Bushe Mulapokelela Ukwafwa kwa kwa Yehova?
Bushe Mulapokelela Ukwafwa kwa kwa Yehova?
“Yehova e kaafwa wandi; nshakatiine.”—ABAHEBERE 13:6.
1, 2. Mulandu nshi cacindamina ukuti tupokelele ukwafwa kwa kwa Yehova no butungulushi mu mikalile yesu?
ELENGANYENI ukuti mulenino lupili. Lelo tamuli mweka pantu uwa kumutungulula naipeelesha ukuya na imwe, kabili uyu wine e waishibisha ukutungulula. Alinina impili imiku iingi kabili alikosa ukumucila, lelo aleenda na imwe lwa mupepi mu kutekanya. Alemona ukuti muleipununa mu nshita mu nshita. Ilyo mwafika pa ncende imo iyabipisha, atambululo kuboko kwakwe pa kuti amwafwe epali mwaicena. Bushe kuti mwakaana? Awe iyo! Cibimbilemo umweo wenu.
2 Fwe Bena Kristu na ifwe twalikwata inshila twendamo iyayafya. Bushe tufwile ukwenda muli uyu musebo wafyenenkana fweka fye? (Mateo 7:14) Iyo, Baibolo ilango kuti Uwa kututungulula uwaishibisha ukucila bonse, Yehova Lesa, alasuminisha abantunse ukwenda nankwe. (Ukutendeka 5:24; 6:9) Bushe Yehova alafwa ababomfi bakwe ilyo baleenda? Atila: “Ine, ne Yehova Lesa obe, nkekato kwa kulyo kobe, nkatila kuli iwe, Witiina, ine nakulakwafwa.” (Esaya 41:13) Yehova mu cikuuku alatambulula ukuboko kwakwe ukwa kwafwa na bucibusa bwakwe ku bafwaya ukwenda nankwe kwati fye ni ulya uwa kutungulula tulandilepo mu cilangililo. Cine cine tapali nangu umo pali ifwe uwingakaana ukwafwa kwakwe!
3. Mepusho nshi twalalanshanyapo mwi sambililo lya lelo?
3 Mu cipande cifumineko, twalandile pa nshila shine umo Yehova aleyafwila abantu bakwe ku kale. Bushe alafwa abantu bakwe mu nshila shimo shine na lelo? Kabili kuti twashininkisha shani ukuti tulepokelela ukwafwa kwakwe konse? Natulande pali ayo mepusho. Ukucite fyo, kwalatulenga ukucetekela nga nshi ukuti Yehova cine cine e Kaafwa wesu.—AbaHebere 13:6.
Ukwafwa kwa Bamalaika
4. Mulandu nshi ababomfi ba kwa Lesa pali lelo bengashininkishisha ukuti balafwiwa na bamalaika?
4 Bushe bamalaika balafwa ababomfi ba kwa Yehova aba pali lelo? Ee, balafwa. Ca cine, pali lelo tabesa no kumonekela kuli bakapepa ba cine pa kuti babatuule ku busanso. Nangu fye ni mu nshita sha Baibolo, limo limo fye bamalaika balecita ifya musango yo. Ifingi ifyo balecita tafyalemoneka ku menso ya buntunse, nge fyo caba pali lelo. Lelo, ababomfi ba kwa Lesa abaishibe ukuti bamalaika e ko baali ku kubafwa balesansamushiwa nga nshi. (2 Ishamfumu 6:14-17) E fyo cifwile ukuba na kuli ifwe.
