Lelo Witabijanga Bukwashi Bwa Yehova?

“Yehova i mukwashi wami; nkikakwatwapo moyo, mhm.”—BAHEBELU 13:6.

1, 2. Mwanda waka i kya kamweno twitabije bukwashi ne buludiki bwa Yehova mu būmi bwetu?

 LANGA’PO shi wenda ukanda mu kashinda ka ku lūlu lwa mabwe. Ino kudi’po kasuku, wendanga na muntu wa kukuludika, kadi i kalombwe wanibwa. Udi na bwino kukupita, kadi udi na lupaka lupite lobe, ino aye utūkije mutyima, wenda nobe kwishila kyaba mpika. Ukumwene ne pokukala na dimodimo. Byakutele mutyima, ukwelanga’ko kuboko ne kukukwasha shi koponena mu kyaka kikatampe. Lelo ubwanya kupela bukwashi bwandi? Mhm, kukapele’bopo! Mwanda būmi bobe budi pa katele bulenda.

² Batwe bene Kidishitu netu tudi mu kashinda kakomo kulonda. Le tufwaninwe kwenda kasuku ketu mu kano kashinda katyetye? (Mateo 7:14) Mhm, Bible ulombola amba Yehova Leza, Kalombwe muyampe, witabije bantu bende nandi pamo. (Ngalwilo 5:24; 6:9) Le Yehova ukwashanga bengidi bandi pobenda nandi? Aye mwine unena’mba: “Amiwa Yehova Leza obe, nkakwata disaka dyobe dya lundyo, kukunena’mba: Kokakwatwapo moyo ami nkakukwasha.” (Isaya 41:13) Pamo’nka bwa muludiki utelelwe mu kyelekejo, Yehova ololanga kuboko kwa bukwashi ne kusamba bulunda na boba bakimba kunanga nandi. Bine, kekudipo muntu ubwanya kupela bukwashi bwandi!

3. Mu mīsambo ya dyalelo, i bipangujo’ka byotukabandaula?

³ Mu kishinte kishele kunyuma, twesambile  pa miswelo iná yākweshe’mo Yehova bantu bandi ba pa kala. Lelo ukwashanga bantu bandi muswelo umo onka dyalelo? Le tukayuka namani amba twitabije buno bukwashi bonso? Tubandaulei bino bipangujo. Potwibibandaula, tukakulupila mpata amba bine Yehova i Mukwashi wetu.—Bahebelu 13:6.

Bukwashi bwa Bamwikeulu

4. Mwanda waka bengidi ba Leza dyalelo bakulupile amba bukwashi bwa bamwikeulu budi’ko?

⁴ Lelo bamwikeulu bakwashanga bengidi ba Yehova ba mu ano mafuku? Eyo, bebakwashanga. Shalko, dyalelo kebakimwekangapo mwanda wa kunyongolola batōtyi ba bine mu byaka. Eyo, mu myaka isekunwinwe mu Bible bamwikeulu bālongele kino, inoko ke pavulepo. Bivule byobādi balonga kebyādipo bimweka ku meso a bantu, monka mokebimwekelapo dyalelo. Inoko, bengidi ba Leza byobādi bayukile amba bamwikeulu bebakwashanga, bādi bakankamikwa mpata. (2 Balopwe 6:14-17) Netu tukankamikwanga uno muswelo umo onka.

