Keti Nge Kendimaka Lusadisu ya Yehowa?
Keti Nge Kendimaka Lusadisu ya Yehowa?
“Mfumu Nzambi muntu ke sadisaka mono, yo yina mono ta wa boma ve.”—BAEBREO 13:6.
1, 2. Sambu na nki yo kele mfunu nde beto ndima lusadisu mpi lutwadisu ya Yehowa na luzingu na beto?
YINDULA nde nge ke na kumata na ngumba mosi. Kansi, nge kele ve nge mosi, sambu ntwadisi mosi kundimaka na kukwenda ti nge, mpi yandi kele ntwadisi ya kuluta mbote. Yandi kele ti eksperiansi mpi ngolo mingi kuluta nge, kansi na kukanga ntima yonso yandi ketambula penepene na nge. Yandi kemona nde nge kebula mabaku bantangu yankaka. Sambu yandi kekudibanza-banza sambu na lutaninu na nge, yandi metandula diboko na yandi sambu na kusadisa nge na kisika mosi ya kigonsa mingi. Keti nge tabuya lusadisu na yandi? Ata fyoti ve! Sambu nge kele na kigonsa.
2 Beto Bakristu, beto ketambulaka na nzila mosi ya mpasi. Keti beto fwete tambula na nzila yina ya mpasi beto mosi? (Matayo 7:14) Ve, sambu Biblia kemonisa nde Yehowa Nzambi, Ntwadisi ya kuluta mbote, kepesaka bantu nzila ya kutambula ti yandi. (Kuyantika 5:24; 6:9) Keti Yehowa kesadisaka bansadi na yandi na ntangu bo ketambulaka? Yandi ketuba nde: “Mono Mfumu Nzambi, mono kele Nzambi na nge; mono muntu ke pesa nge ngolo, mono muntu ke tubila nge nde: ‘Kuwa boma ve, mono ke sadisa nge!’” (Yezaya 41:13) Bonso ntwadisi ya beto tubilaka na luyantiku na mbandu na beto, Yehowa kepesaka lusadisu mpi kinduku na yandi na mawete yonso na bantu yina kesosaka kutambula ti yandi. Ya kyeleka, ata muntu mosi ve na kati na beto lenda buya lusadisu na yandi!
3. Inki bangyufula beto tatadila na disolo yai?
3 Na disolo yina kulutaka, beto tubilaka mitindu iya yina Yehowa kusadisaka bansadi na yandi na ntangu ya ntama. Keti yandi kesadisaka bansadi na yandi na mitindu mosi bubu yai? Inki mutindu beto lenda zikisa kana beto kendimaka lusadisu ya mutindu yina? Bika beto tadila bangyufula yai. Kana beto sala yo, yo lenda sadisa beto na kutula dyaka ntima mingi kuluta nde Yehowa kele mpenza Nsadisi na beto.—Baebreo 13:6.
Lusadisu ya Bawanzyo
4. Sambu na nki bansadi ya Nzambi ya bubu yai lenda tula ntima nde bawanzyo kesadisaka bo?
4 Keti bawanzyo kesadisaka bansadi ya Yehowa ya bubu yai? Ee. Ya kyeleka, bubu yai bo kemonanaka ve na meso ya bantu sambu na kugulusa bansambidi ya kyeleka na kigonsa. Ata na ntangu ya ntama, bawanzyo vandaka kumonana ve mbala mingi. Mambu mingi ya bo vandaka kusala vandaka kumonana ve na meso ya bantu, yo kesalamaka mpi kiteso mosi bubu yai. Ata mpidina, bansadi ya Nzambi kubakaka kikesa mingi ntangu bo bakisaka nde bawanzyo vandaka kusadisa bo. (2 Bantotila 6:14-17) Beto mpi kele ti bikuma ya mbote ya kudiwa mutindu mosi.