5. Baibolo ilanga shani ukuti bamalaika na bo balabombako umulimo wa kushimikila uwa pali lelo?
5 Bamalaika ba kwa Yehova ukucilisha balipoosa sana amano ku mulimo tubombako. Mulimo nshi uyo? Twalasanga ubwasuko pa Ukusokolola 14:6 apatila: “Namwene malaika umbi alepupuka mu kati ka muulu, kabili akwete imbila nsuma ya muyayaya iya kubila ku baikala pe sonde, na ku luko lonse no mutundu no lulimi na bantu.” “Imbila nsuma ya muyayaya” yalyampana bwino bwino ne ‘mbila nsuma ya bufumu,’ iifwile ‘ukushimikilwa pano isonde ponse ku kubo bunte ku nko shonse’ ilyo impela ya buno bwikashi tailaisa nga fintu Yesu asobele. (Mateo 24:14) Kwena, bamalaika tabaya ku kushimikila mu kulungatika. Yesu apeele abantunse uyu mulimo wacindamisha. (Mateo 28:19, 20) Mwandini tulakoseleshiwa nga nshi ukwishibo kuti ilyo tulebomba umulimo twapeelwa, tulafwiwa na bamalaika ba mushilo, aba mano kabili aba maka!
6, 7. (a) Cinshi cilango kuti bamalaika balatungilila umulimo wa kushimikila? (b) Cinshi tufwile ukucita pa kuti bamalaika ba kwa Yehova batwafwe?
6 Kwaliba ubushininkisho ubwingi ubwa kuti bamalaika balatungilila umulimo wesu. Ku ca kumwenako, ilingi tulomfwa ukuti ilyo Inte sha kwa Yehova baleshimikila, basangile umuntu uwalepepa kuli Lesa pali ilya ine nshita ukuti amwafwe ukusange cine. Ifya musango yo filacitika ilingi line ica kuti teti tusose atuti fya mankumanya fye. Pa mulandu wa uku kwafwa kwa bamalaika, abantu abengi nga nshi balesambilila ukucita ifyo ‘malaika uulepupuka mu kati ka muulu’ alebila, ati: “Tiineni Lesa no kumucindika.”—Ukusokolola 14:7.
7 Bushe mulafwaisha ukuti bamalaika ba maka aba kwa Yehova balemwafwa? Lyene bombesheni mu mulimo wenu uwa kushimikila. (1 Abena Korinti 15:58) Ilyo tuleipeelesha muli uyu mulimo waibela uwafuma kuli Yehova, kuti twacetekela ukuti bamalaika bakatwafwa.
Ukwafwa Ukufuma ku Mukalamba wa Bamalaika
8. Cifulo nshi icasumbuka ica kwa Yesu ico akwata ku muulu, kabili mulandu nshi ukwishibe co kwabela ukwa kusansamusha kuli ifwe?
8 Yehova kabili alatwafwa ukupitila muli malaika umbi. Ukusokolola 10:1 kulondolola ‘malaika wakosa’ uwa kutiinya uo “icinso cakwe cali nga kasuba.” Uyu malaika wa mu cimonwa afwile emininako Yesu Kristu uwacindamikwa nge mfumu mu muulu. (Ukusokolola 1:13, 16) Bushe Yesu cine cine ni malaika? Kuti twatila ee, pantu Yesu e malaika mukalamba. (1 Abena Tesalonika 4:16) Yesu e wakwatisha amaka pali bamalaika bonse aba kwa Yehova. Yehova alimupeela bumushika pa milalo Yakwe yonse. Apo ni malaika mukalamba, kanshi aba ni ntulo ya kwafwa nga nshi. Mu nshila nshi?
9, 10. (a) Yesu aba shani “kaafwa” wesu ilyo twabembuka? (b) Kwafwa nshi ica kumwenako ca kwa Yesu citupeela?
9 Umutumwa umukoloci Yohane alembele ati: “Ngo muntu acita ulubembu, natukwata kaafwa kuli Shifwe, Yesu Kristu umulungami.” (1 Yohane 2:1) Mulandu nshi Yohane asosele ukuti Yesu ni “kaafwa” wesu ukucilisha ilyo ‘twacita ulubembu’? Ni co tulabembuka cila bushiku, kabili ulubembu lutwala ku mfwa. (Lukala Milandu 7:20; Abena Roma 6:23) Lelo, Yesu apeele umweo wakwe ku kube lambo pa membu shesu. Kabili aba mupepi na Shifwe wa nkumbu ku kutupaapaatilako. Ifwe bonse umo umo tulakabila ukwafwa kwa musango yo. Kuti twakupokelela shani? Tulekabila ukulapila ku membu shesu no kulombo kwelelwa ukupitila mwi lambo lya kwa Yesu. Na kabili tulekabila ukusengauka ukubwekeshapo imembu shesu.
