Fa wi musu memre Yesus Krestes?

Yesus Krestes „trutru ben de wan fu den moro bigi sma di oiti libi na grontapu”.—„The World Book Encyclopedia”.

NOFO TRON sma e memre trawan di abi barinen fu den sani di den du. Ma fu san ede furu sma e memre a geborte fu Yesus, na presi fu memre den sani di a du? A moro bigi pisi fu sma na ini Krestenhèit, man fruteri den sani di pasa na a geborte fu en. Omeni sma kan memre den kefalek bun leri di a ben gi na ini a Bergitaki, èn omeni fu den sma e du muiti fu libi akruderi den leri dati?

A tru taki a geborte fu Yesus ben de wan tumusi aparti sani, ma gi den fosi disipel fu en, den sani di a ben du èn den sani di a ben leri, ben de moro prenspari. A tru taki noiti a ben de  a wani fu Gado taki a geborte fu Krestes ben o de moro prenspari leki a libi fu en leki wan bigisma. Ma Kresneti e meki taki sma no e si Krestes leki fa a de trutru, ma leki wan pisi fu wan anansitori di e taki fu a geborte fu en.

Wan tra muilek aksi de di abi fu du nanga a fasi fa sma e hori Kresneti fesa. Efu Yesus ben o drai kon baka na grontapu tide, dan san a ben o denki te a ben o si taki sma e gebroiki Kresneti leki wan okasi fu meki moni? Tu dusun yari na fesi, Yesus ben go na a tempel na ini Yerusalem. A ben atibron di a si fa sma ben broko moni èn fa den ben seri sani fu meki moni na wan gridi fasi tapu wan Dyu fesadei. A ben taigi den: „Puru den sani disi dyaso! Un tapu fu meki na oso fu mi Tata wan oso fu seri sani!” (Yohanes 2:13-16) A de krin fu si, taki Yesus no ben feni en bun taki den ben moksi bisnis nanga na anbegi.

Furu opregti Lomsusma fu Spanyorokondre e broko den ede fu di a e gersi leki moro nanga moro a Kresneti fesa e tron wan okasi gi bisnisman fu meki moni. Ma te wi e ondrosuku fu pe furu fu den Kresneti gwenti komoto, dan a no gersi leki den bisnisman o tapu nanga a sani disi. A nyunsuman Juan Arias e sori taki: „Den sma di abi a Kresten bribi e krutu a fasi fa Kresneti kon tron ’wan heiden fesa’ èn taki a abi moro fu du nanga a meki di sma e meki prisiri èn a lobi di sma lobi bai sani, na presi taki a abi fu du nanga na anbegi. Ma furu tron den sma disi no sabi taki, di sma bigin hori Kresneti a fosi leisi, den ben teki furu fu den sani abra fu den heiden fesa [fu a son] di den Romesma ben hori.”—El País, 24 december 2001.

Na ini den lasti yari, furu Spanyoro nyunsuman nanga encyclopedie ben taki dati a Kresneti fesa bigin na den heiden, ma sosrefi taki sma e si a fesa disi leki wan okasi fu meki moni. Na wan tru fasi wan buku e taki fu a dei fu a Kresneti fesa: „A reide fu san ede a Lomsu Kerki teki a bosroiti fu teki a dei disi leki a Kresneti dei, abi fu du nanga a gwenti di den ben abi fu kenki heiden fesa kon tron Kresten fesa. . . . Wi sabi taki na a ten dati na ini Rome, den heiden ben teki 25 december leki a dei fu hori a natalis invicti fesa, a geborte dei fu a ’son di e wini ala ten” (Enciclopedia de la Religión Católica)”.

Na a srefi fasi, wan tra buku e taki: „Sma no teki 25 december leki a dei fu hori Kresneti fu di den ondrosuku finifini o ten Yesus gebore, ma na presi fu dati den ben kenki den fesa di sma ben hori na ini Rome kon tron Kresten fesa. Sma ben hori den fesa disi te a son ben drai kon baka na ini winter” (Enciclopedia Hispánica). Fa den Romesma ben hori a fesa te a son ben drai kon baka na ini winter? Den ben hori bradyari fesa, èn den ben prati kado. Fu di den tiriman fu kerki no ben de klariklari fu puru a pôpi fesa disi, meki den kenki a fesa tron wan „Kresten fesa” di den kari a geborte fu Yesus, na presi fu a geborte fu a son.