5. Inki mutindu Biblia kemonisa nde bawanzyo mpi kesalaka kisalu ya kusamuna bubu yai?
5 Bawanzyo ya Yehowa ketulaka dikebi ntetentete na kisalu mosi ya nene ya beto mpi ke na kusala. Inki kisalu yango? Beto lenda zwa mvutu na Kusonga 14:6: “Mono monaka wanzio ya nkaka ke kwenda kuluta na kati-kati ya zulu; yandi vandaka na Nsangu ya Mbote ya mvula na mvula sambu na kuzabisa na bantu ya nsi-ntoto, na bantu ya makanda yonso ti ya bandinga yonso ti ya bansi yonso.” ‘Nsangu ya mbote yai ya mvula na mvula’ kele na kuwakana ya ngolo ti ‘nsangu ya mbote ya Kimfumu,’ yina, mutindu Yezu kutubaka, bantu ‘talongaka yo na nsi-ntoto ya mvimba, na mpila nde bantu ya makanda yonso kuwa yo’ na ntwala nde nsuka ya ngidika yai ya bima kukwisa. (Matayo 24:14) Ya kyeleka, bawanzyo kelongaka ve kimuntu-kimuntu. Yezu kupesaka kisalu yai ya nene na bantu. (Matayo 28:19, 20) Yo kepesa mpenza kikesa na kuzaba nde na ntangu beto kesalaka kisalu yina, bawanzyo ya santu, yina kele bigangwa ya kimpeve ya mayele mpi ya ngolo, kesadisaka beto.
6, 7. (a) Inki kemonisa nde bawanzyo kesadisaka beto na kisalu na beto ya kusamuna? (b) Inki beto lenda sala sambu na kubaka lusadisu ya bawanzyo ya Yehowa?
6 Beto kele ti banzikisa mingi ya kemonisa nde bawanzyo kesadisaka beto na kisalu na beto. Mu mbandu, mbala mingi beto kewaka nde ntangu bo vandaka na kisalu ya kusamuna, Bambangi ya Yehowa kukutanaka ti muntu mosi yina katukaka kusamba ntama mingi ve sambu Nzambi kusadisa yandi na kuzwa kyeleka. Baeksperiansi ya mutindu yai kesalamaka mbala mingi kibeni. Yo yina, beto lenda mona yo ve bonso mambu ya kesalamaka kaka na kintulumukina. Lusadisu ya mutindu yai ya bawanzyo mesalaka nde bantu mingi kulonguka na kusala mambu yina ‘wanzyo ya vandaka kuluta na kati-kati ya zulu’ kutubaka: “Beno wa Nzambi boma, beno pesa yandi lukumu!”—Kusonga 14:7.
7 Keti nge ke na mpusa nde bawanzyo ya ngolo ya Yehowa kusadisa nge? Kana mpidina, sala ngolo na kudipesa na kisalu na nge. (1 Korinto 15:58) Kana beto kudipesa na luzolo yonso na kisalu yai ya mfunu ya Yehowa mepesaka beto, beto lenda tula ntima na lusadisu ya bawanzyo na yandi.
Lusadisu Yina Kekatukaka na Mfumu ya Bawanzyo
8. Inki kiyeka ya nene Yezu kele na yo na zulu, mpi sambu na nki dyambu yai kepesa beto kikesa?
8 Yehowa kepesaka beto mpi lusadisu ya bawanzyo na mutindu yankaka. Kusonga 10:1 ketubila ‘wanzyo mosi ya ngolo’ mpi ya kuyituka yina “ilungi na yandi vandaka kumonika bonso ntangu.” Yo fwete vanda nde wanzyo yai ya bo monaka na mbona-meso kele Yezu Kristu ya bo pesaka lukumu mpi ya keyala na zulu. (Kusonga 1:13, 16) Keti Yezu kele mpenza wanzyo? Beto lenda tuba nde ee, sambu yandi kele mfumu ya bawanzyo. (1 Tesalonika 4:16) Mfumu ya bawanzyo kele nani? Bangogo yai ketendula “wanzyo ya ntetentete.” Yezu kele mwana ya mpeve ya meluta bana yonso ya mpeve ya Yehowa na ngolo. Yehowa mepesaka yandi mukumba ya kutwadisa basoda na Yandi yonso ya bawanzyo. Mfumu yai ya bawanzyo kele nto ya ngolo ya lusadisu. Na nki mitindu?
