Kana Mwa Amuhela Tuso ya Jehova?
Kana Mwa Amuhela Tuso ya Jehova?
“Mulena ki Yena ya ni tusa, ha ni sabi se siñwi.”—MAHEBERU 13:6.
1, 2. Ki kabakalañi ha ku li kwa butokwa ku amuhela tuso ni ketelelo ya Jehova mwa bupilo?
LU NGENI kuli mu tamile musipili wa ku kambama lilundu. Kono ha mu zamayi mu nosi kakuli ku na ni mutu ya mi potisa ye mu kambama ni yena lilundu mi ki mupotisi yo munde hahulu. Wa ziba sibaka hande mi u na ni m’ata ku mi fita, kono u zamaya bukaufi ni mina ka pilu-telele. U lemuhile kuli fokuñwi mu sweli mwa sitatala. Ka ku bata ku mi tusa, wa mi otololela lizoho kuli a mi tuse ku fita hande fa sibaka se siñwi se si maswe hahulu. Kana ne mu ka hana tuso ya hae? Ku tokwa! Bupilo bwa mina bu mwa kozi.
2 Ka ku ba Bakreste, nzila ye lu zamaya ku yona i t’ata. Kana lu swanela ku zamaya mwa nzila ye sisani yeo lu nosi? (Mateu 7:14) Batili, Bibele i bonisa kuli Mupotisi yo munde ka ku fitisisa, yena Jehova Mulimu, u lumeleza batu ku zamaya ni yena. (Genese 5:24; 6:9) Kana Jehova wa tusanga batanga ba hae ha nze a zamaya ni bona? U li: “Na, [Muñ’a] Bupilo Mulimu wa hao, ni ku sweli kwa lizoho la bulyo, mi ni ku bulelela, ni li: Si sabi, ni ka ku tusa.” (Isaya 41:13) Sina mupotisi yani wa mwa swanisezo ya luna, Jehova ka sishemo u otololela lizoho la hae ni silikani sa hae ku ba ba bata ku zamaya ni yena. Kaniti ha ku na ku luna ya n’a ka bata ku hana tuso ya hae!
3. Lu ka nyakisisa lipuzo mañi mwa tuto ye?
3 Mwa tuto ye felile, ne lu nyakisisize linzila z’e ne za ka m’o Jehova n’a tuselize batu ba hae ba kwaikale. Kana wa tusanga batu ba hae ka linzila ze swana kacenu? Mi lu kona ku eza cwañi kuli lu amuhele tuso ya hae yeo? Ha lu nyakisiseñi lipuzo zeo. Ka ku eza cwalo, lu ka ba ni buikolwiso bwa kuli Jehova kaniti luli ki yena Mutusi wa luna.—Maheberu 13:6.
Tuso ya Mangeloi
4. Ki kabakalañi batanga ba Mulimu kacenu ha ba kona ku sepa ku tusiwa ki mangeloi?
4 Kana mangeloi a tusanga batanga ba Jehova ba miteñi ye? A ba tusanga. Ki niti kuli kacenu ha tahangi luli ka ku bonahala kuli a t’o yangwela balapeli ba niti. Nihaiba mwa miteñi ya kwaikale, mangeloi ne a ezanga cwalo ka siwela fela. Buñata bwa ze ne a ezize ne li sa bonahali kwa batu, sina mo ku inezi kacenu. Nihakulicwalo, batanga ba Mulimu ba ne ba lemuhile kuli mangeloi n’a li teñi mi n’a ba tusa ne ba tiisizwe hahulu. (2 Malena 6:14-17) Ni luna lu swanela ku tiiswa cwalo.