Na ini a di fu fo yarihondro, nanga a di fu feifi yarihondro, a no ben makriki fu meki sma tapu nanga na anbegi fu a son, èn fu hori den na den gwenti fu na anbegi dati. Fu dati ede, a Lomsu „Santawan” Augustinus (354-430 G.T.) ben feni taki a ben musu gi den kompe anbegiman fu en a frumane fu no hori a fesa fu 25 december na a srefi fasi leki fa den heiden ben du dati fu gi grani na a son. Srefi na ini a ten disi, a gersi taki den gwenti fu den owruten fesa fu  Rome abi furu krakti tapu a fasi fa sma e hori Kresneti.

A moro bun fesa fu meki prisiri èn fu meki moni

Na ini den hondrohondro yari di pasa, difrenti sani ben de di meki taki Kresneti kon tron a moro pôpi fesa na heri grontapu, pe sma kan meki prisiri èn pe den kan meki moni. Sosrefi den gwenti fu tra fesa di e hori na ini a winter, spesrutu den wan di sma e hori na a noordsei fu Europa, safrisafri ben kon de wan pisi fu a fesa di bigin na ini Rome. * Na ini a di fu twenti yarihondro, seriman nanga sma di e ondrosuku fa sma e bai èn e seri sani, ben de fayafaya fu kon nanga ala sortu gwenti di ben kan gi den na okasi fu meki bun furu moni.

San ben de a bakapisi fu dati? Fu hori wan fesa fu a geborte fu Krestes kon moro prenspari leki san a geborte srefi wani taki. Nofo tron, sma no e taki srefi fu Krestes na a Kresneti fesa. „[Kresneti] na wan fesa fu grontapu, wan fesa gi a heri famiri, èn ala sma e hori en na den eigi fasi”, na so a Spanyoro koranti El País taki.

A sani disi di a koranti skrifi e sori fa moro nanga moro sma na ini Spanyorokondre nanga furu tra kondre na ini grontapu e denki fu a tori. Aladi a fasi fa sma e hori Kresneti e kon bradyari moro nanga moro, a sabi di sma abi fu Krestes e kon mendri moro nanga moro. Te yu e luku en bun, dan a Kresneti fesa kon tron san a ben de kaba na ini a ten fu Rome, namku wan bradyari fesa, nyan, dringi, nanga prisiri, èn pe sma ben prati kado.

Wan pikin kon gebore gi wi

Efu Kresneti no abi noti fu du nanga Krestes, dan fa tru Kresten musu memre a geborte nanga a libi fu Krestes? Sowan seibi hondro yari bifo Yesus gebore, dan Yesaya ben taki na fesi fu en: „Wan pikin kon gebore gi wi, wan manpikin den ben gi wi; èn a kownu tirimakti sa kon na tapu en skowru” (Yesaya 9:6). Fu san ede Yesaya ben sori taki a geborte fu Yesus nanga a  frantwortu di a ben o kisi ben o de so prenspari? Fu di Yesus ben o tron wan makti tiriman. Sma ben o kari en Granman fu Vrede, èn wan kaba no sa kon na a vrede, noso na a tiri fu en leki Kownu. Boiti dati, a tirimakti fu Yesus o tan „nanga yepi fu retidu èn nanga yepi fu regtfardikifasi”.—Yesaya 9:7.

Na engel Gabrièl ben meki a boskopu fu Yesaya bekènti di a ben gi Maria a nyunsu fu a geborte fu Yesus. A ben taki na fesi: „A wan disi sa bigi èn den sa kari en a Manpikin fu a Moro Heiwan; èn Yehovah Gado sa gi en a kownusturu fu en tata David, èn a sa tiri leki kownu abra na oso fu Yakob fu têgo, èn en kownukondre no sa kon na wan kaba” (Lukas 1:32, 33). A de krin fu si taki a prenspari reide fu a geborte fu Yesus abi fu du nanga a wroko di Krestes ben o du leki a Kownu di Gado poti na ini a Kownukondre fu En. Ala sma kan kisi wini fu a tiri fu Krestes, iya, yu sosrefi nanga den lobiwan fu yu. Fu taki en leti, den engel ben taki dati a geborte fu en ben o tyari „freide gi den sma na grontapu di Gado lobi”.—Lukas 2:14, Nyun Testamenti.