9, 10. (a) Inki mutindu Yezu kesalaka bonso “nsadisi” na beto na ntangu beto mesala masumu? (b) Inki lusadisu beto lenda baka na mbandu ya Yezu?
9 Ntumwa Yoane yina kukumaka mununu kusonikaka nde: “Kana muntu me sala masumu, beto ke na [nsadisi mosi penepene na Tata, NW], Yesu Kristo; yandi kele muntu ya mbote na meso ya Nzambi.” (1 Yoane 2:1) Sambu na nki Yoane kutubaka nde Yezu kele “nsadisi” na beto mingimingi kana beto “me sala masumu”? Na kutuba ya mbote, beto kesalaka masumu konso kilumbu, mpi disumu kenataka na lufwa. (Longi 7:20; Roma 6:23) Kansi, Yezu kupesaka luzingu na yandi bonso kimenga sambu na masumu na beto. Mpi yandi kele na lweka ya Tata na beto ya mawa sambu na kubondila yandi sambu na mambote na beto. Konso muntu na kati beto kele na mfunu ya lusadisu ya mutindu yai. Inki mutindu beto lenda ndima yo? Beto fwete balula ntima na masumu na beto mpi kulomba ndolula na nsadisa ya kimenga ya Yezu. Beto fwete buya mpi na kuvutukila masumu na beto.
10 Katula kufwa sambu na mambote na beto, Yezu kubikilaka beto mbandu ya kukuka. (1 Piere 2:21) Mbandu na yandi ketwadisaka beto, mpi yo kesadisaka beto na kutwadisa luzingu na beto na mpila nde beto lenda buya kubwa na masumu ya nene mpi beto lenda sepedisa Yehowa Nzambi. Keti beto kele ve na kyese na kuvanda na lusadisu ya mutindu yai? Yezu kusilaka balongoki na yandi nde yandi tatindila bo nsadisi yankaka.
Lusadisu ya Mpeve Santu
11, 12. Mpeve ya Yehowa kele inki, ngolo na yo kele nki kiteso, mpi sambu na nki beto kele na mfunu na yo bubu yai?
11 Yezu kusilaka nde: “Mono ta bondila Tata sambu yandi kupesa beno [nsadisi, NW] sambu yandi ta vandaka ti beno ntangu yonso. Y[o] kele Mpeve ya kieleka yina ya bantu ya nsi-ntoto yai lenda baka ve.” (Yoane 14:16, 17) ‘Mpeve yai ya kyeleka,’ to mpeve santu, kele ve muntu kansi ngolo, disongidila ngolo ya kisalu ya Yehowa. Ngolo yango kele na ndilu ve. Yo kele ngolo yina Yehowa kusadilaka sambu na kuganga luyalanganu, kusala mambu ya kuyituka, mpi kupesa bambona-meso yina kumonisaka luzolo na yandi. Sambu Yehowa kesadilaka ve mpeve na yandi na mitindu yai ya sikisiki bubu yai, keti yo ketendula nde beto kele na mfunu na yo ve?
12 Ikele ve! Na ‘bantangu yai ya mpasi,’ beto kele na mfunu ya mpeve ya Yehowa kuluta bantangu yonso yankaka. (2 Timoteo 3:1) Yo kepesaka beto kikesa ya kunwana ti mambu ya mpasi ya beto kekutanaka na yo. Yo kesadisaka beto na kuyedisa bikalulu ya mbote yina kebendaka beto penepene ya Yehowa mpi ya bampangi na beto ya kimpeve ya babakala mpi ya bankento. (Galatia 5:22, 23) Inki mutindu beto lenda baka mambote ya lusadisu yai ya kuyituka ya kekatukaka na Yehowa?
