Inaako daw Nindo an Tabang ni Jehova?

“Si Jehova an sakong paratabang; dai ako matatakot.”​—HEBREO 13:6.

1, 2. Taano ta mahalaga na akoon niato an tabang asin paggiya sa buhay na itinatao ni Jehova?

IMAHINARON na kamo nagbabaklay sa sarong dalan sa bukid. Pero dai kamo nagsosolo, huli ta nag-alok an sarong giya na ibanan kamo, asin sia an pinakamarahay na giya na makukua. Mas dakol nanggad an saiyang eksperyensia asin resistensia kisa saindo, alagad mapasensia siang naglalakaw na harani sa saindo. Naririparo nia na kamo nasisingkog paminsanminsan. Huli sa pagmalasakit nia na kamo magin ligtas sa peligro, iinaabot nia an saiyang kamot tanganing tabangan kamo sa sarong lugar na partikularmenteng peligroso. Sasayumahan daw nindo an tabang nia? Siempre dai! Kalabot digdi an saindong pagigin ligtas sa peligro.

² Bilang mga Kristiano, igwa kita nin masakit na dalan na dapat lakawan. Kaipuhan daw na maglakaw kita nin solo sa hayakpit na dalan na iyan? (Mateo 7:14) Dai, ipinapaheling kan Biblia na an pinakamarahay na Giya na makukua ta, si Jehova Dios, tinotogotan an mga tawo na maglakaw sa kaibahan nia. (Genesis 5:24; 6:9) Tinatabangan daw ni Jehova an saiyang mga lingkod mantang sinda naglalakaw? Sia nagsasabi: “Ako, si Jehova na saimong Dios, nagkakapot sa saimong toong kamot, an Saro na nagsasabi sa saimo, ‘Dai ka matakot. Ako mismo an matabang sa saimo.’” (Isaias 41:13) Siring kan giya sa satong ilustrasyon, si Jehova maboot na nagtatao nin tabang asin nag-aalok kan saiyang pakikikatood sa mga gustong maglakaw sa kaibahan nia. Sierto nanggad na mayo sa sato an masayuma sa saiyang tabang!

3. Anong mga hapot an eestudyaran niato sa pagtokar na ini?

 ³ Sa sinundan na artikulo, tinokar niato an apat na paagi na tinabangan ni Jehova an saiyang banwaan kan suanoy na mga panahon. Tinatabangan nia daw an saiyang banwaan sa kaparehong mga paagi ngonyan? Asin paano niato masisierto na inaako niato an arin man sa siring na tabang? Tokaron niato an mga hapot na iyan. Paagi kaiyan, kita magigin mas kompiado na si Jehova talaga an satong Paratabang.​—Hebreo 13:6.

Tabang Paagi sa mga Anghel

4. Taano ta puedeng magin kompiado an mga lingkod nin Dios ngonyan sa pagsuportar nin mga anghel?

⁴ Tinatabangan daw kan mga anghel an mga lingkod ni Jehova sa presenteng panahon? Iyo nanggad. Totoo, dai na sinda ngonyan nagpapaheling tanganing iligtas sa peligro an tunay na mga parasamba. Dawa kan mga panahon kan Biblia, bihira sanang mag-interbenir an mga anghel sa siring na paagi. An kadaklan kan ginibo ninda dai naheling kan mga tawo, na siring kan nangyayari ngonyan. Minsan siring, napaparigon na marhay an boot kan mga lingkod nin Dios sa pakaaram na yaon an mga anghel tanganing suportaran sinda. (2 Hade 6:14-17) May marahay man kitang dahelan na magkaigwa nin siring na saboot.