5. Bibele i bonisa cwañi kuli mangeloi a abana mwa musebezi wa ku kutaza kacenu?
5 Mangeloi a Jehova sihulu a tabela musebezi o ipitezi o lu filwe ku eza. Ki musebezi mañi wo? Kalabo lu kona ku i fumana kwa Sinulo 14:6 ye li: “Hape na bona lingeloi le liñwi le li fufa fahali a lihalimu, li sweli Evangeli ya linako ze sa feli, ku i bulelela ba ba yahile mwa lifasi, ba masika kamukana, ni mishobo, ni lipuo, ni macaba.” Yona “evangeli ya linako ze sa feli” yeo i zamaelela ni “evangeli ye ya mubuso” ili yeo, ka ku ya ka mwa n’a polofitezi Jesu, “i ka bulelwa mwa lifasi kaufela, ibe bupaki mwa macaba kamukana” pili muinelo wo u si ka fela kale. (Mateu 24:14) Kono mangeloi ha kutazi luli kwa batu. Jesu n’a file batu musebezi o mutuna wo. (Mateu 28:19, 20) Kana haki nto ye tiisa pilu ku ziba kuli ha lu nze lu peta ona musebezi wo, lu tusiwa ki mangeloi a kenile, zona libupiwa za moya ze butali ni ze m’ata?
6, 7. (a) Ki lika mañi ze bonisa kuli mangeloi a lu tusa mwa musebezi wa luna wa ku kutaza? (b) Lu kona ku ezañi kuli lu kone ku tusiwa ki mangeloi a Jehova?
6 Ku na ni bupaki bo buñata bo bu bonisa kuli mangeloi a lu tusa mwa musebezi wa luna. Ka mutala, hañata lu utwanga kuli ha ba nze ba eza bukombwa bwa bona, Lipaki za Jehova ba fumananga batu ba ba sa zo lapela ku Mulimu ku kupa tuso ya kuli ba fumane niti. Lika zeo li utwahalanga hahulu mi kacwalo ha li koni ku ba ze ikezahalelanga fela. Kabakala tuso yeo ya mangeloi, batu ba bañata ni ku fita ba ituta ku eza se li shaela ‘lingeloi le li fufa fahali a lihalimu’ kuli: “Mu sabe Mulimu, mu mu lumbeke.”—Sinulo 14:7.
7 Kana mu nyolelwa ku tusiwa ki mangeloi a Jehova a m’ata? Fohe mu eze ka mo mu konela kaufela mwa bukombwa. (1 Makorinte 15:58) Ha lu nze lu ifana ka ku itatela mwa musebezi o ipitezi wo wa lu file Jehova, lwa kona ku sepa kuli lu ka tusiwa ki mangeloi a hae.
Tuso ya Nduna ya Mangeloi
8. Jesu u na ni mayemo afi a pahami mwa lihalimu, mi ki kabakalañi nto yeo ha i lu tiisa?
8 Jehova hape u lu file tuso ye ñwi ya singeloi. Sinulo 10:1 i bulela ka za ‘lingeloi le li na ni mata’ le li na ni ‘pata inge lizazi.’ Lingeloi le ne li bonwi mwa pono le ku bonahala li swaniseza Jesu Kreste ya beilwe fa bulena mwa lihalimu. (Sinulo 1:13, 16) Kana Jesu ki lingeloi luli? Ka nzila ye ñwi ki lingeloi, kakuli ki nduna ya mangeloi. (1 Matesalonika 4:16) Jesu ki yena ya m’ata ka ku fitisisa kwa bana ba Mulimu kaufela ba moya. Jehova u mu beile ku ba muzamaisi wa limpi za hae kaufela za mangeloi. Nduna ya mangeloi y’o ki mutusi sakata. Ka linzila lifi?
9, 10. (a) Jesu u banga cwañi ‘muyemeli’ wa luna ha lu ezize sibi? (b) Lu kona ku fumana tuso mañi kwa mutala wa Jesu?
9 Muapositola Joani wa musupali n’a ñozi kuli: “Mutu h’a ezize sibi, lu na ni Muyemeli fapil’a Ndate, ki Jesu Kreste Ya-Lukile.” (1 Joani 2:1) Ki kabakalañi Joani ha n’a bulezi kuli Jesu ki ‘muyemeli’ wa luna sihulu ha lu “ezize sibi”? Lwa ziba kuli lwa fosanga ka zazi, mi sibi si tisa lifu. (Muekelesia 7:20; Maroma 6:23) Kono Jesu n’a lu shwezwi kuli a lu liulule kwa libi za luna. Mi u kwa lineku la Ndat’a luna ya sishemo kuli a lu yemele ku yena. Mañi ni mañi wa luna u tokwa tuso yeo. Lu kona ku i fiwa cwañi? Lu lukela ku bakela libi za luna ni ku kupa swalelo fa mutomo wa sitabelo sa Jesu. Hape lu lukela ku sa kutela ku eza libi za luna.