Suma no e angri fu libi na ini wan grontapu pe vrede nanga retidu sa de? Ma fu man kisi a vrede di a tiri fu Krestes sa tyari kon, wi musu plisi Gado èn wi musu abi wan bun banti nanga en. Yesus ben taki dati a fosi sani di wi musu du fu kisi so wan banti nanga Gado, na fu kisi sabi fu Gado èn fu Krestes. Yesus ben taki: „Disi wani taki têgo libi, fu den e teki sabi na ini den fu yu, a wan-enkri tru Gado èn fu en di yu seni kon, Yesus Krestes.”—Yohanes 17:3.

Te wi abi soifri sabi fu Yesus, dan wi no abi fu prakseri moro fa a wani taki wi musu memre en. Yu denki taki a ben o wani taki wi musu memre en fu di wi e nyanyan, fu di wi e dringi, èn fu di wi e prati kado na tapu a srefi dei fu wan heiden fesa? Yesus no ben o lobi dati kwetikweti. A neti bifo Yesus dede, a ben taigi den disipel fu en san a ben wani. „A sma di abi den komando fu mi èn di e hori den, en na a sma di lobi mi. Èn a sma di lobi mi, a Tata fu mi sa lobi en, èn mi sa lobi en.”—Yohanes 14:21.

Yehovah Kotoigi ondrosuku den Santa Buku fu Bijbel finifini, èn disi yepi den fu frustan san na den komando fu Gado nanga Yesus. Den de klariklari fu yepi yu fu frustan den prenspari komando dati, so taki yu kan memre Yesus na a fasi fa a wani taki sma musu memre en.

[Futuwortu]

[Faki/​Prenki na tapu bladzijde 6, 7]

A de so taki Bijbel e sori taki sma no mag hori fesa èn taki den no mag prati kado?

Wi mag gi kado?

Bijbel e sori taki a bun te sma e gi kado, fu di Bijbel e kari Yehovah a sma di e gi „ibri bun presenti nanga ibri volmaakti kado” (Yakobus 1:17). Yesus ben sori taki bun papa nanga mama ben o gi presenti na den pikin fu den (Lukas 11:11-13). Den mati nanga famiriman fu Yob ben gi en kado di a ben kon betre baka (Yob 42:11). Ma sma no ben gi den kado disi tapu wan spesrutu fesadei. Den sma ben gi den kado nanga den heri ati.—2 Korentesma 9:7.

Wi mag abi famiri demakandra?

Te famiri abi demakandra, dan dati e yepi den fu tyari wánfasi kon na ini na osofamiri, funamku efu den no e libi moro na ini a srefi oso. Yesus nanga den disipel fu en ben go na wan trowfesa na ini Kana, èn a ben musu fu de so, taki furu famiri nanga mati ben de drape (Yohanes 2:1-10). Na ini Yesus en agersitori fu a manpikin di ben lasi, a papa ben hori wan bigi fesa gi a famiri fu di a manpikin fu en ben drai kon baka. Na a fesa, sma ben nyan, den ben prei poku èn den ben dansi.—Lukas 15:21-25.

Wi mag nyan switi nyanyan?

Furu tron Bijbel e taki fu den futuboi fu Gado di ben e nyan switi nyanyan makandra nanga famiri, mati, noso nanga tra futuboi fu En. Di dri engel ben go na Abraham, dan a ben sreka wan fesa, èn a ben gi den kawmeti, merki, botro, nanga lontu kuku (Genesis 18:6-8). Salomo ben kari ’nyan, dringi èn prisiri’ wan presenti fu Gado.—Preikiman 3:13; 8:15.

A de krin fu si taki Gado wani taki wi e prisiri fu bun nyanyan, makandra nanga mati èn nanga famiri, èn a feni en bun taki wi e gi kado na makandra. Wi abi furu okasi fu du dati ala ten na ini a yari.