13, 14. (a) Sambu na nki beto lenda ndima nde Yehowa kepesaka bansadi na yandi mpeve santu na yandi na luzolo yonso? (b) Na mambu ya nki mutindu beto lenda monisa nde beto kendima mpenza ve dikabu ya mpeve santu?
13 Ntetentete, beto fwete sambaka sambu na kulomba mpeve santu. Yezu kutubaka nde: “Beno bantu ya mbi, kana beno zaba kupesa makabu ya mbote na bana na beno, zaba nde Tata yina kele na zulu ta pesa mpenza Mpeve na yandi na bantu yina ke lombaka yandi Mpeve!” (Luka 11:13) Yehowa kele Tata ya kuluta mbote ya beto lenda vanda na yandi. Kana beto lomba yandi mpeve santu na lukwikilu mpi na masonga yonso, ntembe kele ve nde yandi tapesa beto dikabu yai. Kansi, beto lenda kudiyula nde: Keti beto kelombaka yandi yo? Beto fwete lomba yandi yo na bisambu na beto ya konso kilumbu.
14 Ya zole, beto kendimaka dikabu yina na mutindu beto kesalaka mambu yina kewakanaka na yo. Beto baka mbandu mosi: Yindula nde Mukristu mosi kenwana ti kikalulu ya mbi ya kutala bafilme to kutanga mikanda yina kesongaka bantu kinkonga. Yandi kesambaka sambu na kulomba mpeve santu sambu yo sadisa yandi na kukatula kikalulu yai ya mvindu. Yandi melombaka bandongisila na bankuluntu, mpi bo mesadisaka yandi na kusala ngolo sambu na kuyambula kikalulu yina, na kukonda kupusana nkutu ata penepene ya bima ya mvindu ya mutindu yina. (Matayo 5:29) Inki beto lenda tuba kana yandi kelanda ve bandongisila na bo mpi kelanda na kutala bima yina ntangu mpukumuna mekwisila yandi? Keti yandi kesala mambu yina kewakana ti kisambu na yandi sambu mpeve santu kusadisa yandi? To dyaka, keti yandi kele na kigonsa ya kumonisa mpeve ya Nzambi mawa mpi ya kuvidisa dikabu yai? (Efezo 4:30) Ya kyeleka, beto yonso fwete sala ngolo sambu na kuzikisa kana beto kelandaka na kubaka lusadisu yai ya nene ya kekatukaka na Yehowa.
Lusadisu Yina Kekatukaka na Ndinga ya Nzambi
15. Inki mutindu beto lenda monisa nde beto kemonaka ve Biblia mpamba?
15 Biblia kevandaka nto ya lusadisu sambu na bansadi ya kwikama ya Yehowa banda ntama. Na kisika ya kumona Masonuku ya Santu mpamba, beto fwete vila ve nde yo kele nto ya ngolo ya lusadisu. Yo kelombaka kikesa sambu na kundima lusadisu yina. Beto fwete vanda na kikalulu ya kutanga Biblia mbala na mbala.
16, 17. (a) Inki mutindu Nkunga 1:2, 3 ketubila mambote yina kutanga nsiku ya Nzambi kenataka? (b) Inki mutindu Nkunga 1:3 kemonisa nde beto fwete sala kisalu na kikesa yonso?
16 Nkunga 1:2, 3 ketuba mutindu yai sambu na muntu yina kesepedisaka Nzambi: “Yandi ke monaka kiese na bansiku ya Mfumu Nzambi, yandi ke yindulaka yo mpimpa ti mwini. Yandi kele bonso nti yina [bo mekuna penepene na mwa-bamasa, NW]; yo ke butaka bambuma na yo konso mvula, matiti na yo mpi ke yumaka ve. Mambu yonso ya yandi ke salaka ke vandaka mbote.” Keti nge mesimba dibanza ya mfunu ya baverse yai? Yo kele ve mpasi na kutanga bangogo yai mpi kutuba nde yo kepesa kaka kifwani ya kitoko ya kisika mosi ya ke na ngemba, disongidila nti mosi ya kepesa madidi mpi ya keyela na lweka ya masa. Yo tavanda kyese mingi kibeni na kupema na kisika ya mutindu yina na nima ya midi! Kansi, nkunga yai kelomba beto ve na kutadila yo kaka bonso kisika ya kupema. Yo ketubila kusala kisalu na kikesa yonso. Inki mutindu?
