Jesu Kriste o Swanetše go Gopolwa Bjang?

Jesu Kriste “ruri e be e le yo mongwe wa batho ba nago le tutuetšo kudu bao ba kilego ba phela.”—“The World Book Encyclopedia.”

GANTŠI batho ba tumilego ba gopolwa ka seo ba se dirilego. Ka gona, ke ka baka la’ng batho ba bantši ba gopola Jesu ka matswalo a gagwe go e na le go mo gopola ka dilo tšeo a di dirilego? Bojakaneng ka moka, batho ba bantši ba ka hlalosa ditiragalo tše di akaretšago matswalo a gagwe. Ke batho ba bakae bao ba gopolago le go leka ka matla go diriša thuto e phagamego kudu yeo e hwetšwago Thutong ya Thabeng?

Ke therešo gore matswalo a Jesu e be e le a bohlokwa, eupša barutiwa ba gagwe ba pele ba ile ba lebiša tlhokomelo kudu go seo a se dirilego  le seo a se rutilego. Ka kgonthe Modimo ga se a ka a rera gore matswalo a Kriste a šire bophelo bja gagwe e le monna yo a godilego ka tsebo. Lega go le bjalo, Keresemose e ile ya atlega go šireng seo Kriste a lego sona ka go se tswaka le dinonwane le mabarebare a Matswalo a gagwe.

Go rotoga potšišo e nngwe e hlobaetšago mabapi le tsela yeo Keresemose e binwago ka yona. Ge e ba Jesu a be a ka boa lefaseng lehono, o be a tla nagana’ng ka boemo bja tša kgwebo bja Keresemose? Nywageng e 2 000 e fetilego, Jesu o ile a etela tempele ya Jerusalema. O ile a galefišwa ke baananyi ba tšhelete le babapatši bao ba bego ba ikhola ka go hwetša tšhelete e oketšegilego nakong ya monyanya wa ba-Juda wa bodumedi. O itše: “Tlošang dilô tšê. Ngwakô wa Tate Le se kê la o dira borêkêlô.” (Johane 2:13-16) Go molaleng gore Jesu ga se a ka a amogela go tswaka-tswakanywa ga kgwebo le bodumedi.

Makatholika a mantši a botegago a kua Sepania a ipontšha a kgomega ka boemo bjo bo golago bja tša kgwebo ya Keresemose. Lega go le bjalo, mo gongwe mokgwa o bjalo wa go sekamela kgwebong ga o thibelege, ka baka la medu ya mekgwa e mentši ya Keresemose. Raditaba e lego Juan Arias o bolela gore: “Bao ka gare ga Bokriste ba ganetšago tsela yeo Keresemose e bilego ya ‘boheitene’ e bile ba ineetšego kudu menyanyeng le go rekeng go feta go ineela bodumeding, ka kakaretšo ga ba lemoge gore gaešita le setlogong sa ona, Matswalo a Jesu . . . a be a šetše a tsene dikarolong tše dintši tša monyanya [wa letšatši] wa boheitene wa Roma.”—El País, December 24, 2001.

Nywageng ya morago bjale, bo-raditaba ba bantši ba ma-Sepania le disaeklopedia ba boletše ka ditlogo tša boheitene tša menyanya e tlwaelegilego ya Keresemose, gaešita le dipolelelo tša yona tša kgwebo. Mabapi le letšatši-kgwedi la go binwa ga Keresemose, Enciclopedia de la Religión Católica e bolela ka go lebanya gore: “Lebaka leo ka lona Kereke ya Roma e ilego ya phetha ka go kgetha letšatši le gore e be la monyanya go bonagala e bile tshekamelo ya yona ya go bea menyanya ya boheitene legatong la ya Bokriste. . . . Re a tseba gore kua Roma ka nako yeo, boheitene bo ile bja kgethagatša December 25 e le monyanya wa natalis invicti, e lego matswalo a ‘letšatši leo le sa fenyegego.’”

Ka mo go swanago, Enciclopedia Hispánica e bolela gore: “Go binwa ga letšatši-kgwedi la December 25 e le letšatši la Keresemose ga se gwa thewa ka go lebanya matswalong a Jesu, eupša go e na le moo, go tšerwe menyanyeng yeo e dirilwego ya Bokriste ya letšatšing la mafelelo la marega leo le bego le binwa kua Roma.” Ke bjang ba-Roma ba bego ba binela go hlaba ga letšatši leratadimeng la marega? Ka go dira menyanya, meletlo ya mašata le ka go neana dimpho. Ka ge baetapele ba dikereke ba be ba sa nyake go fediša monyanya o bjalo o tumilego, ba ile ba o dira gore e be wa Bokriste ka go o bitša matswalo a Jesu go e na le go o bitša matswalo a letšatši.

