဦးကို ဖွားမြင်ခဲ့သည်။ ဤဖွားမြင်မှု၏အရေးပါပုံကို ဒေသခံအနည်းငယ်သာ သိရှိခဲ့သည်။ သို့သော် ညအခါ မိမိတို့သိုးများနှင့်အတူ ကွင်းပြင်တွင်ရှိနေကြသော သိုးထိန်းအချို့သည် ကောင်းကင်ဗိုလ်ခြေများ ဤသို့သီဆိုသည်ကို တွေ့မြင်ကြားနာခဲ့ရ၏– “ကောင်းကင်ဘဝဂ်ဝယ် ဘုရားသခင်သည် ဘုန်းကြီးတော်မူစေသတည်း။ မြေကြီးပေါ်၌လည်း [“စိတ်ထားကောင်းသူတို့တွင်၊” ကဘ] ငြိမ်သက်ခြင်းရှိစေသတည်း။”—လုကာ ၂:၈-၁၄။
မကြာမီ သိုးထိန်းတို့သည် ကောင်းကင်တမန်များညွှန်လိုက်သည့်အတိုင်း မာရိနှင့် သူ့ခင်ပွန်းယောသပ်တို့ကို နွားတင်းကုပ်တစ်ခု၌ ရှာတွေ့လေ၏။ မာရိသည် သူငယ်ကို ယေရှုဟုအမည်ပေးကာ တင်းကုပ်ထဲရှိ နွားစားခွက်၌ သိပ်ထားသည်။ (လုကာ ၁:၃၁; ၂:၁၂) ယခု အနှစ်နှစ်ထောင်လွန်ပြီးနောက် လူသားထုသုံးပုံတစ်ပုံသည် ယေရှုခရစ်၏နောက်လိုက်သည်ဟုဆိုကြ၏။ ကိုယ်တော်ဖွားမြင်ခြင်းဆိုင်ရာ အဖြစ်အပျက်များသည် လူ့သမိုင်းတွင် အခြားမည်သည့်အတ္ထုပ္ပတ္တိထက်မဆို လူပြောများသည်။
. . . အစဉ်အလာကြီးမားပြီး ထုံးတမ်းစဉ်လာပွဲတော်များကျင်းပရန် ဝါသနာထုံသည့် စပိန်နိုင်ငံသည် ဗက်လင်မြို့မှ အဆိုပါညထူးညမြတ်ကို ဂုဏ်ပြုကျင်းပရန် နည်းများစွာထွင်ခဲ့သည်။
စပိန်ခရစ္စမတ်
သူငယ်တော်ဖွားမြင်ခန်းအခင်းအကျင်းသည် ၁၃ ရာစုမှစ၍ စပိန်ပွဲတော်များ၏ အရင်းနှီးဆုံးသွင်ပြင်တစ်ခုဖြစ်ခဲ့ပြီ။ မိသားစုများစွာတို့သည် ယေရှုကိုသိပ်ထားသော နွားစားခွက်ပုံစံငယ်လေး ပြုလုပ်ကြသည်။ သိုးထိန်းများနှင့် မာဂုပညာရှိ (သို့မဟုတ် “မင်းကြီးသုံးပါး”) တို့အပြင် ယောသပ်၊ မာရိနှင့် ယေရှုတို့ကို ရွှံ့စေးဖြင့် ရုပ်လုံးဖော်ပေးထားသည်။ ခရစ္စမတ်ရာသီအတွင်း ပကတိလူအရွယ်ရှိသောရုပ်လုံးများဖြင့် သူငယ်တော်ဖွားမြင်ခန်းပြကွက်ကြီးများကို မြို့တော်ခန်းမအနီး ခင်းကျင်းပြသထားလေ့ရှိသည်။ အစ္စစ်ဇီမြို့သား ဖရန်စစ်သည် ယေရှုဖွားမြင်ခြင်းဆိုင်ရာ ခရစ်ဝင်ကျမ်းမှတ်တမ်းကို လူတို့အာရုံပြုစေဖို့ အီတလီနိုင်ငံတွင် ဤထုံးစံကို အစထွင်ခဲ့ပုံရသည်။ နောင်သော် ဖရန်စစ္စကန်ဘုန်းကြီးများသည် စပိန်နိုင်ငံနှင့် အခြားနိုင်ငံများစွာတွင် ယင်းကို လူကြိုက်များစေခဲ့ကြသည်။