10 Kwand’a ku lu shwela, Jesu n’a lu tomezi mutala o petehile. (1 Pitrosi 2:21) Mutala wa hae wa lu etelela, mi u lu tusa ku zamaya ka nzila ye ka lu tusa ku pima libi ze tuna ni ku tabisa Jehova Mulimu. Kana ha lu ba ba tabile kuli lu filwe tuso ye cwalo? Jesu n’a sepisize balateleli ba hae kuli ne ba ka fiwa mutusi yo muñwi hape.
Tuso ya Moya o Kenile
11, 12. Moya wa Jehova ki nto mañi, u na ni m’ata a kuma kai, mi lu u tokwelañi kacenu?
11 Jesu n’a sepisize kuli: “Ni ka lapela Ndate, mi u ka mi fa Mutiisapilu yo muñwi, kuli a ine ni mina kamita, Ona Moya wa niti, o lifasi li sa koni ku u amuhela.” (Joani 14:16, 17) ‘Moya wa niti’ kamba moya o kenile wo haki mutu kono ki m’ata—ki m’ata a Jehova ka sibili a sebeza. Moya wo u na ni m’ata a sa feli. Ki ona m’ata a n’a itusisize Jehova kwa ku bupa pupo kaufela, kwa ku eza limakazo, ni kwa ku fa lipono za ku patulula ka zona tato ya hae. Bakeñisa kuli Jehova ha itusisi moya wa hae ka linzila zeo tenyene kacenu, kana ku talusa kuli ha lu u tokwi?
12 Batili lwa u tokwa! Mwa “linako ze tata” ze, lu tokwa hahulu moya wa Jehova. (2 Timotea 3:1) Wa lu tiisa kuli lu tiyele litiko. U lu tusa ku beya miselo ye minde ye lu suteleza ku Jehova ni kwa mizwale ni likaizeli ba luna ba kwa moya. (Magalata 5:22, 23) Kacwalo, lu kona cwañi ku fumana tuso yeo ye tuna ye zwelela ku Jehova?
13, 14. (a) Ki kabakalañi ha lu kona ku kolwa kuli Jehova u fanga ka ku lata moya wa hae o kenile kwa batu ba hae? (b) Lu kona ku bonisa ka likezo mañi kuli lu keshebisa mpo ya moya o kenile?
13 Sa pili, lu lukela ku lapelanga ku kupa moya o kenile. Jesu n’a ize: “Mbali mina ba ba na ni lunya, mu ziba ku fa bana ba mina lika ze nde, Ndate ya kwa lihalimu u ka mi fita hahulu mwa ku fa Moya o Kenile ku ba ba u kupa ku yena.” (Luka 11:13) Kiniti, Jehova ki yena Mushemi yo munde ka ku fitisisa. Haiba lu kupa ka tumelo moya o kenile, ha lu koni ku nahana kuli wa kona ku lu tima mpo yeo. Kacwalo puzo ki ya kuli, Kana lwa u kupanga? Lu lukela ku no u kupanga mwa litapelo za luna za ka zazi ni zazi.
14 Sa bubeli, lu amuhela mpo yeo ka ku sebeza ka ku lumelelana ni yona. Ka swanisezo: Lu nge kuli Mukreste u sweli ku lika ka t’ata ku ambuka ku buha maswaniso a mapunu. Wa lapelanga ku kupa moya o kenile kuli u mu tuse ku ambuka mukwa o masila wo. U kupile kelezo kwa maeluda ba Sikreste, mi ba mu elelize kuli a nge muhato o tiile wa ku sa sutelela nihaiba hanyinyani fela kwa maswaniso a cwalo a maswe. (Mateu 5:29) Ku cwañi ha n’a ka keshebisa kelezo ya bona ni ku zwelapili ku buhanga maswaniso ao? Kana wa eza ka ku lumelelana ni tapelo ya hae ya ku kupa moya o kenile kuli u mu tuse? Kamba kana u sweli mane ku swabisa moya wa Mulimu mi u mwa kozi ya ku timiwa mpo yeo? (Maefese 4:30) Kaniti, kaufel’a luna lu tokwa ku eza ka mo lu konela kaufela kuli lu zwelepili ku amuhela tuso ye nde hahulu yeo ye zwelela ku Jehova.