17 Simba nde nti yango kele ve nti mosi ya kepesa kaka madidi mpi yina kuyelaka yo mosi na lweka ya masa. Kansi yo kele nti yina kebutaka bambuma, yina bo “kunaka” na kisika ya bo ponaka mbote, disongidila “penepene ya mwa-bamasa.” Inki mutindu nti mosi lenda yela penepene na mwa-bamasa mingi? Na kilanga mosi ya kele na banti mingi, munkwa na yo lenda timuna mwa mabulu mingi sambu na kunataka masa na bansimbulu ya banti na yandi ya mfunu. Beto mebakisa mbote ntangu yai! Na mutindu mosi ya kimpeve, kana beto keyela bonso nti yina, yo kele sambu bantu yankaka kusalaka kisalu mingi sambu beto yela. Beto kevukanaka na organizasio mosi ya kepesaka beto masa ya bunkete ya kyeleka, kansi beto fwete sala mpi dikabu na beto. Beto fwete kuditula na pozisio mosi yina tasadisa beto na kubaka masa yai ya mfunu. Yo yina beto fwete kudipesa na kuyindulula mpi na kusala bansosa ya beto kele na yo mfunu sambu na kukotisa bakyeleka ya Ndinga ya Nzambi na mabanza mpi na ntima na beto. Mpidina, beto mpi tabuta mbuma ya mbote.
18. Inki beto fwete sala sambu na kuzwa bamvutu yina Biblia kepesa na bangyufula na beto?
18 Kana Biblia kekusaka beto na kukonda kumonisa mambu pwelele, yo tanatila beto ve ata mambote fyoti. Yo kele mpi ve mazi, bonso nde beto lenda kanga meso na beto, kubika nde Biblia kudikangula na kisika mosi, mpi kuyindula na nima nde mvutu na ngyufula na beto tabasika na lutiti yina mekanguka na ntwala na beto. Na ntangu beto kezola kubaka badesizio, beto fwete timuna sambu na kusosa “nzayilu ya Nzambi” (NW) bonso nde beto ketimuna kima mosi ya ntalu ya bo zikaka. (Bingana 2:1-5) Yo kelombaka ntangu yonso kusala bansosa na kikesa mpi dikebi sambu na kuzwa bandongisila ya Masonuku yina ketubila bampusa na beto ya sikisiki. Beto kele ti mikanda mingi ya ketendulaka Biblia yina lenda sadisa beto na kusala bansosa. Kana beto kesadila mikanda yai sambu na kutimuna na kikesa yonso sambu na kuzwa bima ya ntalu ya mayele na Ndinga ya Nzambi, pana beto kesadila mpenza lusadisu yina mekatuka na Yehowa.
Lusadisu na Nzila ya Bampangi Bakristu
19. (a) Sambu na nki beto lenda mona masolo ya Nzozulu ya Nkengi mpi ya Réveillez-vous! bonso lusadisu yina Nzambi kepesaka beto na nzila ya bampangi na beto Bakristu? (b) Inki mutindu disolo mosi yina kubasikaka na bazulunalu na beto kusadisaka nge?