5. Paano ipinapaheling kan Biblia na kalabot an mga anghel sa paghuhulit ngonyan?

⁵ An mga anghel ni Jehova partikularmenteng interesado sa sarong espesyal na gibohon na kalabot kita. Anong gibohon iyan? Manonompongan niato an simbag sa Kapahayagan 14:6: “Naheling ko an saro pang anghel na naglalayog sa tahaw kan langit, asin igwa sia nin daing katapusan na maogmang bareta na ipapahayag bilang nakakaogmang notisya sa mga nag-eerok sa daga, asin sa lambang nasyon asin tribo asin tataramon patin banwaan.” An “daing katapusan na maogmang bareta” na ini malinaw nanggad na may koneksion sa ‘maogmang bareta kan kahadean,’ na, siring kan ihinula ni Jesus, “ihuhulit sa bilog na ineerokan na daga para sa pagpatotoo sa gabos na nasyon” bago dumatong an katapusan kan sistemang ini nin mga bagay. (Mateo 24:14) Siempre, dai direktang naghuhulit an mga anghel. Itinao ni Jesus an mahalagang sugo na ini sa mga tawo. (Mateo 28:​19, 20) Bako daw na nakakaparigon sa boot na maaraman na mantang inootob niato an sugo na iyan, tinatabangan kita kan banal na mga anghel, na madonong asin makapangyarihan na mga espiritung linalang?

6, 7. (a) Ano an nagpaparisa na sinusuportaran kan mga anghel an satong paghuhulit? (b) Paano kita makakasierto na aakoon ta an suporta kan mga anghel ni Jehova?

⁶ Igwa nin awad-awad na ebidensia kan pagsuportar nin mga anghel sa satong gibohon. Halimbawa, nadadangog niato sa parate na durante kan saindang pagmiministeryo, an mga Saksi ni Jehova may nanunuparan na sarong tawo na dai pa sana nahaloy na namibi sa Dios para sa tabang na manompongan an katotoohan. An siring na mga eksperyensia parate nanggad na nangyayari kaya dai puedeng sabihon na nagkanorongod sana. Bilang resulta kan siring na pagsuportar kan mga anghel, padakol nang padakol na tawo an nakakanood na gibohon an ibinabalangibog kan “anghel na naglalayog sa tahaw kan langit”: “Matakot kamo sa Dios asin pamurawayon sia.”​—Kapahayagan 14:7.

 ⁷ Hinihimuyawot daw nindo an suporta kan makapangyarihan na mga anghel ni Jehova? Kun siring gibohon an bilog nindong makakaya sa saindong ministeryo. (1 Corinto 15:58) Mantang bulaos niatong ginagamit an satong sadiri sa espesyal na asignasyon na ini hale ki Jehova, makakaasa kita sa tabang kan saiyang mga anghel.

Tabang Hale sa Namomoon sa mga Anghel

8. Anong halangkawon na posisyon sa langit an kapot ni Jesus, asin taano ta iyan nakakapakosog liwat sa boot niato?

⁸ Si Jehova nagtatao man sa sato nin saro pang klase nin tabang paagi sa mga anghel. Ilinaladawan kan Kapahayagan 10:1 an sarong makangingirhat na “makosog na anghel” na an “lalauogon siring sa aldaw.” An bisyonaryong anghel na ini minalataw na naglaladawan sa pinamuraway na si Jesu-Cristo sa langitnon na kapangyarihan. (Kapahayagan 1:​13, 16) Anghel daw talaga si Jesus? Sa sarong sentido, iyo, huli ta sia sarong arkanghel. (1 Tesalonica 4:16) Ano an arkanghel? An terminong iyan nangangahulogan nin “pangenot na anghel.” Si Jesus an pinakamakapangyarihan sa gabos na espiritung aki ni Jehova. Ipinasakop sa saiya ni Jehova an gabos Niang hukbo nin mga anghel. Tunay nanggad na an arkanghel na ini makapangyarihan na gikanan nin tabang. Sa anong mga paagi?

9, 10. (a) Paano si Jesus nagseserbing “paratabang” niato kun kita nagkakasala? (b) Anong tabang an makukua niato sa halimbawa ni Jesus?

⁹ An gurang nang si apostol Juan nagsurat: “Kun an siisay man makaginibo nin kasalan, igwa kita nin paratabang sa Ama, si Jesu-Cristo, sarong matanos.” (1 Juan 2:1) Taano ta isinuherir ni Juan na si Jesus an satong “paratabang” partikularmente kun kita ‘nakakagibo nin kasalan’? Bueno, nagkakasala kita aroaldaw, asin an kasalan minaresulta sa kagadanan. (Eclesiastes 7:20; Roma 6:23) Minsan siring, itinao ni Jesus an saiyang buhay bilang sarong atang para sa satong mga kasalan. Asin kataed sia kan satong maheherakon na Ama tanganing makimaherak para sato. Gabos kita nangangaipo kan siring na tabang. Paano daw niato iyan maaako? Kaipuhan na pagsolsolan niato an satong mga kasalan asin humagad nin kapatawadan basado sa atang ni Jesus. Kaipuhan man niatong likayan na otrohon an satong mga kasalan.