5. Le Bible ulombola namani amba bamwikeulu bengilanga netu mwingilo wa busapudi dyalelo?

⁵ Bamwikeulu ba Yehova batele mutyima nakampata ku mwingilo wa pa bula otwingila. Le i mwingilo’ka? Malondololo atanwa mu Kusokwelwa 14:6 munena’mba: “Namwene mwikeulu mukwabo wipapa umbukata mwa mūlu, wa myanda-miyampe ya nyeke ya kusapwila bēkele panopantanda, ne mizo yonso, ne bisaka byonso, ne ndimi yonso, ne bantu bonso bēne kumo.” Ino “myanda-miyampe ya nyeke” i mikwatañane na “Myanda Miyampe ino’i ya Bulopwe” yālaile Yesu amba “ikasapulwa panopantanda ponso, amba ikale bu kiyukeno ku mizo yonso” kumeso kwa mfulo ya ngikadilo ya bintu kufika. (Mateo 24:14, MB) Eyo, bamwikeulu kebasapulangapo na kwimona na bantu mpala na mpala. Yesu wāpele bantu uno mwingilo wa mvubu. (Mateo 28:19, 20) Mwene tukankamikwanga pa kuyuka amba twingilanga mwingilo wetu na bukwashi bwa bamwikeulu bakola, bipangwa bya tunangu ne bukomo bukatampe?

6, 7. (a) I bika bilombola amba bamwikeulu bakwatakanyanga mwingilo wetu wa busapudi? (b) Tukayuka namani amba tukwashibwanga na bamwikeulu ba Yehova?

⁶ Kudi bukamoni buvule bulombola amba bamwikeulu bakwatakenye mwingilo wetu. Kimfwa, divule dine twivwananga amba Batumoni ba Yehova, pobengila mwingilo wabo, betananga na muntu ukitamba mu kulomba’mba Leza amukwashe kusokola bubinebine. Ino myanda mimweke ifikanga divule, o mwanda ketukokejapo kunena’tu amba i kitanina bitupu. Na buno bukwashi bwa bamwikeulu, bavule bene kebefunde kulonga kyokya kinena ‘mwikeulu wipapa umbukata mwa mūlu’ amba: “Akamwai Leza mumutumbike ntumbo.”—Kusokwelwa 14:7.

⁷ Le nobe wabilanga kukwashibwa na bamwikeulu bakomokomo ba Yehova? Nankyo wipāne nobe mu mwingilo. (1 Kodinda 15:58) Wivwane tuvuije na mutyima tō uno mwingilo wa pa bula witupele Yehova, ketukabulwepo kutambula bukwashi bwa bamwikeulu bandi.

Bukwashi bwa Mwikeulu Mfumu

8. Yesu udi na kitenta’ka kikatampe mūlu, ne mwanda waka kino kitukankamika?

⁸ Yehova witupanga kadi bukwashi bwa bamwikeulu mu muswelo mukwabo. Kusokwelwa 10:1 ulombola “mwikeulu mukwabo mukomo” byamwiko udi na “mpala yandi yadi bwa dyuba.” Uno mwikeulu wa mu kimonwa ke ungipo, i Yesu Kidishitu mutumbikwe ntumbo mu lupusa lwandi lwa mūlu. (Kusokwelwa 1:13, 16) Le bine Yesu i mwikeulu? Eyo, mu  buluji kampanda, mwanda ye mwikeulu mukatampe mwine. (1 Tesalonika 4:16) Kunena’mba Mwikeulu mukatampe mwine ko kushintulula namani? Ko kunena amba “mwikeulu mwinemwine,” nansha “mwikeulu mfumu.” Yesu ye mwana wa Yehova wa ngitu ya ku mushipiditu upityile bonso. Yehova i mumupe kwendeja kibumbo kyonso kya bamwikeulu bandi. Bine, uno mwikeulu mukatampe mwine yo nsulo ya bukwashi ya bukomo kutabuka. Muswelo’ka?

9, 10. (a) Le Yesu i “Nsenga-Mukwashi” wetu namani kitatyi kyotupya mambo? (b) Kimfwa kya Yesu kitukwashanga muswelo’ka?