19 Bantu yina kesadilaka Yehowa kevandaka ntangu yonso nto ya lusadisu sambu na bampangi na bo yankaka. Keti Yehowa mesobaka? Ata fyoti ve. Ntembe kele ve nde konso muntu na kati na beto lenda yindula baokazio yina yandi bakaka lusadisu ya yandi vandaka na yo mpenza mfunu na ntangu ya mbote na nzila ya bampangi na beto Bakristu. Mu mbandu, keti nge lenda yibuka mwa masolo ya Nzozulu ya Nkengi to ya Réveillez-vous! yina kupesaka nge kikesa ntangu nge vandaka na mfunu na yo to yina kusadisaka nge na kuyidika dikambu mosi to na kununga dyambu mosi ya vandaka kunwanisa lukwikilu na nge? Yehowa kupesaka nge lusadisu yina na nzila ya “mpika ya kwikama mpi ya mayele” (NW) yina kele ti mukumba ya kupesa ‘madya na ntangu ya mbote.’—Matayo 24:45-47.
20. Na nki mitindu bankuluntu kemonisaka nde bo kele ‘makabu ya bantu’?
20 Kansi, mbala mingi lusadisu yina bampangi Bakristu kepesaka beto kekuminaka beto na mbala mosi. Nkuluntu mosi mesala diskure yina mesimba ntima na beto, to yandi mekwisa kutala beto sambu na kusadisa beto na ntangu beto kenwana ti dyambu mosi ya mpasi, to na mawete yonso yandi mepesa beto ndongisila mosi yina mesadisa beto na kubakisa mpi kununga kikalulu mosi ya mbi. Mukristu mosi kusonikaka mutindu yai sambu na kumonisa ntonda na yandi na lusadisu yina nkuluntu mosi kupesaka yandi: “Ntangu beto vandaka kusala kisalu ya bilanga, yandi vandaka kusyamisa mono na kupesa bangindu na mono. Kaka na mpimpa ya kilumbu yina kulutaka, mono sambaka Yehowa sambu na kulomba yandi muntu mosi yina mono lenda solula ti yandi. Na kilumbu yina kulandaka, mpangi yai ya bakala kusolulaka ti mono na mawete yonso. Yandi sadisaka mono na kubakisa mutindu Yehowa vandaka kusadisa mono tuka ntama. Mono kepesa mersi na Yehowa sambu yandi tindilaka mono nkuluntu yai.” Ntangu bo kesalaka mutindu yai, bankuluntu kemonisaka nde bo kele ‘makabu ya bantu,’ yina Yehowa mepesaka na nzila ya Yezu Kristu sambu na kusadisa beto na kulanda na kunwana na ntangu beto ketambula na nzila ya luzingu.—Efezo 4:8.
21, 22. (a) Inki mambu kesalamaka na ntangu bantu yina ke na kati ya dibundu kesadilaka ndongisila yina kele na Filipi 2:4? (b) Sambu na nki beto kebakaka na valere ata mambu ya fyoti yina bampangi kesalaka sambu na kusadisa beto?
21 Katula bankuluntu, konso Mukristu ya kwikama fwete sadila ntuma ya kupemama ya ketuba nde “konso muntu na kati na beno kusosa mpi mambote ya bantu ya nkaka kansi mambote na yandi mosi mpamba ve.” (Filipi 2:4) Kana bantu yina ke na kati ya dibundu ya Bukristu kesadila ndongisila yai, bo tasala mambu ya mbote. Mu mbandu, dibuta mosi kukutanaka ti mambu mingi ya mpasi na mbala mosi. Tata kwendaka kusumba bima kumosi ti mwana na yandi ya nkento. Ntangu bo vandaka kuvutuka na nzo, bo salaka aksida. Mwana kufwaka, mpi tata kulwalaka mputa ya nene. Ntangu yandi basikaka na lupitalu, yandi vandaka kukuka ve na kusala ata kima mosi sambu na yandi mosi. Nkento na yandi kunyokwamaka mingi na mabanza na mpila nde yandi vandaka kukuka ve na kusungimina bakala na yandi. Yo yina, mpangi mosi ya dibundu na bo ti nkento na yandi kundimaka na kubaka bankwelani yai ya vandaka kumona mpasi na nzo na bo mpi bo sadisaka bo na nsungi ya bamposo mingi.
