Tetai Anau Anga kia Akamaaraia

‘I nakonei oki i anau ei te Ora, koia oki te Mesia ra ko te Atu.’​—Luka 2:11.

I ETAI rua tauatini mataiti i topa akenei, kua anau tetai vaine i tetai pepe tamaroa i roto i te taoni o Betelehema. E tokoiti ua te au tangata o reira tei kite i te puapinga no teia anau anga. Inara ko etai tiaki mamoe, te tiaki ra i te po i ta ratou au anana i roto i te koro, kua kite atu i tetai urupu maata o te au angera e kua akarongo atu i te imene anga ratou e: “Kia akakakāia te Atua i runga i te rangi teitei, e ei au to to teianei ao, e kia kite aroaia mai te tangata nei.”​—Luka 2:8-14.

Kua kiteaia i reira e te tiaki mamoe ia Maria raua ko tana tane, ko Iosepha, i roto i te are puakatoro, mei ta te au angera i akakite atu kia ratou. Kua tuku atura a Maria iaia, ko tei tapa ra i te ingoa o te tama ra ko Iesu, ki roto i te are puakatoro, me kore e pia kai na te manu, i roto i te ngai no te manu. (Luka 1:31; 2:12) I teianei, e rua tauatini mataiti i muri mai, vaitata e toru tuanga o te au tangata ravarai te karanga ra e te aru ra ia Iesu Karaiti. E kua akatupu te au tupuanga te piri atura ki tona anau anga i te tumu anga no tetai tua i te akara anga kua akakite putuputu maataia i tetai ua atu tua i roto i te tuatua enua o te tangata ra.

Ko Paniora, e enua ma te peu akonoanga Katorika pakari e te tu kite no te au peu taito oroa, kua akatupu mai i te au tu e manganui kia akamaara i taua po takake i Betelehema.

Te Kiritimiti Paniora

Mei te 13 anere mataiti, kua riro mai te akaariarianga Anau Anga ko tetai au tu tei matau maataia no te au oroa Paniora. E manganui te au ngutuare kua rave i te akatutuanga meangiti no te are puakatoro te ngai i tukunaia a Iesu. Te akatutu maira te au tiki karakaraea i te au tiaki mamoe e te au Tangata Pakari (me kore “e toru ariki”), pera katoa ia Iosepha, Maria, e Iesu. Kua akanoo putuputuia te au tiki Anau Anga mamaata vaitata rai mei te au tangata rai te tu i te pae i te are uipaanga o te oire i te tuatau Kiritimiti. I te akara anga na Francis o Assisi i akamata i teia peu i Itaria kia arataki i te manako o te au tangata ki te papaanga Evangeria no to Iesu anau anga. Na te au mongoka Francis i akamaata atu i te reira i Paniora e ki tetai atu au enua e manganui.

E tuanga maata ta te au Tangata Pakari i roto i te au akonoanga Kiritimiti Paniora, mei ia Santa Claus rai i tetai atu au enua. Te manakoia ra kua oake te au tangata pakari i te au apinga aroa ki te tamariki Paniora ia Tianuare 6, Día de Reyes (Ra o te au Ariki), te apai anga mai te au Tangata Pakari, kia tau ki te irinaki anga i matauia, i te au apinga oronga ra ki te pepe anau ouia ko Iesu. Inara, e tokoiti ua te au tangata tei kite, e kare te papaanga Evangeria i taiku mai ana e tokoia au Tangata Pakari i atoro ana ia Iesu. Kare i riro mai ana ei au ariki, kua akataka tikai ia mai ratou ei aronga akara etu. * Tei runga ravao, i muri ake te atoro anga a te au Tangata Pakari, kua ta a Heroda i te tamariki tamaroa katoa i Betelehema “tei tae ki te rua o te mataiti ra e tei kore” i tona tauta anga i te ta ia Iesu. Te akataka maira te reira e kua raveia ta  ratou atoro anga i tetai tuatau i muri roa mai i to Iesu anau angaia.​—Mataio 2:11, 16.

Mei te 12 anere mataiti, kua rave etai au taoni Paniora i tetai akaariarianga tikai i te are teata no te anau anga o Iesu, kapiti anga i te atoro anga a te au tiaki mamoe ki Betelehema e i muri mai ta te au Tangata Pakari ra. I teia tuatau, te maata anga o te au oire i Paniora te rave ra i tetai cabalgata, me kore i tetai akaariari anga, ia Tianuare 5, i taua tuatau ra ka na runga mai te “toru ariki” i te au paata akamanea tikaiia i te aere anga na roto i te oire tikai, i te tua anga i te au raore ki te au tangata te akarakara maira. Te au peu akamanea anga taito no te Kiritimiti e te villancicos (au imene) kua riro ei akaoraora i te atianga oroa.

Te maata anga o te au ngutuare Paniora te reka ra i te rave i tetai kaikai anga takake i te aiai i mua ake i te Kiritimiti (Titema 24). Te kapiti maira te kai tei matauia mei te au apinga ra mei te turrón (apinga venevene tei maaniia mei te tekati e te meri), te marzipan, te au ua rakau tamaroia, te mamoe tunutunuia, e te kai moana. Penei ka rave te au mema ngutuare, pera katoa te aronga te noo ra i te ngai mamao, i tetai tauta anga takake kia taokotai mai no teia atianga. I tetai peu taito no te kaikai anga, ia Tianuare 6, ka kai te ngutuare i tetai roscón de reyes, e keke punupunu no “te au Ariki” e sorpresa (e tiki meangiti) tei uunaia i roto. Ko tetai peu aiteite i te tuatau Roma kua akariro i tetai tavini tei iaia te tuanga te vai ra te apinga tei uunaia kia riro mai ei “ariki” e tai ra.

“Te Tuatau Mataora Roa Atu e te Angaanga Maata Roa Atu o te Mataiti”

Noatu e eaa te au peu o te reira ngai tei tupu mai, kua riro mai te Kiritimiti i teianei ei atianga oroa puapinga maata i te ao. Te akataka maira The World Book Encyclopedia i te Kiritimiti ei “tuatau mataora roa atu e te angaanga maata roa atu o te mataiti no te au Kerititiano e mirioni ua atu e no etai aronga kare i te Kerititiano i te ao katoa nei.” E mea meitaki ainei te reira?

Te taka meitaki ra e, ko te anau anga o Karaiti e tupuanga tuatua enua ia. Te tika e kua akakite mai te au angera i te reira e ko te momua no te ‘au e kia kite aroaia mai te tangata nei’ te akataka meitaki maira i te puapinga o te reira.

Noatu rai, “i te au tuatau akamata anga o te Akonoanga Kerititiano, kare te Anau Anga i akonoia ana ei oroa,” ta te tangata tata tianara Paniora ko Juan Arias i tou mai ei. Me ko teia te turanga, noea mai ra te akono anga Kiritimiti? Eaa ra te mataara meitaki atu kia akamaaraia to Iesu anau anga e te oraanga? I roto i te atikara te aru mai nei, ka kite koe i te au pauanga ki taua au uianga ra.

[Tataanga Rikiriki i Raro]