Mathomong, ngwaga-kgolong wa bone le wa bohlano, go kgomarela borapedi bja letšatši le metlwae ya gona go ile gwa ba thata gore go fedišwe. Yo go thwego ke Mokgethwa wa Katholika Augustine (354-430 C.E.) o ile a ikwa a gapeletšega go kgothaletša badumedi-gotee le yena gore ba se ke ba bina December 25 go etša ge baheitene ba be ba dira bjalo bakeng sa go hlompha letšatši. Gaešita le lehono, menyanya ya Roma ya bogologolo e bonagala e e-na le tutuetšo e kgolo.

 Monyanya o Swanetšego Bakeng sa go Ithabiša le go Reka

Go theoša le nywaga-kgolo, dilo tše mmalwa di bapetše karolo e kgolo go direng gore Keresemose e be monyanya o tumilego kudu le wa ditšhaba-tšhaba bakeng sa go ithabiša le go reka. Le gona, metlwae ya menyanya e mengwe ya marega, kudu-kudu yeo e binwago ka leboa la Yuropa, e ile ya tsenywa ganyenyane-ganyenyane mohuteng wa monyanya wo o ilego wa thoma kua Roma. * Le gona, lekgolong la bo-20 la nywaga, barekiši le ditsebi tša tša kgwebo ba ile ba kgothaletša ka mafolofolo motlwae le ge e le ofe wo o bego o tla ba tlišetša tšhelete e ntši e oketšegilego.

Mafelelo e bile afe? Go binwa ga matswalo a Kriste go ile gwa lebelelwa go le bohlokwa kudu go feta seo ge e le gabotse matswalo a gagwe a se bolelago. Dikarolong tše dintši, gaešita le go bolela ka Kriste go ile gwa nyaka go timelela Keresemoseng e tlwaelegilego. Kuranta ya kua Sepania ya El País e bolela gore: “[Keresemose] ke monyanya wa lefase e bile ke wa lapa gomme yo mongwe le yo mongwe o e bina ka tsela yeo a ratago ka yona.”

Tlhaloso ye e bonagatša tshekamelo e golago kua Sepania le dinageng tše dingwe tše dintši go dikologa lefase. Gaešita le ge go bina Keresemose go tšwela pele go fetelela, go tseba Kriste go a nyamelela. Ge e le gabotse, menyanya ya Keresemose e boetše go seo e bego e le sona mathomong mehleng ya Roma—meletlo ya mašata, go dira menyanya le go neana dimpho.

Re Tswaletšwe Ngwana

Ge e ba Keresemose e tlwaetšwego e tloga e sa tswalane le Kriste, Bakriste ba therešo ba swanetše go gopola bjang matswalo le bophelo bja Kriste? Nywaga-kgolong e ka bago e šupa pele ga matswalo a Jesu, Jesaya o ile a porofeta ka yena ka gore: “Re tswaletšwe ngwana, re neilwe morwa, yo pušô e lexo lexetleng la xaxwe.” (Jesaya 9:5) Ke ka baka la’ng Jesaya a ile a bolela gore matswalo a Jesu le tema ye a bego a tla e kgatha  e be e tla ba tše bohlokwa gakaakaa? Ka gobane Jesu e be e tla ba mmuši yo matla. O be a tla bitšwa Kgošana ya Khutšo, le gona khutšo goba pušo ya bogoši bja gagwe e be e ka se fele. Go feta moo, bobuši bja Jesu bo be bo tla matlafatšwa “ka molaô le ka tokô.”—Jesaya 9:6.

Ge a be a tsebiša Maria ka go tswalwa mo go tlago ga Jesu, morongwa Gabariele o ile a dumelelana le seo Jesaya a se tsebaditšego. O ile a bolela e sa le pele gore: “Yêna-eo e tlo ba e moxolo, ó tlo bitšwa Morwa wa Yo-xodimo-dimo; ’me Morêna ó tlo mo nea sedulô sa Dafida tat’axwe. Ó tlo buša moloko wa Jakobo xo iša mehleng ya neng le neng; ’me boxoši bya xaxwe bo ka se kê bya ba le bofêlô.” (Luka 1:32, 33) Go molaleng gore selo se bohlokwa kudu seo se bolelwago ke matswalo a Jesu se tswalana le modiro wo Kriste a bego a tla o phethagatša e le Kgoši e kgethilwego ya Mmušo wa Modimo. Pušo ya Kriste e ka hola bohle, go akaretša wena le bao o ba ratago. Ge e le gabotse, barongwa ba bontšhitše gore matswalo a gagwe a be a tla dira gore “lefaseng xo bê le khutšô, kxahlišô [ya Modimo] bathong.”—Luka 2:14.

