Sa Unsang Paagi Angayng Hinumdoman si Jesu-Kristo?

Si Jesu-Kristo “maoy usa gayod sa labing impluwensiyadong mga tawo nga nabuhi sukad.”—“The World Book Encyclopedia.”

ANG bantogang mga tawo kasagarang mahinumdoman tungod sa ilang mga nahimo. Busa nganong daghang tawo ang mas nahinumdom pa sa pagkahimugso ni Jesus inay kay sa iyang mga binuhatan? Daghang tawo sa Kakristiyanohan ang makaasoy sa mga panghitabo nga nalangkit sa iyang pagkahimugso. Pila ang nakahinumdom ug naningkamot sa pagpadapat sa iyang maayo kaayong mga pagtulon-an nga makaplagan diha sa Wali sa Bukid?

Tinuod, talagsaon kaayo ang pagkahimugso ni Jesus, apan ang mas gihatagag importansiya sa iyang unang mga tinun-an mao ang mga butang  nga iyang gihimo ug gitudlo. Segurado nga dili katuyoan sa Diyos nga mas hatagan pa ug importansiya sa mga tawo ang pagkahimugso ni Kristo inay kay ang iyang kinabuhi ingong hamtong nga tawo. Apan, ang personalidad ni Kristo wala na kaayo mailhi tungod kay ang mas gihatagag importansiya sa mga tawo panahon sa Pasko mao ang lainlaing mga kasugiran ug sugilambong bahin sa iyang pagkahimugso.

Ang laing makatugaw nga pangutana motungha bahin sa paagi sa pagselebrar sa Pasko. Kon si Jesus mobalik sa yuta karon, unsa kahay iyang hunahunaon bahin sa dayag nga komersiyalismo sa Pasko? Duha ka libo ka tuig kanhi, si Jesus miadto sa templo sa Jerusalem. Naglagot siya pag-ayo sa mga tig-ilis ug salapi ug mga tigbaligya nga nagpahimulos sa usa ka relihiyosong kasaulogan sa mga Hudiyo aron makasapi. “Kuhaa ninyo dinhi kining mga butanga!” matod niya. “Ihunong na ninyo ang paghimo sa balay sa akong Amahan nga balay sa mga tinda!” (Juan 2:13-16) Tin-aw nga supak si Jesus nga sagolan ug negosyo ang relihiyon.

Daghang sinserong mga Katoliko sa Espanya ang nabalaka tungod kay ang Pasko anam-anam na nga nahimong negosyo. Apan, lagmit nga dili kalikayan ang maong kiling sa komersiyalismo tungod sa gigikanan sa daghang kostumbre sa Pasko. Ang magsusulat nga si Juan Arias miingon: “Kadtong mga Kristiyano nga mosaway sa Pasko tungod kay kini nahimo nang ‘pagano’ ug mas nagpasiugda sa paglipaylipay ug sa pagpamalit inay kay sa relihiyon, wala gayod makaamgo nga sa sinugdanan pa lang, ang pagsaulog sa pagkahimugso ni Jesus . . . nasagolan na ug daghang kostumbre sa pagano nga Romanhong kasaulogan [sa adlaw].”—El País, Disyembre 24, 2001.

Ning bag-o pang mga tuig, daghang basahon ug ensiklopedia sa Espanya ang mikomento bahin sa paganong sinugdanan sa naandang mga kasadyaan sa Pasko, maingon man sa komersiyalismo nga nalangkit niini. Mahitungod sa petsa sa pagsaulog sa Pasko, ang Enciclopedia de la Religión Católica prangkang miingon: “Ang hinungdan kon nganong napili sa Iglesya Romana kining petsaha ingong kasaulogan sa Pasko lagmit mao ang hilig niini nga ilisdan ug Kristiyanong mga selebrasyon ang paganong mga kasaulogan. . . . Nasayod kita nga sa Roma niadtong panahona, ang mga pagano nagpahinungod sa petsa nga Disyembre 25 ingong kasaulogan sa natalis invicti, ang adlaw sa pagkahimugso sa ‘dili-mabuntog nga adlaw.’”

Ang Enciclopedia Hispánica may susamang komento: “Ang pagpili sa petsa nga Disyembre 25 ingong kasaulogan sa Pasko dili resulta sa tukmang pagkalkulo sa adlawng natawhan ni Jesus kondili resulta kini sa pagsagop sa mga selebrasyon sa winter solstice sa Roma ingong Kristiyano nga kasaulogan.” Sa unsang paagi gisaulog sa mga Romano ang pagsubang sa adlaw panahon sa tingtugnaw? Kadto maoy pinaagi sa pagkombira, paghudyaka, ug pagbayloay ug mga gasa. Sanglit dili gustong wad-on sa mga kadagkoan sa simbahan ang maong popular nga kasaulogan, ila kanang “gihimong Kristiyano” pinaagi sa pag-ingon nga kana mao ang adlaw sa pagkahimugso ni Jesus inay kay sa adlaw.