⁹ Yoano mutumibwa mununu wāsonekele amba: “Shi muntu apye mambo, nankyo tudi ne Nsenga-Mukwashi udi kudi Tata, ke Yesu Kidishitu moloke kadi.” (1 Yoano 2:1) Mwanda waka Yoano wātelele Yesu bu “Nsenga-Mukwashi” wetu, nakampata shi ‘tubapi mambo’? Bine, tupyanga mambo a bubi difuku ne difuku, kadi bubi nabo butwala ku lufu. (Musapudi 7:20; Loma 6:23) Ino Yesu wāpwile kala kwela būmi bwandi bu kitapwa pangala pa bubi bwetu. Pano udi ku mutamba wa Shandi wa lusa mwanda wa kwitunenena’ko. Batwe bonso tusakilwa buno bukwashi. Le tuketabija’bo namani? I na kwisāsa bubi bwetu ne kulomba kulekelwa pangala pa kitapwa kya Yesu. Ne kadi tufwaninwe kuleka kujokela mu bubi bwetu.

¹⁰ Kutentekela pa kwitufwila kwāitufwidile, Yesu wētushidile ne kimfwa kibwaninine. (1 Petelo 2:21) Kimfwa kyandi kituludikanga, kitupa muswelo wa kwiolola senene kutyina amba twakalonga bubi ne kufityija Yehova Leza mutyima. Mwene tusangele pa kwikala na buno bukwashi? Kadi Yesu wālaile balondi bandi amba bakebapa mukwashi mukwabo.

Bukwashi bwa Mushipiditu Sandu

11, 12. Mushipiditu wa Yehova i bika, ne udi na bukomo’ka, ne mwanda waka tusakilwa’o mpata dyalelo?

¹¹ Yesu wālaile amba: “Nkalomba kudi Tata ino aye ukemupa Nsenga-mukwashi mukwabo wakwikala nandi mafuku onso nyeke. Ke Mushipiditu wa binebine kadi, wakubulwa kuyūkwa kutambulwa na bapanopantanda, mhm.” (Yoano 14:16, 17) Uno “Mushipiditu wa binebine,” ko kunena’mba mushipiditu sandu, ke muntupo; ino i bukomo—bukomo bwa Yehova bwingila. I bukomo bukatampe bya mwiko. Yehova wāingidije buno bukomo pa kupanga diulu ne ntanda, pa kulonga bingelengele bityikukwa, ne pa kupāna bimonwa bya kusokola kiswa-mutyima kyandi. Pano Yehova kakingidijangapo mushipiditu mu ano mashinda, le ko kunena’mba ketudipo nao mvubu?

¹² Mhm! Mu ino “myaka ya malwa” mo mwine motusakilwa mushipiditu wa Yehova mpata. (2 Temote 3:1) O witukomeja tutyumwine matompo umanwi. Witukwasha  tutamije ngikadilo milumbuluke itufwenya mpata kudi Yehova ne kudi batutu ne bakaka ba ku mushipiditu. (Ngalatea 5:22, 23) Tukamwena namani mu buno bukwashi bwa kutendelwa butamba kudi Yehova?

13, 14. (a) Mwanda waka tukulupile amba Yehova usakanga kupāna mushipiditu sandu ku bantu bandi? (b) I kilongwa’ka kikokeja kulombola amba na bubine ketwitabijepo kyabuntu kya mushipiditu sandu?

¹³ Dibajinji, tulombei mushipiditu sandu. Yesu wānene amba: “Ino bānweko babi, muyūkile kupa bāna benu byakwibapa biyampe, lelo Shenu wa mūlu ke pepi, keye mwine ukakija kupana Mushipiditu Sandu ku bakumulomba?” (Luka 11:13) Bine, Yehova ye Tata mulumbuluke kupita bonso. Shi tumulomba mushipiditu sandu na mutyima umo, kakapelepo nansha dimo kwitupa kino kyabuntu. Ino kipangujo i kino: Le tumulombanga’o? Tudi na bubinga bonso bwa kwiulomba mu milombelo yetu ya difuku ne difuku.