22 Ya kyeleka, mambu yonso ve ya beto kesalaka sambu na kusadisa bampangi ketadilaka dyambu mosi ya nene ya mpasi mpi ya kelombaka mpeve ya kudipesa ya mutindu yai. Lusadisu yankaka ya beto kebakaka kevandaka ya fyoti kibeni. Ata lusadisu kele ya fyoti, beto kebakaka yo mpenza na valere. Keti nge lenda yindula ntangu ngogo mosi ya mbote to dyambu mosi ya mayele ya mpangi mosi ya bakala to ya nkento kusalaka yina kupesaka nge lusadisu ya nge vandaka na yo mfunu? Yehowa kesungiminaka beto mbala mingi na mitindu yai.—Bingana 17:17; 18:24.
23. Inki mutindu Yehowa kemonaka bikesa ya beto kesalaka sambu na kusadisana?
23 Keti nge tazola nde Yehowa kusadila nge sambu na kusadisa bantu yankaka? Nge kele ti dibaku ya kulungisa mukumba yai ya kitoko. Ya kyeleka, Yehowa kesepelaka na kikesa ya mutindu yai ya nge kesalaka. Ndinga na yandi ketuba nde: “Kana nge kabila bansukami, yo kele bonso nde nge ke defa Mfumu Nzambi kima, sambu Mfumu Nzambi ta vutudila nge yo.” (Bingana 19:17) Beto kebakaka kyese mingi ntangu beto kekudipesaka sambu na bampangi na beto ya babakala ti ya bankento. (Bisalu 20:35) Bantu yina kekudivandilaka bo mosi kemonaka ve kyese ya kupesa lusadisu ya mutindu yai to ya kubaka yo. (Bingana 18:1) Yo yina, bika beto vukanaka mbala na mbala na balukutakanu ya Bukristu sambu beto pesana kikesa.—Baebreo 10:24, 25.
24. Sambu na nki beto lenda kudiwa ve nde beto mekonda kima mosi sambu beto monaka ve mambu ya kuyituka yina Yehowa kusalaka na ntangu ya ntama?
24 Keti yo kele ve kyese na kumona mitindu Yehowa kesadisaka beto? Ata beto kezinga ve na ntangu yina Yehowa kesalaka mambu ya kuyituka sambu na kulungisa balukanu na yandi, beto fwete kudiwa ve nde beto mekonda kima mosi. Kima kele mpenza mfunu kele nde Yehowa kepesaka beto lusadisu yonso ya beto kevandaka na yo mfunu sambu na kubikala ya kwikama. Dyaka, kana beto kekanga ntima ti lukwikilu, beto tavanda na luzingu mpi tamona bisalu ya kuyituka mpenza mpi ya kuluta nene ya Yehowa mesalaka ntete ve! Bika beto baka lukanu ya kundima mpi ya kusadila mbotembote lusadisu ya zola ya Yehowa na mpila nde beto mpi kumonisa nde beto kendima bangogo ya mukapu na beto ya mvu 2005: ‘Yehowa muntu kesadisaka mono.’—Nkunga 121:2.
Inki Nge Keyindula?
Inki mutindu Yehowa kepesaka beto lusadisu ya beto kevandaka na yo mfunu bubu yai—
• na nzila ya bawanzyo?
• na nsadisa ya mpeve santu na yandi?
• na nsadisa ya Ndinga na yandi ya kupemama?
• na nzila ya bampangi na beto Bakristu?
[Bangyufula ya disolo ya kulonguka]
[Kifwanisu ya kele na lutiti 15]
Beto kebakaka kikesa na kuzaba nde bawanzyo kesadisaka beto na kisalu ya kusamuna
[Kifwanisu ya kele na lutiti 17]
Yehowa lenda sadila bampangi na beto Bakristu sambu na kupesa beto kikesa ya beto ke na yo mfunu