Ke mang yo a sa fagahlelego go phela lefaseng la khutšo le toko? Eupša re swanetše go thabiša Modimo gomme re be le tswalano e botse le yena e le gore re tle re thabele khutšo yeo pušo ya Kriste e tlago go e tliša. Jesu o boletše gore mogato wa mathomo wa go ba le tswalano e bjalo ke ka go ithuta ka Modimo le Kriste. Jesu o itše: “Bophelô byo bo sa felexo ké xe ba Xo tseba, Wene Modimo-dimo Ò le nnoši. Ba tsebê le Moromiwa wa xaxo Jesu Kriste.”—Johane 17:3.

Ge re tseba Jesu gabotse, re ka se sa ipotšiša mabapi le kamoo a nyakago gore re mo gopole ka gona. Na e tla ba ka go ja, go nwa le go neana dimpho ka letšatši le le swanago le la monyanya wa bogologolo wa boheitene? Go bonagala go se bjalo. Bošegong bja pele ga ge a ka hwa, Jesu o ile a botša barutiwa ba gagwe seo a se nyakago. “E a naxo le melaô ya-ka ’me a e lôtôla, ké yêna a nthataxo. ’Me e a nthataxo, ó tlo ratwa ke Tate. Le Nna ke tlo mo rata.”—Johane 14:21.

Dihlatse tša Jehofa di ithutile Mangwalo a Makgethwa ka mo go tseneletšego, ao a ilego a di thuša go kwešiša ditaelo tša Modimo le Jesu. Di ka thabela go go thuša gore o hwetše temogo ditaelong tše bjalo tša bohlokwa e le gore o gopole Jesu ka tsela ye a swanetšego go gopolwa ka yona.

[Mengwalo ya ka tlase]

[Caption on page 6]

Na Beibele e Nyatša Menyanya le go Neana Dimpho?

Go Neana Dimpho

Beibele e dumelelana le go neana dimpho, Jehofa ka boyena o bitšwa Monei wa “’neô tšohle tše botse, le ’mphô tšôhle di tletšexo.” (Jakobo 1:17) Jesu o bontšhitše gore batswadi ba babotse ba nea bana ba bona dimpho tše dibotse. (Luka 11:11-13) Bagwera ba Jobo le ditho tša lapa ba ile ba nea Jobo dimpho ge a be a fodile. (Jobo 42:11) Lega go le bjalo, ga go le e tee ya dimpho tšeo ye e ilego ya nyaka gore go bewe letšatši le le kgethegilego la monyanya. Go nea mo go bjalo go be go e-tšwa pelong.—2 Ba-Korinthe 9:7.

Dipokano tša Lapa

Dipokano tša lapa di ka dira mo gontši kudu go bopa botee go ditho tša lapa, kudu-kudu ge e ba di se sa hlwa di dula gotee. Jesu le barutiwa ba gagwe ba ile ba ya monyanyeng wa lenyalo kua Kana, wo ka ntle le pelaelo e bego e le pokano e kgolo ya ba lapa le bagwera. (Johane 2:1-10) Le gona seswantšhong sa Jesu sa morwa wa lehlaswa, tate o ile a dira monyanya wa lapa wa go boa ga morwa wa gagwe, wo o bego o akaretša mmino le go bina.—Luka 15:21-25.

Go Thabela Dijo tše Bose

Beibele e bolela gantši ka bahlanka ba Modimo e le bao ba thabelago dijo tše di rothišago mare le ba lapa, bagwera goba barapedi-gotee. Ge barongwa ba bararo ba be ba etetše Aborahama, o ile a ba lokišetša dijo tše di bego di akaretša nama ya kgomo, mafsi, potoro le dikuku. (Genesi 18:6-8) Salomo o ile a hlalosa ‘go ja, go nwa le go thaba’ e le mpho e tšwago go Modimo.—Mmoledi 3:13; 8:15.

Go molaleng gore Modimo o nyaka gore re thabele dijo tše bose le bagwera gotee le ba lapa, gomme o amogela go neana dimpho. Re na le dibaka tše dintši tša go dira bjalo ka nako le ge e le efe mo ngwageng.