Un Nacemento Memorabel

‘Awe a nace pa boso un Salbador, kende ta Cristo e Señor.’—Lucas 2:11.

ALREDEDOR di dos mil aña pasa, un señora den e stad di Betlehem a duna lus na un yiu homber. Masha poco hende cu tawata biba den e stad ei a realisa con importante e nacemento aki tawata. Pero algun wardado di carne, cu a pasa anochi cu nan carnenan den sabana, a mira un multitud di angel y a tende nan canta: “Gloria na Dios den halturanan, y na tera pas meimei di hende cu ta agrad’e.”—Lucas 2:8-14.

E wardadonan a bin topa Maria cu su casa, Hose, den un stal, precis manera e angelnan a bisa nan. Maria a pone e yiu, cu el a yama Hesus, den un pesebre (loke ta en realidad un baki di cuminda pa bestia) cu tawatin den e stal. (Lucas 1:31; 2:12) Awe, despues di dos mil aña, mas o menos un tercera parti di humanidad ta bisa cu nan ta sigui Hesucristo. Y e susesonan cu tawatin di aber cu su nacemento ta forma e base pa un relato cu probablemente ta esun mas conta den historia humano.

Spaña, un pais cu tin un tradicion catolico masha fuerte y ta hopi bon den celebra fiestanan tradicional, a desaroya hopi manera pa conmemora e anochi unico ei na Betlehem.

Pasco di Nacemento na Spaña

Desde siglo 13, e pesebre a bira un di e aspectonan mas conoci di celebracionnan Spaño. Hopi famia ta traha un pesebre chikito cu ta simbolisa esun cu Hesus tawata aden. Figuranan chikito di klei ta representa e wardadonan di carne y e magonan (of sabionan of “tres rei”), y tambe Hose, Maria y Hesus. Durante e temporada di Pasco hopi bes nan ta pone pesebrenan mas grandi cu figuranan cu ta casi e tamaño di hende, banda di stadhuis. Parce cu ta na Italia Fransisco di Assisi a cuminsa cu e custumber aki pa asina e hala hende su atencion na e relato di Evangelio cu ta papia di e nacemento di Hesus. Despues e frèrenan Fransiscano a hacie popular na Spaña y hopi otro pais.

E magonan ta hunga un papel importante den e celebracionnan di Pasco na Spaña, mescos cu ta e caso cu Santa Claus den otro paisnan. Segun e creencia popular, mescos cu e magonan a hiba regalo pa e baby resien naci, Hesus, asina supuestamente e magonan ta duna regalo na e muchanan Spaño riba 6 di januari, Día de Reyes. Sinembargo, ta poco hende ta realisa cu e relato di Evangelio no ta menciona cuanto mago a bishita Hesus. Y pa ta mas exacto nan ta wordo identifica como astrologo y no como rei. * Ademas, despues di e bishita di e magonan, Herodes, den su afan pa mata Hesus, a manda mata tur mucha homber na Betlehem “di edad di dos aña p’abou.” Esei ta indica cu e magonan a haci e  bishita aki basta tempo despues di Hesus su nacemento.—Mateo 2:11, 16.

Desde siglo 12, algun pueblo Spaño a cuminsa presenta obranan teatral di Hesus su nacemento, incluso e bishita di e wardadonan di carne na Betlehem y despues esun di e magonan. Awendia, tur 5 di januari, mayoria stad na Spaña tin un cabalgata of parada, durante cua e “tres reinan” ta pasa door di e centro di ciudad riba carosanan tur decora, y ta parti mangel pa e publico. Decoracionnan tradicional di Pasco y villancicos (canticanan di Pasco) ta duna bida na e fiesta.

Mayoria famia Spaño gusta pone un comemento special riba bispo di Pasco (24 di december). E comemento tradicional ta inclui cosnan manera turrón (un cos dushi traha di almendra y honing), marsepein, fruta seco, lamchi geroast y marisco. Miembronan di famia, asta esnan cu ta biba hopi leu, ta haci un esfuerso special pa nan por ta hunto como famia pa e ocasion aki. Riba 6 di januari, durante un otro comemento tradicional, e famia ta come un roscón de reyes, un bolo cu forma di renchi di “e Reinan” cu un sorpresa (un figura chikito) scondi aden. Durante e epoca Romano tawatin un custumber similar den cua a permiti un esclabo bira “rei” pa un dia si su pida bolo tawatin e obheto scondi den dje.

“E Temporada Mas Alegre y Mas Druk di Aña”

Sea cual sea e custumber local cu a desaroya, awe Pasco a bira e ocasion festivo principal rond mundo. The World Book Encyclopedia ta describi Pasco como “e temporada mas alegre y mas druk di aña pa miyones di cristian y no cristian rond mundo.” E celebracion ei ta beneficioso?

No tin duda cu e nacemento di Cristo tawata un suseso historico. E echo cu e angelnan a anuncia su nacemento como un indicacion di ‘pas entre hende cu ta agrada Dios’ ta indica claramente con importante e ta.

No obstante, e periodista Spaño Juan Arias ta indica cu “na comienso di cristianismo, hende no tawata celebra e fiesta di Pasco.” Si ta asina, di unda e celebracion di Pasco a bin anto? Con ta e miho manera pa recorda e nacemento y bida di Hesus? Den e siguiente articulo, lo bo haya contesta pa e preguntanan ei.

[Nota]