¹⁴ Dya bubidi, twitabijanga kino kyabuntu na kulongela mungya mokisakila. Tulete kimfwa: Langa shi mwine Kidishitu ulwa na kilokoloko kya kutala bantu badi mutaka. Walombe mushipiditu sandu wa kumukwasha aleke kano kasela kabi. Walombe madingi ku bakulumpe bene Kidishitu, nabo abamukwasha alonge bintu na kusumininwa, na kuleka kufwena nansha kubwipi kwine na bino byamunyanji. (Mateo 5:29) Ino bikekala namani shi wapumpunya madingi ne kwitūla monka mu matompo? Le kuno i kulongela mungya milombelo yalomba mushipiditu sandu umukwashe? Nansha witūlanga mu kyaka kya kufityija mushipiditu wa Leza mutyima ne kubulwa kino kyabuntu? (Efisesa 4:30) Bine, batwe bonso twielelei’ko mwanda wa twendelele na kutambula buno bukwashi bwa kutendelwa bwa Yehova.

Bukwashi bwa Kinenwa kya Leza

15. Tukalombola namani amba ketumwenepo Bible bu kintu kya bitupu?

¹⁵ Bible yo nsulo ya bukwashi ku bengidi ba kikōkeji ba Yehova mu bula bwa myaka. Pa kyaba kya kumona Bisonekwa Bikola bu kintu kya bitupu, tufwaninwe kuyuka amba i nsulo mikomo ya bukwashi yotudi nayo. Kwitabija buno bukwashi kulomba kwielela’ko. Tufwaninwe kwitungila kutanga Bible difuku ne difuku.

16, 17. (a) Le Mitōto 1:2, 3 ulombola namani mpalo ilupuka mu kutanga mukanda wa bijila wa Leza? (b) Mitōto 1:3 ulombola namani mwingilo mukatampe otufwaninwe kwingila?

¹⁶ Mitōto 1:2, 3 īsambila pa muntu usangaja Leza amba: “Mutyima wandi i umutōkele mu mukanda-wabijila wa Yehova; e monka mwāfwatakanya dyuba ne bufuku. Aye ukēkalanga bwa mutyi mukunwe pa tunonga twa mema, wakupa bipa byao pa mwaka wao, ne dyani dyao kufumba mpika; ne byonso byālonga bikalumbuluka.” Le ubamone kikimba kunena kino kisonekwa? I kipēla kutanga bino binenwa ne kulanga lubilo lonka amba bilombola’tu kyaba kya ndoe, ko kunena’mba mutyi wa mwemba utama kubwipi na munonga. Bine, buya’byopo kusendalala ka kyolwa mu uno mutyi wa mwemba! Ino uno mutōto kewitunenapo kwela milafwe ku buya bwa kōlolokwa. Ulombolanga mwanda mwishile na kino, mwanda ulomba kuputuma na mingilo. Namani?

¹⁷ Tala biyampe, usa kumona amba uno ke mutyipo’tu wa mwemba wimenene ku munonga. Ino i mutyi upa bipa, “mukunwe” na muntu mu kifuko kampanda—“pa tunonga twa mema.” Ino mutyi umo ubwanya namani kumena ku tunonga tuvule? Bine, mu kyombe kya mityi, mwinē kyombe ukokeja kukola’mo mikola mivule mwa kukokela mema kubwipi na miji ya mityi ya kamweno. Bine, pano ubafika  pa mwanda! Shi tudi na ntundubuko ya ku mushipiditu bwa uno mutyi, i mwanda kudi muntu kampanda watakamene na mingilo ya kwitukwasha. Tudi mu bulongolodi bupungulwila mema atōka a bubinebine kufika ne kotudi, ino netu tunenwe kwingila’mo ketu kaji. Tufwaninwe kutoma ano mema malēme, na kulanguluka ne kulonga bukimbi bufwaninwe mwanda wa bubinebine bwa Kinenwa kya Leza bushale mu ñeni ne mu mutyima wetu. Nabya netu tukamona kupa bipa biyampe.