¹⁰ Apuera sa pagpagadan huli sa sato, si Jesus nagtao nin sangkap na halimbawa para sa sato. (1 Pedro 2:21) An saiyang halimbawa naggigiya sa sato, nagtatabang sa sato na iplano an satong mga gigibohon tanganing malikayan niato an magabat na kasalan asin mapaogma si Jehova Dios. Bako daw na kita naoogmang magkaigwa nin siring na tabang? Nanuga si Jesus sa saiyang mga parasunod na itatao an saro pang paratabang.

An Tabang kan Banal na Espiritu

11, 12. Ano an espiritu ni Jehova, gurano iyan kamakapangyarihan, asin taano ta kaipuhan niato iyan ngonyan?

¹¹ Si Jesus nanuga: “Makikimaherak ako sa Ama asin tatawan nia kamo nin saro pang paratabang tanganing makaibanan nindo sagkod lamang, an espiritu kan katotoohan, na dai naaako kan kinaban.” (Juan 14:​16, 17) An “espiritu kan katotoohan” na ini, o banal na espiritu, bakong persona kundi sarong puersa​—an aktibong puersa mismo ni Jehova. Daing sagkod an kapangyarihan kaiyan. Iyan an puersa na ginamit ni Jehova sa paglalang kan uniberso, sa paggibo nin pambihirang mga milagro, asin sa pagtao nin bisyonaryong mga kapahayagan kan saiyang kabotan. Mantang dai ginagamit ni Jehova an saiyang espiritu sa siring na espesipikong mga paagi ngonyan, nangangahulogan daw iyan na dai niato iyan kaipuhan?

¹² Dai nanggad! Sa “delikadong mga panahon [na ini] na masakit pakibagayan,” kaipuhan niato an espiritu ni Jehova orog kisa kasuarin man. (2 Timoteo 3:1) Pinapakosog kita kaiyan tanganing makatagal sa mga pagbalo. Tinatabangan kita kaiyan na makultibar an marahayon na mga kualidad na mas nagpaparani sa sato ki Jehova asin sa satong mga tugang sa espirituwal. (Galacia 5:​22, 23) Kun siring,  paano kita makikinabang sa makangangalas na tabang na ini hale ki Jehova?

13, 14. (a) Taano ta puede kitang makasierto na gikan sa boot na itinatao ni Jehova an saiyang banal na espiritu sa saiyang banwaan? (b) Paagi sa anong paghiro na tibaad ipaheling niato na dai talaga niato inaako an balaog na banal na espiritu?

¹³ Enot, kaipuhan na mamibi kita na logod tawan kita nin banal na espiritu. Sinabi ni Jesus: “Kun kamo, minsan maraot, tataong magtao nin marahay na mga regalo sa saindong mga aki, gurano pa daw an Ama sa langit na dai magtao nin banal na espiritu sa mga naghahagad sa saiya!” (Lucas 11:13) Iyo, si Jehova an pinakamarahay na Ama na puedeng maisip. Kun may pagtubod na sinserong mahagad kita saiya nin banal na espiritu, imposibleng isipon na dai nia kita tatawan kan balaog na ini. Kun siring, an hapot, Naghahagad daw kita kaiyan? May marahay na dahelan kita na humagad kaiyan sa satong pamibi sa aroaldaw.

¹⁴ Ikaduwa, inaako niato an balaog na iyan paagi sa paghiro na kaoyon kaiyan. Sa pag-ilustrar: Ipamugtak ta baga na an sarong Kristiano nakikipaglaban sa tendensia na magheling nin pornograpiya. Namibi sia na logod tabangan sia kan banal na espiritu na labanan an maating ugale na ini. Naghagad sia nin konseho sa Kristianong kamagurangan, asin sinadol ninda sia na maggibo nin desididong aksion, na likayan dawa an pagrani sa siring na nakakaparigsok na materyal. (Mateo 5:29) Paano kun iniignoro nia an saindang konseho asin nagpapadagos na magheling sa siring na materyal kun sia nasusugotan? Naghihiro daw sia kaoyon kan saiyang pamibi na logod tabangan sia kan banal na espiritu? O imbes, namemeligro daw sia na mapamondo nia an espiritu nin Dios asin mawara nia an balaog na ini? (Efeso 4:30) Tunay nanggad, kita gabos nangangaipong gibohon an enterong magigibo ta tanganing siertohon na kita padagos na nag-aako kan makangangalas na tabang na ini hale ki Jehova.