Tuso ya Linzwi la Mulimu
15. Lu kona ku bonisa cwañi kuli ha lu keshebisi Bibele?
15 Bibele i tusize hahulu batanga ba Jehova ba ba sepahala ka lilimo-limo. Kono ku fita ku nga Mañolo a Kenile ka likesha, lu lukela ku hupula kuli a na ni tuso ye tuna ku luna. Ku amuhela tuso yeo ku tokwa buikatazo. Ku bala Bibele ku swanela ku ba kalulo ya tomahanyo ya luna.
16, 17. (a) Samu 1:2, 3 i talusa cwañi mipuzo ye zwa mwa ku bala mulao wa Mulimu? (b) Samu 1:3 i bonisa cwañi kuli buikatazo bwa tokwahala?
16 Samu 1:2, 3 i bulela ka za mutu ya tabisa Mulimu, i li: “Ki ya tabela mulao wa [Muñ’a] Bupilo; mi wa u nahana musihali ni busihu. U swana sina kota ye calilwe kwatuko ni mezi a’ buba, ye beya miselo mwa nako ya yona, ye matali a yona a sa omi; s’a eza kaufela sa konda.” Kana mu boni sisupo se si mwa litimana zeo? Ku bunolo ku bala manzwi ao ni ku nahana fela kuli a bulela ka za kota ye nde ye na ni muluti ye mela kwatuko ni nuka. Ne ku ka tabisa luli ku itobalela mwatas’a kota ye cwalo musihali! Kono samu ye ha i lu tokwi ku nahana ka za ku pumula. I bulela ka za nto ye fapana ni yeo; i bulela ka za buikatazo bo lu swanela ku eza. Ka nzila ifi?
17 Mu lemuhe kuli kota ye bulelwa fa haki kota fela ye na ni muluti ye imelela kwatuko ni nuka. Ki kota ye beya miselo, ye “calilwe” ki mutu mwa sibaka s’a ketile se si “kwatuko ni mezi a’ buba.” Kota i liñwi i kona ku mela cwañi kwatuko ni linuka ze ñata? Mwa simu ya likota za miselo, muñ’a simu a kana a yepa mikokolombwa mo ku ka buba mezi a’ ya kwa mibisi ya likota za hae ze nde. Cwale lwa kala ku bona sisupo, nji cwani? Haiba lwa beya miselo kwa moya sina kota yeo, ki ka libaka la kuli ku na ni ya mbindanile ku lu tusa. Lu mwa kopano ye lu tiseza mezi a kenile a niti, kono lu na ni ku eza se siñwi ni luna. Lu na ni kuka kwa mezi ao a butokwa, ka ku yeya ni ku eza lipatisiso ze tokwahala kuli lu suñe niti ya Linzwi la Mulimu mwa minahano ni mwa lipilu za luna. Ka nzila yeo, ni luna lu ka beya miselo ye minde.
18. Ku tokwahalañi kuli lu fumane likalabo za mwa Bibele kwa lipuzo za luna?
18 Bibele ha i koni ku lu tusa haiba i beiwa fela fa tafule inze i kwalilwe. Mi hape Bibele haki nkau kuli mane lwa kona ku itima fela kwa meto, ku apula fa likepe lifi kamba lifi, ni ku libelela ku fumana kalabo kwa puzo ya luna fa likepe leo. Ha lu bata ku eza likatulo, lu lukela ku bata-bata ‘zibo ya Mulimu’ inge ba ba bata-bata maluo a patilwe. (Liproverbia 2:1-5) Patisiso ya ka tukufalelo ni ka tokomelo hañata ya tokwahala ilikuli lu fumane kelezo ya ka Mañolo ye kona ku lu tusa mwa butata bwa luna. Lu na ni lihatiso ze ñata ze tomile fa Bibele ze kona ku lu tusa ha lu eza lipatisiso. Ha lu nze lu itusisa zona mwa ku bata-bata ka tukufalelo manzwi a’ butali a mwa Linzwi la Mulimu, fohe lwa itusisa tuso ye zwelela ku Jehova.