18. Tufwaninwe kulonga bika pa kutana malondololo a mu Bible a bipangujo byetu?

¹⁸ Bible kadipo na kamweno shi ulēle mupūte mu kabatyi. Kadi ke nsanzopo, nansha bikuya bya kwitulangija amba shi tupūte’tu meso ne kupūtula pantu po-ponso mu Bible tukasokola kala malondololo a bipangujo byetu pa dyani dyotwapūtula’dya. Ino shi tukimba kutyiba mbila, tufwaninwe kukola na kukimba “kuyukidija Leza” pamo bwa byabupeta bijike panshi. (Nkindi 2:1-5) Tufwaninwe kulonga bukimbi bwa kininga ne katentekeji pa kusaka kutana madingi a mu Bisonekwa akwatañene na bisakibwa byetu kampanda. Tudi na mabuku esambila pa Bible etukwasha tulonge bukimbi. Wivwane twingidije’o pa kukimbakimba tunangu tudi mu Kinenwa kya Leza, nankyo na bubine tukimbanga bukwashi bwa Yehova.

Bukwashi bwa Balunda mu Lwitabijo

19. (a) Mwanda waka bishinte bya Kiteba kya Mulami ne Amkeni! bikokeja kumonwa bu bukwashi bwa balunda netu mu lwitabijo? (b) Le nobe kodi mukwashibwe namani na kishinte kampanda kya mu ano mapepala?

¹⁹ Bengidi ba Yehova ba pano panshi i nsulo ya bukwashi ku abo bene na bene. Le Yehova ke mushinte? Mhm, kashintyilepo. Kunena na bubine, yense umbukata mwetu ukokeja kuyuka bitatyi byobamukweshe senene kudi banababo betabije mu kitatyi kine kyaadi usakilwa bukwashi. Kimfwa, le ukokeja kuvuluka bishinte kampanda bya mu Kiteba kya Mulami nansha mu Amkeni! byakusengele pa kitatyi kifwaninwe ne kukukwasha upwije mwanda nansha makambakano a mu lwitabijo lobe? Bine, Yehova wākukweshe kupityila kudi “umpika wa binebine, udi na manwa” upelwe kiselwa kya kupāna “bidibwa pa kitungo kya mwaka po kitungilwe.”—Mateo 24:45-47.

20. Bakulumpe bene Kidishitu i “byabuntu ku bantu” mu miswelo’ka imo?

²⁰ Divule, tupebwanga bukwashi bwa kiponka na ponka na banabetu betabije. Padi i mukulumpe unena dishikulu ditutenga ku mityima, nansha witukwasha mu bitatyi bikomo na bupempudi bwa bukumbi, nansha witupa madingi a kanye etukwasha tujingulule bukōkekōke bwetu ne kwibunekenya. Mwine Kidishitu umo wa mutyima wa kufwija’ko wāsonekele pangala pa bukwashi bwamukweshe mukulumpe umo amba: “Wankweshe mu mwingilo wa budimi ndyuke kwisamba bidi  ku mutyima. Bufuku bukya ke difuku’dya, nalombele Yehova ampe muntu ombwanya kwisamba nandi. Mu dine difuku dilonda’po, tutu’wa wesamba nami na mutyima wa lusa. Waunkwasha mone muswelo unkweshe Yehova mu bula bwa myaka. Bine, mfwijanga’ko Yehova pa kuntumina mwine mukulumpe’wa.” Mu bino byonso, bakulumpe bene Kidishitu belombolanga amba i “byabuntu ku bantu,” biletelwe na Yehova kupityila kudi Yesu Kidishitu mwanda wa kwitukwasha twendelele mu kashinda katwala ku būmi.—Efisesa 4:8.

21, 22. (a) Bikalanga namani shi bonso mu kipwilo balonda madingi adi mu Fidipai 2:4? (b) I kika kinenenwa amba ne bilongwa bya kanye bityebitye bine bidi na kamweno?