10 Ukulunda pa kutufwila, Yesu alitwimikiile ne ca kumwenako capwililika. (1 Petro 2:21) Ica kumwenako cakwe cilatutungulula, cilatwafwa ukwishiba umwa kuya pa kuti tutaluke ku membu shabipisha no kutemuna Yehova Lesa. Bushe tatuletasha pali uku kwafwa? Yesu alaile abakonshi bakwe ukuti bali no kutuminwa ukwafwa na kumbi.
Ukwafwa kwa Mupashi wa Mushilo
11, 12. Umupashi wa kwa Yehova cinshi, amaka ya uko yakula shani, kabili mulandu nshi ukabililwa pali lelo?
11 Yesu alaile ukuti: “Nkalomba Tata na o akamupeela kaafwa na umbi uwa kuba na imwe pe na pe, umupashi wa cine, uo aba pano calo te kuti bapokelele.” (Yohane 14:16, 17) Uyu “mupashi wa cine,” atemwa umupashi wa mushilo, te muntu iyo lelo maka—amaka ayo Yehova abomfya. Maka ayashingalinganishiwako. E yo Yehova abomfeshe pa kulenga ukubumbwa konse, pa kucita ifipesha amano fya lulumbi, na pa kusokolola ukufwaya kwakwe ukupitila mu fimonwa. Apo Yehova tabomfya umupashi wakwe muli isho nshila sha kulungatika pali lelo, bushe cilepilibulo kuti taukabilwa?
12 Awe iyo! Muli shino “nshita shaibela ishayafya,” e mo tukabila sana umupashi wa kwa Yehova. (2 Timote 3:1) Ulatukosha ukushipikisha ifya kwesha. Ulatwafwa ukulundulula imibele ishaiwamina iitupalamika kuli Yehova na kuli bamunyinefwe ba ku mupashi ne nkashi. (Abena Galatia 5:22, 23) Nga kanshi kuti twanonkelamo shani muli uku kwafwa kwa kwa Yehova ukwa cipesha amano?
13, 14. (a) Mulandu nshi twingashininkishisha ukuti Yehova mu kuitemenwa alapeela abantu bakwe umupashi wa mushilo? (b) Ni ncitilo sha musango nshi ishingalanga ukuti tatulepokelela ica bupe ca mupashi wa mushilo?
13 Intanshi, tufwile ukupepela umupashi wa mushilo. Yesu atile: “Nga imwe nangu muli babifi, mwaishiba ukupeela abana benu ifya bupe ifisuma, kanshi Shinwe wa mu muulu wena akacishamo ukupeela umupashi wa mushilo ku balemulomba!” (Luka 11:13) Cine cine, pa bafyashi bonse, Yehova e mufyashi wawamisha. Nga ca kutila mu kufumaluka twamulomba umupashi wa mushilo, nangu cibe shani te kuti atutane ici ca bupe. Nomba ubwipusho bwa kuti, Bushe tulamulomba? Tulingile ukulalombe co mu mapepo yesu cila bushiku.
14 Icalenga bubili, tupokelela ico ca bupe ukupitila mu kucita ifileumfwana na wene. Natulangilile: Tutile umutima wa Mwina Kristu umo walemenena ku kutambe fye shiku. Alipepela umupashi wa mushilo ukuti umwafwe ukukaana ici cimusango cishaibipila. Alyebako na baeluda ba Bwina Kristu ubu bwafya, kabili balimupanda amano ya kuti afwile ukucitapo cimo no mutima wakwe onse, e kutila ukukanapalama fye na kuli fyo fintu fyalubana. (Mateo 5:29) Nomba tutile asuula ukufunda kwabo no kutwalilila ukutambe fye shiku. Bushe ninshi alebomba mu kumfwana ne pepo ilya kuti umupashi wa mushilo umwafwe? Nelyo bushe ali mu busanso bwa kulengo mupashi wa kwa Lesa ubulanda icingalenga afilwa ukupokelela ici ca bupe? (Abena Efese 4:30) Cine cine, ifwe bonse tufwile ukubombesha pa kuti tutwalilile ukupokelela uku kwafwa kushaiwamina ukufuma kuli Yehova.