Tabang Hale sa Tataramon nin Dios

15. Paano niato ikakapaheling na dai niato ipinapasipara an Biblia?

¹⁵ An Biblia nagin gikanan nin tabang para sa maimbod na mga lingkod ni Jehova sa laog nin dakol na siglo. Pero imbes na ipasipara sana an Banal na Kasuratan, kaipuhan niatong girumdomon na iyan mapuersang gikanan nin tabang. May kalabot na paghihingoa an pag-ako kan tabang na iyan. Kaipuhan niatong gibohon na kabtang kan satong regular na rutina an pagbasa sa Biblia.

16, 17. (a) Paano ilinaladawan kan Salmo 1:​2, 3 an mga balos huli sa pagbasa kan ley nin Dios? (b) Paano naglaladawan nin kahigosan an Salmo 1:3?

¹⁶ An Salmo 1:​2, 3 nagtataram manongod sa diosnon na tawo: “An saiyang pagkaogmang marhay yaon sa ley ni Jehova, asin sa saiyang ley sia nagbabasa nin pahinghing aldaw asin banggi. Asin sia magigin nanggad siring sa kahoy na itinanom sa kataed nin mga sapa, na namumunga sa kapanahonan kaiyan asin dai naaalang an mga dahon kaiyan, asin an gabos niang ginigibo mapapakarhay.” Nasasabotan daw nindo an punto kan tekstong iyan? Pasil sanang basahon an mga tataramon na iyan asin magkonklusyon na iyan saro sanang magayon na paglaladawan nin matoninong na kamugtakan​—sarong kahoy na nagtatao nin limpoy na nabubuhay sa gilid nin sarong salog. Kanigoan karahay na magtorog nin kadikit pakapangudto sa siring na lugar! Alagad dai kita inaagda kan salmong ini na mag-isip manongod sa pagpahingalo. Laen na marhay an ilinaladawan kaiyan, saro na nagsusuherir nin kahigosan. Paano man?

¹⁷ Mangnohon na an kahoy digdi bako sanang sarong kahoy na nagtatao nin limpoy na basta na sanang nabubuhay sa kataed nin salog. Iyan kahoy na namumunga, na tuyong “itinanom” sa sarong piling lugar​—“sa kataed nin mga sapa.” Paano puedeng mabuhay an sarong kahoy sa kataed nin labi sa sarong sapa? Bueno, sa sarong tatamnan nin namumungang mga kahoy, an kagsadiri puede man na magkalot nin mga kali nin irigasyon na mataong tubig sa mga ugat kan saiyang mahalagang mga kahoy. Di, ngonyan malinaw nang marhay an punto! Kun sa espirituwal na sentido kita matubang na siring sa kahoy na iyan, iyan huli ta dakol na trabaho an ginibo para sa sato. Kita asosyado sa sarong organisasyon na naghahatod sa sato mismo nin dalisay  na tubig nin katotoohan, alagad dapat niatong gibohon an satong kabtang. Kaipuhan niatong ibugtak an satong sadiri sa sarong posisyon na makakasagom kan mahalagang marhay na tubig na ini, na naghohorophorop asin naggigibo nin pagsiyasat na kaipuhan tanganing ilaog sa satong isip asin puso an mga katotoohan kan Tataramon nin Dios. Paagi kaiyan, kita man mamumunga nin dakol.