Tuso ka Balumeli Ba Bañwi
19. (a) Ki kabakalañi lituto za mwa Tora ya ku Libelela ni Awake! ha li kona ku ngiwa kuli ki lituso ze zwelela kwa balumeli ka luna? (b) Ne mu tusizwe cwañi ki tuto ye ñwi ye ne mu itutile ku ye ñwi ya limagazini za luna?
19 Batanga ba Mulimu ba fa lifasi-mubu ba tusananga kamita. Kana Jehova u cincize? Batili. Ku si na kakanyo mañi ni mañi wa luna wa kona ku hupula muta balumeli ka luna ne ba lu file tuso ye ne lu tokwa ka yona nako yeo. Ka mutala, kana mwa kona ku hupula lituto ze ñwi za mwa Tora ya ku Libelela kamba Awake! ze ne mi tiisize ha ne mu tokwa tuso kamba ze ne mi tusize ku tatulula butata kamba ku tiyela tiko ya tumelo ya mina? Jehova n’a mi file tuso yeo ka “mutanga ya sepahala, ya na ni kutwisiso” ya filwe musebezi wa ku lu “fa lico ka nako ye lukela.”—Mateu 24:45-47.
20. Ki mwa linzila lifi m’o maeluda ba Sikreste ba boniseza kuli ki “batu ba ba li limpo”?
20 Kono hañata tuso ye lu fiwanga ki balumeli ka luna ki tuso ye tahanga luli ka ku nonga. Eluda wa Sikreste a kana a fa ngambolo ye lu tiisa, kamba a kana a lu potela ni ku lu tusa mwa muinelo o t’ata, kamba a kana a lu fa kelezo ka sishemo ni ku lu tusa ku bona bufokoli bwa luna ni ku bu tula. Kaizeli yo muñwi wa Sikreste n’a itumezi kwa tuso ya n’a filwe ki eluda mi n’a ñozi kuli: “Ha ne lu li mwa simu, a ni buza lipuzo kuli ni kone ku bulela maikuto a ka. F’o ne li inge kuli mabani busihu ne ni lapezi ku Jehova ku kupa mutu wa ku ambola ni yena. Zazi leo, ili habusa, muzwale y’o a ambola ni na ka sishemo. A ni tusa ku bona ka m’o Jehova a ni tuselize ka lilimo-limo. Na itumela ku Jehova kwa ku ni lumela eluda y’o.” Ka linzila ze cwalo kaufela, maeluda ba Sikreste ba bonisa kuli ki “batu ba ba li limpo” ba ba filwe ki Jehova ka Jesu Kreste kuli ba lu tuse ku tundamena mwa nzila ye liba kwa bupilo.—Maefese 4:8, NW.
21, 22. (a) Ki sifi se si ezahalanga muta ba ba mwa puteho ba latelela kelezo ye kwa Mafilipi 2:4? (b) Ki kabakalañi lituso nihaiba ze nyinyani ha li li za butokwa?