Ukwafwa Ukufuma mu Cebo ca kwa Lesa
15. Kuti twalanga shani ukuti tatumona Baibolo kwati libuuku fye ilya cabe cabe?
15 Baibolo yaliba ni ntulo ya kwafwa ku babomfi ba busumino aba kwa Yehova pa myaka iingi. Ukucila ukumona Baibolo kwati libuuku fye ilya cabe cabe, tufwile ukulaibukisha ukuti yaba ni ntulo ya kwafwa kwa maka nga nshi. Ukupokelela uko kwafwa kukabila ukubombesha. Tulekabila ukubelenga Baibolo lyonse.
16, 17. (a) Amalumbo 1:2, 3 yalondolola shani ifilambu fya kubelengela mu malango ya kwa Lesa? (b) Amalumbo 1:3 yalanga shani ukuti tufwile ukubombesha?
16Amalumbo 1:2, 3 yalanda pa muntu wa bukapepa ayati: “Mu malango ya kwa Yehova e mwabo kubekwa kwakwe, ne fili mu malango yakwe afitontonkanya akasuba no bushiku. Aba ngo muti uwalimbwa pa tumilonga twa menshi, uutwale fisabo fya uko mu nshita ya fiko, kabili amabuula ya uko tayalokota; conse ico acita cikalengwo kushuka.” Bushe namwishiba icishinka cikalamba icaba muli fi fikomo? Calyanguka ukubelenga ayo mashiwi no kutontonkanyo kuti yalanda pa ncende iilemoneka bwino, e kutila umuti watemfuma uwabela mupepi no mumana. Mwandini kuti cawama akasuba kamo ukulambalala mwi samba lya uyo muti! Lelo ili lumbo talilanda pa kutuusha. Lilanda pa cintu fye cimbi, icifwaya ukubombesha. Mu nshila nshi?
17 Moneni ukuti uyu muti te muti fye watemfuma uwaimenena fye mupepi no mumana. Muti uutwale fisabo, “uwalimbwa” mu ncende iisuma, e kutila “pa tumilonga twa menshi.” Bushe umuti umo kuti wamenena shani pa tumilonga utwingi? Cisuma, mwi bala lya fisabo, umwine we bala napamo kuti aimba utuminyangala utwa kuleta amenshi ku miti yakwe iyo alimba. Eya, nomba icishinka caumfwika! Nga ca kuti lwa ku mupashi tuli nga ulya muti watemfuma, ni pa mulandu wa kubombesha kwa bantu bamo ku kutwafwa. Twaba mu kuteyanya ukuleta amenshi yasanguluka aya cine kuli ifwe, lelo na ifwe tufwile ukucitapo fimo. Tufwile ukucita kwati muti uulekula aya menshi yacindamisha ukupitila mu kwetetula no kusapika ifyebo filekabilwa pa kuti tumfwikishe icine ca mu Cebo ca kwa Lesa no kuleka cifike pa mutima wesu. Nga twacite fyo, mukwai na ifwe tukatwale fisabo fisuma.