²¹ Kutentekela pa bakulumpe, mwine Kidishitu yense wa kikōkeji ulondanga uno musoñanya unena’mba “kemukibangai byonka byenu bintu wa byandi, wa byandi, ehe, poso ne ku bintu bya bakwenu, au ku bya mukwabo, au ku bya mukwabo.” (Fidipai 2:4) Ekale bonso mu kipwilo kya bwine Kidishitu balonde ano madingi, bilongwa bilumbuluke bya kanye kebikabulwepo kumweka. Kimfwa, kisaka kimo kyatenwe na kinkumbulu kya mu kitulumukila ne bishoto bivule. Shabana waendele na wandi mwana mwana-mukaji ku mangajini. Pa kujoka kwabo, balonga akishida na motoka. Mwana wafwa; shabana watapwa bilonda bivule. Difuku dya kutamba mu lupitalo, watyumukila panshi, katunya’nka ne kya kulonga. Mukajandi nandi pa kukwatwa na njia, wakomenwa ne kumulela bunka bwandi. Penepo ba mulume ne mukaji bamo ba pa kipwilo baselela ku njibo yabo bano ba mulume ne mukaji bakolelwe ne kwibalela bebalela mu bula bwa mayenga.

²² Eyo, ke bilongwa bya kanye byonsopo bikalanga bya binkumbulu ne bya kwipānina bantu namino. Bukwashi bumo botupebwanga bwikalanga butyebutye. Ino nansha butyepele namani, twibutendelanga, mwene i amo? Le ukivulukile binenwa bya kanye nansha kilongwa kya kukulangila kya tutu nansha kaka mokyakukwashishe? Bine, Yehova witutanga divule mutyima mu bino byonso. —Nkindi 17:17; 18:24.

23. Yehova umwene namani bukomo botulonga bwa kwikwasha batwe bene na bene?

²³ Le usaka Yehova akwingidije mu kukwasha bakwenu? Udi na ano madyese. Bine, Yehova usangelanga bukomo bolonga pa kino. Kinenwa kyandi kinena’mba: “Yewa ufwila mulanda lusa wāpuja kudi Yehova; kadi kilongwa kyandi kiyampe ukamulubwilanga monka.” (Nkindi 19:17) Bine, tukamona nsangaji shi twipāna mu kukwasha batutu ne bakaka. (Bilongwa 20:35) Ino nsangaji ya kupāna bukwashi nansha ya kutambula kukankamikwa keitambangapo ku boba betolwela kwa bunka ku kusaka kwabo. (Nkindi 18:1) Nanshi, tutanwei nyeke ne nyeke ku kupwila kwa bwine Kidishitu kotwikankamika batwe bene na bene.—Bahebelu 10:24, 25.

24. I kika kinenenwa amba nansha byoketumonepo bingelengele bikatampe byālongele Yehova pa kala inoko ketubudilwepo bukwashi?

²⁴ Mwene i kya nsangaji mpata kubandila miswelo itukwasha’mo Yehova? Nansha byotudi mu kitatyi kekilongapo Yehova bingelengele bityikukwa pa kufikidija mpango yandi, ino ketubudilwepo bukwashi. Kya mvubu kine kisakwa i kino: Yehova witupanga bukwashi bonso bwitusakilwa amba twikale nyeke ba kikōkeji. Kadi shi tūminine batwe bonso mu lwitabijo, tukemwena bilongwa bya nkuo ne bya ntumbo bya Yehova bitabukile byonso mu mānga yonso ya bantu! Shi ke pano, tusumininwei kwitabija ne kwingidija bukwashi bonso bwa buswe bwitupa Yehova amba netu tunene binenwa bya kisonekwa kyetu kya mwaka wa 2005 amba: “Bukwashi bwami bwiyanga kudi Yehova.”—Mitōto 121:2.

Ulanga’po Namani?

Yehova witupanga namani bukwashi botusakilwa dyalelo—

• kupityila ku bamwikeulu?

• kupityila ku mushipiditu sandu?

• kupityila ku Kinenwa kyandi?

• kupityila ku balunda netu mu lwitabijo?

[Bipangujo bya Kifundwa]

[Kifwatulo pa paje 15]

Kuyuka amba bamwikeulu betukwashanga mu mwingilo wa busapudi i kintu kitukankamika

[Kifwatulo pa paje 17]

Yehova ukokeja kwingidija mulunda netu mu lwitabijo mwanda wa kwitusenga