21 Kwand’a maeluda, Mukreste ni Mukreste kaufela ya sepahala u lukela ku latelela taelo ya ka Mañolo ye li “mutu mañi kamba mañi a si ke a tokomela za hae fela, kono a talime ni za ba bañwi.” (Mafilipi 2:4) Ba ba mwa puteho ya Sikreste ha ba latelela kelezo yeo, ku ba ni likezo ze nde za ku bonisana sishemo. Ka mutala, lubasi lo luñwi ne lu tahezwi ki kozi ye tuna ka sipundumukela. Ndate n’a ile ni mwan’a hae wa musizana kwa lintolo. Ha ba nze ba kutela kwahae, ba ba mwa kozi ya fa mukwakwa. Mwana a timela; mi mushemi a holofala maswe. Ha lukululwa mwa sipatela, pili a ba siyanga mi ha ku na sa n’a kona ku ikezeza. Musal’a hae n’a tomohile hahulu pilu mi n’a sa koni ku mu babalela a nosi. Kacwalo bosinyalana ba bañwi mwa puteho ba tutiseza bosinyalana ba ne ba ziyelehile bao kwa ndu ya bona ni ku ba babalela ka lisunda li sikai.
22 Ki niti kuli sishemo ha lu si bonisangi fela ha ku bile ni likozi ze tuna cwalo kamba ka ku eza lika ze ñwi cwalo ze tuna. Lituso ze ñwi ze lu fiwanga ki ze nyinyani. Kono lituso ze lu fiwa nihaikaba ze nyinyani, lwa itumelanga, nji cwañi? Kana mwa kona ku hupula muta linzwi le li musa kamba kezo ye nde ya muzwale kamba kaizeli ne i mi tusize hahulu? Jehova hañata u lu babalelanga ka linzila ze cwalo.—Liproverbia 17:17; 18:24.
23. Jehova u lu nga cwañi ha lu lika ka t’ata ku tusana?
23 Kana ne mu ka tabela kuli Jehova a itusise mina mwa ku tusa ba bañwi? Mwa kona ku ba ni tohonolo ye cwalo. Mane, Jehova wa itebuha ha mu eza buikatazo bo bu cwalo. Linzwi la hae li li: “Ya tusa mubotana u cisa [Muñ’a] Bupilo sikoloti; mi [Muñ’a] Bupilo u ka mu kutiseza se si mu lukela.” (Liproverbia 19:17) Lu fumana tabo ye tuna ka ku tusa mizwale ni likaizeli ba luna. (Likezo 20:35) Ba ba sa lati siango ha ba koni ku ba ni tabo ye cwalo ye zwa mwa ku tusa ba bañwi kamba ku fumana susuezo ye zwa mwa ku fiwa tuso ki ba bañwi. (Liproverbia 18:1) Kacwalo, haike lu fumanehange ka busepahali kwa mikopano ya Sikreste ilikuli lu kone ku susuezana.—Maheberu 10:24, 25.
24. Ki kabakalañi ha lu sa swaneli ku ikutwa kuli lu yawile limakazo za n’a ezize Jehova kwamulaho?
24 Kana ha ku tabisi ku nahanisisa linzila zeo Jehova a lu tusa ka zona? Nihaike kuli ha lu pili ka nako yeo Jehova a eza limakazo ze komokisa kuli a pete milelo ya hae, ha lu lukeli ku ikutwa kuli ku na ni ze lu yawile. Sa butokwa luli kikuli Jehova u lu file tuso kaufela ye lu tokwa kuli lu zwelepili ku sepahala. Mi haiba lu itiisa hamoho ka tumelo, lu ka pila ni ku t’o iponela likezo za Jehova ze komokisa hahulu ili ze si ka bonwa kale haisali! Ha lu tundameneñi ku amuhela ni ku itusisa ka ku tala tuso ya Jehova ya lu file ka lilato ilikuli ni luna lu kone ku bulela manzwi a liñolo la luna la silimo la 2005 a li: “Tuso ya ka i zwa ku [Jehova, NW.]”—Samu 121:2.
Mu Nahanañi?
Jehova u lu fanga cwañi tuso ye lu tokwa kacenu—
• ka mangeloi?
• ka moya wa hae o kenile?
• ka Linzwi la hae le li tahile ka moya?
• ka balumeli ba bañwi?
[Lipuzo za Tuto]
[Siswaniso se si fa likepe 18]
Kwa tiisa ku ziba kuli mangeloi a lu tusa mwa musebezi wa ku kutaza
[Siswaniso se si fa likepe 21]
Jehova wa kona ku itusisa yo muñwi kwa balumeli ka luna kuli a lu tiise pilu ha lu tokwa tiisezo