Sa primero, niadtong ikaupat ug ikalima nga mga siglo, ang kadasig alang sa pagsimba sa adlaw ug sa mga kostumbre niini wala dayon mahanaw. Ang Katolikong si “San” Agustin (354-430 K.P.) natukmod sa pag-awhag sa iyang mga isigkamagtutuo nga dili nila angayng saulogon ang Disyembre 25 sama sa gihimo sa mga pagano ingong pagpasidungog sa adlaw. Bisan karon, padayon gihapon nga gisunod ang mga kostumbre nga nalangkit nianang Romanhong kasaulogan.

 Ang Labing Maayo nga Kasaulogan Alang sa Paglipaylipay ug Pagpanapi

Latas sa kasiglohan, daghang butang ang nakaingon kon nganong ang Pasko nahimong labing popular ug internasyonal nga kasaulogan alang sa paglipaylipay ug pagpanapi. Dugang pa, ang mga kostumbre sa ubang mga kasaulogan sa tingtugnaw, ilabina kanang gisaulog sa amihanang Uropa, inanayng gidugang nianang selebrasyon nga nagsugod sa Roma. a Ug sa ika-20 nga siglo, madasigong gipasiugda sa mga negosyante ug mga eksperto sa pagpamaligya ang bisan unsang kostumbre nga makapatunghag dagkong ganansiya.

Unsay resulta niini? Ang pagsaulog sa adlawng natawhan ni Kristo inay kay ang kahulogan niini mao na ang nahimong mas hinungdanon. Sa daghang kaso, bisan gani ang paghisgot kang Kristo nawala na gikan sa naandang pagsaulog ug Pasko. “[Ang Pasko] maoy tibuok-kalibotan nga kasaulogan alang sa pamilya, ug ang matag usa mosaulog niana sa iyang kaugalingong paagi,” matod sa mantalaan sa Espanya nga El País.

Gipakita niining maong komento ang usa ka nagauswag nga kiling diha sa Espanya ug sa daghang ubang nasod sa tibuok kalibotan. Samtang ang pagsaulog sa Pasko nahimong mas maluho, ang kahibalo bahin kang Kristo nagkamenos. Sa pagkatinuod, ang mga kasadyaan sa Pasko nahimo na gayong sama sa kon unsa kini kaniadto sa Roma—paghudyaka, pagkombira, ug pagbayloay ug mga gasa.

Usa ka Bata Natawo Kanato

Kon ang naandang pagsaulog ug Pasko wala gayoy kalangkitan kang Kristo, sa unsang paagi angayng hinumdoman sa matuod nga mga Kristohanon ang pagkahimugso ug pagkinabuhi ni Kristo? Pito ka siglo una pa nahimugso si Jesus, si Isaias mitagna bahin kaniya: “Adunay usa ka bata nga natawo alang kanato, adunay usa ka anak nga lalaki nga gihatag kanato; ug ang prinsipenhong pagmando mahipatong sa iyang abaga.” (Isaias 9:6) Nganong miingon man si Isaias nga ang pagkahimugso ni Jesus ug ang iyang umaabot nga papel hinungdanon kaayo? Tungod kay si Jesus mahimong usa ka gamhanang magmamando. Siya pagatawgon nga Prinsipe sa Pakigdait, ug dili gayod mahanaw  ang pakigdait o ang iyang prinsipenhong pagmando. Dugang pa, ang pagmando ni Jesus mapatunhay “pinaagi sa hustisya ug pinaagi sa pagkamatarong.”—Isaias 9:7.

Ang mensahe nga giproklamar ni Isaias giproklamar usab ni manulondang Gabriel sa dihang gipahibalo niya kang Maria ang umaabot nga pagkahimugso ni Jesus. “Kini siya mahimong bantogan ug pagatawgong Anak sa Labing Hataas,” siya mitagna. “Ug ihatag kaniya ni Jehova nga Diyos ang trono ni David nga iyang amahan, ug magamando siya ingon nga hari sa balay ni Jacob hangtod sa kahangtoran, ug walay pagkatapos ang iyang gingharian.” (Lucas 1:32, 33) Tin-aw nga ang pangunang katuyoan sa pagkahimugso ni Jesus nalangkit sa buluhaton nga pagahimoon ni Kristo ingong tinudlo nga Hari sa Gingharian sa Diyos. Ang pagmando ni Kristo makabenepisyo sa tanan, lakip kanimo ug sa imong mga hinigugma. Sa pagkatinuod, gipaila sa mga manulonda nga ang iyang pagkahimugso magdalag ‘pakigdait taliwala sa mga tawo nga gikahimut-an sa Diyos.’—Lucas 2:14.