18. Pa kusanga amasuko muli Baibolo ku mepusho yesu, cinshi tufwile ukucita?
18 Tatwakanonkelemo muli Baibolo nga ca kutila tatuleibelenga. Kabili Baibolo taicita ifipesha amano—te kuti tushibate fye, no kulolela Baibolo iine ukuikupukula, e lyo twasanga no bwasuko tulefwaya pali ilyo ibula. Ilyo kwaba ifya kupingulapo, tufwile ukwimba kwati tulesokota ifyuma fyashikama e lyo tukasanga “ukwishiba Lesa.” (Amapinda 2:1-5) Ukusapika sana kabili mu kusakamanishisha ilingi kulakabilwa pa kuti tusange ukufunda kwa mu Malembo ukulelanda pa fyo tulekabila. Twalikwata impapulo shashimpwa pali Baibolo ishingi isha kutwafwa mu kusapika kwesu. Ilyo tulebomfya ishi mpapulo ku kusapika amano yaba mu Cebo ca kwa Lesa, ninshi tulenonkelamo mu kwafwa kwa kwa Yehova.
Ukwafwa Ukupitila mu Basumina Banensu
19. (a) Mulandu nshi uwa kumwena ifipande fya mu Ulupungu lwa kwa Kalinda na Loleni! ngo kwafwa ukupitila mu basumina banensu? (b) Ifipande fimo ifya muli bamagazini besu fyamwafwa shani?
19 Ukutula fye kale, ababomfi ba kwa Yehova abantunse lyonse balafwana. Bushe Yehova alyaluka? Awe iyo. Ukwabula no kutwishika ifwe bonse umo umo kuti twaibukisha ilyo abasumina banensu batwafwile pa nshita ilya ine fye twalefwaya ukwafwiwa. Ku ca kumwenako, bushe kuti mwaibukisha icipande ca mu Ulupungu lwa kwa Kalinda nelyo Loleni! icamusansamwishe ilyo mwacibelengele atemwa icamwafwile ukupwisha ubwafya nelyo ukucimfya ubwesho ubwaleesha icitetekelo cenu? Yehova e wamwafwile ukupitila mu “musha wa cishinka kabili uwashilimuka” uwapeelwa umulimo wa kupekanya ‘ifya kulya pa nshita yalinga.’—Mateo 24:45-47.
20. Ni mu nshila nshi baeluda ba Bwina Kristu babela “ifya bupe mu bantu”?
20 Lelo, ilingi line ukwafwa tupokelela ukufuma ku basumina banensu kuba ukwa kulungatika. Napamo eluda wa Bwina Kristu kuti alande lyashi ilyatufika sana pa mutima, nelyo kuti atutandalila pa cipempu ca bucemi no kutwafwa ukupwisha ubwafya bwesu, nelyo kuti atupeela ukufunda kwa cikuuku ukwatwafwa ukumona ubunake tukwete no kubombelapo. Umwina Kristu umo uutasha alembele ukukuma ku kwafwa apokelele ukufuma kuli eluda ati: “Ilyo twali mu mulimo wa mwi bala, alintekanishishe pa kuti fye nande ifyo nalefwaya ukulanda. Ubushiku bwafumineko, nalipepele kuli Yehova, ukumulomba ukutumo muntu uo ningalanda nankwe. Ubwakonkelepo, uyu munyinane alandile na ine cikuuku cikuuku. Anjebele ukumona ifyo Yehova angafwile pa myaka iingi. Ndetasha Yehova pa kutumo uyu eluda kuli ine.” Muli shi nshila shonse, baeluda ba Bwina Kristu balalango kuti baba “fya bupe mu bantu,” ukufuma kuli Yehova ukupitila muli Yesu Kristu ku kutwafwa ukushipikisha ilyo tuli pa nshila ya ku bumi.—Abena Efese 4:8.
21, 22. (a) Ciba shani ilyo aba mu cilonganino bakonka ukufunda kwa pa Abena Filipi 2:4? (b) Mulandu nshi nangu fye kwafwa ukunono kwabela ukwacindama?