အခြားနိုင်ငံများရှိ စဲန်တာကလော့စ်ကဲ့သို့ စပိန်ခရစ္စမတ်ပွဲများတွင် မာဂုပညာရှိများသည် အရေးပါသောအခန်းကဏ္ဍမှ ပါဝင်ကြသည်။ ခေတ်စားသောအယူအရ မာဂုပညာရှိများသည် မွေးကင်းစယေရှုထံသို့ လက်ဆောင်များယူလာပေးသကဲ့သို့ ဇန်နဝါရီ ၆ ရက်၊ ဒီအား ဒဲ့ ရေးစ် (ဘုရင်များနေ့) တွင် မာဂုပညာရှိများသည် စပိန်နိုင်ငံရှိ ကလေးများကို လက်ဆောင်များပေးသည်ဟု အဆိုရှိ၏။ သို့သော် ခရစ်ဝင်ကျမ်းမှတ်တမ်းက ယေရှုထံသို့ မာဂုပညာရှိဘယ်နှစ်ဦး လည်ပတ်ခဲ့သည်ဟု မဖော်ပြထားကြောင်းကိုမူ သိသူ အနည်းငယ်သာရှိ၏။ ထိုသူတို့သည် ရှင်ဘုရင်များမဟုတ်ဘဲ နက္ခတ်ဗေဒင်ပညာရှင်များဟု ပို၍တိကျစွာဖော်ပြထားသည်။ * ထို့ပြင် မာဂုပညာရှိများ သွားရောက်လည်ပတ်ပြီးနောက် ဟေရုဒ်သည် ယေရှုကိုသတ်လိုစိတ်ဖြင့် ဗက်လင်မြို့ရှိ “နှစ်နှစ်အရွယ်မှစ၍ ထိုအရွယ်အောက်” သားယောက်ျားအပေါင်းကို သတ်ဖြတ်ခဲ့သည်။ ယင်းက ယေရှုမွေးဖွားပြီး အချိန်အတန်ကြာမှ သူတို့သွားလည်ပတ်ခဲ့ကြောင်း ဖော်ပြသည်။—မဿဲ ၂:၁၁၊ ၁၆။
၁၂ ရာစုမှစ၍ စပိန်နိုင်ငံရှိ အချို့သောမြို့များတွင် သိုးထိန်းများ ထို့နောက် မာဂုပညာရှိများ ဗက်လင်မြို့သို့ လာရောက်လည်ပတ်ခြင်းပါဝင်သည့် ယေရှုဖွားမြင်ခြင်းဆိုင်ရာ ပြဇာတ်ကို တိုက်ရိုက်တင်ဆက် ဖျော်ဖြေကြသည်။ ယခုအခါ စပိန်နိုင်ငံရှိ မြို့အများစုသည် ဇန်နဝါရီ ၅ ရက်နေ့တိုင်း ကဘာကာတာ၊ သို့မဟုတ် တန်းစီချီတက်ပွဲအခမ်းအနားကို အိမ်ရှင်အဖြစ်ဆောင်ရွက်ပေးကြသည်၊ “ရှင်ဘုရင်သုံးပါး” ကိုသယ်ဆောင်သော အလှပြယာဉ်များ မြို့လယ်ကောင်တစ်လျှောက် လှည့်လည်နေစဉ် ပွဲကြည့်ပရိသတ်များကို သကြားလုံးများ ဝေပေးကြသည်။ ရိုးရာခရစ္စမတ် အဆင်တန်ဆာများနှင့် ဗီယဲန်စီကော့စ် (နာတာလူးသီချင်းများ) က ပွဲတော်အခါသမယကို သက်ဝင်လှုပ်ရှားစေသည်။
စပိန်မိသားစုအများစုသည် ခရစ္စမတ်အကြိုနေ့ (ဒီဇင်ဘာ ၂၄) တွင် အထူးညစာစားသုံးလိုကြသည်။ ထုံးစံအရစားသော အစားအစာများမှာ ထူရောန် (ဗာဒံစေ့နှင့် ပျားရည်တို့ဖြင့်ပြုလုပ်ထားသော သကြားလုံးများ)၊ မာဇီပန်မုန့်၊ သစ်သီးခြောက်များ၊ သိုးကင်နှင့် ပင်လယ်စာတို့ပါဝင်သည်။ ရပ်ဝေး၌နေထိုင်သော မိသားစုဝင်များပင် ထိုအခါသမယတွင် မိသားစုလိုက် စုရုံးရောက်ရှိနေဖို့ အထူးကြိုးပမ်းကြပေမည်။ ဇန်နဝါရီ ၆ ရက်နေ့တွင်ကျသော ထုံးတမ်းစဉ်လာစားသောက်ပွဲ နောက်တစ်ခုတွင် မိသားစုသည် စော်ပရာစာ (အရုပ်လေး) ထည့်ဖုတ်ထားသော “ရှင်ဘုရင်များ” မုန့်လက်ကောက်ကိတ်၊ ရော့စ်ကောန် ဒဲ့ ရေးယက်စ်ကိုစားသုံးကြသည်။ ရောမခေတ်မှ အလားတူထုံးတမ်းစဉ်လာတွင် အရုပ်လေးမြှုပ်ထားသော အပိုင်းကိုရသည့် ကျွန်တစ်ဦးသည် ထိုတစ်နေ့တာ “ရှင်ဘုရင်” ဖြစ်နိုင်လေသည်။