18. Ano an kaipuhan tanganing manompongan an mga simbag kan Biblia sa satong mga hapot?

¹⁸ An Biblia dai makakatao sa sato nin pakinabang kun iyan nasa estante sana. Bako man iyan anting-anting​—na garo baga puede niatong ipirong an satong mga mata, pabayaan na bumuka an Biblia dawa saen na pahina, dangan asahan na an simbag sa satong hapot maheheling ta sa pahina na nasa atubangan ta. Kun kita napapaatubang sa paggibo nin mga desisyon, kaipuhan niatong kaloton an “kaaraman nin Dios” na siring sa nakatalbong na kayamanan. (Talinhaga 2:1-5) Sa parate kaipuhan an mahigos asin maingat na pagsiyasat tanganing manompongan an mga konseho sa Kasuratan na may labot sa satong espesipikong mga pangangaipo. Igwa kita nin dakol na publikasyon na basado sa Biblia na matabang sa sato sa satong pagsiyasat. Mientras na ginagamit niato an mga ini sa galagang pagkalot sa mga mutya nin kadonongan sa Tataramon nin Dios, kita nakikinabang talaga sa tabang ni Jehova.

Tabang Paagi sa mga Kapagtubod

19. (a) Taano ta masasabing tabang na itinao paagi sa mga kapagtubod An Torrengbantayan asin Awake!? (b) Paano kamo natabangan nin sarong partikular na artikulo sa saro kan satong mga magasin?

¹⁹ An mga lingkod na tawo ni Jehova sarong gikanan nin tabang para sa lambang saro poon pa kaidto. Nagbago daw si Jehova? Dai nanggad. Daing duwa-duwa na balang saro sato makakaisip nin mga pangyayari na inako niato an mismong tabang na kaipuhan niato sa tamang panahon hale sa satong mga kapagtubod. Halimbawa, may nagigirumdoman daw kamong artikulo sa An Torrengbantayan o Awake! na nakaranga sa saindo kan iyan kaipuhan nindo o nakatabang sa saindo na resolberan an sarong problema o atubangon an angat sa saindong pagtubod? Ipinaabot ni Jehova sa saindo an tabang na iyan paagi sa “maimbod asin mapagmansay na oripon” na inasignaran na magtao nin “kakanon sa tamang panahon.”​—Mateo 24:45-47.

20. Sa anong mga paagi nagigin “balaog na mga lalaki” an Kristianong mga magurang sa kongregasyon?

²⁰ Pero, sa parate an tabang na inaako niato hale sa mga kapagtubod mas direkta. An sarong Kristianong magurang sa kongregasyon nagtatao nin pahayag na nakakapahiro sa satong puso, o sia nagsosongko sa pagpastor na nakakatabang sa sato na matagalan an sarong kadepisilan, o nagtatao sia sa sato nin maboot na konseho na nakakatabang na maheling asin mapangganahan niato an sarong kaluyahan. Nagsurat an sarong mapagpasalamat na Kristiana mapadapit sa tabang na itinao sa saiya nin sarong magurang sa kongregasyon: “Sa paglilingkod sa langtad, nagtao sia nin panahon na enkaminaron akong sabihon an nasa isip ko. Kan mismong banggi bago kaidto, namibi ako ki Jehova, na  hinahagad na may saro man logod na puede kong makaolay. Kan sunod na aldaw na idto, an tugang na lalaking ini nakipag-olay sa sako sa maheherakon na paagi. Tinabangan nia ako na maheling kun paano ako tinatabangan ni Jehova sa laog nin dakol nang taon. Nagpapasalamat ako ki Jehova sa pagsugo kan magurang na ini sa sako.” Sa gabos na paaging iyan, ipinapaheling kan Kristianong mga magurang sa kongregasyon na sinda “balaog na mga lalaki,” na itinao ni Jehova paagi ki Jesu-Cristo tanganing tabangan kita na magdanay sa dalan pasiring sa buhay.​—Efeso 4:8.

21, 22. (a) Ano an ibinubunga kun iinaaplikar kan mga nasa kongregasyon an konseho na manonompongan sa Filipos 2:4? (b) Taano ta mahalaga dawa an saradit na akto nin kabootan?