21 Ukulunda pali baeluda, Umwina Kristu wa busumino umo umo afwile ukukonka ukufunda kwapuutwamo ukwa ‘kukanaba uwangwa fye ifyakwe umwine eka, lelo uwangwa ne fya bambi.’ (Abena Filipi 2:4) Ilyo ababa mu cilonganino ca Bwina Kristu bakonka uko kufunda, kulaba ukucitilana ifintu fya cikuuku ifingi nga nshi. Ku ca kumwenako, ulupwa lumo mu kupumikisha lwaponenwe na kayofi kabipisha. Wishi aile no mwana wakwe umwanakashi ku mashitolo. Pa kubwelela ku ng’anda, basangilwe mu busanso bwa pa musebo. Umwana afwilile palya pene; e lyo wishi ena alicenenwe icabipisha. Ilyo afumine mu cipatala, pa kubala takwete amaka ica kuti alefilwa ukuicitila ifili fyonse. Umukashi wakwe na o amano yalifulungene pa mulandu no mulimo ubukulu uwa kusakamano mulume wakwe eka. E co ulupwa lumo ulwa mu cilonganino lwasendele aba baupana abali mu bulanda ku ng’anda ku mwabo no kwikala na bo pa milungu iingi.
22 Kwena, te kutila aba cikuuku ni balya fye abasakamana abali mu kayofi kabipisha. Ukwafwa kumo tupokelela kuba ukunono. Lelo te mulandu ukwafwa twapokelela kuli ukunono, tulatasha, bushe te ifyo? Bushe mulebukisha amashiwi yasuma aba bwananyina balandile kuli imwe nelyo ifintu fisuma bamucitile pa nshita mwalefikabila? Ilingi line Yehova alatusakamana mu nshila sha musango yo.—Amapinda 17:17; 18:24.
23. Yehova amona shani ilyo tuleibikilishako ku kwafwana?
23 Bushe kuti mwatemwa Yehova ukumubomfya ku kwafwa bambi? Kale kale mwalikwata ili shuko. Na kuba, Yehova alatasha nga nshi ukubombesha kwenu ukwa musango yo. Icebo cakwe citila: “Uukumbusuko mulanda aashima Yehova, e ukabwesesha kuli wene ica kutetesa cakwe.” (Amapinda 19:17) Mulaba ukusekelela kukalamba mu kwafwa bamunyinefwe ne nkashi. (Imilimo 20:35) Lelo abaitalusha kuli bambi tabapokelela insansa shaba mu kupeela nangu ukukoseleshiwa kufuma mu kwafwa kwa bamunyinefwe. (Amapinda 18:1) E ico, lyonse natulesangwa ku kulongana kwa Bwina Kristu pa kuti tulekoseleshanya.—AbaHebere 10:24, 25.
24. Mulandu nshi tushilingile ukumwena kwati tulepusulwa pantu tatwamonapo ifipesha mano fya lulumbi ifya kwa kwa Yehova ifyo acitile ku numa?
24 Mwandini ca nsansa ukutontonkanya pa nshila Yehova atwafwilamo! Nangu ca kuti inshita twikalamo Yehova tacita ifipesha mano fya lulumbi pa kufikilisha ukufwaya kwakwe, tatufwile ukumona kwati tulepusulwa. Icacindama ca kuti Yehova alatupeela ukwafwa konse uko tukabila pa kuti tube aba busumino. Nga twatwalilila ukushipikisha capamo mu busumino, tukamonako uko Yehova akacite fipesha amano fya lulumbi kabili ifyakulisha icine cine! Natupampamine pa kupokelela no kumwenamo sana mu kwafwa kwa kutemwa ukwa kwa Yehova pa kuti na ifwe tukasose amashiwi ya mwi lembo lyesu ilya mwaka wa 2005 ayaleti: “Ukunjafwa kufuma kuli Yehova.”—Amalumbo 121:2.
Muletipo Shani?
Yehova apeela shani ukwafwa tukabila pali lelo
• ukupitila muli bamalaika?
• ukupitila mu mupashi wa mushilo?
• ukupitila mu Cebo cakwe icapuutwamo?
• ukupitila mu basumina banensu?
[Amepusho]
[Icikope pe bula 18]
Cilomfwika bwino sana ukwishiba ukuti bamalaika balatungilila umulimo wa kushimikila
[Icikope pe bula 21]
Yehova kuti abomfya uwasumina munensu ku kutupeela icisansamushi tulekabila