“တစ်နှစ်တာ၏ အပျော်ရွှင်ရဆုံးနှင့် အလုပ်အများဆုံးကာလ”
ဒေသခံဓလေ့ထုံးစံများ မည်သို့ပင် တိုးတက်ပြောင်းလဲလာပါစေ ခရစ္စမတ်သည် ယခု ကမ္ဘာ့အဓိကပွဲတော်အခါသမယ ဖြစ်လာလေပြီ။ ကမ္ဘာ့စာအုပ်စွယ်စုံကျမ်းက ခရစ္စမတ်ကို “ကမ္ဘာတစ်လွှားရှိ သန်းပေါင်းများစွာသောခရစ်ယာန်များနှင့် ခရစ်ယာန်မဟုတ်သူအချို့အတွက် တစ်နှစ်တာ၏ အပျော်ရွှင်ရဆုံးနှင့် အလုပ်အများဆုံးကာလ” အဖြစ် ဖော်ပြထားသည်။ ယင်းသည် အကျိုးဖြစ်ထွန်းသောပွဲတစ်ခုလော။
ခရစ်တော်ဖွားမြင်ခြင်းသည် သမိုင်းဝင်ဖြစ်ရပ်တစ်ခုဖြစ်ကြောင်း သိသာထင်ရှားပါသည်။ ‘စိတ်ထားကောင်းသူတို့တွင် ငြိမ်သက်ခြင်း’ ရှိစေမည့် ရှေ့ပြေးနိမိတ်အဖြစ် ထိုသတင်းကို ကောင်းကင်တမန်များ ကြေညာခဲ့ခြင်းက ၎င်းဖွားမြင်မှုအရေးပါကြောင်း အထင်အရှားသက်သေထူ၏။
သို့သော် စပိန်လူမျိုးသတင်းစာဆရာ ဝှမ် အဲရီစ်က “ခရစ်ယာန်ဘာသာ၏ အစောပိုင်းကာလများတွင် ယေရှုမွေးဖွားခြင်းကို ပွဲတစ်ခုအဖြစ် မကျင်းပခဲ့” ဟုထောက်ပြသည်။ သို့ဖြစ်လျှင် ခရစ္စမတ်ပွဲကျင်းပခြင်းသည် အဘယ်မှလာသနည်း။ ယေရှုဖွားမြင်ခြင်းနှင့် ကိုယ်တော်၏ဘဝကို သတိရအောက်မေ့ရန် အကောင်းဆုံးနည်းကား အဘယ်နည်း။ နောက်ဆောင်းပါး၌ ဤမေးခွန်းများ၏အဖြေကို ရပါလိမ့်မည်။
[အောက်ခြေမှတ်ချက်]
^ အပိုဒ်၊ 8 လာ စာကရာသာ အက်စ်ကရီတူရာ—တက်ခ်စ်တို အီ ကိုမဲန်တေရီယို ပေါ် ပရိုဖက်စ်ဆိုရီးစ် ဒီလာ ခေါန်ပဏီယာ ဒဲ့ခါဇူး (ယေရှုအသင်းအဖွဲ့မှ ပါမောက္ခများထုတ်ဝေသည့် သမ္မာကျမ်းစာ—ကျမ်းချက်နှင့် ရှင်းလင်းချက်) ကဤသို့ရှင်းပြသည်– “ပါရှန်း၊ မေဒိနှင့် ခါလဒဲလူမျိုးတို့တွင် မာဂုပညာရှိများသည် လောကဓာတ်ပညာများ၊ နက္ခတ်ဗေဒင်နှင့် ဆေးပညာကို အားပေးအားမြှောက်ပြုသည့် ပုရောဟိတ်အတန်းအစားဖြစ်သည်။” သို့သော် အလယ်ခေတ်ရောက်သော် သူငယ်ယေရှုကို သွားရောက်ဖူးမြော်ကြသော မာဂုပညာရှိအုပ်စုကို သူတော်စင်စာရင်းသွင်းပြီး မယ်လ်ခီးယို၊ ဂက်စ်ပါနှင့် ဗာလ်တာဇာဟူသောအမည်များပေးခဲ့ကြသည်။ သူတို့၏ရုပ်ကြွင်းများကို ဂျာမနီနိုင်ငံ၊ ကိုလုံးမြို့ရှိ ခရစ်ယာန်ဝတ်ကျောင်းကြီးတွင် သိမ်းဆည်းထားသည်ဆို၏။