²¹ Apuera sa mga magurang sa kongregasyon, gustong iaplikar kan balang maimbod na Kristiano an ipinasabong na pagboot na magin “[mapagrisa], bakong sa personal na interes sa sadiri sana [niang] mga bagay-bagay, kundi siring man sa personal na interes sa mga bagay-bagay kan iba.” (Filipos 2:4) Kun iinaaplikar kan mga nasa Kristianong kongregasyon an konsehong iyan, magayon na mga akto nin kabootan an ibinubunga. Halimbawa, sarong pamilya an nag-agi nin bigla asin balakid na trahedya. Iiniba kan ama an saiyang sadang na aking babae sa tindahan. Kan papuli na, naaksidente an saindang auto. Nagadan an aking babae; an ama, naerido nin grabe. Kan sia makaluwas sa ospital, grabe an pagkabaldado nia kaya dai nia kayang asikasohon an saiyang sadiri. Purisaw na marhay sa emosyon an saiyang agom na babae sa pag-ataman sa saiya na nagsosolo. Kaya an sarong mag-agom sa kongregasyon pinaistar sa saindang harong an nagmomondong mag-agom na ini asin inataman sinda sa laog nin nagkapirang semana.

²² Siempre, bakong gabos na akto nin kabootan may kalabot na siring na trahedya asin personal na pagsakripisyo. An nagkapirang tabang na inaako niato sadit sana nanggad. Alagad gurano man kasadit kan kabootan, inaapresyar niato iyan, bako daw? May nagigirumdoman daw kamong mga panahon na an maboot na tataramon o mapaggirumdom na akto nin sarong tugang na lalaki o babae nagtao sa saindo kan mismong tabang na kaipuhan nindo? Sa parate sa arog kaiyan na mga paagi an pagmakolog sato ni Jehova.​—Talinhaga 17:17; 18:24.

23. Paano minamansay ni Jehova an satong paghihingoang magtarabangan?

²³ Gusto daw nindong gamiton kamo ni Jehova bilang instrumento sa pagtabang sa iba? Bukas an pribilehiong iyan sa saindo. Sa katunayan, inaapresyar ni Jehova an siring na paghihingoa nindo. An saiyang Tataramon nagsasabi: “An nagpapaheling nin pabor sa hamak nagpapautang ki Jehova, asin an saiyang pagtratar Saiyang babayadan sa saiya.” (Talinhaga 19:17) Dakulang kagayagayahan an ibinubunga kan pagtao niato kan satong panahon asin kosog para sa satong mga tugang na lalaki asin babae. (Gibo 20:35) An mga tuyong isinusuhay an saindang sadiri dai nakakaeksperyensia kan kagayagayahan nin pagtao nin siring na tabang ni kan pamparigon sa boot sa pag-ako kaiyan. (Talinhaga 18:1) Huli kaini, magin maimbod kita sa pagtorotiripon sa Kristianong mga pagtiripon tanganing maparigon niato an boot kan lambang saro.​—Hebreo 10:​24, 25.

24. Taano ta dai kita maninigong magsaboot na kita inurihan huli ta dai niato naheheling an pambihirang mga milagro ni Jehova kan suanoy?

²⁴ Bako daw na kawiliwiling horophoropon an mga paagi nin pagtabang ni Jehova sa sato? Minsan ngani dai kita nabubuhay sa panahon na si Jehova naggigibo nin pambihirang mga milagro tanganing otobon an saiyang mga katuyohan, dai kaipuhan na kita magsaboot na kita pinag-urihan. An talagang mahalaga iyo na tinatawan kita ni Jehova kan gabos na tabang na kaipuhan niato tanganing kita magdanay na maimbod. Asin kun kita iribang magtagal sa pagtubod, mabubuhay kita tanganing maheling an pinakapambihira asin pinakamamuraway na mga gibo ni Jehova sa bilog na kasaysayan! Magin desidido logod kitang akoon asin biyong aprobetsaran an mamomoton na tabang na itinatao ni Jehova tanganing masabi man niato an mga tataramon kan satong teksto para sa taon 2005: “An tabang sa sako gikan ki Jehova.”​—Salmo 121:2.

Ano sa Paghona Nindo?

Paano itinatao ni Jehova an tabang na kaipuhan niato ngonyan​—

• paagi sa mga anghel?

• paagi sa saiyang banal na espiritu?

• paagi sa saiyang ipinasabong na Tataramon?

• paagi sa mga kapagtubod?

[Mga Hapot Para sa Pag-adal]

[Ritrato sa pahina 18]

Nakakaparigon sa boot na maaraman na sinusuportaran kan mga anghel an paghuhulit

[Ritrato sa pahina 21]

Puedeng gamiton ni Jehova an saro sa satong mga kapagtubod tanganing itao sa sato an karangahan na kaipuhan niato