Kinsay dili mangandoy nga mopuyo sa kalibotan nga adunay pakigdait ug hustisya? Apan aron matagamtam nato ang pakigdait nga ipahinabo sa pagmando ni Kristo, kinahanglang pahimut-an nato ang Diyos ug magbaton ug maayong relasyon uban kaniya. Si Jesus miingon nga ang unang lakang aron mabatonan nato ang maong relasyon mao ang pagtuon bahin sa Diyos ug kang Kristo. “Kini nagkahulogan ug kinabuhing walay kataposan,” matod ni Jesus, “ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.”—Juan 17:3.

Sa dihang kita aduna nay tukmang kahibalo bahin kang Jesus, dili na kita maghunahuna kon sa unsang paagi kaha niya gusto nga hinumdoman nato siya. Pinaagi ba sa pagkaon, pag-inom, ug pagbayloay ug mga regalo sa samang petsa sa usa ka karaang pagano nga kasaulogan? Lagmit nga dili gayod kana ang iyang gusto. Sa gabii una siya namatay, giingnan ni Jesus ang iyang mga tinun-an kon unsay iyang gusto. “Siya nga nakabaton sa akong mga sugo ug nagsunod niini, siya mao ang nahigugma kanako. Sa ingon usab siya nga nahigugma kanako higugmaon sa akong Amahan, ug ako mahigugma kaniya.”—Juan 14:21.

Ang mga Saksi ni Jehova matukiong nagtuon sa Balaang Kasulatan, nga nakatabang kanila sa pagsabot sa mga sugo sa Diyos ug ni Jesus. Malipay sila sa pagtabang kanimo nga masayod bahin nianang hinungdanong mga sugo aron imong mahandom si Jesus sa paagi nga angay siyang hinumdoman.

[Footnote]

[Kahon/Hulagway sa panid 6, 7]

Supak ba ang Bibliya sa Pagkombira ug Paghatag ug mga Gasa?

Ang Paghatag ug mga Gasa

Ang Bibliya dili supak sa pagpanghatag ug mga regalo, nga nagtawag pa gani kang Jehova ingong Maghahatag sa “matag maayong gasa ug matag hingpit nga regalo.” (Santiago 1:17) Gipakita ni Jesus nga ang maayong mga ginikanan manghatag ug gasa sa ilang mga anak. (Lucas 11:11-13) Ang mga higala ug mga membro sa pamilya ni Job nanghatag ug mga gasa kang Job sa dihang siya naayo sa iyang sakit. (Job 42:11) Hinunoa, ang maong pagpanghatag wala magkinahanglan ug espesyal nga mga okasyon. Kini naggikan sa kasingkasing.—2 Corinto 9:7.

Mga Panagtapok sa Pamilya

Ang mga panagtapok sa pamilya makatabang sa paghiusa sa mga membro sa pamilya, ilabina kon sila nagpuyo na sa lainlaing lugar. Si Jesus ug ang iyang mga tinun-an mitambong ug kombira sa kasal sa Cana, nga usa gayod ka dakong panagtapok sa pamilya ug mga higala. (Juan 2:1-10) Ug sa ilustrasyon ni Jesus sa usikan nga anak, gipakita sa amahan ang iyang kalipay sa pagpauli sa iyang anak pinaagig paghikay ug bangkete sa pamilya, nga naglakip ug musika ug pagsayawsayaw.—Lucas 15:21-25.

Pagtagamtam ug Lamiang Pagkaon

Kanunayng gihisgotan sa Bibliya ang pagtagamtam sa mga alagad sa Diyos ug lamiang pagkaon uban sa pamilya, mga higala, o mga isigkamagsisimba. Sa dihang giduaw sa tulo ka manulonda si Abraham, giandaman niya sila ug kombira nga naglakip sa karneng baka, gatas, mantekilya, ug lingin nga mga tinapay. (Genesis 18:6-8) Gihubit ni Solomon ang ‘pagkaon, pag-inom, ug pagmaya’ ingong mga gasa gikan sa Diyos.—Ecclesiastes 3:13; 8:15.

Tin-aw nga gusto sa Diyos nga kalipayan nato ang lamiang mga pagkaon uban sa mga higala ug pamilya, ug giuyonan niya ang pagpanghatag ug mga gasa. Aduna kitay daghang kahigayonan sa paghimo niana sa bisan unsang panahon sa tibuok tuig.